Fakagagao Kia he Tiapolo a Tautolu?
KUA NAKAI LATA KE FAI GAGAO. Ne tufuga he Atua a tautolu ke moui tukulagi ke he tino malolo mitaki katoatoa. Ko e mena moui fakaagaga, ko Satani, ne fakatupu e gagao, mamahi, mo e mate ke fakamatematekelea aki e magafaoa tagata he magaaho ne fakataki e ia e tau matua fakamua ha tautolu, ko Atamu mo Eva, ke hala.—KENESE 3:1-5, 17-19; ROMA 5:12
KUA pehe kia e mena nei ko e tau gagao katoa ko e fua tupu fakahako mai ha ko e fakaleua he lalolagi fakaagaga?
Matagahua a Satani
Ne tali fakamahino he Tohi Tapu e huhu nei. Fakamua, ne fakakite mai nakai maeke e tau agaga he tau tupuna ha tautolu ke haofia e tau tagata momoui. Ka mamate e tau tagata, “nakai iloa e lautolu ha mena.” Nakai toka ia lautolu e agaga ne hao mai he mate. Kua momohe a lautolu he tukuaga, ne “nakai fai gahua, po ke manamanatu, po ke mena kua iloa, po ke iloilo.” (Fakamatalaaga 9:5, 10) Kua nakai fakai ke fakagagao he tagata mate e tagata moui!
Ka kua fakakite mai he Tohi Tapu ki a tautolu e ha ha ai he tau agaga kelea. Ko e totoko fakamua he lalolagi mo e lagi katoatoa ko e agaga moui fakaagaga ne talahaua he mogonei ko Satani. Ne tutaki atu foki e falu ki a ia ati eke ai ke talahaua ko e tau temoni. Maeke nakai a Satani mo e tau temoni ke fakatupu e gagao? Kua fita e tupu pihia. Ko e falu fakamalolo mana ha Iesu kua putoia foki e vega he tau temoni. (Luka 9:37-43; 13:10-16) Ka ko e laulahi he tau fakamalolo ha Iesu ne taute ko e tau gagao ne nakai tupu fakahako mai he tau temoni. (Mataio 12:15; 14:14; 19:2) Pihia foki he vaha nei, kua talitonu, ko e mena tupu pauaki e tau gagao, nakai mai he taha mena fakamana.
‘Ka e kua a Iopu?’ ka huhu he falu. ‘Nakai kia fakagagao he agaga kelea a ia?’ E, kua talahau e Tohi Tapu ko e gagao ha Iopu ne fakatupu e Satani. Ka kua taute pauaki e mena ne tupu ki a Iopu. Kua leva tuai e puipui faka-Atua a Iopu mai he tau fakahaupo he tau temoni. Ti paleko e Satani a Iehova ke fakamatematekelea a Iopu, mo e ha kua putoia ai e tau matakupu lalahi, ne utakehe e Iehova falu puhala puipui hana mai he hana tagata tapuaki ke he mena nei ni.
Gahua Fefe a Satani?
Ti teitei ni ke he tau mena oti, ko e fetuiaga hokoia he vahaloto he gagao he tagata mo Satani ko e magaaho ne kamatamata e Satani e hoa fakamua, ati hala ai a laua. Ti kua nakai tupu fakahako mai e tau gagao kehekehe ha ko Satani mo e hana tau temoni. Pete ia kua fiafia lahi a Satani ke fakaohooho a tautolu ke taute e tau fifiliaga goagoa mo e fakahui e tua ha tautolu, ti liga fua mai e matematekelea ke he tino malolo ha tautolu. Ne nakai fakamohe mana, kelipopo, po ke pao e ia a Atamu mo Eva aki e gagao. Ne fakavaivai e ia a Eva ke nakai omaoma ke he Atua, ti mui a Atamu ke he puhala nakai omaoma ha Eva. Ko e gagao mo e mate ko e tau mena tupu mai i ai.—Roma 5:19.
Ko e perofeta nakai tua fakamoli ne higoa ko Palaamo ne ui he patuiki a Moapi ke kaialu e motu a Isaraela, ne kemu fakamatakutaku he tau katofia a Moapi. Ne lali a Palaamo ke kaialu a Isaraela, ka kua kaumahala a ia ha kua haia e motu i lalo he puipuiaga a Iehova. Ati lali e tau Moapi ke fakataki e tau Isaraela ke tapuaki tupua mo e ke feuaki. Kua kautu ai e lagatau nei, ti utakehe ai e puipuiaga a Iehova i Isaraela.—Numera 22:5, 6, 12, 35; 24:10; 25:1-9; Fakakiteaga 2:14.
Ako ai e tautolu e fakaakoaga aoga lahi mai he tau mena tutupu he vaha i tuai. Kua foaki he lagomatai faka-Atua ke he tau tagata tapuaki tua fakamoli he Atua e puipuiaga mai he fakahaupo he tau agaga kelea. Pete he pihia, liga lali agaia a Satani ke fakaohooho e tau tagata takitokotaha ke fakahui e tua ha lautolu. Liga lali a ia ke fakataki a lautolu ke mahani feuaki. Po ke, tuga e leona tagi, liga lali a ia ke fakamatakutaku a lautolu ke taute taha mena ka utakehe aki e puipuiaga he Atua ia lautolu. (1 Peteru 5:8) Ko e kakano haia ne ui he aposetolo ko Paulo a Satani ko “ia ne toka ai e kautu ke mate ai.”—Heperu 2:14.
He magaaho ka gagao a tautolu, liga fakaatukehe a tautolu. Ke he tau tuaga pihia, kua mafiti lahi a Satani ke lali ke fakaohooho a tautolu ke taute taha mena ka fakahui aki e tua ha tautolu. Ti kua lata, he magaaho ka gagao ai, ke manatu kua tupu e matematekelea ha tautolu ha ko e nakai mitaki katoatoa ne moua e tautolu nakai ko e ha hufiaaga fakagalogalo. Manatu, kua fai tau ne matapouli ai a Isaako tua fakamoli ato mate a ia. (Kenese 27:1) Ko e kakano ne mate nakai ko e tau agaga kelea ka kua motua lahi. Ne mate a Rahela he fanau, nakai ha ko Satani, ka ko e fakaameame fakatagata. (Kenese 35:17-19) Kua fakahiku ni, ke mamate oti a lautolu ne tua fakamoli—nakai ha ko e tau kaialu ka ko e he nakai mitaki katoatoa ne moua.
Ko e Tali ke he Vaha Loa
Kua nakai gagao ha ko e hehe he Atua. “Ko e mena nakai kamatamata ai e Atua ke he mena kelea, nakai kamatamata foki e ia ke he taha.” (Iakopo 1:13) Ka gagao taha he tau tagata tapuaki hana, ne faihoani fakaagaga e Iehova a ia. “To faihoani a Iehova kia ia ka takoto a ia he hana gagao; kua fuluhi e koe hana mohega oti kana ke he hana gagao.” (Salamo 41:3) E, fakaalofa hohofi e Atua. Manako a ia ke lagomatai a tautolu, nakai fakamamahi a tautolu.
Moli, ha ha ia Iehova e tali ke he vaha loa ma e gagao—ko e matulei mo e liu tu mai ha Iesu. He kakano he poa lukutoto a Iesu, kua fakamagalo a lautolu ne loto hakohako mai he tuaga hala ha lautolu mo e fakahiku ni ke moua e malolo mitaki katoatoa mo e moui tukulagi he lalolagi parataiso. (Mataio 5:5; Ioane 3:16) Ko e tau mana ha Iesu ko e fakakiteaga fakamua he fakamalolo moli ka ta mai he Kautu he Atua. To uta kehe foki he Atua a Satani mo e hana tau temoni. (Roma 16:20) Moli ni, kua tanaki e Iehova e tau mena homo ue atu ma lautolu ne fakagahuahua e tua ki a ia. Kua lata na tautolu ke fakamanavalahi mo e fakauka.
He magaaho taha ia ni, ne foaki mai he Atua e pulotu gahuahua mo e hatakiaga fakaagaga he kakano he Tohi Tapu mo e fematakainagaaki he tau tagata tapuaki tua fakamoli he lalolagi katoa. Fakakite e ia ki a tautolu e puhala ke kalo mai he kamataaga he tau lekua ke he tino malolo. Mo e foaki e ia ki a tautolu e tau kapitiga moli ka lagomatai a tautolu he magaaho ka mafuta hake e tau mena vihi.
Liu la manatu a Iopu. Ko e fano ke he toketa taulatua kua mua e kelea a ia ke taute e Iopu! Ha ko e mena to utakehe e puipui he Atua ia ia, mo e to galo e tau fakamonuinaaga oti ne fakatali ki a ia ka mole atu e kamatamata hana. Ne nakai nimo he Atua a Iopu, mo e to nakai nimo e ia a tautolu. “Kua fanogonogo a mutolu ke he fakauka a Iopu, kua iloa foki e mutolu e fakahikuaga ha he Iki,” he talahau he tutaki ko Iakopo. (Iakopo 5:11) Kaeke ke aua mahala a tautolu, to moua foki e tautolu e tau monuina homo ue atu he vaha kotofa he Atua.