“Ne Pipiki Ni a Ia kia Iehova”

KUA lagataha nakai e tala atu ki a koe ke pipiki ke he taha mena?—a Liga tala age e tau matua mo e tau faiaoga ki a lautolu ne ikiiki ke pipiki ke he tau fakaakoaga ha lautolu. Ko e kakano he mena nei ke onoono ki ai ko e mena aoga lahi. Manako a tautolu ke fakatutala hagaao ke he tagata ne pehē e Tohi Tapu “ne pipiki ni a ia kia Iehova,” ko e Atua mooli. Ko e higoa he tagata ko Hesekia. O mai la ke kitia ko e heigoa ha tautolu ka fakaako mai he fakafifitakiaga haana.

Ne nakai fiafia e vahā tama tote ha Hesekia. Ko e matua taane haana ko Ahasa, ko e patuiki ha Iuta, ne fuluhi kehe mai he fekafekau ki a Iehova. Ne takitaki e Ahasa e tapuakiaga he tau atua fakavai he mogo ne tote agaia a Hesekia. Ne hokotia a Ahasa ke tamate mo e poa e taha he tau tama taane haana—ko e matakainaga ni ha Hesekia—ke he atua ne tapuaki a Ahasa ki ai!

Pete he matutaki a Ahasa ke taute e tau mena kelea, ne fakatumau a Hesekia ke omaoma ki a Iehova. Uka nakai e mena nei ki a ia ke taute he manatu e koe?— Liga uka. Ka e fakatumau ni a Hesekia ki ai! O mai la ke fakaako ke he puhala ati maeke ia ia ke pipiki ki a Iehova, mo e puhala kua maeke foki ia tautolu ke taute pihia.

Ne fakaako a Hesekia hagaao ke he falu ne pipiki ki a Iehova. Ko Tavita e taha tagata. Pete kua moui a Tavita ke he totou teau e tau tau fakamua atu, ne maeke ia Hesekia ke fakaako hagaao ki a ia i loto he tau Tohiaga Tapu. “Ha kua tiaki au he haku a matua tane mo e haku a matua fifine,” he tohi e Tavita, “ti talia ai e Iehova au.”

Kitia nakai e koe e mena ne lagomatai aki a Tavita ke omaoma ki a Iehova?— Ko e tua haana! Ne iloa moolioli e Tavita ka omaoma a ia, to lagomatai e Iehova a ia. Nakai fakauaua a Tavita ke he mena ia! He manamanatu hagaao ki a Tavita ne lagomatai mooli a Hesekia ke pipiki ki a Iehova he omaoma ki a Ia. Maeke foki ia koe ke iloa moolioli to lagomatai e Iehova a koe ka fakatumau a koe ke pipiki ki a ia he omaoma ki a ia.

Ka e kua ka nakai tapuaki e matua taane po ke matua fifine haau ki a Iehova?— Pehē e Atua kua lata e tau fanau ke omaoma ke he tau matua ha lautolu. Ti kua lata foki a koe ke omaoma ke he haau. Ka e kaeke ke tala atu e tau matua haau ke taute e taha mena ne pehē e Atua kua nakai lata a koe ke taute, maeke ia koe ke fakamaama e kakano kua nakai taute ai e koe. Kua nakai lata ia koe ke pikopiko, kaihā, po ke taute falu mena kelea ne pehē e Atua kua hepe, pete ni ko hai kua tala atu ki a koe ke taute. Kua hako a koe ke omaoma ke he Atua!

Kua ha ha i ai e tau fakafifitakiaga mitaki ke mumuitua a tautolu ki ai. Nakai ni ko Tavita e fakafifitakiaga ha Hesekia, ka e pihia foki e tupuna taane haana ko Iotamo. Ne maeke a Hesekia ke fakaako mai ia ia, ti maeke foki a tautolu mai he tau Tohi Tapu ha tautolu he vahā nei. Maeke nakai a koe ke manamanatu ke he falu fakafifitakiaga mitaki foki ka mumuitua e tautolu?—

Mooli, he Tohi Tapu kua maeke ia koe ke fakaako hagaao ke he falu hepehepe ne taute e Hesekia, Tavita, Iotamo, mo e falu tagata nakai mitaki katoatoa. Ka kua fakaalofa e tau tagata ia ki a Iehova, talahau e tau hepehepe ha lautolu, ti lali ke taute e mena hako. Manatu, ko e Tama he Atua ni, ko Iesu, ne mitaki katoatoa. Lata ia tautolu ke fakaako pauaki hagaao ki a ia ti lali ke muitua e fakafifitakiaga haana.