Fiafia ha kua Fakakite e Iehova ki a Tautolu e Puhala Hana

“Ko e Atua kua hakohako hana puhala, kua fakamoli e vagahau a Iehova.”​—2 SAMUELA 22:31.

1, 2. (a) Ko e heigoa kua manako lahi mahaki e tau tagata oti kana ki ai? (e) Ha hai e fakafifitakiaga kua lata ke fifitaki e tautolu?

KUA ha ha he tau tagata oti kana e manako lahi mahaki ma e takitakiaga. Haia ni, kua manako lagomatai a tautolu ke takitaki aki e puhala he tau momoui ha tautolu. Moli, ne foaki mai e Iehova ki a tautolu e fuafuaaga he lotomatala mo e manamanatuaga ke lagomatai a tautolu ke iloa e hako mai he hepe. Ka kua lata e tau manamanatuaga ha tautolu ke fakamahani kaeke ko e takitakiaga kua falanaki ki ai. (Heperu 5:14) Ti kua lata e tau manamanatuaga ha tautolu ma e vala tala hako​—ti fakamahani foki ke fokifoki e vala tala ia—​kaeke ke taute e tautolu e fifiliaga mitaki. (Tau Fakatai 2:1-5) Pihia foki mogoia, ha ko e tau nakai iloa tonu he moui, kua kaumahala e tau fifiliaga ha tautolu ke fua mai tuga he manako. (Fakamatalaaga 9:11) I loto ia tautolu, nakai fai puhala mauokafua a tautolu ke iloa e fakatoka maiaga he vaha anoiha.

² Ma e tau mena nei mo e falu kakano foki, ne tohi he perofeta ko Ieremia: “Iehova na e, kua iloa e au, kua nakai ha i ai ke he tagata hana puhala, nakai ha ha he tagata kua fano ke fakatonu e mena ke fano a ia ki ai.” (Ieremia 10:23) Ne talia e Iesu Keriso, ko ia ko e tagata ne moui fakamua, e takitakiaga. Ne pehe a ia: “Nakai maeke ke he Tama ke eke taha mena, ko ia ni hokoia; ka ko e tau mena ne kikite atu ke he Matua ha ne eke; ko e tau mena foki ne eke e ia, ko e tau mena foki ia ha ne eke pihia he Tama.” (Ioane 5:19) Ko e pulotu ha ia, mogoia, he muitua a Iesu mo e ono atu ki a Iehova ma e lagomatai ke takitaki e tau lakaaga ha tautolu! Ne lologo e Patuiki ko Tavita: “Ko e Atua kua hakohako hana puhala, kua fakamoli e vagahau a Iehova; ko e akau punuti ni a ia kia lautolu oti kua tua kia ia.” (2 Samuela 22:31) Ka kumi a tautolu ke he puhala a Iehova ka e nakai muitua ni ke he pulotu ni ha tautolu, to moua e tautolu e takitakiaga mitaki katoatoa. Ko e tiaki e puhala he Atua ka takitaki a tautolu ke he matematekelea.

Fakakite e Iehova e Puhala

3. Takitaki fefe e Iehova a Atamu mo Eva, ti ko e heigoa e tau monuina ne foaki ki a laua?

³ Manamanatu la ke he mena ne tupu ki a Atamu mo Eva. Pete he nakai agahala a laua, kua lata agaia a laua mo e takitakiaga. Nakai tokanoa e Iehova a Atamu ke pulega ni e ia e tau mena oti ma hana ni he kaina fuluola i Etena. Ka e, age he Atua ki a ia e gahua ke taute. Fakamua, ne fakahigoa e Atamu e tau manu huifa. Ti, age e Iehova ki a Atamu mo Eva e tau foliaga tukulagi. Ma laua ke fakatupu e lalolagi, he fanafanau e laua e tau tama, mo e leveki e tau manu he lalolagi. (Kenese 1:28) Ko e gahua makimaki anei, ka ko e fakaotiaga to puke e parataiso he lalolagi katoa he tau tagata mitaki katoatoa kua nonofo fakafeheleaki mo e tau manu kehekehe. Ko e monuina homo ue atu ha ia! Fakalaulahi atu, he mahani fakamoli a Atamu mo Eva he o he puhala a Iehova, to ha ha ia laua e matutakiaga mo ia. (Fakatatai Kenese 3:8.) Ko e kotofaaga mua ue atu ha ia​—ke ha ha i ai e fakafetuiaga fakatagata tumau mo e Tufuga!

4. Fakagalo fefe e Atamu mo Eva e falanakiaga mo e mahani fakamoli ti ko e heigoa e tau fua matematekelea?

⁴ Ne fakatapu e Iehova e hoa fakamua ke nakai kai e fua he akau he iloilo he mitaki mo e kelea ne toka i Etena, ti foaki age he mena nei ki a laua e fifiliaga mafiti ke fakatata e omaoma ha laua​—ko e manako ha laua ke o he puhala a Iehova. (Kenese 2:17) Nakai leva, ne kamatamata e omaoma ia. He hau a Satani mo e tau kupu fakavaia hana, ne lata ia Atamu mo Eva ke fakakite e mahani fakamoli ki a Iehova mo e ke falanaki ke he tau maveheaga Hana ka fakatumau a laua ke omaoma. Nakai fiafia ai, ne toe malaefi a laua ke he mahani fakamoli mo e falanaki. He foaki age e Satani ki a Eva e tutokotaha mo e tukupau fakavai kua pikopiko a Iehova, ne fakavaia mo e liuliu a ia ke he Atua. Ne mui atu a Atamu ki a ia he agahala. (Kenese 3:1-6; 1 Timoteo 2:14) Kua lahi mahaki e fua he hala ha laua. Ko e o he puhala a Iehova to foaki ki a laua e olioli lahi he fakakatoatoa atu ki mua e laua hana finagalo. Ka kua puke tuai e tau momoui ha laua ke he tokihala mo e mamahi ato hoko atu a laua ke he mate.​—Kenese 3:16-19; 5:1-5.

5. Ko e heigoa e finagalo tukulagi a Iehova, ti lagomatai fefe e ia e tau tagata tua fakamoli ke kitia e fakamoliaga ia?

⁵ Pete ia, ne nakai hiki e Iehova hana finagalo ke he taha aho to liu e lalolagi ke he kaina parataiso ma e tau tagata mitaki katoatoa nakai fai hala. (Salamo 37:11, 29) Ti nakai la kaumahala a ia ke foaki e takitakiaga mitaki katoatoa ki a lautolu kua o he puhala hana mo e amanaki ai ke kitia e fakamoliaga he maveheaga ia. Ma tautolu kua fai teliga ke logona, ko e leo a Iehova i tua ia tautolu, kua pehe: “Ko e puhala hanai ke o ai a mutolu.”​—Isaia 30:21.

Falu ne O he Puhala a Iehova

6. Ko hai e tau tagata tane tokoua he vaha fakamua ne o he puhala a Iehova, ti ko e heigoa e tau fua?

⁶ Hagaao ke he fakamauaga he Tohi Tapu, ko e tokofiha ni he tau fanau a Atamu mo Eva ne o he puhala a Iehova. Ko Apelu ko e fakamua ia lautolu nei. Pete ni e matematekelea a ia he mate tuai, ne mate a ia mo e taliaaga a Iehova ti moua e ia e amanaki moli he fakalataha ke he ‘liu tu mai he tututonu’ ke he magaaho ni he Atua. (Gahua 24:15) To kitia e ia e fakamoliaga fakahiku he finagalo lahi a Iehova ma e lalolagi mo e tau tagata. (Heperu 11:4) Ko e taha foki ne fano he puhala a Iehova ko Enoka, ne perofeta mai hagaao ke he fakaotiaga he fakatokaaga he tau mena nei ne moua mai he tohi a Iuta. (Iuta 14, 15) Ne kaumahala foki a Enoka ke moui leva. (Kenese 5:21-24) Pete ni ia, “ko ia ko e tagata kua fakafiafia atu ke he Atua.” (Heperu 11:5) He mate a ia, tuga a Apelu, ne moua e ia e amanakiaga moli he liu tu mai mo e to fakalataha auloa a ia mo lautolu ka kitia e fakamoliaga he tau finagalo a Iehova.

7. Fakakite fefe e Noa mo e magafaoa hana e mahani fakamoli ki a Iehova mo e falanaki ki a ia?

⁷ He tomo hifo muatua e lalolagi ato hoko e Fakapukeaga ke he mahani kelea, kua eke ai e omaoma ki a Iehova mo kamatamata mua ue atu he mahani fakamoli. He hoko atu fakahaga e lalolagi ia ke he fakaotiaga, taha ni e matakau tote ne moua ha ne o he puhala a Iehova. Ne fanogonogo a Noa mo e magafaoa hana ke he Atua mo e falanaki ke he mena ne talahau e ia. Ne fakakatoatoa fakamoli e lautolu e tau matagahua ne fakatoka i mua ha lautolu mo e nakai talia ke putoia he tau gahua kelea he lalolagi he vaha ha lautolu. (Kenese 6:5-7, 13-16; Heperu 11:7; 2 Peteru 2:5) Kua fiafia lahi a tautolu ha ko e mahani fakamoli mo e omaoma katoatoa ha lautolu. Ha ko e mena ia, ne hao a lautolu he Fakapuke ti eke a lautolu mo tau tupuna ha tautolu.​—Kenese 6:22; 1 Peteru 3:20.

8. Ma e motu a Isaraela, ko e heigoa ne putoia he o he puhala he Atua?

⁸ He magaaho ia, ne taute e Iehova e maveheaga mo e tau magafaoa hana ne fakamoli ko Iakopo, ti eke a lautolu mo motu pauaki hana. (Esoto 19:5, 6) Ne foaki e Iehova e takitakiaga ma e hana tau tagata mavehe he puhala mai he Fakatufono tohia, tau ekepoa, mo e takitakiaga fakaperofeta matutaki tumau. Ka ke he tau Isaraela ni ke muitua ke he takitakiaga ia. Ne fakaaoga e Iehova hana perofeta ke tala age ke he tau Isaraela: “Kitiala, kua tuku atu e au kia mutolu ke he aho nai e monuina mo e malaia. Ko e monuina ka fanogonogo mai a mutolu ke he tau poakiaga a Iehova ha mutolu a Atua kua poaki atu ai au kia mutolu ke he aho nai. Ka ko e malaia kaeke ke nakai fanogonogo a mutolu ke he tau poakiaga a Iehova ha mutolu a Atua, ka e o kehe a mutolu he puhala kua poaki atu ai e au kia mutolu ke he aho nai, ke mumui atu ai ke he tau atua kehe kua nakai iloa e mutolu.”​—Teutaronome 11:26-28.

Kakano kua Tiaki he Falu e Puhala a Iehova

9, 10. Ko e heigoa e tuaga ne kua lata ma e tau Isaraela ke falanaki ki a Iehova mo e feaki e mahani fakamoli ki a ia?

⁹ Tuga na Atamu mo Eva, kua lata e tau Isaraela ke falanaki ki a Iehova mo e mahani fakamoli ki a ia ka manako a lautolu ke fakatumau e omaoma. Ko e motu tote a Isaraela ne takai viko he tau katofia taufetoko. He fahi toga ki lalo ko Aikupito mo Aitiope. He fahi tokelau ki uta ko Suria mo Asuria. He lotouho ko Filisitia, Amoni, Moapi, mo Etoma. He ha magaaho ni, kua fakamoli oti he tau motu oti nei ko e tau fi a Isaraela. Lafi atu ai, ko lautolu oti ne taute e lotu fakavai, kua kitia ai ke he tapuakiaga he tau atua tupua, kumikumi ke he tau fetu, mo e falu mena foki ko e tau aga mau he mahani fakatane mo e fifine kelea muikau mo e poa favale he tau fanau. Ko e tau katofia a Isaraela ne onoono ke he tau atua ha lautolu ke foaki e tau magafaoa lalahi, fua loga e fonua, kautu ke he tauaga.

¹⁰ Ko Isaraela ni hokoia ne tapuaki ke he taha e Atua, ko Iehova. Ne mavehe a ia ki a lautolu ke he tau monuina he magafaoa lahi, monuina e heleheleaga, haohao mitaki mai he tau fi ha lautolu kaeke ke omaoma a lautolu ke he tau fakatufono hana. (Teutaronome 28:1-14) Nakai fiafia ai, tokologa i Isaraela ne kaumahala ke taute e mena nei. Mo lautolu ne o he puhala a Iehova, tokologa ne matematekelea ha ko e mahani fakamoli ha lautolu. Ko e falu foki ne fakakikiveka, va, tamate, tuku he fale puipui, taulitimaka, mo e kelipopo he tau matakainaga Isaraela. (Gahua 7:51, 52; Heperu 11:35-38) Ko e kamatamata ha ia kua lata ma lautolu ne tua fakamoli! Ko e ha mogoia, ne tokologa ai ne o kehe he puhala a Iehova? Ua e fakafifitakiaga mai he fakamauaga tuai a Isaraela ke lagomatai a tautolu ke kitia e tau manatu hepe ha lautolu.

Fakafifitakiaga Kelea a Ahasa

11, 12. (a) He fakamatakutaku he tau Suria, ko e heigoa ne nakai talia e Ahasa ke taute? (e) Ko e heigoa e tau punaaga ua ne fuluhi ki ai a Ahasa ma e haohao mitaki?

¹¹ Ne pule a Ahasa ke he kautu he fahi toga a Iuta he senetenari ke valu aki F.V.N. Nakai mafola e pule hana. He taha magaaho, ne kautaha a Suria mo e kautu he fahi tokelau a Isaraela ke tau atu ki a ia, ti “vivivivi ai hana loto, mo e tau loto he hana motu.” (Isaia 7:1, 2) Pete ia, he foaki e Iehova e lagomatai mo e uiina a Ahasa ke kamatamata a ia, ne fakaheu fakakelea e Ahasa! (Isaia 7:10-12) Ti ko e fua, ne kaumahala a Iuta he tau mo e fahiloga e tau matematekelea.​—2 Nofoaga he Tau Patuiki 28:1-8.

¹² Ha kua fakaheu e Ahasa ke tuku a Iehova ke he kamatamata, ne fakatokoluga a ia he ole lagomatai ke he patuiki a Asuria. Ne tumau agaia ni a Iuta ke matematekelea ke he tau lima he hana tau katofia. He magaaho ne totoko atu foki a Asuria ki a Ahasa mo e “fakamamahi . . . a ia,” “ne eke poa foki e ia [ko e patuiki] ke he tau atua a Tamaseko ko lautolu ne keli a ia; ne pehe age a ia, Kua malolo e tau atua he tau tagata Suria ke lagomatai kia lautolu, ko e mena ia to ekepoa e au kia lautolu ke lagomatai mai a lautolu kia au.”​—2 Nofoaga he Tau Patuiki 28:20, 23.

13. Ko e heigoa ne fakakite e Ahasa he fuluhi ke he tau atua Suria?

¹³ He magaaho fakahiku, ne talahau a Iehova ki a Isaraela: “Ko au ko Iehova, ko e hau a Atua, kua fakaako atu kia koe ke he tau mena ke aoga ai, kua takitaki e ia a koe ke he puhala ke fano ai a koe. Ane hagao mai a koe ke he haku tau poaki, po kua tuga ne vailele hāu a monuina; mo e tuga ne tau peau he tahi hau a tututonu.” (Isaia 48:17, 18) He fuluhi atu ke he tau atua a Suria, ne fakakite e Ahasa e mamao he ‘puhala kua lata ke fano ai a ia.’ Ne hehe katoatoa a ia ha ko e manamanatu he tau motu, he ono ke he tau punaaga fakavai he haohao mitaki ha lautolu ka e nakai ki a Iehova.

14. Ko e ha ne nakai kalo hola ai a Ahasa he magaaho ne haga atu a ia ke he tau atua fakavai?

¹⁴ Ko e tau atua he tau motu, fakalataha mo lautolu i Suria, ne kua leva e fakakite ko e “tau tupua.” (Isaia 2:8) Fakamua atu, he pule ai e Patuiki ko Tavita, ko e tokoluga nea he pule a Iehova ke he tau atua a Suria ne kitia maali ai he eke e tau Suria mo tau tupa a Tavita. (1 Nofoaga he Tau Patuiki 18:5, 6) Ko Iehova tokotaha, “ko e Atua he tau atua a ia, ko e Iki he tau iki, ko e Atua lahi a ia, kua lilifu a ia, mo e matakutakuina,” kua foaki e haohao mitaki moli. (Teutaronome 10:17) Ka e, na haga tua ni a Ahasa ki a Iehova mo e ono atu ke he tau atua he tau motu ma e haohao mitaki. Ne matematekelea e fakahikuaga a Iuta.​—2 Nofoaga he Tau Patuiki 28:24, 25.

Ko e Tau Iutaia mo Ieremia i Aikupito

15. Ke he puhala fe ne hala e tau Iutaia i Aikupito he vaha a Ieremia?

¹⁵ Ha ko e muikau he mahani fakamoli he tau tagata hana, he 607 F.V.N., ne fakaata e Iehova e tau Papelonia ke moumou a Ierusalema mo e faituga i ai. Laulahi e motu ne fakapaea ki Papelonia. Ka e fai ne toe hifo, mai ia lautolu ko e perofeta ko Ieremia. Ko e magaaho ne kelipopo e Kavana ko Ketalia, ne fehola e matakau nei ki Aikupito ti uta foki a Ieremia mo lautolu. (2 Tau Patuiki 25:22-26; Ieremia 43:5-7) Kua kamata a lautolu i ai ke poa ke he tau lotu fakavai. Ne vagahau fakamalolo a Ieremia ke he tau Iutaia nakai fakamoli, ka e ulumao a lautolu. Ne fakaheu a lautolu ke fuluhi atu ki a Iehova mo e peehi malolo kua lata ni ia lautolu ke fakatumau e fakavela he tau mena manogi ke he “patuiki fifine he lagi.” Ko e ha? Ha ko e mena nei ha lautolu mo e tau matua tupuna tane ha lautolu ne taute “ke he tau maga a Iuta, mo e tau puhala i Ierusalema; ha ko e vaha ia ne makona ai a [l]autolu he tau mena kai, ne monuina foki; ti nakai kitia e [l]autolu e kelea.” (Ieremia 44:16, 17) Ne fakalatalata foki e tau Iutaia: “Tali he toka e mautolu he fakavela e tau mena manogi ke he patuiki fifine he lagi, mo e liligi atu kia ia e tau poa inu, kua nonofogati a mautolu ke he tau mena oti, ti fakaoti ai a mautolu ke he pelu mo e hoge.”​—Ieremia 44:18.

16. Ko e ha ne hehe lahi ai e tau Iutaia i Aikupito ke he tau manatu ha lautolu?

¹⁶ Kua ha ha i ai mogoia he manamanatuaga e fifiliaga! Ko e heigoa e tau mena moli? Ne poa moli e tau Iutaia ke he tau atua fakavai he motu ne foaki age e Iehova ki a lautolu. Falu magaaho, he vaha a Ahasa, ne matematekelea a lautolu ha ko e tiaki taofiaga. Pete ia, ko Iehova na “fakatuai hana ita” ke he hana tau tagata mavehe. (Esoto 34:6; Salamo 86:15) Ne fakafano e ia hana tau perofeta ke fakamafana a lautolu ke tokihala. Falu magaaho, ka fakamoli e patuiki, ne fakamonuina e Iehova a ia, ti aoga e tau tagata mai he fakamonuinaaga ia, pete ni kua tokologa a lautolu ne nakai loto fakamoli. (2 Nofoaga he Tau Patuiki 20:29-33; 27:1-6) Ko e hepe ha ia he tau Iutaia ia i Aikupito ne talahau ko e ha monuina ne olioli he kaina nofo mau ha lautolu ne mai he tau atua fakavai!

17. Ko e ha ne galo ai e Iuta e motu mo e faituga ha lautolu?

¹⁷ Ato hoko ke he 607 F.V.N., ne fakamafana e Iehova e tau tagata i Iuta: “Kia fanogonogo mai a a mutolu ke he haku a leo, ti eke au mo Atua ha mutolu, ti eke a mutolu mo motu haku; mo e o a mutolu ke he tau puhala ne poaki atu ai e au kia mutolu, kia monuina ai a mutolu.” (Ieremia 7:23) Ne galo he tau Iutaia e faituga ha lautolu mo e ha lautolu a motu ha kua fakaheu e lautolu ke o ‘he puhala ne poaki age e Iehova ki a lautolu.’ Kia mailoga moli e tautolu ke fehola kehe mai he hehe lahi mahaki ia.

Fakamonuina e Iehova a Lautolu kua O he Hana Puhala

18. Ko e heigoa kua lata ia lautolu kua o he puhala a Iehova ke taute?

¹⁸ He vaha nei, tuga ni he vaha i tuai, ko e o he puhala a Iehova kua manako lahi ke he mahani fakamoli​—ko e fifiliaga ke fekafekau ki a ia hokoia. Kua manako ma e falanaki​—tua katoatoa kua molioli mo e to fakamoli e tau maveheaga a Iehova. Ko e o he puhala a Iehova kua lata ke he omaoma​—muitua ke he hana tau fakatufono he nakai hola kehe mai ai ti fakatumau ke he tau tuaga tokoluga hana. “Ha kua tututonu a Iehova, to fiafia a ia ke he tututonu.”​—Salamo 11:7.

19. Ko e heigoa e tau atua ne tapuaki ki ai e tokologa he vaha nei, ti ko e heigoa e tau fua?

¹⁹ Ne ono a Ahasa ke he tau atua a Suria ma e haohao mitaki. Ne amanaki e tau Isaraela i Aikupito ko e “patuiki fifine he lagi,” ko e atua fifine ne tapuaki oti he Lotouho he Fahi Uta i tuai, ka ta mai e monuina fakatino ma lautolu. He vaha nei, tokologa e tau atua ne nakai ko e tau atua moli. Ne hataki e Iesu ke nakai tapuaki ki a “Mamone” ka ki a Iehova. (Mataio 6:24) Ne tutala e aposetolo ko Paulo ke he “mahekeheke, ko e hufeilo ke he tupua haia.” (Kolose 3:5) Ne tutala foki a ia ki a lautolu “ko e manava, ko e atua ha lautolu haia.” (Filipi 3:19) E, ko e tupe mo e tau koloa tino ko e tau matapatu atua haia ne tapuaki he vaha nei. He moli ai, ne laulahi​—kua lauia e tokologa mo e tau matutakiaga fakalotu​—ne “tua ke he tau koloa nakai tumau.” (1 Timoteo 6:17) Tokologa ne gahua malolo ke fekafekau ke he tau atua nei, ti kua palepale e falu​—he nonofo ke he tau fale kikila, fiafia ke he tau mena tau uka, mo e kai hohoko mitaki tumau. Ka e nakai fiafia he tau tagata oti e mautu pihia. Ti pihia foki mo lautolu he magaaho fakamui ne moua e tau mena nei kua nakai makona a lautolu ki ai. Kua ku ni e tumau ha lautolu, ti nakai makona e tau manako fakaagaga.​—Mataio 5:3.

20. Ko e heigoa e lagotatai kua lata ia tautolu ke fakatumau?

²⁰ Moli, kua lata ia tautolu ke hagahaga mitaki he momoui he tau aho fakahiku he fakatokaaga he tau mena nei. Kua lata ia tautolu ke uta e tau lakaaga mitaki ke gahua ke lata mo e tau magafaoa ha tautolu he puhala fakatino. Ka e ka tuku e tautolu e uho lahi ke he tuaga tokoluga he moui, ko e tutuli ke he tau tupe, po ke tau mena pihia mai he fekafekau ke he Atua, kua mokulu tuai a tautolu ke he tapuaki tupua ti nakai o he puhala a Iehova. (1 Timoteo 6:9, 10) Ka e kua foki ka fehagai a tautolu mo e gagao fakatino, fakatupe, po ke falu mena vihi? Kia nakai tuga e tau Iutaia i Aikupito a tautolu ne tukupau e tau mena vihi he fekafekau ke he Atua. Ka e, kia kamatamata e tautolu a Iehova, ne kua kaumahala a Ahasa ke taute pihia. Kia fuluhi fakamoli atu ki a Iehova ko e Atua ma e takitakiaga. Kia fakagahua fakamoli hana takitakiaga, ti liogi ma e malolo mo e pulotu ke fehagai mo e tau tuaga kehekehe. Ti, fakatali mauokafua ma e fakamonuinaaga a Iehova.

21. Ko e heigoa e tau monuina kua moua e lautolu kua o he puhala a Iehova?

²¹ Mai he fakatokaaga he fakamauaga tuai a Isaraela, ne fakamonuina lahi e Iehova a lautolu ne o he hana a puhala. Ne lologo e Patuiki ko Tavita: “Iehova na e, kia takitaki mai e koe au ke he hau a tututonu ha ko lautolu kua fai fi kia au.” (Salamo 5:8) Ne foaki age e Iehova ki a ia e kautu fakakautau ki luga he tau motu tata mai ne fakalavelave aki a Ahasa he magaaho fakamui. I lalo hifo a Solomona, ne fakamonuina a Isaraela aki e mafola mo e monuina ne kua manako lahi e tau Iutaia i Aikupito ki ai he magaaho fakamui. Ko e tama tane a Ahasa ko Hesekia, ne foaki age foki e Iehova e kautu ki luga a Asuria malolo. (Isaia 59:1) E, nakai ku e lima a Iehova ke he tau tagata mahani fakamoli hana, ne nakai tutu “ke he puhala he tau tagata hala” ka e kua fiafia ke he tau fakatufono he Atua. (Salamo 1:1, 2) Ko e mena taha agaia ni foki. Maeke fefe mogoia a tautolu he vaha nei ke iloa moli kua o a tautolu he puhala a Iehova? To fakatutala e mena nei he vala tala ka hau.

Manatu Nakai e Koe?

◻ Ko e heigoa e tau fua kua lata kaeke ke o a tautolu he puhala a Iehova?

◻ Ko e ha kua fakavai e manatu a Ahasa?

◻ Ko e ha kua hehe ai e manatu he tau Iutaia i Aikupito?

◻ Fakamalolo fefe e tautolu e fifiliaga ha tautolu ke o he puhala a Iehova?

[Fakatino he lau 11]

Ne ono atu a Ahasa ke he tau atua Suria nakai ki a Iehova