Ko Hai e Atua?

LIGA tali fēfē e koe e hūhū ia? Manatu e falu kua iloa mitaki e lautolu e Atua—ti ko ia ko e kapitiga tata. Ne kitia he falu e Atua ke tuga e magafaoa nakai tata. Talitonu a lautolu kua fai Atua ka e iloa tote hagaao ki a ia. Kaeke ke talitonu a koe ke he Atua, tali fēfē e koe e tau hūhū na i lalo?

1. Ko e peresona mooli kia e Atua?

2. Fai higoa kia e Atua?

3. Ko e Atua Malolō Ue Atu kia  a Iesu?

4. Leveki nakai he Atua au?

5. Talia oti nakai he Atua e tau puhala tapuaki?

Ka hūhū a koe ke he falu ke tali e tau hūhū nei, to liga moua e koe e tau tali kehekehe. Ko e mena haia ati tutupu e tau tala fakatai mo e tau fakakakanoaga hehē hagaao ke he Atua.

Kakano ne Aoga e Tau Tali

He tutala mo e fifine fano lotu ne feleveia mo ia he tapa vai, ne peehi e Iesu Keriso e lata ke iloa e kupu mooli hagaao ke he Atua. Ko e fifine nei, ko e Samaria, ne talia ko Iesu ko e perofeta. Ka e fai mena ne tupetupe ai a ia. Kua kehe e lotu ha Iesu mai he haana. He talahau e ia e tupetupe nei, ne tala age fakamahino e Iesu ki a ia: “Kua tapuaki fakahaupo na mutolu.” (Ioane 4:19-22) Maaliali ai, ne mailoga e Iesu kua nakai iloa mooli he tau tagata oti ne ō lotu e Atua.

Kakano kia e talahauaga ha Iesu kua nakai maeke ha tagata ke iloa mooli e Atua? Nakai. Ne matutaki a Iesu ke tala age ke he fifine nei: “Ko lautolu ne tapuaki fakamoli, to tapuaki a lautolu ke he Matua mo e agaga mo e fakamoli; ha ko e mena kumi e Matua kia pihia a lautolu ne tapuaki kia ia.” (Ioane 4:23) Ko koe nakai ia lautolu kua tapuaki ke he Atua “mo e agaga mo e fakamoli”?

Kua aoga lahi mahaki ma haau ke moua mooli e tali ke he hūhū ia. Ko e ha? Ne fakamalolō e Iesu e lata ke moua e iloa tonu he magaaho ne liogi a ia: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) E, ko e amaamanaki mooli haau ma e moui anoiha kua matutaki tata ke he iloaaga haau ke he kupu mooli hagaao ke he Atua!

Maeke mooli nakai ke iloa e kupu mooli hagaao ke he Atua? E, maeke! Maeke fēfē mogoia ke moua e koe? Ne talahau e Iesu e mena nei hagaao ki a ia ni: “Ko au nai ko e puhala, mo e kupu moli, mo e moui; nakai hau taha ke he Matua, ka noa mo au.” (Ioane 14:6) Ne pehē foki a ia: “Nakai iloa foki e taha e Matua, ko e Tama hokoia, mo e tagata kua loto e Tama ke fakakite atu ki ai.”—Luka 10:22.

Ti ko e kei ke iloa e Atua kua moua ke he tau fakaakoaga ha Iesu Keriso, ko e Tama he Atua. Ti mavehe mai a Iesu ki a tautolu: “Kaeke ke tumau fakaoti a mutolu ke he haku a kupu, ko e tau tutaki moli haku a mutolu. To iloa foki e mutolu e mena moli, ko e mena moli foki ke toka noa ai a mutolu.”—Ioane 8:31, 32.

Tali fēfē mogoia e Iesu e tau hūhū ne lima ne talahau fakamua?

[Fakatino he lau 4]

Tapuaki kia a koe ke he Atua ne nakai iloa mooli e koe?