Lagomatai e Tau Tagata ke Fakatata Atu ki a Iehova
“Nakai hau taha ke he Matua, ka noa mo au.”—IOANE 14:6.
1. Ko e heigoa e poakiaga ne age e Iesu ne liu tu mai ke he hana tau tutaki, ti ko e heigoa e fua ne moua he omaoma e Tau Fakamoli a Iehova?
NE POAKI e Iesu Keriso hana tau tutaki ke “eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga tapu.” (Mataio 28:19) He tau hogofulu tau kua mole, ne lagomatai lahi he Tau Fakamoli a Iehova molea e tolu miliona tagata ke o mai ke he Atua, ati papatiso a lautolu ko e fakamailoga he tukuleleaga ha lautolu ki a ia ke taute hana finagalo. Ko e fiafia ha ia ha tautolu ke lagomatai a lautolu ke fakatata ke he Atua!—Iakopo 4:8.
2. Pete e tokologa a lautolu ne fou kua papatiso, ko e heigoa ne tupu?
2 He falu motu ne ha ha i ai e tau tutaki fou ne papatiso laia, kua nakai tatai e malikiti ke he numera he tau tagata fakailoa he Kautu. Moli, ko e ataina kua lata ma lautolu ne mamate, ko e fuafuaaga he mate he taha e tau kua kavi ke he 1 e pasene. Ka e, ke he falu tau tau gahoa fakahiku, tokologa ne mokulu kehe ha ko e tau kakano kehekehe. Ko e ha? Ko e vala tala nei mo e vala tala ka mui mai ka kumikumi e puhala ne futiaki mai e tau tagata ki a Iehova mo e tau kakano kua maeke he falu ke mokulu kehe.
Ko e Kakano he Fakamatala ha Tautolu
3. (a) Tatai fefe e poakiaga ne foaki ke he tau tutaki a Iesu mo e he agelu ne talahau he Fakakiteaga 14:6? (e) Ko e heigoa e puhala lauia mitaki kua fakamoli ke fakalagalaga aki e fiafia he tau tagata ke he fekau he Kautu, ka ko e heigoa e tau mena uka kua tutupu?
3 He “vaha ke fakahiku ai,” ne ha ha he tau tutaki a Iesu e poakiaga ke folafola e ‘iloilo moli’ hagaao ke he “tala mitaki nai he kautu.” (Tanielu 12:4; Mataio 24:14) Kua tatai e fekau ha lautolu mo e he agelu ne “ha ia ia e vagahau mitaki tukulagi ke fakamatala atu kia lautolu kua nonofo ke he lalolagi, mo e tau motu kehe oti, mo e tau magafaoa, mo e tau vagahau kehekehe, mo e tau motu.” (Fakakiteaga 14:6) He lalolagi nei kua apitia ke he tau matafekau mahani mau, ko e puhala lauia mitaki ke fiafia e tau tagata ke he Kautu he Atua mo e lagomatai a lautolu ke fakatata ki a Iehova he tala age ki a lautolu hagaao ke he amaamanakiaga he moui tukulagi ke he lalolagi parataiso. Pete ni kua maama e mena nei, ko lautolu kua fakalataha mo e tau tagata he Atua kua mauokafua ke moua e gutuhala ke he Parataiso kua nakai fakave mauokafua e tau hui ha lautolu ke he puhala pukilu kua takitaki atu ke he moui.—Mataio 7:13, 14.
4. Hagaao ki a Iesu mo e agelu ne lele he lagi, ko e heigoa e kakano he gahua fakamatala ha tautolu?
4 Ne talahau e Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) Ne fakapuloa he agelu ne lele he pulagi e “vagahau mitaki tukulagi” ti tala age ki a lautolu kua nonofo he lalolagi: “Kia matakutaku a mutolu ke he Atua, mo e ta age kia ia e fakahekeaga, ha kua hoko mai e magaaho he hana fakafiliaga; kia hufeilo foki a mutolu kia ia ne eke e lagi, mo e lalolagi, mo e tahi, mo e tau vai puna.” (Fakakiteaga 14:7) Ko e kakano lahi mahaki haia he fakamatala ha tautolu he tala mitaki ke lagomatai e tau tagata ke fakatata ki a Iehova puhala ia Keriso Iesu.
Matagahua ha Tautolu he Gahua ha Iehova
5. Ko e heigoa e tau talahauaga ha Paulo mo Iesu ne fakakite kua taute e tautolu e gahua a Iehova, nakai ko e ha tautolu?
5 He tohi ke he tau Kerisiano fakauku, ne vagahau e aposetolo ko Paulo ke he “gahua he fakafeilo” ti talahau kua fakafeilo he Atua e tau tagata ki a ia ke he matapatu he poa lukutoto a Iesu Keriso. Kua pehe a Paulo “tuga he ole he Atua kia mutolu ia mautolu” ti ko e mena ia “kua hukui aki e mautolu a Keriso mo e ole atu kia mutolu kia fakafeilo a mutolu mo e Atua.” Ko e manatu mafanatia ha ia! Pete ko e “tau fekau [fakauku] a Keriso” a tautolu po ke ko e tau hukui pauaki mo e amaamanakiaga he lalolagi, kia nakai nimo e tautolu ko e gahua ha Iehova anei, nakai ko e ha tautolu. (2 Korinito 5:18-20) Ko Iehova moli kua futiaki e tau tagata mo e fakaako a lautolu kua o mai ke he Keriso. Ne talahau a Iesu: “Nakai maeke ia taha ke hau kia au, ka nakai futia mai he Matua ne fakafano mai au; to fakatu foki e au a ia ke he aho fakamuiaki. Kua tohi he tau perofeta, To fakaako he Atua a lautolu oti kana. Hanai, ko lautolu oti ne fanogonogo ke he Matua, mo e ako ai, to o mai a lautolu kia au.”—Ioane 6:44, 45.
6. Fefe e luelueaga fakapa ha Iehova ke he tau motu, mo e ko hai kua moua e haohao mitaki i loto he hana “fale” he tapuakiaga?
6 He tau aho fakahiku nei, futiaki mai fefe e Iehova e tau tagata mo e hafagi ki a lautolu e “gutuhala he tua”? (Gahua 14:27, matahui tala, NW; 2 Timoteo 3:1) Ko e matapatu puhala he fakaaoga e Tau Fakamoli hana ke fakapuloa hana tau fekau he fakamouiaga mo e fakafiliaga ke he fakatokaaga kelea nei he tau mena. (Isaia 43:12; 61:1, 2) Ko e fakapuloaaga he lalolagi katoa nei kua lulululu e tau motu—ko e fakakiteaga he fakafiliaga mahaikava kua tata lahi ke hoko mai. He magaaho taha, ko e tau tagata kua “uho” ke he fofoga he Atua ne takitaki kehe mai he fakatokaaga nei mo e kua moua ai e haohao mitaki i loto he hana a “fale” he tapuakiaga moli. Ti fakamoli e Iehova hana tau kupu fakaperofeta ne fakamau e Hakai: “To luelue foki e au e tau motu oti; ti hoko mai ai e tau mena kua manako ki ai e tau motu oti; to fakapuke foki e au e fale nai ke he lilifu.”—Hakai 2:6, 7, matahui tala, NW; Fakakiteaga 7:9, 15.
7. Hafagi fefe e Iehova e tau loto he tau tagata mo e futiaki e tau tagata ki a ia mo e ke he hana Tama?
7 Kua hafagi e Iehova e tau loto he tau tagata matakutaku Atua nei—“ko e tau mena homo ue atu he tau motu oti kana”—ke maeke ia lautolu ke “hagao mai ke he tau kupu ne vagahau atu” he Tau Fakamoli hana. (Hakai 2:7, Jewish Publication Society; Gahua 16:14) He senetenari fakamua, ne fakaaoga e Iehova hana tau agelu falu magaaho ke takitaki atu hana Tau Fakamoli ke he tau tagata loto fakamoli ne tagi lagomatai atu ki a ia. (Gahua 8:26-31) He ako he tau tagata takitaha hagaao ke he tau foakiaga homo ue atu ne taute he Atua ma lautolu he puhala mai he hana Tama, ko Iesu Keriso, ne futiaki mai a lautolu ki a Iehova ha ko e hana fakaalofa. (1 Ioane 4:9, 10) E, futiaki he Atua e tau tagata ki a ia mo e hana Tama kakano he Hana “fakaalofa,” po ke “fakaalofa fakamoli.”—Ieremia 31:3, matahui tala, NW.
Ko Hai kua Futiaki e Iehova?
8. Ko e faga tagata fefe ne futiaki e Iehova?
8 Kua futiaki e Iehova ki a ia mo e ke he hana Tama a lautolu kua kumi ki a Ia. (Gahua 17:27) Kua putoia ai e tau tagata kua “tauoi mo e mānu ha ko e tau mena vihiatia kua eke e lautolu” i Kerisitenitome ti, pihia foki, ke he lalolagi katoa. (Esekielu 9:4) Ko “lautolu ne manamanatu ke he tau mena fakaagaga” ha lautolu. (Mataio 5:3, NW) Moli, “ko [l]autolu oti ne mahani molu [“fakatokolalo,” matahui tala, NW] ke he motu,” ka nonofo tukulagi ke he lalolagi parataiso.—Sefanaia 2:3.
9. Maeke fefe ia Iehova ke kitia kaeke ko e tau tagata kua ‘kotofa ke he moui tukulagi,’ ti futiaki fefe e ia a lautolu nei?
9 Iloa e Iehova e loto he tagata. Ne tala age e Patuiki ko Tavita ke he tama tane hana ko Solomona: “Kua kumi a Iehova ke he tau loto oti, kua fioia foki e ia e tau fatuakiloto oti he tau manatu; kaeke ke kumi e koe a ia, ti moua e koe a ia.” (1 Nofoaga he Tau Patuiki 28:9) He tuaga he loto he tagata mo e agaga, po ke aga fia pule, na kitia e Iehova to matamata nakai a ia ke talia e tau foakiaga faka-Atua ma e fakamagaloaga he tau agahala mo e amaamanakiaga he moui tukulagi he fakatokaaga tututonu fou he Atua. (2 Peteru 3:13) Puhala mai he Kupu hana, ne fakamatala mo e fakaako he Tau Fakamoli hana, ne futiaki e Iehova ki a ia mo e ke he Tama hana “a lautolu oti ne kotofa ke he moui tukulagi,” ti ko lautolu nei “kua tua foki.”—Gahua 13:48.
10. Ko e heigoa kua fakakite kua futiaki e Iehova falu ka e nakai ko e falu kua nakai putoia e talahau tuai?
10 Ko e futiaki kia a Iehova he falu mo e nakai ke he falu kua putoia e talahau tuai? Nakai pihia! Ko e futiaki he Atua e tau tagata kua falanaki ke he ha lautolu ni a tau foliaga. Kua fakalilifu e ia e fifiliaga tokanoa ha lautolu. Kua tuku e Iehova e fifiliaga pihia ke he tau tagata ne nonofo he lalolagi he vaha nei tuga he fakatoka ke he tau Isaraela ke he 3,000 tau i tuai, he pehe a Mose: “Kua tuku atu e au ki mua hau ke he aho nai ko e moui mo e monuina, ko e mate foki mo e malaia. . . . Kua ui age au ke he aho nai ke he lagi mo e lalolagi ke talahaua atu kia mutolu, kua tuku atu e au ki mua ha mutolu e moui mo e mate, ko e monuina mo e malaia; ko e hanai, kia fifili la e moui, kia moui ai a koe katoa mo e hau a fanau. Kia fakaalofa atu a koe kia Iehova hau a Atua, mo e fanogonogo ke he hana leo, mo e pipiki atu a koe kia ia; ha ko e hau a moui haia, ko ia foki ke fakaloga ai hau a tau aho.”—Teutaronome 30:15-20.
11. Maeke fefe e tau Isaraela ke fifili e moui?
11 Mailoga na kua lata he tau Isaraela ke fifili e moui he ‘fakaalofa atu kia Iehova mo e fanogonogo ke he hana leo, mo e pipiki atu kia ia.’ He vagahau e tau kupu ia, ne nakai la moua he tau tagata i Isaraela e Motu he Maveheaga. Ne mautali a lautolu he tau Kelekele Tatai a Moapi, he tauteute a lautolu ke o atu ke he taha fahi he Vailele ko Ioritana mo e huhu atu ki Kanana. Ha kua pauaki ma lautolu ke liliu e tau manamanatuaga ke he motu “mitaki mo e lahi” ne “tafe ai e puke huhu mo e meli” ka nakai leva ti moua e lautolu, ko e mailogaaga he tau miti ha lautolu kua falanaki ni ke he fakaalofa ha lautolu ki a Iehova, fanogonogo ha lautolu ke he hana leo, mo e tapiki mau ki a ia. (Esoto 3:8) Ne fakamaaliali e Mose e mena nei, he talahau: “Ke he haku a poaki atu kia koe ke he aho nai, kia fakaalofa atu a koe kia Iehova hau a Atua, ke fano ai a koe ke he hana tau puhala, mo e omaoma ai a koe ke he hana tau poakiaga, mo e hana tau fakatufono, mo e hana tau fakafiliaga, kia moui a koe, mo e fakatokologa ai, kia fakamonuina ai e Iehova hau a Atua a koe ke he motu ke fano a koe ki ai ke eke mau.”—Teutaronome 30:16.
12. Ko e heigoa e fakafifitakiaga he tau Isaraela kua fakaako e tautolu hagaao ke he gahua fakamatala mo e fakaako?
12 Nakai kia fakaako mai he talahauaga fakamua ki a tautolu taha mena hagaao ke he gahua fakamatala mo e fakaako he vaha nei he fakahikuaga? Manamanatu a tautolu ke he lalolagi Parataiso hane hau ti tutala hagaao ki ai he fekafekauaga ha tautolu. Ka e nakai ko tautolu po ke tau tutaki ne taute e tautolu ka kitia e tau fakamoliaga he maveheaga ka fekafekau a tautolu po ko lautolu ke he Atua ha ko e tau kakano lotokai. Tuga ni e tau Isaraela, ko tautolu mo lautolu ne fakaako e tautolu kua lata ke ako ke ‘fakaalofa atu kia Iehova mo e fanogonogo ke he hana leo, mo e pipiki atu kia ia.’ Ka manatu e tautolu e mena nei ka taute e fekafekauaga ha tautolu, to fuhiulu fakalataha moli a tautolu mo e Atua he futiaki mai e tau tagata ki a ia.
Tau Ekegahua he Atua
13, 14. (a) Hagaao ke he 1 Korinito 3:5-9, eke fefe a tautolu mo tau ekegahua mo e Atua? (e) Fano ki a hai e lilifu he malikitiaga, ti ko e ha?
13 Ne fakatai e Paulo e fuhiulu mo e Atua he hagaao ke he feakiaga he fonua. Ne tohi e ia: “Ko hai kia a Paulo? Ko hai a Apolo? Nakai kia ko e tau fekafekau ne tua ai a mutolu ke he Iki kia tuga he foaki mai e ia kia maua takitokotaha? Ne to e au, ne fakamalū e Apolo, ka ko e Atua ni kua fakatutupu ai. Hanai, kua noa a ia ne to, mo e noa a ia ne fakamalu; ka ko e Atua ni kua fakatutupu ai. Ko ia ne to, mo ia ne fakamalū ne taha a laua; ka e takitokotaha mo e moua hana taui ke lata mo e hana gahua. Ha ko e tau ekegahua a mautolu fakalataha mo e Atua; ko mutolu ko e kaina haia ne to he Atua.”—1 Korinito 3:5-9.
14 Ha ko e tau ekegahua he Atua, kua lata ia tautolu ke to fakamoli e “kupu he kautu” he tau loto he tau tagata, ti fakamalu e fiafia kua kitia he tau liu ahi atu mo e tau fakaakoaga Tohi Tapu tauteute fakamitaki. Ka mitaki e kelekele, ko e loto, to taute e Iehova e vala hana he fakatupu e tega he kupu moli he Tohi Tapu ke he akau fua loga. (Mataio 13:19, 23) To futiaki e ia e tagata ki a ia mo e ke he hana Tama. He fokifokiaga fakahiku, ko e ha malikiti ke he numera he tau tagata fakapuloa he Kautu kua toka ni ke he gahua a Iehova ke he tau loto he tau tagata, he taute e tega he kupu moli ke tupu mo e futiaki a lautolu ia ki a ia mo e ke he Tama hana.
Gahua Ati Hake Ka Tumau
15. Ko e heigoa e fakataiaga ne fakaaoga e Paulo ke fakakite e puhala ke lagomatai e tautolu falu ke feaki e tua?
15 Ha ko e fiafia he malikiti, kua manako moli a tautolu ke kitia e tau tagata ka fakatumau ke fakaalofa ki a Iehova, fanogonogo ke he leo hana, mo e pipiki mau ki a ia. Kua momoko a tautolu ka kitia falu kua hepehepe mo e mokulu kehe. Taute nakai e tautolu ha mena ke puipui mai he mena nei? He taha fakataiaga, ne fakakite e Paulo e puhala kua maeke ia tautolu ke lagomatai falu ke feaki e tua. Ne tohi e ia: “Ha ko e mena nakai maeke kia taha ke fakatoka ai ha fakaveaga kua kehe mo e fakaveaga kua fakatoka tuai, ko Iesu Keriso ni haia. Kaeke foki ke ati hake e taha ke he fakaveaga nei e auro, ko e ario, ko e tau maka uho ko e tau akau, ko e tau pupu, ko e gutugutu saito. To fakakite mai e tau gahua he tau tagata takitokotaha; to fakailoa mai he aho ha ko e mena to fakakite mai ke he afi; to kamatamata foki e tau gahua he tau tagata takitokotaha ke he afi po ke fefe.”—1 Korinito 3:11-13.
16. (a) Kehekehe fefe e tau foliaga ua ne fakaaoga e Paulo? (e) Fakahiku fefe e gahua ha tautolu ke he kelea mo e nakai tumau tukulagi?
16 He fakataiaga a Paulo he fonua, kua falanaki e tupuaga ke he akau fakamakutukutu, fakamalu tumau, mo e fakamonuina he Atua. Kua fakamaama mai he aposetolo falu fakataiaga he matagahua he fekafekau Kerisiano ke lata mo e gahua talaga hana. Kua talaga kia e ia he mena patu moli aki e tau koloa mitaki? Ne hataki e Paulo: “Kia takitokotaha mo e fakaeneene po ke fefe hana ati hake ai.” (1 Korinito 3:10) He fakalagalaga e fiafia he tagata he tala age ki a ia hagaao ke he amaamanakiaga he moui tukulagi he Parataiso, kua hagaaki nakai a tautolu ke he ha tautolu a fakaako atu ke he tau matapatu iloilo faka-Tohiaga Tapu ti fakave mogoia matamua ke he mena kua lata he tagata ke taute ke moua e moui tukulagi? Maeke kia he fakaakoaga ha tautolu ke tumau ke he mena nei: ‘Ka manako a koe ke moui tukulagi he Parataiso, kua lata ia koe ke fakaako, fano he tau feleveiaaga, mo e fakalataha ke he gahua fakamatala’? Ka pihia, kua nakai ati hake e tautolu e tua he tagata ke he fakaveaga mauokafua, mo e mena ne ati hake e tautolu kua vela he afi he tau kamatamata po ke nakai tumau tukulagi ka kamatamata ai. He lali ke futiaki e tau tagata ki a Iehova he amaamanakiaga hokoia ke he moui he Parataiso he tautui aki e tau tau gahoa ne fekafekau ki a ia, kua tuga e talaga aki e “tau akau, tau pupu ko e gutugutu saito.”
Ati Hake e Fakaalofa ma e Atua mo Keriso
17, 18. (a) Ko e heigoa kua latatonu ke taute kaeke ke tumau e tua he tagata? (e) Lagomatai fefe e tautolu e tagata ke toka e Keriso he loto hana?
17 Ma e tua ke tumau, kua lata ke fakave ke he fakafetuiaga fakatagata mo e Atua ko Iehova puhala ia Iesu Keriso. Ha ko e tau tagata nakai mitaki katoatoa, maeke ia tautolu ke moua e fakafetuiaga mafola mo e Atua he puhala ni he hana Tama. (Roma 5:10) Manatu na pehe a Iesu: “Nakai hau taha ke he Matua, ka noa mo au.” Ke lagomatai falu ke ati hake e tua, “nakai maeke kia taha ke fakatoka ai ha fakaveaga kua kehe mo e fakaveaga kua fakatoka tuai, ko Iesu Keriso ni haia.” Ko e heigoa kua putoia he mena nei?—Ioane 14:6; 1 Korinito 3:11.
18 He talaga ia Keriso ko e matapatuaga kua kakano ke fakaako ke he puhala kua fakatupu he tagata fakaako Tohi Tapu e fakaalofa hokulo ma Iesu he iloilo katoa ke he Hana matagahua ko e Laveaki, ko e Ulu he fakapotopotoaga, Ekepoa fakaalofa ne mua, mo e patuiki hane pule. (Tanielu 7:13, 14; Mataio 20:28; Kolose 1:18-20; Heperu 4:14-16) Kua kakano he taute a Iesu ke moli ki a lautolu ati nofo mau a ia he tau loto ha lautolu. Ko e liogi ha tautolu ma lautolu kua lata ke tuga e ole ha Paulo ma e tau Kerisiano i Efeso. Ne tohi e ia: “Kua fakatokotui ai au ke he Matua . . . kia foaki e ia kia mutolu . . . kia nofo mau a Keriso ke he tau loto ha mutolu ke he tua, kua mauokafua a mutolu, mo e fakave ke he fakaalofa.”—Efeso 3:14-17.
19. Ko e heigoa e fua he ati hake e fakaalofa ma Keriso he tau loto he tau tagata fakaako Tohi Tapu ha tautolu, ka ko e heigoa kua lata ke fakaako?
19 Ka ati hake e tautolu ke he puhala ke tupu e fakaalofa ki a Keriso ke he tau loto he tau tagata fakaako ha tautolu, to fua moli e mena nei he ati hake e fakaalofa ma Iehova ko e Atua. Ko e fakaalofa, logonaaga, mo e fakaalofa hofihofi a Iesu ko e fakaata fakamoli he tau fua a Iehova. (Mataio 11:28-30; Mareko 6:30-34; Ioane 15:13, 14; Kolose 1:15; Heperu 1:3) Ti ke maeke he tau tagata ke iloa mo e fakaalofa ki a Iesu, to o mai a lautolu ke iloa mo e fakaalofa ki a Iehova.a (1 Ioane 4:14, 16, 19) Kua lata ia tautolu ke fakaako e tau tagata fakaako Tohi Tapu ko Iehova i tua he tau mena oti ne taute e Keriso ma e tau tagata mo e ko e mena ia kua lata a Ia mo e tau fakaaue, fakaheke, mo e tapuakiaga mai ia tautolu ko e “Atua ko e ha tautolu a fakamouiaga.”—Salamo 68:19, 20; Isaia 12:2-5; Ioane 3:16; 5:19.
20. (a) Lagomatai fefe e tautolu e tau tagata ke fakatata ke he Atua mo e ke he hana Tama? (e) Ko e heigoa ka fakatutala ke he vala tala ne mui mai?
20 Ko e tau ekegahua he Atua, kia lagomatai e tautolu e tau tagata ke futiaki fakatata ki a ia mo e ke he hana Tama, he lagomatai a lautolu ke feaki e fakaalofa mo e tua ke he tau loto ha lautolu. To moli a Iehova ki a lautolu. (Ioane 7:28) Puhala ia Keriso, to maeke ia lautolu ke fakatu e fakafetuiaga tata mo e Atua, ti to fakaalofa a lautolu ki a ia mo e pipiki ki a ia. To nakai fakatoka magaaho pauaki a lautolu ke he fekafekauaga fakaalofa ha lautolu, he fakagahuahua e tua to fakamoli e tau maveheaga homo ue atu a Iehova ke he magaaho fafati ni hana. (Tagi Aue 3:24-26; Heperu 11:6) He lagomatai e falu ke feaki e tua, amaamanaki, mo e fakaalofa, ka kua lata ni ia tautolu ke ati hake foki e tua ha tautolu ke tuga ai e toga malolo kua maeke ke kautu mai he tau afa lalahi. To kikite ke he mena nei he vala tala ne mui mai.
[Matahui Tala]
a Ko e lagomataiaga mitaki ue atu ke iloa mitaki a Iesu mo e puhala ia ia, hana Matua, ko Iehova, ko e tohi The Greatest Man Who Ever Lived, ne lomi fakailoa he Watchtower Bible and Tract Society of New York, Inc.
Puhala he Fakamanatu
◻ Lagafiha e fakalagalaga e tautolu e fiafia he tau tagata ke he fekau he Kautu, ka ko e heigoa e hagahaga kelea i ai?
◻ Ko e faga tagata fefe kua futiaki mai e Iehova ki a ia mo e ke he hana Tama?
◻ Falanaki ke he heigoa e hu atu ha Isaraela ke he Motu he Maveheaga, ti ko e heigoa kua ako e tautolu mai he mena nei?
◻ Ko e heigoa e matagahua kua taute e tautolu ke lagomatai e tau tagata ke fakatata ki a Iehova mo e ke he hana Tama?
[Fakatino he lau 10]
He folafola e tautolu e amaamanakiaga he moui tukulagi he Parataiso ke he tau tagata, ko e matapatu foliaga ha tautolu ke futiaki mai a lautolu ki a Iehova
[Tau Fakatino he lau 13]
Kua lauia mitaki lahi e tau liu ahi atu ha tautolu ka mau tauteute mitaki a tautolu