Fifitaki e Fakaalofa Hofihofi a Iehova

“Hanai, kia hofihofi noa ha mutolu a fakaalofa, tuga ne hofihofi noa e fakaalofa he Matua ha mutolu.”—LUKA 6:36.

1. Fakakite fefe he tau Farasaio a lautolu kua nakai fai fakaalofa?

PETE ni kua tufuga ke he fakatai he Atua, fa mahani e tau tagata ke kaumahala ke fifitaki hana fakaalofa hofihofi. (Kenese 1:27) Ma e fakatai, manamanatu ke he tau Farasaio. He fakamatakau, kua nakai fiafia a lautolu ki a Iesu he fakamalolo fakaalofa hofihofi e tagata tane ne mate e lima ke he Sapati. Kehe ai, ne pulega a lautolu he totoko atu ki a Iesu ke “tamate e lautolu a ia.” (Mataio 12:9-14) He taha magaaho foki, ne fakamalolo e Iesu e tagata tane ne matapouli tali mai he fanau. Liu foki, ne nakai olioli “falu he tau farasaio” he fakaalofa a Iesu. Ka kua gugu a lautolu: “Nakai ko e tagata mai he Atua a ia, ha ko e mena nakai omaoma e ia ke he sapati.”​—Ioane 9:1-7, 16.

2, 3. Ko e heigoa e kakano he talahauaga a Iesu, “Kia kalo kehe a mo e mena fakaea he tau farasaio”?

² Ko e aga nakai fakaalofa he tau Farasaio ne taute e holifono ke he tau tagata mo e agahala ke he Atua. (Ioane 9:39-41) Mo e kakano mitaki, ne hataki e Iesu hana tau tutaki, “Kia kalo kehe a mo e mena fakaea” he matakau malolo nei mo e falu tagata lotu, tuga e tau Satukaio. (Mataio 16:6) Ko e fakaea ne fakaaoga he Tohi Tapu ke fakakite aki e agahala po ke holifono. Ti kua talahau ai a Iesu ko e fakaakoaga he “tau tohikupu mo e tau farasaio” kua maeke ke moumou e tapuakiaga mea. Fefe? Ne fakaako ai e tau tagata ke onoono ke he Fakatufono he Atua ke he tau puhala malolo he ha lautolu a tau fakaveaga mo e tau aga fakamotu, ka kua tiaki e “tau mena he fakatufono ne mua,” putoia e fakaalofa hofihofi. (Mataio 23:23) Ko e aga nei he lotu ne taute e tapuakiaga he Atua ke kavega tokaimaka.

³ He vala ke ua he fakatai ku hana ke he tama moumou koloa, ne fakatapakupaku e Iesu e manamanatuaga holifono he tau takitaki lotu Iutaia. He fakatai ku ko e matua tane, kua hukui a Iehova, ne makai ke fakamagalo hana tama tane tokihala. Ka ko e tama uluaki, ne fakatai ke he “tau farasaio, mo e tau tohikupu,” ne kehe katoa e logonaaga ke he manatu.​—Luka 15:2.

Ko e Ita he Matakainaga

4, 5. Kua “galo” fefe matakainaga he tama moumou koloa?

⁴ “Ha he kaina hana tama uluaki, ha ne hau a ia, kua tata mai ke he fale, ti logona ai e ia e leo mitaki, mo e koli. Ti ui atu ai a ia ke he taha fekafekau, kua hūhu atu, po ke heigoa e kakano he tau mena ia? Kua pehe mai a ia kia ia; Kua hau tuai hau a matakainaga; kua tamate foki he hau a matua tane e tama povi gako, ha kua moua a ia kua malolo. Ti ita ai a ia, nakai maeke he hu ki ai.”​—Luka 15:25-28.

⁵ Maali ai, nakai ni ko e tama moumou koloa ne fai mena vihi he fakatai ku a Iesu. “Ko e tau tama tane tokoua nei ne fakatino mai kua galo,” he talahau he taha tohi, “kua galo e tehina mai he nakai tututonu ne fakatokolalo aki a ia, ka e galo e uluaki mai he fia tututonu ne kua manamanatu ku a ia.” Mailoga ne nakai ni fakaheu he matakainaga e tama moumou koloa ke fiafia ka kua “ita” foki. Ko e kupu faka-Heleni “ita” kua fakakite, nakai lahi ke he pa he ita, ka ko e tuaga mao he loto manamanatu. Ne tokaloto he matakainaga he tama moumou koloa e ita kononu, ti logona e ia kua nakai tonu ke fakafeleveia e liu mai he taha ne kua nakai lata ke toka e kaina.

6. Ko hai ne fakakite he matakainaga he tama moumou koloa, mo e ko e ha?

⁶ Ko e matakainaga he tama moumou koloa ne fakakite fakamitaki a lautolu ne fakaheu e fakaalofa mo e levekiaga ne taute e Iesu ke he tau tagata agahala. Ko lautolu nei ne fia tututonu ne nakai lauia he fakaalofa hofihofi a Iesu; ti nakai ata foki e lautolu e olioli he lagi kua kitia ai ka fakamagalo e tagata hala. Ka e fakaohooho he fakaalofa hofihofi a Iesu e ita ha lautolu, ti kamata a lautolu ke “manamanatu kelea” he tau loto ha lautolu. (Mataio 9:2-4) He taha magaaho ne ita lahi mahaki e tau Farasaio kua ta mai e lautolu e tagata tane ne fakamalolo e Iesu ti ‘vega a ia ki tua’ he sunako​—ke fakahala a ia! (Ioane 9:22, 34) Tuga e matakainaga he tama moumou koloa, ne “nakai maeke he hu ki ai,” ne kaupa ni e magaaho he tau takitaki lotu ka “fiafia . . . fakalataha mo lautolu kua fiafia.” (Roma 12:15) Ne fakatapakupaku foki e Iesu e kakano kelea ha lautolu he matutaki e ia hana fakatai ku.

Kakano Fakahehe

7, 8. (a) Ko e heigoa e puhala ne kaumahala e matakainaga he tama moumou koloa ke he fehagai he matua mo e tama? (e) Nakai tatai fefe e tama tane uluaki ke he matua tane hana?

⁷ “Ti fano ai hana matua tane ki fafo, kua ole kia ia. Ati tala mai ai a ia, kua pehe mai ke he hana matua tane, Kitiala, kua loga e tau ne fekafekau ai au kia koe, kua nakai fakai taha poaki hau kua holi ai e au; ka e nakai ni ta mai e koe ha tama koti māku, ke fiafia ai a mautolu mo e tau kapitiga haku. Ka koe tama hau a ena, ne fakaoti e ia hau a tau mena fakalataha mo e tau fifine fakataka, kua hau a ia, ati tamate ai e koe e tama povi gako māna.”​—Luka 15:28-30.

⁸ Mo e tau kupu nei, ko e matakainaga he tama moumou koloa kua maaliali e kaumahala hana ke iloa e kakano moli he fehagai he matua mo e tama. Ne fekafekau a ia ke he matua tane hana tuga ni kua fekafekau e tagata gahua ke he hana takitaki gahua. He talahau e ia ke he hana matua tane: “Ne fekafekau ai au kia koe.” Moli, ne nakai toka he tama uluaki nei e kaina po ke moumou e poakiaga he matua tane hana. Ka kua omoi kia he fakaalofa hana a omaoma? Moua kia e ia e olioli moli he fekafekau ke he hana matua tane, po ke kua tafea fakahaga hana fiafia fakatagata, talitonu ai a ia ko e tama tane mitaki ha kua taute e ia hana tau matagahua “he kaina”? Ane mai ko e tama tane fakamoli lahi a ia, ko e ha ne kaumahala a ia ke fakaata e manatu he matua tane hana? He foaki e magaaho ke fakakite e fakaalofa hofihofi ke he hana tehina, ko e ha ne nakai fakaalofa a ia ke he hana loto?​—Fakatatai Salamo 50:20-22.

9. Fakamaama ko e fakakite fefe he tau takitaki lotu Iutaia e tama tane uluaki.

⁹ Ne fakakite he tau takitaki lotu Iutaia e tama tane uluaki. Ne talitonu a lautolu kua fakamoli a lautolu ke he Atua ha kua tapiki mau a lautolu ke he tau matafakatufono. Moli, kua lata e omaoma. (1 Samuela 15:22) Ka ko e peehi malolo he tau gahua ha lautolu ne liliu e tapuakiaga he Atua ke he puhala tohia, ko e gati he tapuaki moli mo e nakai fakaagaga moli. Kua puke e tau loto manamanatu ha lautolu he tau mahani toka tuai. Kua nakai fai fakaalofa e tau loto ha lautolu. Kua onoono hifo a lautolu ke he tau tagata noa, ti onoono foki a lautolu ki a lautolu “kua ulaafia ni a lautolu.” (Ioane 7:49) To nava moli fefe he Atua e tau gahua he tau takitaki pihia ka uta kehe e tau loto ha lautolu mai ia ia?​—Mataio 15:7, 8.

10. (a) Ko e ha ko e fakatonuaga kua latatonu e tau kupu, “Mena loto au ke he fakaalofa, ka e nakai ko e poa”? (e) Kelea lahi he ha e nakai fakaalofa hofihofi?

¹⁰ Ne tala age a Iesu ke he tau Farasaio ke “o a, ke ako po ke heigoa e kakano he kupu ē, Mena loto au ke he fakaalofa, ka e nakai ko e poa.” (Mataio 9:13; Hosea 6:6) Kua pulefu e tau mena kua mua ha lautolu, ha ko e tau poa oti ha lautolu kua nakai aoga ha kua nakai fai fakaalofa hofihofi. Kua hokulo moli e mena nei, ha kua talahau mai he Tohi Tapu ko lautolu ne “nakai fai fakaalofa atu” kua putoia ai ia lautolu ne ui he Atua kua “lata he mamate.” (Roma 1:31, 32) Nakai ofo ai, ne pehe a Iesu ko e vahega he tau takitaki lotu ne nonofo ke he moumouaga tukulagi. Moli ai, kua lafi lahi e nakai fakaalofa hofihofi ha lautolu ke he moua e lautolu e fakafiliaga nei. (Mataio 23:33) Ka e liga ko lautolu he vahega nei kua lata lagomatai. He fakaotiaga he fakatai ku a Iesu, ne lali a ia ke hiki e manamanatuaga he tau Iutaia pihia ke he puhala he tau kupu he matua tane ke he tama tane uluaki hana. O mai la tautolu ke kitia e puhala.

Ko e Fakaalofa Hofihofi he Matua Tane

11, 12. Maeke fefe e matua tane he fakatai ku a Iesu ke lali ke fakakakano ke he tama tane uluaki hana, mo e ko e heigoa e aoga lahi he fakaaoga he matua tane e talahauaga “hau a matakainaga”?

¹¹ “Ka e pehe age a ia kia ia, Ma mea, ko e mena nonofo mau a taua mo koe, ko e haku a tau mena oti foki, ko e hāu a ia. Kua lata foki he fiafia mo e kolikoli a tautolu, ha ko e hau a matakainaga a ena ne mate, ka kua moui mai tuai; ne galo foki a ia, ka kua moua.”​—Luka 15:31, 32.

¹² Mailoga na fakaaoga he matua tane e talahauaga “hau a matakainaga.” Ko e ha? Manatu kua talahau tuai ke he matua tane hana, ko e tama tane fakamua ne fakahigoa e tama moumou koloa ko e “tama hau”​—nakai ko e “haku a matakainaga.” Ne nakai hagahaga a ia ke fakakite e pipiaga tatai he vahaloto hana mo e tehina hana. Ti kua talahau mogonei he matua tane ke he hana tama uluaki: ‘Nakai ni ko e tama tane haku. Ko e hau a matakainaga, ko e hau ni a tino mo e toto. Kua lata ia koe ke fiafia ha ko e hana a liu mai!’ Kua lata e fekau a Iesu ke maaliali ke he tau takitaki Iutaia. Ko e tau tagata agahala ne ­vihia e lautolu kua moli ai ko e “tau matakainaga” ha lautolu. Moli, “nakai ni ha ha i ai ha tagata tututonu ke he lalolagi, kua eke e mahani mitaki, mo e nakai hala a ia.” (Fakamatalaaga 7:20) Ko e tau Iutaia talahaua kua lata lahi ke fiafia he fakatokihala e tau tagata agahala.

13. Ko e mamutufua he fakatai ku a Iesu kua toka a tautolu aki e huhu fakamafanatia fe?

¹³ He mole e ole he matua tane, ne ma­mutufua ai e fakatai ku. Ne tuga kua uiina e Iesu hana tau tagata fanogonogo ke tohi ha lautolu a fakaotiaga he tala. Ko e heigoa ni e tali atu he tama tane uluaki, igatia e tagata fanogonogo ne fehagai mo e huhu, ‘To fakalataha nakai a koe he olioli kua moua he lagi ka tokihala e tagata agahala?’ Kua fai magaaho foki e tau Kerisiano he vaha nei ke fakatata ha lautolu a tali ke he huhu ia. Fefe?

Fifitaki e Fakaalofa Hofihofi he Atua he Vaha Nei

14. (a) Fakaaoga fefe e tautolu e fakatonuaga a Paulo ne moua ia Efeso 5:1 he magaaho ka hoko ke he fakaalofa hofihofi? (e) Ko e heigoa e nakai maama hagaao ke he fakaalofa hofihofi he Atua kua lata ia tautolu ke puipui mai?

¹⁴ Kua fakamafana e Paulo e tau Efeso: “Kia fifitaki a mutolu ke he Atua tuga e tau fanau fakahelehele.” (Efeso 5:1) Ti, ko e tau Kerisiano kua lata ia tautolu ke loto fiafia ke he fakaalofa hofihofi he Atua, he to hifo fakahokulo ke he tau loto ha tautolu, ti fakatata e fua nei he tau fehagaiaga ha tautolu mo e falu. Pete ia, ko e puipuiaga kua lata. Ko e fakaalofa hofihofi he Atua kua nakai lata ke iloa hehe tuga ko e fefeua he agahala. Ma e fakatai, ko e falu ne liga talahau fakateaga, ‘Ka taute e au e agahala, maeke ia au ke liogi tumau ke he Atua ma e fakamagaloaga, ti fakaalofa hofihofi a ia.’ Ko e aga pihia kua lautonu ke he mena he tagata tohia Tohi Tapu ko Iuta he ui “kua liu e lautolu e fakaalofa noa he Atua ha tautolu ke he mata kakana.” (Iuta 4) Pete ni e fakaalofa hofihofi a Iehova, to “nakai toka noa e ia a lautolu kua hala” ka fehagai mo e tau tagata mahani kelea ne nakai tokihala.​—Esoto 34:7; fakatatai Iosua 24:19; 1 Ioane 5:16.

15. (a) Ko e ha e tau motua kua lata pauaki ke tumau e onoonoaga lagotatai he fakaalofa hofihofi? (e) He nakai tiaki e tagata mahani kelea pauaki, ko e heigoa he tau motua kua lata ke taute, mo e ko e ha?

¹⁵ He taha fahi, kua lata ia tautolu ke fakaeneene foki he puipui mai he falu fakatutuaga​—ko e hagahaga he papa mao mo e fakafili a lautolu kua fakakite e fakatokihala moli mo e momoko mahani Atua ke he tau hala ha lautolu. (2 Korinito 7:11) Ha kua foaki ke he tau motua e levekiaga he tau mamoe ha Iehova, kua lata ke tumau e onoonoaga lagotatai ha lautolu ke he mena nei, mua atu ka hokotia ke he tau mena fakafili. Kua lata e fakapotopotoaga Kerisiano ke leveki tumau ke mea, ti kua tonu faka-Tohiaga Tapu ke ‘tuku kehe e tagata mahani kelea’ he tuku ki tua. (1 Korinito 5:11-13) He magaaho taha, kua mitaki ke fakakite e fakaalofa hofihofi ka fai fakaveaga maama ki ai. Ti kua nakai toka noa he tau motua e mahani kelea pauaki, ka kua lali a lautolu ke kumi e puhala fakaalofa mo e fakaalofa hofihofi, ki loto he fakafiliaga tonu. Kua mataala lahi a lautolu he matapatu fakaakoaga Tohi Tapu: “Ha ko ia nakai fakaalofa atu, nakai ofania a ia ke he fakafiliaga; ka ko e fakaalofa, kua olioli a ia ke he fakafiliaga.”​—Iakopo 2:13; Tau Fakatai 19:17; Mataio 5:7.

16. (a) He fakaaoga e Tohi Tapu, fakakite e manako moli a Iehova ki a lautolu kua hehe ke liliu mai ki a ia. (e) Fakatata fefe e tautolu kua fakafeleveia foki e tautolu a lautolu ko e tau tagata agahala kua fakatokihala?

¹⁶ Ko e fakatai ku he tama moumou koloa kua maaliali ai kua manako a Iehova ki a lautolu kua hehe ke liliu ki a ia. Moli, kua fakatoka e ia e uiina ki a lautolu ato fakamoli e lautolu a lautolu kua nakai fakatokihala katoatoa. (Esekielu 33:11; Malaki 3:7; Roma 2:4, 5; 2 Peteru 3:9) Tuga e matua tane he tama moumou koloa, kua fakalilifu e Iehova a lautolu kua liliu ki a ia, he talia a lautolu ko e tau tagata agaia he magafaoa. Kua fifitaki nakai a koe ki a Iehova he mena nei? Ka liu talia e matakainaga talitonu na kua fai magaaho kua tuku ki tua, fefe hau a tali atu? Kua fita he iloa e tautolu kua ha ha ai he “lagi e fiafia.” (Luka 15:7) Ka kua fai olioli kia he lalolagi, he fakapotopotoaga hau, pihia foki he loto hau? Po ke, tuga e tama tane uluaki he fakatai ku, kua fai vahaloto kia, he nakai lata ke moua e ia e fakafeleveiaga ne toka e fuifui he Atua?

17. (a) Ko e heigoa e tuaga ne tupu he senetenari fakamua i Korinito, ti hataki fefe e Paulo a lautolu he fakapotopotoaga ke taute e mena ia? (e) Kua aoga he ha e fakamafanaaga a Paulo, ti fakagahua fefe e tautolu he vaha nei? (Kikite foki e puha he fahi matau.)

¹⁷ Ke lagomatai a tautolu ke kumikumi e tautolu a tautolu ke he mena nei, manamanatu la ke he mena ne tupu kavi ke he tau 55 V.N. i Korinito. Ne ha ha i ai e tagata ne uta kehe he fakapotopotoaga ne liu fakamea e ia hana moui. Ko e heigoa ne lata ke taute he tau matakainaga? Kua lata kia ia lautolu ke onoono ke he tokihalaaga hana mo e fakauaua mo e matutaki ke kalo kehe ia ia? Nakai pihia, ne fakamafana e Paulo e tau Korinito: “Kia fakamagalo atu a mutolu mo e fakamafana atu ke he tagata na, neke mahala a ia ke he momoko kua lahi ue atu. Ko e mena ia kua ole atu au kia mutolu ke fakamau ha mutolu a fakaalofa kia ia.” (2 Korinito 2:7, 8) Fa mahani ko e tau tagata mahani kelea ne tokihala kua pauaki ke tuaha ke he tau logonaaga he fakama mo e fakaatukehe. Ka kua lata a lautolu nei ke fakamafana kua ofania a lautolu he tau matakainaga talitonu mo Iehova foki. (Ieremia 31:3; Roma 1:12) Kua lata lahi e mena nei. Ko e ha?

18, 19. (a) Fakakite fefe he tau Korinito he kamataaga a lautolu kua fakateaga lahi? (e) Maeke fefe he aga nakai fakaalofa ke fua mai he tau Korinito ha kua ‘fakavai e Satani’?

¹⁸ He fakamafana e tau Korinito ke taute e fakamagaloaga, ne age e Paulo e taha he tau kakano “neke fakavai a tautolu e Satani; nukua nakai pouli a tautolu ke he hana tau lagatau.” (2 Korinito 2:11) Ko e heigoa e kakano hana? Ne fakahala fakamua e Paulo e fakapotopotoaga Korinito he fakateaga lahi. Ne fakaata e lautolu e tagata tane nei ke holopi tumau ke he hala hana. He taute pihia ko e fakapotopotoaga​—mua atu ke he tau motua​—ne taute lagatau ki a Satani, ha ko e mena fiafia a ia ke ta mai e fakapotopotoaga ke he tuaga feveheveheaki.​—1 Korinito 5:1-5.

¹⁹ Ka hiki atu a lautolu ke he taha fahi mo e fakaheu ke fakamagalo e tagata tokihala, to hopoloa atu a Satani ia lautolu ke he taha fahi. Fefe? Ne fakaaoga katoa e ia e favale mo e nakai fakaalofa hofihofi ha lautolu. Kaeke e tagata agahala ne fakatokihala ke “mahala a ia ke he momoko kua lahi ue atu”​—po ke tuga he talahau he Today’s English Version, “kua momoko lahi ti tiaki katoatoa ai”​—ko e matagahua mamafa ha ia ka fua he tau motua ki mua ha Iehova! (Fakatatai Esekielu 34:6; Iakopo 3:1) Mo e kakano mitaki, he mole e hataki hana tau tutaki neke fakatupetupe e “taha ia lautolu nai kua fakateaga,” ne pehe a Iesu: “A mutolu kia mutolu. Kaeke kua mahani kelea mai kia koe hau a matakainaga, kia akonaki atu e koe a ia; kaeke foki kua tokihala a ia, kia fakamagalo atu a koe ki ai.”a​—Luka 17:1-4.

20. Ko e heigoa e olioli he lagi mo e lalolagi ka tokihala e tagata agahala?

²⁰ Totou afe ne liliu mai ke he tapuakiaga mea he tau tau takitaha ne kua fakaaue ma e fakaalofa hofihofi a Iehova ne foaki age ki a lautolu. “Nakai la iloa e au e magaaho he moui haku ne fiafia tuga anei hagaao ke he ha mena,” he talahau he taha matakainaga fifine Kerisiano ha ko e hana a liu talia. Moli, ko e olioli hana ne taogo ke he tau agelu. Kia auloa foki a tautolu ke he ‘fiafia he lagi’ ka tokihala e tagata agahala. (Luka 15:7) He taute pihia, to fifitaki e tautolu e fakaalofa hofihofi a Iehova.

[Tau Matahui Tala]

Ke Fakamanatu

◻ Ke he puhala fe ne fakakite he matakainaga he tama moumou koloa e tau takitaki lotu Iutaia?

◻ Ko e heigoa e puhala ne kaumahala e matakainaga he tama moumou koloa ke he kakano moli he fehagai he matua mo e tama?

◻ He fakaata e fakaalofa hofihofi he Atua, ko e heigoa e tau fakatutuaga kua lata ia tautolu ke kalo kehe mai ai?

◻ Fifitaki fefe e tautolu e fakaalofa hofihofi he Atua he vaha nei?

[Puha he lau 27]

“FAKAMAU HA MUTOLU A FAKAALOFA KIA IA”

Hagaao ke he tagata mahani kelea ne fakahala na kua fakatokihala, ne tala age a Paulo ke he fakapotopotoaga Korinito: “Kua ole atu ai au kia mutolu ke fakamau ha mutolu a fakaalofa kia ia.” (2 Korinito 2:8) Kua fakaliliu e kupu Heleni “fakamau” ko e kupu matafakatufono kua kakano ke “fakamoli.” E, ko lautolu kua tokihala ne liu talia mai kua lata ke matala kua ofania a lautolu he liu fakafeleveia ki a lautolu ko e tau tagata he fakapotopotoaga.

Kia manatu e tautolu, tokologa he fakapotopotoaga kua nakai iloa e tau tutuaga pauaki ne takitaki ke he tuku ki tua he tagata po ke liu talia mai hana. Lafi ki ai, liga fai ne kua lauia po ke mamahi fakatagata​—kau ko e matafatia kua leva​—ha ko e mahani kelea he tagata fakatokihala. Ha kua tutotonu ke he tau mena pihia, ka taute e fakailoaaga he liu talia, to maama ai ia tautolu ke tautaofi e tau talahauaga he fakafeleveiaaga ato femataaki fakatagata.

Ko e ati hake ha ia ma lautolu kua liu talia ke iloa kua fakafeleveia fakamitaki a lautolu ko e tau tagata he fakapotopotoaga Kerisiano! Maeke ia tautolu ke fakamalolo a lautolu ia kua tokihala he tutala mo lautolu mo e fiafia auloa e feoakiaga ke he Fale he Kautu, ke he fekafekauaga, mo e ke he ha magaaho kua lata. He fakamau, po ke fakamoli ai e fakaalofa ha tautolu ki a lautolu e tau fakahelehele nei, kia nakai fakatote e tautolu e hokulo he tau agahala ne taute e lautolu. Ka e, fakalataha mo lautolu e tau tagata gahua he lagi, kua olioli a tautolu ha ko e moli kua tiaki e lautolu e puhala agahala mo e liliu mai ki a Iehova.​—Luka 15:7.

[Fakatino he lau 25]

Kua nakai manako e tama uluaki ke fiafia fakalataha ke he liu mai he tehina hana