‘Ko e Kupu Moli ke Toka Noa Ai a Mutolu’
‘To iloa foki e mutolu e kupu moli, ko e kupu moli ke toka noa ai a mutolu.’ Ne talahau pihia e Iesu he mogo ne fakaako e ia e tau tagata tokologa he faituga i Ierusalema. (Ioane 8:32) Kua mautali ai e tau tutaki ha Iesu ke mailoga ko e kupu moli e tau fakaakoaga ha Iesu. Ne kitia e lautolu e tau fakamoliaga loga he tupumaiaga faka-Atua he faiaoga ha lautolu.
KA E, he vaha nei, kua uka lahi e falu ke mailoga e kupu moli ne tala ki ai a Iesu. Ke tuga ni he tau aho he perofeta ko Isaia, he vaha nei kua haia a “lautolu kua pehe mai, ko e mitaki e mena kelea, ka e kelea e mena mitaki; ko lautolu ne pehe ke he maama ko e pouli ia, ka e pehe ke he pouli ko e maama haia; ko lautolu ne pehe ko e mena humelie ko e mena kona haia, ka ko e mena kona ko e mena humelie haia.” (Isaia 5:20) Ha ko e tau manatu, tau pulotu, mo e tau puhala moui loga ne kua fakamalolo he mogo nei, kua tokologa e tau tagata ne talahau kua tatai e tau mena oti ti nakai fai kupu moli.
He magaaho ne tala age a Iesu ke he hana a tau tagata ne fanogonogo to toka noa he kupu moli a lautolu, ne tali age a lautolu: “Ko mautolu nai ko e fanau a Aperahamo, ti nakai fakatupa a mautolu kia taha tali he kamataaga, kua tala mai fefe a koe, To toka noa a mutolu?” (Ioane 8:33) Kua nakai fioia e lautolu e lata ma e taha tagata po ke ha mena ni ke fakatokanoa a lautolu. Ka e fakamaama age a Iesu: “Ko e moli, ko e moli, ke tala atu e au kia mutolu, ko e tagata kua hala ke he mena kua eke ko e tupa he hala a ia.” (Ioane 8:34) Ko e kupu moli ne tala ki ai a Iesu ka hafagi e puhala ke toka noa mai he hala. Ne talahau a Iesu: “Ka toka noa he Tama a mutolu, kua toka noa fakamoli a mutolu.” (Ioane 8:36) Ti ko e kupu moli ne fakatokanoa e tau tagata ko e kupu moli hagaao ki a Iesu Keriso, ko e Tama he Atua. Ko e tua ke he poa he moui mitaki katoatoa ni ha Iesu ka maeke ai ha tagata ke toka noa mai he hala mo e mate.
He taha magaaho ni ne talahau a Iesu: “Kia fakatapu e koe a lautolu ke he hau a kupu moli; ko e hau a kupu ko e kupu moli haia.” (Ioane 17:17) Ko e kupu he Atua ne fakakite i loto he Tohi Tapu ko e kupu moli ka tamai e tokanoaaga mai he matakutaku aitu mo e tapuakiaga fakavai. Kua tokai he Tohi Tapu e kupu moli hagaao ki a Iesu Keriso, ka takitaki atu e tau tagata ke tua ki a ia mo e hafagi e puhala ke he amaamanakiaga mitaki lahi he vaha anoiha. Ko e mena mua ue atu aia ke iloa e kupu moli he Kupu he Atua!
Lahi fefe e aoga ke iloa e kupu moli? Ko e tokologa he tau lotu he vaha nei, pete ni he talahau ke mumuitua ke he Tohi Tapu, kua fakaohooho ai he tau pulotu mo e tau aga tuai he tagata. Tuga ni, kua fa mahani e tau takitaki lotu ke nakai tupetupe ke he tonu he ha lautolu a fekau ke tuga ke he taliaaga he tau tagata. Tokologa ne manatu kua talia e Atua ke he ha puhala tapuaki ni, ka eke kua fakamoli ai. Ka e fakamaama e Iesu Keriso: “Ke hoko mai e vaha, kua hoko [m]ai foki ki ai, ko lautolu ne tapuaki fakamoli, to tapuaki a lautolu ke he Matua mo e agaga mo e fakamoli; ha ko e mena kumi e Matua kia pihia a lautolu ne tapuaki kia ia.”—Ioane 4:23.
Kaeke ke manako a tautolu ke tapuaki mo e talia he Atua, kua lata ia tautolu ke iloa e kupu moli. Ko e matakupu aoga lahi anei. He kua falanaki ki ai ha tautolu a fiafia tukumalagi. Ko e mena ia, kua lata ai he tau tagata oti ke huhu hifo ki a ia ni: ‘Talia nakai he Atua e puhala tapuaki haku? Fiafia moli kia au ke fakaako e kupu moli he Kupu he Atua? Po kua matakutaku au neke fai mena ka kitia ha ko e kumikumi fakamatafeiga?’