Maeke Fēfē a Koe ke Eke mo Kapitiga he Atua?

1, 2. Ko hai e falu tagata ne kapitiga mo Iehova?

KO HAI haau ne manako ke eke mo kapitiga? Taha tagata ne fiafia a koe ki ai. Taha tagata ne femataaki mo koe. Taha tagata ne aga totonu mo e nava a koe ke he tau mahani.

² Fifili e Iehova ko e Atua e falu tagata ke eke mo kapitiga haana. Ma e fakatai, ko Aperahamo e taha he tau kapitiga ha Iehova. (Isaia 41:8; Iakopo 2:23) Fiafia foki a Iehova ki a Tavita. Pehē a ia ko Tavita ‘ko e tagata ke lata mo e haana a loto.’ (Gahua 13:22) Ti ko e perofeta ko Tanielu kua “ofania lahi” e Iehova.​—Tanielu 9:23.

3. Ko e ha a Aperahamo, Tavita, mo Tanielu ne eke mo tau kapitiga ha Iehova?

³ Maeke fēfē a Aperahamo, Tavita, mo Tanielu ke eke mo tau kapitiga ha Iehova? Pehē a Iehova ki a Aperahamo: “Ha kua fanogonogo a koe ke he haku tau kupu.” (Kenese 22:18) Eke a Iehova mo kapitiga ha lautolu ne mahani fakatokolalo ke omaoma ki a ia. Maeke foki e motu he tau tagata ke eke mo tau kapitiga haana. Fakamaama e Iehova ke he motu ko Isaraela: “Kia fanogonogo [po ke, omaoma] mai a a mutolu ke he haku a leo, ti eke au mo Atua ha mutolu, ti eke a mutolu mo motu haku.” (Ieremia 7:23) Ti lata foki a koe ke omaoma ki a Iehova ka manako mooli a koe ke eke mo kapitiga haana.

PUIPUI E IEHOVA E TAU KAPITIGA HAANA

4, 5. Puipui fēfē e Iehova e tau kapitiga haana?

⁴ Pehē e Tohi Tapu kua kumi puhala a Iehova “ke lagomatai kia lautolu kua katoatoa ha lautolu a tau loto kia ia.” (2 Nofoaga he Tau Patuiki 16:9) He Salamo 32:8, mavehe a Iehova ke he tau kapitiga haana: “To fakaako e au a koe, mo e fakakite kia koe e puhala ke fano ai a koe; to fakatonu e au kia koe, mo e kitekite au kia koe.”

⁵ Ko e fī malolō lahi kua manako ke taofi a tautolu ke ua eke mo tau kapitiga he Atua. Ka e manako a Iehova ke puipui a tautolu. (Totou Salamo 55:22.) Ha ko tautolu ko e tau kapitiga ha Iehova, kua fekafekau a tautolu ki a ia mo e tau loto katoa. Mahani fakamooli a tautolu ki a ia pete ka lauia he tau tutūaga uka. Mauokafua a tautolu tuga e salamo. Ne tohi e ia hagaao ki a Iehova: “Ha ko e mena ha he tapa matau haku a ia, nakai fagahuatia [po ke, maueue] ai au.” (Salamo 16:8; 63:8) Lali fēfē a Satani ke taofi a tautolu he eke mo tau kapitiga he Atua?

TUKUMALE HA SATANI

6. Ko e heigoa ne talahau e Satani hagaao ke he tau tagata?

⁶ He Veveheaga 11, ne fakaako e tautolu kua paleko e Satani a Iehova mo e tukumale kua pikopiko a Ia mo e nakai hako he nakai fakaatā a Atamu mo Eva ke fifili ma ha laua e tau mena kua hako mo e hepe. Fakaako a tautolu mai he tohi a Iopu he Tohi Tapu kua tukumale foki e Satani e tau tagata ne manako ke eke mo tau kapitiga he Atua. Talahau a Satani kua fekafekau a lautolu ke he Atua ha ko e tau mena ne moua mai e lautolu ia Ia, ka e nakai ha ko e fakaalofa ha lautolu ki a Ia. Talahau foki a Satani na maeke a ia ke fuluhi kehe ha tagata mai he Atua. O mai la ke onoono ke he tau mena kua maeke a tautolu ke fakaako mai ia Iopu mo e puhala ne puipui e Iehova a ia.

7, 8. (a) Fēfē e logonaaga ha Iehova hagaao ki a Iopu? (e) Ko e heigoa ne talahau e Satani hagaao ki a Iopu?

⁷ Ko hai a Iopu? Ko ia ko e tagata mitaki ne moui he kavi ke he 3,600 tau kua mole. Pehē a Iehova, he magahala ia kua nakai fai tagata he lalolagi ke tatai mo Iopu. Ne lahi e fakalilifu ha Iopu ke he Atua, ti vihiatia e ia e tau mena kelea. (Iopu 1:8) Ē, ko Iopu ko e kapitiga mooli ha Iehova.

⁸ Talahau e Satani kua fekafekau a Iopu ke he Atua ha ko e tau manako lotokai. Pehē a Satani ki a Iehova: “Nakai kia pa takai ai e koe a ia, mo e hana fale, katoa mo e hana tau mena oti ke he tau faahi oti? kua fakamonuina e koe e gahua he hana tau lima, kua fakaloga ai foki hana tau manu ke he fonua. Ka kia fakaolo atu a e koe e lima hau mo e pipiki atu ke he hana tau mena oti, ti vagahau kelea ai a ia kia koe ki mua hau ni.”​—Iopu 1:10, 11.

9. Ko e heigoa ne fakaatā e Iehova a Satani ke taute?

⁹ Ne tukumale e Satani ko e fekafekau a Iopu ki a Iehova ha ko e tau mena ha Iopu ka moua mai ia Iehova. Talahau foki e Satani na maeke a ia ke taute a Iopu ke oti e fekafekau ki a Iehova. Nakai talia e Iehova e talahauaga ha Satani, ka e fakaatā e Ia a Satani ke kamatamata a Iopu ke kitia kua kapitiga nakai a Iopu mo Iehova ha ko e fakaalofa ha Iopu ki a Ia.

TOTOKO A SATANI KI A IOPU

10. Totoko fēfē e Satani a Iopu, mo e tali atu fēfē a Iopu?

¹⁰ Fakamua, kaihā po ke tamate e Satani e tau manu oti ha Iopu. Ti kelipopo foki e Satani e tokologa he tau fekafekau ha Iopu. Ne galo e tau mena oti ha Iopu. Fakahiku, ne tamate e Satani e tau fanau tokohogofulu ha Iopu he matagi lahi. Ka e tumau ni e fakamooli ha Iopu ki a Iehova. “Nakai hala a Iopu he tau mena oti na, ti nakai pehe foki a ia kua goagoa e Atua.”​—Iopu 1:12-19, 22.

11. (a) Ko e heigoa foki ne taute e Satani ki a Iopu? (e) Tali atu fēfē a Iopu?

¹¹ Nakai oti e laliaga ha Satani. Totoko a ia ke he Atua he pehē: “Piki atu ke he hana tau hui motua mo e hana kakano, po ke vagahau kelea atu nakai a ia kia koe ki mua hau?” Ti fakahoko atu e Satani ki a Iopu e gagao kelea lahi mahaki. (Iopu 2:5, 7) Ka e fakatumau ni a Iopu ke mahani fakamooli ki a Iehova. Pehē a ia: “Ato hoko ke he aho ke mate ai au nakai toka e au haku a mahani hakohako.”​—Iopu 27:5.

12. Fakakite fēfē e Iopu ko Satani ko e pikopiko?

¹² Nakai iloa e Iopu ha mena hagaao ke he tau tukumale ha Satani po ke kakano ne matematekelea lahi a ia. Manatu a ia ko Iehova ne fakatupu e tau lekua haana. (Iopu 6:4; 16:11-14) Pete ni he pihia, ne tumau e mahani fakamooli ha Iopu ki a Iehova. Kua kitia maaliali mogonei e mauokafua haana. Nakai lotokai a Iopu. Ko e kapitiga he Atua a Iopu ha kua fakaalofa a ia ke he Atua. Ko e tau tukumale ha Satani ko e tau pikopiko oti!

13. Ko e heigoa e fua he mahani fakamooli ha Iopu?

¹³ Pete ne nakai iloa e Iopu e mena ne tupu he lagi, mahani fakamooli a ia ke he Atua mo e fakakite e mahani kelea muitui ha Satani. Fakamonuina e Iehova a Iopu ha ko e haana kapitiga fakamooli.​—Iopu 42:12-17.

PUHALA KUA TUKUMALE E SATANI A KOE

14, 15. Ko e heigoa e tukumale ha Satani ke he tau tagata oti?

¹⁴ Maeke a koe ke moua e tau fakaakoaga aoga mai he mena ne tupu ki a Iopu. He mogonei, kua tukumale e Satani ko e fekafekau ni a tautolu ki a Iehova ha ko e tau mena ka moua e tautolu mai ia Ia. He Iopu 2:4, ne pehē a Satani: “Ko e tau mena oti foki ha ha he tagata, to ta age e ia ke totogi aki hana moui.” Ti tukumale e Satani kua lotokai e tau tagata oti, nakai ko Iopu ni. Totou teau tau he mole e mate ha Iopu, ne fakafiu agaia e Satani a Iehova mo e tukumale e tau fekafekau Haana. Ma e fakatai, he Tau Fakatai 27:11, totou e tautolu: “Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.”

¹⁵ Maeke a koe ke fifili ke omaoma ki a Iehova mo e eke mo kapitiga fakamooli Haana, ti fakakite ko Satani ko e pikopiko. Pete kua lata a koe ke taute e tau hikiaga lalahi he moui haau ke eke mo kapitiga he Atua, ko e fifiliaga kua mua atu e mitaki a ia ka taute e koe! Ti ko e fifiliaga uho lahi anei. Pehē a Satani to nakai mahani fakamooli a koe ke he Atua ka fai lekua a koe. To taute e ia e tau lagatau ke nakai mahani fakamooli a tautolu ke he Atua. He puhala fe?

16. (a) Ko e heigoa e tau puhala kua fakaaoga e Satani he lali ke taofi e tau tagata he fekafekau ki a Iehova? (e) Liga lali fēfē e Tiapolo ke taofi a koe he fekafekau ki a Iehova?

¹⁶ Fakaaoga e Satani e tau puhala kehekehe loga he lali ke taofi a tautolu ke ua eke mo kapitiga he Atua. Kua totoko mai a ia “tuga ne leona tagi, kua kumi kia falu ke faiola ai e ia.” (1 Peteru 5:8) Kia nakai ofo ka lali e haau a tau kapitiga, tau tagata he magafaoa, po ke falu foki ke taofi a koe he fakaako e Tohi Tapu mo e taute e mena hako. Liga logona hifo e koe kua totoko ki a koe.a (Ioane 15:19, 20) Fakagalogalo foki e Satani a ia ko e “agelu he maama.” Ti liga lali a ia ke taute lagatau ki a tautolu ke nakai omaoma ki a Iehova. (2 Korinito 11:14) Taha puhala foki kua fakaaoga e Satani he lali ke taofi a tautolu he fekafekau ki a Iehova, ko e taute a tautolu ke manamanatu kua nakai fakaai a tautolu ke hokotia e mitaki ke fekafekau ke he Atua.​—Tau Fakatai 24:10.

OMAOMA KE HE TAU POAKIAGA HA IEHOVA

17. Ko e ha kua omaoma a tautolu ki a Iehova?

¹⁷ He omaoma a tautolu ki a Iehova, kua fakakite e tautolu ko Satani ko e pikopiko. Ko e heigoa ka lagomatai a tautolu ke omaoma? Pehē e Tohi Tapu: “Kia fakaalofa a koe kia Iehova hau a Atua mo e hau a loto katoa, mo e hau a [“moui,” NW] katoa, mo e hau a malolo katoa.” (Teutaronome 6:5) Omaoma a tautolu ki a Iehova ha kua fakaalofa a tautolu ki a ia. He tupu e fakaalofa ha tautolu ki a Iehova, to manako a tautolu ke taute e tau mena oti ne ole e ia ke taute e tautolu. Tohi he aposetolo ko Ioane: “Ha ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.”​—1 Ioane 5:3.

18, 19. (a) Ko e heigoa e falu mena ne talahau e Iehova kua hepe? (e) Iloa fēfē e tautolu kua nakai ole a Iehova ke taute e tautolu taha mena ne nakai maeke a tautolu ke taute?

¹⁸ Ka ko e heigoa e falu mena ne tala mai e Iehova kua hepe? Haia e falu mena he puha “Vihiatia e Tau Mena ne Vihiatia e Iehova.” He mogo fakamua, liga manatu a koe kua nakai kelea lahi e falu he tau mena nei. Ka e he totou a koe ke he tau kupu Tohi Tapu mo e manamanatu fakamitaki ki ai, to maama e koe e pulotu he omaoma ke he tau fakatufono ha Iehova. Liga logona hifo foki e koe kua lata ke taute e tau hikihikiaga he moui haau. Pete kua uka e mena nei he falu magaaho, ka taute e koe e tau hikihikiaga ia, to moua e koe e mafola mo e fiafia he eke mo kapitiga fakamooli he Atua. (Isaia 48:17, 18) Iloa fēfē e tautolu na maeke ke taute e tau hikihikiaga nei?

¹⁹ Nakai ole a Iehova ke taute e tautolu ha mena kua nakai maeke a tautolu ke taute. (Teutaronome 30:11-14) Ha ko e Kapitiga mooli a Ia, kua iloa mitaki e ia a tautolu he iloa e tautolu a tautolu ni. Iloa e ia e tau mena mitaki ha tautolu mo e tau lolelole ha tautolu. (Salamo 103:14) Fakamalolō mai he aposetolo ko Paulo a tautolu: “Ha kua fakamoli e Atua, he nakai tuku atu e ia a mutolu ke he kamatamata kua mua ke he mena kua fahia ai a mutolu, ka e taute foki e ia fakalataha mo e kamatamata e mena ke hao ai, kia fahia a mutolu ke fakauka ai.” (1 Korinito 10:13) Maeke a tautolu ke mauokafua to foaki mai tumau e Iehova e malolō ke taute e mena hako. To foaki e ia ki a koe e “lahi ue atu he malolo” ke lagomatai a koe ke fakauka ke he tau tuaga uka.​—2 Korinito 4:7.

FAKAAKO KE FIAFIA KE HE TAU MENA NE FIAFIA E ATUA KI AI

20. Ko e heigoa e tau aga kua lata a koe ke fifitaki, mo e ko e ha?

²⁰ Ka manako ke eke mo kapitiga ha Iehova, lata a tautolu ke fakaoti e taute he tau mena ne pehē a Iehova kua hepe, ka e lata foki ke gahua fakalahi atu. (Roma 12:9) Fiafia e tau kapitiga he Atua ke he tau mena ne fiafia e Atua ki ai. Fakamaama mai e tau mena ia he Salamo 15:1-5. (Totou.) Fifitaki he tau kapitiga ha Iehova e tau aga Haana mo e fakakite e “fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua, ko e mahani molu, mo e manako fakalatalata.”​—Kalatia 5:22, 23.

21. Puhala fe ka fakaako a koe ke fakakite e tau aga ne fiafia e Atua ki ai?

²¹ Fakaako fēfē a koe ke fakakite e tau aga mitaki ia? Lata a koe ke iloa hagaao ke he tau mena ne fiafia a Iehova ki ai he totou mo e fakaako tumau e Tohi Tapu. (Isaia 30:20, 21) Ka taute pihia e koe, to tupu e fakaalofa haau ki a Iehova, ti ka tupu e fakaalofa haau ki a ia, to manako a koe ke omaoma ki a ia.

22. Ko e heigoa e fua ka omaoma a koe ki a Iehova?

²² Ko e tau hikiaga kua lata a koe ke taute he moui haau kua maeke ke fakatatai ke he aaki kehe he tau tapulu tuai mo e tui he tau tapulu foou. Pehē e Tohi Tapu kua lata a koe ke “tuku kehe . . . e tagata tuai” mo e fakatapulu a koe “ke he tagata fou.” (Kolose 3:9, 10) Pete kua liga nakai mukamuka, ka taute e tautolu e tau hikiaga nei mo e omaoma ki a Iehova, kua mavehe mai a ia to “lahi foki e totogi” ka foaki ma tautolu. (Salamo 19:11) Ē, fifili ke omaoma ki a Iehova mo e fakakite ko Satani ko e pikopiko. Fekafekau ki a Iehova, nakai ha ko e tau palepale anoiha, ka e ha ko e fakaalofa loto katoatoa. To eke a koe mogoia mo kapitiga mooli he Atua!