Ko e Aho Nai ke Fakamomoui Ai!

“Kitiala, ko e ainei e vaha ke talia mitaki mai ai; kitiala, ko e aho nai ke fakamomoui ai.”​—2 KORINITO 6:2.

1. Ko e heigoa kua lata ma e tuaga fiafia mo e Atua mo Keriso?

KUA fafati e Iehova e aho ke fakafili ai e tau tagata. (Gahua 17:31) Kaeke ko e aho ke fakamomoui ai a tautolu, kua lata ia tautolu ke fai taliaaga mo ia mo e hana Ikifakafili ne kotofa, ko Iesu Keriso. (Ioane 5:22) Ko e tuaga pihia kua lata ke lauia mitaki mo e Kupu he Atua mo e tua ka omoi a tautolu ke lagomatai e falu ke eke mo tau tutaki moli a Iesu.

2. Ko e ha ne mafoki kehe e lalolagi he tau tagata mai he Atua?

² Ha ko e agahala, ati mafoki kehe e lalolagi mai he Atua. (Roma 5:12; Efeso 4:17, 18) Ti, ko lautolu ne fakamatala a tautolu ki ai to moua ni e fakamouiaga ka fakafeilo a lautolu ki a ia. Ne fakamaama he aposetolo ko Paulo e mena nei he magaaho ne tohi ke he tau Kerisiano i Korinito. Kia kumikumi a a tautolu ke he 2 Korinito 5:10–6:10 ke kitia e mena ne talahau e Paulo hagaao ke he fakafiliaga, fakafeiloaga mo e Atua, mo e fakamouiaga.

“Kua Ole a Mautolu ke he Tau Tagata”

3. Fakatumau fefe a Paulo ke ‘ole ke he tau tagata,’ mo e ko e ha e mena nei kua lata ke taute e tautolu he vaha nei?

³ Ne matutaki e Paulo e fakafiliaga mo e fakamatalaaga he magaaho ne tohia e ia: “Ko e mena ke tutu a tautolu oti kana ki mua he nofoa fakafili a Keriso ke lata ai; kia takitokotaha mo e moua e tau mena ne eke ke he tino, ke fakalata ke he tau mena ne eke, po ke mitaki, po ke kelea. Hanai, ha kua iloa e mautolu e matakutaku ke he Iki, kua ole a mautolu ke he tau tagata.” (2 Korinito 5:10, 11) Ne ‘ole e aposetolo ke he tau tagata’ he fakamatala e tala mitaki. Ka e kua a tautolu? Ha kua fehagai a tautolu ke he fakahikuaga he fakatokaaga kelea he tau mena nei, kua lata ia tautolu ke fakamakamaka ke ole ke he falu ke taute e tau lakaaga kua lata ke moua e fakafiliaga fiafia a Iesu mo e taliaaga he Punaaga he fakamouiaga, ko Iehova ko e Atua.

4, 5. (a) Ko e ha kua nakai lata ia tautolu ke hula hagaao ke he tau monuina ne moua e tautolu he fekafekau ha Iehova? (e) Kua hula fefe a Paulo ‘ma e Atua’?

⁴ Kaeke kua fakamonuina he Atua e fekafekauaga ha tautolu, ti kua nakai lata ia tautolu ke hula. Kua fakatokoluga falu i Korinito ki a lautolu ni po ke he falu tagata, ti tutupu ai e tau feveveheaki he fakapotopotoaga. (1 Korinito 1:10-13; 3:3, 4) Ne tohia ai a Paulo hagaao ke he tuaga nei: “Ha kua nakai liu foki talahau mitaki e mautolu a mautolu kia mutolu, ka kua ta atu e mautolu kia mutolu e mena ke fiafia ai a mutolu ha ko mautolu, kia fai mena a mutolu ke tala age kia lautolu kua hula ke he tau mena he tino, ka e nakai ko e loto. Ha ko e mena kaeke ke heketia a mautolu ha ko e Atua haia, kaeke ke loto matala a mautolu, ha ko mutolu haia.” (2 Korinito 5:12, 13) Kua nakai mahalo a lautolu ne fakatokoluga ke he fakalatahaaga mo e tuaga fakaagaga he fakapotopotoaga. Manako ni a lautolu ke hula ke he tau mena he tino nakai ke lagomatai e tau matakainaga talitonu auloa ke feaki e tau loto mitaki ki mua he Atua. Ko e mena ia, ne akonaki e Paulo e fakapotopotoaga mo e talahau he mogo fakamui: “Ko ia kua hula kia hula a ia ke he Iki.”​—2 Korinito 10:17.

⁵ Nakai kia hula foki a Paulo? Liga manatu pihia falu ha ko e mena ne talahau e ia hagaao ke he tuaga aposetolo hana. Ka kua lata ia ia ke hula ‘ma e Atua.’ Ne hula a ia hagaao ke he hana latatonu mo aposetolo, ke nakai tiaki he tau Korinito a Iehova. Ne taute e Paulo e mena nei ke liuaki a lautolu ke he Atua kakano kua takitaki he tau aposetolo fakavai a lautolu ke he puhala hepe. (2 Korinito 11:16-21; 12:11, 12, 19-21; 13:10) Ka kua nakai lali a Paulo ke nava mai e tau tagata oti ke he tau monuina ne moua e ia.​—Tau Fakatai 21:4.

Omoi Kia he Fakaalofa a Keriso a Koe?

6. Lauia fefe e fakaalofa he Keriso ia tautolu?

⁶ Ko e aposetolo moli, ne fakaako e Paulo e falu hagaao ke he poa lukutoto a Iesu. Kua lauia lahi ai e moui ha Paulo, ti tohia ai e ia: “Kua omoomoi a mautolu he fakaalofa a Keriso, kua manatu pehe a mautolu, kaeke kua mate tokotaha ke hukui aki e tau tagata oti kana, ti kua mamate tuai e tau tagata oti kana. Ne matulei foki a ia ke hukui aki e tau tagata oti, kia nakai omaoma a lautolu kua momoui kia lautolu ni, ka ko ia ne matulei, mo e liu tu mai foki ke hukui aki a lautolu.” (2 Korinito 5:14, 15) Ko e fakaalofa ha ia ne fakakite e Iesu he matulei hana moui ma tautolu! Ti kua lata ni he mena ia ke omoomoi e tau momoui ha tautolu. Ko e fakaaue mahaki ki a Iesu he foaki hana moui ma tautolu ka omoi a tautolu ke gahua fakamakutu he fakapuloa e tala mitaki he fakamouiaga ne foaki mai e Iehova he puhala he Tama fakahele hana. (Ioane 3:16; fakatatai Salamo 96:2.) Kua omoomoi kia he “fakaalofa a Keriso” a koe ke fakamakutu atu ke he gahua fakamatala he Kautu mo e taute tutaki?​—Mataio 28:19, 20.

7. Ko e heigoa e kakano ke ‘nakai tuai iloa e taha ke he tino’?

⁷ He fakaaoga e tau momoui ha lautolu ke he puhala ne fakakite e fakaaue lahi ke he mena ne taute he Keriso ma lautolu, ‘kua nakai omaoma a lautolu kua momoui [lautolu ne fakauku] kia lautolu ni, ka kia ia.’ “Hanai,” he talahau e Paulo, “kua kamata ke he vaha nai he nakai tuai iloa e mautolu taha ke he tino; pete ni he iloa tuai e mautolu a Keriso ke he tino, ka ko e vaha nai nakai tuai iloa pihia e mautolu a ia.” (2 Korinito 5:16) Ti nakai lata he tau Kerisiano ke mailoga e tau tagata ke he puhala tino, tuga e fiafia ni ke he tau Iutaia nakai ke he tau Tagata Motu Kehe po ke, ke he tau tagata mautu nakai ke he tau nonofogati. Kua ‘nakai tuai iloa e lautolu ne fakauku taha ke he tino,’ ha kua mua e aoga he fakafetuiaga fakaagaga ha lautolu mo e tau matakainaga talitonu auloa. Kua nakai ni ko lautolu ne kitia mata a Iesu he nofo agaia he lalolagi ne ‘iloa tuai a Keriso ke he tino.’ Ti pete ni he onoono fakamua a lautolu, ne amaamanaki ke he Mesia, ki a Keriso ke he puhala tino, kua nakai liu taute pihia foki. Ne foaki e ia e tino hana mo lukutoto mo e kua fakaliu tu mai ko e agaga haia ke fakamoui ai. Ko e falu ne fakatutu hake ke he moui he lagi kua foaki e tau tino ha lautolu ka e nakai kitia mata a Iesu Keriso he tino.​—1 Korinito 15:45, 50; 2 Korinito 5:1-5.

8. O mai fefe e tau tagata ke “ha ia Keriso”?

⁸ Fakatonutonu atu agaia ki a lautolu ne fakauku, ne talahau a Paulo: “Kaeke ke ha ia Keriso taha, ko e tagata fou a ia, kua mole atu e tau mena tuai; kitiala, kua fakafou e tau mena oti.” (2 Korinito 5:17) Ke “ha ia Keriso taha,” ko e olioli a ia he fakalataha mo ia. (Ioane 17:21) Kua fakamoli e fakafetuiaga nei ma e tagata he magaaho ne futia e Iehova a ia ke he hana Tama mo e fakauku e tagata ia aki e agaga tapu. Ko e tama he Atua ne fakauku he agaga, ko e “tagata fou a ia” mo e amaamanakiaga ke fakalataha mo Keriso i luga he Kautu he lagi. (Ioane 3:3-8; 6:44; Kalatia 4:6, 7) Kua foaki age ke he tau Kerisiano fakauku pihia e kotofaaga ne mua he fekafekauaga.

“Kia Fakafeilo a Mutolu mo e Atua”

9. Ko e heigoa ne taute he Atua ke maeke e fakafeiloaga mo ia?

⁹ Kua fiafia lahi ha a Iehova ke he “tagata fou”! Ne pehe a Paulo: “Ko e tau mena oti kana, mai he Atua ia, ko ia kua fakafeilo tuai a tautolu kia ia ia Iesu Keriso, kua tuku mai foki kia mautolu e gahua he fakafeilo. Hanai, ne ha ia Keriso e Atua, kua fakafeilo e ia e lalolagi kia ia, nakai talahau ha lautolu a tau hala kia lautolu; kua tuku mai foki kia mautolu e fekafekauaga he fakafeilo.” (2 Korinito 5:18, 19) Kua mafoki kehe mai e tagata he Atua tali mai he hala a Atamu. Ka kua fakaalofa mai a Iehova he hafagi e puhala he fakafeiloaga ha ko e poa a Iesu.​—Roma 5:6-12.

10. Ne tuku e Iehova ki a hai e fekau he fakafeiloaga, ti ko e heigoa ne fa e taute e lautolu?

¹⁰ Kua poaki e Iehova e fekau he fakafeiloaga ki a lautolu ne fakauku, ti maeke ai ia Paulo ke talahau: “Hanai, ko e tau fekau a Keriso a mautolu nai, tuga he ole he Atua kia mutolu ia mautolu; kua hukui aki e mautolu a Keriso mo e ole atu kia mutolu kia fakafeilo a mutolu mo e Atua.” (2 Korinito 5:20) He tau vaha mai i tuai, kua fekafekau ni e tau hukui he tau magahala faitaua ke kitia ko e maeke nakai ke kalo kehe he tau. (Luka 14:31, 32) Ha kua mafoki kehe e tau tagata he lalolagi agahala mai he Atua, ne fakafano mai e ia e tau hukui fakauku hana ke hataki e tau tagata hagaao ke he tau poakiaga hana ma e fakafeiloaga. Ko e tau hukui a Keriso, ne ole mai a lautolu ne fakauku: “Kia fakafeilo a mutolu mo e Atua.” Ko e ole he fakaalofa hofihofi anei ke kumi mafola mo e Atua ti talia e fakamouiaga ne maeke e ia he puhala he Keriso.

11. He tua ke he lukutoto, ko hai ne fakahiku ke moua e tuaga tututonu ki mua he Atua?

¹¹ Kua maeke he tau tagata oti ne fakagahuahua e tua ke he lukutoto ke fakafeilo mo e Atua. (Ioane 3:36) Ne pehe a Paulo: “Ha ko ia [Iesu] kua nakai iloa e hala, kua eke [e Iehova] a ia mo hala ke hukui aki a tautolu; kia eke ai a tautolu mo tututonu he Atua kia ia.” (2 Korinito 5:21) Ko e tagata mitaki katoatoa ko Iesu ko e poa he tau hala ma e tau fanau oti kana ha Atamu ne kua laveaki mai he agahala hana. Ne eke a lautolu “mo tututonu he Atua” he kakano mai ia Iesu. Ko e tututonu nei, po ke tuaga tututonu ki mua he Atua, kua moua mua he tau hakeaga fakalataha mo Keriso ne 144,000. He magahala he Pule Afe Tau hana, to hoko ke he fanau he lalolagi e tuaga tututonu ha ko e tau tagata mitaki katoatoa he Matua Tukulagi, ko Iesu Keriso. To ta hake e ia a lautolu ke he tuaga tututonu ne mitaki katoatoa ti fakakite e lautolu e tua fakamoli ke he Atua mo e moua ai e monuina he moui tukulagi.​—Isaia 9:6; Fakakiteaga 14:1; 20:4-6, 11-15.

‘Ko e Vaha ke Talia Mitaki Mai Ai’

12. Ko e heigoa e fekafekauaga ne mua ne fa e taute he tau hukui mo e tau fekafekau ha Iehova?

¹² Ma e fakamouiaga, kua lata ia tautolu ke fakatatai atu ke he tau kupu a Paulo: “Hanai foki, ko mautolu ko e tau eke gahua fakalataha mo ia [Iehova], kua ole atu a mautolu kia mutolu aua neke talia teao e mutolu e fakaalofa noa he Atua. (Ha kua pehe mai a ia, Ko e vaha ke talia ai ne fanogonogo ai au kia koe, ko e aho foki ke fakamomoui ai ne lagomatai ai au kia koe; kitiala, ko e ainei e vaha ke talia mitaki mai ai; kitiala, ko e aho nai ke fakamomoui ai.)” (2 Korinito 6:1, 2) Ko e tau hukui fakauku ha Iehova mo e hana tau fekafekau, ko e tau “mamoe kehe,” kua nakai talia teao e fakaalofa noa he ha lautolu a Matua he lagi. (Ioane 10:16) Ha ko e ha lautolu a mahani tonu mo e fakamalolo ke he fekafekauaga he “vaha ke talia mitaki” nei, kua kumi e lautolu e fiafia he Atua mo e hane hataki ke he tau tagata he lalolagi ko e hanei e “aho nai ke fakamomoui ai.”

13. Ko e heigoa e alito he Isaia 49:8, mo e kua fakamoli fefe he mogo fakamua?

¹³ Ne fatiaki e Paulo e Isaia 49:8, ne totou: “Kua vagahau mai pehe a Iehova; Ko e vaha ke fakaalofa ai kua tali atu ai au kia koe; ko e aho ke fakamoui ai kua lagomatai ai e au kia koe; to leveki foki e au a koe, mo e ta atu e au a koe ke eke mo maveheaga ke he tau motu; ke fakatu hake ai e lalolagi, ke eke ai e tau motu kua tiaki mo tufaaga ha lautolu.” Kua fakamoli e perofetaaga nei he magaaho ne fakatokanoa e tau tagata Isaraela mai he fakapaea i Papelonia mo e liliu he mogo fakamui ke he ha lautolu a motu malamalaega.​—Isaia 49:3, 9.

14. Kua fakamoli fefe e Isaia 49:8 ke he mena ne tupu ki a Iesu?

¹⁴ He fakamoli atu foki e perofetaaga a Isaia, ne foaki mai e Iehova hana “fekafekau” ko Iesu “ke eke mo maama he tau motu kehe, ke eke mo fakamouiaga [he Atua] ke hoko ke he motuaga he lalolagi.” (Isaia 49:6, 8; fakatatai Isaia 42:1-4, 6, 7; Mataio 12:18-21.) Ko e “vaha ke fakaalofa ai,” po ke “vaha ke talia mitaki ai,” kua hagaaki moli ni ki a Iesu he nofo agaia a ia he lalolagi. Ne liogi a ia, ti “tali” he Atua a ia. Ko e ‘aho ke fakamoui’ a ia ma Iesu kakano he taofi mau e ia e loto fakamoli ne mitaki katoatoa ti kua ‘eke mo tupuaga he moui tukulagi kia lautolu oti kana kua omaoma kia ia.’​—Heperu 5:7, 9; Ioane 12:27, 28.

15. Tali mai he mogo fe ne lali e tau Isaraela fakaagaga ke fakamoli e fakaalofa noa he Atua, mo e ko e heigoa e hagaaoaga?

¹⁵ Ne fakahagaao e Paulo e Isaia 49:8 ke he tau Kerisiano fakauku, he fakamakamaka ki a lautolu ke ‘nakai talia teao e fakaalofa noa he Atua’ he mahala ke kumi e fakaalofa hana he “vaha ke talia mitaki” mo e he “aho ke fakamomoui” ne foaki e ia. Ne lafi ki ai e Paulo: “Kitiala, ko e ainei e vaha ke talia mitaki mai ai; kitiala, ko e aho nai ke fakamomoui ai.” (2 Korinito 6:2) Tali mai he Penetekoso 33 V.N., kua lali e tau Isaraela fakaagaga ke fakamoli e fakaalofa noa he Atua ke eke ai e “vaha ke talia mitaki” mo ‘aho ke fakamomoui ai’ ma lautolu.

‘Fakakite e Mautolu a Mautolu ko e Tau Fekafekau he Atua’

16. I lalo he tau tutuaga uka fe ne fakakite e Paulo a ia ko e fekafekau he Atua?

¹⁶ Ko e falu tagata ne fakalataha ke he fakapotopotoaga Korinito kua nakai fakamoli ke he fakaalofa noa he Atua. Ne ekefakakelea e lautolu a Paulo he lali ke moumou hana a pule faka-aposetolo, ka e kua nakai taute e ia ‘ha mena ke fakatupetupe ai.’ Ne fakakite ni e ia a ia ko e fekafekau he Atua “he fakauka lahi, ke he matematekelea, ke he malaia, ke he fakaatukehe. Ke he tau fahiaga, ke he tuku ke he tau fale puipui, ke he tau fakaagitau, ke he tau gahua, ke he tau mataalaaga, ke he tau fakakanopogi.” (2 Korinito 6:3-5) He taha magaaho, ne talahau e Paulo kaeke ko e tau fekafekau e tau tagata ne fetoko ki a ia, kua “homo atu” a ia kakano kua lahi e matematekelea ke he tau fale puipui, tau fahiaga, tau hagahagakelea, mo e nofogati.​—2 Korinito 11:23-27.

17. (a) He fakatata e tau mahani fe ka fakakite e tautolu a tautolu ko e tau fekafekau he Atua? (e) Ko e heigoa e “tau kanavaakau he tututonu”?

¹⁷ Ke tuga a Paulo mo e tau tagata ne katofia mo ia, maeke foki ia tautolu ke fakakite a tautolu ko e tau fekafekau he Atua. Fefe? “Ke he mahani mea,” po ke loto mea, mo e he fakatatai ke he iloilo tonu he Tohi Tapu. Fakakite e tautolu a tautolu “he fakamanavalahi,” fakauka fakaeneene ke he hepe po ke ita, mo e “he mahani totonu” he lagomatai atu a tautolu ke he falu. Kua lata foki ia tautolu ke fakakite a tautolu ko e tau fekafekau he Atua he talia e takitakiaga he hana agaga, fakatata e “fakaalofa fakamoli,” talahau e kupu moli, mo e falanaki ki a ia ma e malolo ke taute e fekafekauaga. Fuluola ni, he fakamoli foki e Paulo e matagahua fekafekau hana “ke he tau kanavaakau he tututonu ke he fahi matau katoa mo e fahi hema.” He tauaga he vaha mai i tuai, ne fa mahani ke ta he lima matau e pelu ka e toto he lima hema e papatau. He tau fakaagaga atu ke he tau faiaoga fakavai, ne nakai fakaaoga e Paulo e tau kanavaakau he tino agahala​—ko e mahani keukeu, fakavai mo e pikopiko. (2 Korinito 6:6, 7; 11:12-14; Tau Fakatai 3:32) Ne fakaaoga e ia e “tau kanavaakau” he tututonu, po ke tau koloa, ke fakatolomaki e tapuakiaga moli. Ti lata ke pihia foki a tautolu.

18. Kaeke ko e tau fekafekau he Atua a tautolu, to ekemena fefe a tautolu?

¹⁸ Kaeke ko e tau fekafekau he Atua a tautolu, to ekemena a tautolu ke tuga a Paulo mo e hana tau tagata ne gahua fakalataha. To eke a tautolu tuga e tau Kerisiano pete kua fakalilifu mai po ke nakai. To nakai fakaoti he tau hokotaki kelea hagaao ki a tautolu e gahua fakamatala ha tautolu, to nakai eke foki a tautolu ke fakaikaluga kaeke ke talahau mitaki. To talahau e tautolu e kupu moli mo e liga talahaua ai ha ko e tau gahua mahani Atua. He magaaho ka to e matematekelea lahi ha ko e favale he tau fi, to falanaki a tautolu ki a Iehova. Mo e to talia e tautolu e akonakiaga mo e loto fakaaue.​—2 Korinito 6:8, 9.

19. Kua maeke fefe ke ‘fakamuhukoloa fakaagaga e tau tagata tokologa’?

¹⁹ Ke fakaoti aki e tutalaaga hana hagaao ke he fekau he fakafeiloaga, ne vagahau a Paulo hagaao ki a ia ni mo e tau tagata ne katofia mo ia ke “tuga he fakatutuku, ka kua fiafia mau; tuga he nonofogati, ka e fakamuhukoloa ke he tau tagata tokologa; tuga he tau tagata kua noa maka ni, ka e ha ha ia mautolu e tau mena oti.” (2 Korinito 6:10) Pete ni he fakatutuku e tau fekafekau ia ha ko e tau mamahi ha lautolu, kua fiafia e tau loto ha lautolu. Kua nonofogati ke he tino a lautolu, ka e ‘fakamuhukoloa fakaagaga e lautolu e tau tagata tokologa.’ Ti kua ‘ha ha ia lautolu e tau mena oti’ ha kua fakamuhukoloa he tua ha lautolu a lautolu​—pihia foki e amaamanakiaga ke eke mo tau tama he Atua he lagi. Mo e moua e lautolu e moui monuina mo e fiafia ko e tau fekafekau Kerisiano. (Gahua 20:35) Ke tuga a lautolu, maeke ia tautolu ke ‘fakamuhukoloa e tau tagata tokologa’ he fakalataha ke he fekau he fakafeiloaga he mogo tonu nei​—ko e aho nai ke fakamomoui ai!

Falanaki ke he Fakamouiaga ia Iehova

20. (a) Ko e heigoa e manako lahi ha Paulo, mo e ko e ha ai ne nakai fai magaaho ke moumou? (e) Kua fakamailoga he heigoa e aho he fakamouiaga ne nonofo ai a tautolu he mogonei?

²⁰ He magaaho ne tohia e Paulo hana tohi ke ua aki ke he tau Korinito he kavi 55 V.N., kua kavi 15 ni e tau tau ne toe ma e fakatokaaga he tau mena a Iuta. Ne manako lahi e aposetolo ke eke e tau Iutaia mo e tau Tagata Motu Kehe ke fakafeilo mo e Atua he puhala ia Keriso. Ko e aho he fakamouiaga a ia, ti nakai fai magaaho ke moumou. Tali mai he 1914, kua ha ha a tautolu he fakaotiaga he fakatokaaga he tau mena. Kua fakamailoga he fakamatalaaga he Kautu ke he lalolagi katoa ne hane taute he mogonei e aho nai ke fakamomoui ai.

21. (a) Ko e heigoa e lauga he tau ne kua fifili ma e 1999? (e) Ko e heigoa ha tautolu ka taute he aho nai ke fakamomoui ai?

²¹ Kua lata he tau tagata he tau motu oti kana ke iloa e foakiaga he Atua ma e fakamouiaga he puhala ia Iesu Keriso. Kua nakai fai magaaho ke fakatuai. Ne tohia e Paulo: “Kitiala, ko e aho nai ke fakamomoui ai.” To eke e tau kupu ia he 2 Korinito 6:2 mo lauga he tau ma e Tau Fakamoli a Iehova he 1999. Kua lata ha ia, ha kua kelea lahi e mena hane fehagai mo tautolu ke he moumouaga a Ierusalema mo e hana faituga! Ha i mua ko e fakaotiaga he fakatokaaga katoa he tau mena nei, ti putoia ai e tau tagata oti he lalolagi. Ko e mogo ainei​—nakai a pogipogi​—e magaaho ke fakagahua ai. Kaeke ke talitonu a tautolu ko e ha Iehova e fakamouiaga, kaeke ke fakaalofa a tautolu ki a ia, mo e kaeke ke uho e moui tukulagi ki a tautolu, to nakai talia teao e tautolu e fakaalofa noa he Atua. Mo e manako moli ke fakalilifu ki a Iehova, to fakakite e tautolu he tau kupu mo e tau gahua kua fakamoli a tautolu he mogo ne talahau e tautolu: “Kitiala, ko e aho nai ke fakamomoui ai.”

To Tali Fefe e Koe?

◻ Ko e ha kua mua atu e aoga he fakafeiloaga mo e Atua?

◻ Ko hai e tau hukui mo e tau fekafekau ne fakafita ke he fekau he fakafeiloaga?

◻ Maeke fefe a tautolu ke fakakite a tautolu ko e tau fekafekau he Atua?

◻ Ko e heigoa e kakano he lauga he tau ma e Tau Fakamoli a Iehova he 1999 ki a koe?

[Tau Fakatino he lau 13]

Ke tuga a Paulo, kua fakamatala fakamakutu nakai a koe mo e lagomatai e falu ke fakafeilo mo e Atua?

Tau Fahi Kaufakalataha

Falani

Kote Ivoira

[Fakatino he lau 14]

He aho nai ke fakamomoui ai, kua haia nakai a koe mo e tokologa ne kua eke ke fakafeilo mo Iehova ko e Atua?