Tuku Fakatokoluga e Iopu e Higoa a Iehova

“Kia monuina ai e higoa a Iehova.”—IOPU 1:21.

1. Ko hai ne liga tohia e tohi a Iopu, ti ko e magaaho fe?

KAVI ke 40 e tau he moui a Mose he mogo ne hola a ia i Aikupito ha ko e ita ha Farao ti nofo ai ki Mitiana. (Gahua 7:23) He nofo a ia he motu ia, liga logona e ia e tau tala ke he tau kamatamata a Iopu, ne nofo tata mai he motu ko Usa. Fai tau he mole, he tata atu a Mose mo e motu ko Isaraela ki Usa kua teitei oti e fenoga he tutakale, ne liga iloa e Mose e tau tau fakahiku a Iopu. Hagaao ke he aga fakamotu Iutaia ne tohia e Mose e tohi a Iopu he fai magaaho he mole e mate a Iopu.

2. Ko e heigoa e tau puhala ne kua fakamalolō ai e tohi a Iopu ke he tau fekafekau a Iehova he vahā foou nei?

² Kua fakamalolō he tohi a Iopu e tua he tau fekafekau he Atua he vahā foou nei. Ke he tau puhala fe? Kua lagomatai he tala a tautolu ke maama e uho lahi he tau mena ne tutupu he lagi mo e peehi e matakupu lahi mahaki he pule katoatoa he Atua ke he lagi mo e lalolagi. Ko e tala ha Iopu kua fakahokulo foki e maamaaga ha tautolu ke he mena ne putoia he fakatumau ke mahani fakamooli mo e lagomatai a tautolu ke moua e kakano ne fakaatā e Iehova he falu magaaho e tau fekafekau haana ke matematekelea. Lafi ki ai, ko e tohi a Iopu kua fakakite ko Satani ko e Tiapolo ko e matapatu Fī a Iehova mo e fī he tau tagata. Kua fakakite foki he tohi ko e tau tagata nakai mitaki katoatoa tuga a Iopu kua maeke ke fakamooli tumau ki a Iehova pete e kamatamata vevela. Kia kumikumi a tautolu ke he falu mena tutupu ne fakamaama he tohi a Iopu.

Kamatamata e Satani a Iopu

3. Ko e heigoa ne iloa e tautolu hagaao ki a Iopu, ti ko e ha ko e matafī ha Satani a ia?

³ Ko Iopu ko e tagata monuina mo e talahaua, ko e tupuna ne mahani mitaki. Ne mooli ko e tagata fakatonu lilifu a ia ne kapitiga ke he tau tagata nonofogati. Aoga lahi ai, ne matakutaku a Iopu ke he Atua. Ne fakamaama hagaao ki a Iopu ko e tagata ne ‘mahani hakohako, mo e mahani tonu, ne matakutaku ke he Atua, mo e kalo kehe mo e tau mena kelea.’ Ko e mahani Atua fakamooli a Iopu—nakai ko e monuina mo e talahaua haana—ne taute a ia mo matafī ke he tau totokoaga a Satani ko e Tiapolo.—Iopu 1:1; 29:7-16; 31:1.

4. Ko e heigoa e mahani fakamooli?

⁴ Ko e tala he kamataaga he tohi a Iopu ne fakamaama e fakapotopotoaga he lagi ne tutū ai e tau agelu ki mua a Iehova. Ne ha ha i ai foki a Satani, ti tukupau e ia a Iopu. (Totou Iopu 1:6-11.) Pete ne totoku e Satani e tau koloa a Iopu, ne hagaaki e onoonoaga haana ke paleko e mahani fakamooli a Iopu. Ko e kupu “mahani fakamooli” kua ha ha i ai e manatu he mahani tonu, mahani hakohako, mo e tututonu. He fakaaoga he Tohi Tapu, kua kakano e mahani fakamooli he tagata ko e katoatoa he loto fakamooli ki a Iehova.

5. Ko e heigoa ne talahau e Satani hagaao ki a Iopu?

⁵ Ne talahau a Satani ko e tapuaki a Iopu ke he Atua ne fakavē ke he mahani lotokai, nakai ke he mahani fakamooli. Ne tuahā a Satani to fakamooli ni a Iopu ki a Iehova ha ko e matutaki atu e Atua ke palepale mo e puipui a ia. Ke foaki e tali ke he tukupau a Satani, ne fakaatā e Iehova a Satani ke favale ke he tagata fakamooli ia. Ko e fua ne tupu he taha aho, ne iloa e Iopu kua kaihā po ke tamate e tau fuifui manu haana, kua kelipopo e tau fekafekau haana, ti mamate e tau tama tokohogofulu haana. (Iopu 1:13-19) Mahala nakai a Iopu ke he favale a Satani? Ne fakamaama he tohi omoomoi e tali atu a Iopu ke he malaia haana: “Ne foaki mai ai e Iehova, kua uta kehe foki e Iehova; kia monuina ai e higoa a Iehova.”—Iopu 1:21.

6. (a) Ko e heigoa kua tupu he magaaho ne ha ha i ai foki e fakapotopotoaga he lagi? (e) Ko hai ne tokaloto ki ai a Satani he magaaho ne paleko e ia e mahani fakamooli a Iopu ki a Iehova?

⁶ Fakamui, ne ha ha i ai foki e fakapotopotoaga he lagi. Ne liu foki a Satani tukupau a Iopu, he pehē: “Ko e kili ke totogi aki e kili; ko e tau mena oti foki ha ha he tagata, to ta age e ia ke totogi aki hana moui. Ka e fakaolo atu e koe hau a lima mo e piki atu ke he hana tau hui motua mo e hana kakano, po ke vagahau kelea atu nakai a ia kia koe ki mua hau.” Mailoga ne fakalaulahi atu foki e Satani e tau tukupau haana. He talahau, “Ko e tau mena oti foki ha ha he tagata, to ta age e ia ke totogi aki hana moui,” ne nakai ni paleko he Tiapolo e mahani fakamooli ha Iopu ka e pihia foki ke he tau “tagata” kua tapuaki ki a Iehova. Mole ia, ne fakaatā he Atua a Satani ke fakalauia a Iopu aki e gagao kelea lahi. (Iopu 2:1-8) Ka e nakai ko e katoatoaaga a ia he tau kamatamata a Iopu.

Fakaako Mai he Tuaga a Iopu

7. Ko e heigoa e tau puhala ne peehi he hoana mo e tau tagata ahiahi ha Iopu a ia?

⁷ Fakamua, ne matematekelea lahi foki e hoana a Iopu tuga e matematekelea he taane haana. Ko e mamate he tau tama haana mo e malona e tau koloa he magafaoa kua fakamamahi lahi a ia. Kua liga mamahi lahi a ia ke kitia e taane haana he matematekelea he gagao kelea lahi. Ne tagi a ia ki a Iopu: “Kua taofi agaia kia e koe hau a mahani [“fakamooli,” NW]? Kia vagahau kelea a a koe ke he Atua, mo e mate ai.” Ati hohoko mai e tau tagata taane tokotolu—ko Elifasa, Pilitati, mo Sofara—ne lata ke foaki e fakamafanaaga ki a Iopu. Ka e fakaaoga e lautolu e tau fakakakano fakahehē mo e fakakite ko e “tau tagata fakamafana fakahukia.” Ma e fakatai, ne tala age a Pilitati kua taute he tau tama a Iopu e mena kelea ti kua latatonu ni a lautolu ke mamate. Ne hagaao a Elifasa ko e matematekelea a Iopu ko e fakahala he tau agahala kua mole. Ne hūhū toko foki e ia po ke uho e fakatumau he mahani fakamooli ha lautolu ke he Atua! (Iopu 2:9, 11; 4:8; 8:4; 16:2; 22:2, 3) I lalo he peehiaga mamafa ia, ne fakatumau e mahani fakamooli a Iopu. Mooli, liga kua hehē a ia he fuluhi ke “talahaua e ia a ia kua tututonu, ka e nakai ko e Atua.” (Iopu 32:2) Ka kua fakatumau ni a ia ke tua fakamooli ke he tau mena oti kana.

8. Ko e heigoa e fifitakiaga mitaki ne foaki e Elihu ma e tau tagata fakatonu he vahā nei?

⁸ Matutaki atu ai, ne totou e tautolu hagaao ki a Elihu, ne hau foki ke feleveia mo Iopu. Ne fanogonogo fakamua a Elihu ke he taufetoko ne talahau e Iopu mo e haana tau kapitiga tokotolu. Pete kua tote e tau he moui a Elihu ke he tau tagata taane tokofā, ne fakakite e ia e iloilo ne mua atu. Ne vagahau fakalilifu a ia ki a Iopu he fakaaoga e higoa ha Iopu. Ne nava a Elihu ki a Iopu ha ko e puhala hakohako haana. Ka e pehē foki a ia hagaao ki a Iopu kua hagaaki lahi a ia he lali ke fakamooli e mahani hakohako ni haana. Ati fakamafana e Elihu a Iopu kua uho lahi e fekafekau tua fakamooli tumau ke he Atua. (Totou Iopu 36:1, 11.) Ko e fifitakiaga mitaki mooli ma lautolu ne lata ke foaki e fakatonuaga he vahā nei! Ne fakakite e Elihu e fakauka, fanogonogo fakamitaki, nava ke he mena kua lata, ti foaki e fakatonuaga atihake.—Iopu 32:6; 33:32.

9. Lagomatai fēfē e Iehova a Iopu?

⁹ Fakahiku, ne ahiahi atu a Iehova ki a Iopu. Ne pehē e tohi: “Ti tali mai ai a Iehova mai he afa kia Iopu.” He fakaaoga e tau fufuta hūhū, ne lagomatai totonu ka e mauokafua e Iehova a Iopu ke fakahako e manamanatuaga haana. Ne talia makai e Iopu e akonaki, he talahau: “Kua kelea ni au . . . mo e tokihala ai au ke he efuefu mo e efuefuafi.” He mole e tutala a Iehova ki a Iopu, ne fakakite e Ia e ita Haana ke he tau kapitiga tokotolu ha kua ‘nakai vagahau mo e tonu’ a lautolu. Kua lata a Iopu ke liogi ma lautolu. Ti “kua oti he liogi a Iopu ha ko e tau kapitiga hana, ti liuaki e Iehova e paeaaga hana. Ne tamai fakaloga ai foki e Iehova e tau mena kia Iopu, ko e tau mena oti ha ha ia ia fakamua kua takiua.”—Iopu 38:1; 40:4; 42:6-10.

Hokulo Fēfē e Fakaalofa ha Tautolu ki a Iehova?

10. Ko e ha ne nakai fakaheu po ke moumou e Iehova a Satani?

¹⁰ Ko Iehova e Tufuga he lagi mo e lalolagi katoatoa, ko e Pule Katoatoa he tau tufugatia oti. Ko e ha ne nakai fakaheu e ia e paleko he Tiapolo? Ne iloa he Atua ne nakai ko e fakaheu a Satani po ke moumou a ia ka fakamafola e matakupu ne tupu. Ne tukupau he Tiapolo ko e fekafekau mua atu a Iehova ko Iopu, to nakai tumau ke fakamooli kaeke kua galo e ia e tuaga fakatupe mitaki haana. Ne mauokafua e mahani fakamooli a Iopu ke he kamatamata. Ti tukupau e Satani to fuluhi kehe e ha tagata mai he Atua ka matematekelea fakatino a ia. Ne matematekelea a Iopu, ka e nakai galo e mahani fakamooli haana. Ti eke mooli a Satani mo pikopiko ke he mena ne tupu ke he tagata nakai mitaki katoatoa ia ne mahani tua fakamooli. Ka e kua e falu tagata tapuaki he Atua?

11. Foaki fēfē e Iesu e tali katoatoa ke he paleko a Satani?

¹¹ Ko e tau fekafekau takitaha he Atua ne fakatumau ke he haana a mahani fakamooli pete ni e tau mena ne totoko aki e Satani a lautolu, kua fakakite hagaao ki a ia ni, ko e tau tukupau, he fī nakai tokihala ia kua fakavai. Ne hau a Iesu ke he lalolagi ti foaki e tali katoatoa ke he paleko a Satani. Ko Iesu ko e tagata mitaki katoatoa, tuga ne matua fakamua ha tautolu, ko Atamu. Ko e tua fakamooli a Iesu ke hoko ke he mate ne fakakite katoa ko Satani ko e pikopiko ti ko e tau tukupau haana kua fakavai.—Fakakite. 12:10.

12. Ko e heigoa e magaaho mo e fakamonuina ma e tau fekafekau takitaha a Iehova?

¹² Kua fakatumau ni a Satani ke kamatamata e tau tagata tapuaki a Iehova. Igatia a tautolu mo e magaaho mo e matagahua ke fakakite e mahani fakamooli fakatagata kua fekafekau a tautolu ki a Iehova ha kua fakaalofa a tautolu ki a ia—nakai ha ko e tau kakano lotokai. Onoono fēfē a tautolu ke he matagahua ia? Kua kitia ai e tautolu ko e fakamonuinaaga ke fakamooli ki a Iehova. Kua fakamafana foki ki a tautolu ke iloa kua foaki e Iehova ki a tautolu e malolō ke fakauka, tuga e mena ne tupu ki a Iopu, ne fakakaupā e Ia e tau kamatamata ne fehagai mo tautolu.—1 Kori. 10:13.

Satani—Ko e Fī Totoko mo e Tiaki Taofiaga

13. Ko e heigoa e tau vala tala he tohi a Iopu ne fakakite hagaao ki a Satani?

¹³ Ne fakakite he tau Tohiaga Tapu Heperu e tau vala tala hagaao ke he matagahua fakamā a Satani he paleko a Iehova mo e takitaki fakahehē e tau tagata. He tau Tohiaga Tapu Heleni Kerisiano, kua moua foki e tautolu e tau vala tala hagaao ke he totokoaga a Satani ki a Iehova, ti ako e tautolu i loto he tohi a Fakakiteaga e fakatokolugaaga he pule katoatoa a Iehova mo e moumouaga fakahiku a Satani. Ko e tohi a Iopu kua lafi ke he iloilo ha tautolu ke he puhala totoko a Satani. He ha ha ai a Satani ke he fakapotopotoaga he lagi, ne nakai fakalataha a ia mo e loto ke fakaheke a Iehova. Ne ha ha he Tiapolo e aga fakafiufiu mo e foliaga fakahululoto. He mole e tukupau e ia a Iopu ti moua e fakaatāaga ke kamatamata ai, “ti fano kehe ai a Satani mai mua a Iehova.”—Iopu 1:12; 2:7.

14. Ko e heigoa e aga ne fakakite e Satani ki a Iopu?

¹⁴ Ti fakakite he tohi a Iopu a Satani ko e fī nakai fakaalofa hofihofi noa he tau tagata. He vahāloto he fakapotopotoaga he lagi ne totoku ia Iopu 1:6 mo e fakapotopotoaga ne fakamaama ia Iopu 2:1, ne nakai talahau e lahi he magahala ne mole, he mogo ne kamatamata fakakelea a Iopu. Ko e tua fakamooli a Iopu ati maeke a Iehova ke tala age ki a Satani: “Kua taofi agaia foki e [Iopu] hana mahani [“fakamooli,” NW], pete he fakaohooho mai e koe au kia ia, ke fakahoko noa e au e malaia kia ia.” Ka e nakai talahau e Satani ko e tau tukupau haana kua hepe mooli. Mamao ligo ai, ne loto lahi a ia ke kamatamata fakamamahi foki a Iopu. Ti kamatamata he Tiapolo a Iopu he magaaho ne mautū ai mo e he magaaho ne nofogati ai. Maaliali ai, ne nakai fai fakaalofa hofihofi noa a Satani ma lautolu ne mativa po ke tau tagata ne matematekelea. Ne vihiatia e ia e tau tagata ne mahani fakamooli. (Iopu 2:3-5) Ka e fakakite he tua fakamooli a Iopu kua pikopiko a Satani.

15. Ko e heigoa ne tatai e tau tagata tiaki taofiaga he vahā foou nei mo Satani?

¹⁵ Ko Satani e mena moui fakamua ne tiaki taofiaga. Ko e tau tagata tiaki taofiaga he vahā foou nei kua fakakite e tau aga tuga he Tiapolo. Liga kona e tau manamanatuaga ha lautolu ha ko e aga tuhituhi ke he tau tagata he tau fakapotopotoaga, tau motua Kerisiano, po ke Kau Fakatufono. Ne totoko he falu tagata tiaki taofiaga e fakaaoga he higoa faka-Atua, ko Iehova. Kua nakai fiafia a lautolu ke fakaako hagaao ki a Iehova po ke fekafekau ki a ia. Tuga ha lautolu a matua, ko Satani, ne matafī e tau tagata tiaki taofiaga ke he tau tagata mahani fakamooli. (Ioane 8:44) Ko e mena ia he tau fekafekau ha Iehova ne kalo mai he matutaki oti kana mo lautolu!—2 Ioa. 10, 11.

Tuku Fakatokoluga e Iopu e Higoa a Iehova

16. Ko e heigoa e aga ne fakatātā e Iopu ki a Iehova?

¹⁶ Ne fakaaoga mo e fakaheke e Iopu e higoa a Iehova. Pete foki he loto malipilipi ha ko e ogo kua mamate e tau tama haana, ne nakai talahau e Iopu ha mena ne nakai tonu ke he Atua. Pete ne tuku hehē e Iopu kua galo e tau mena haana ha ko e Atua, ka e tuku fakatokoluga agaia e ia e higoa a Iehova. He taha he tau talahauaga fakatai haana he magaaho fakamui, ne fakapuloa e Iopu: “Kitiala, ko e matakutaku [ki a Iehova], ko e iloilo ni haia; ko e kalo kehe mo e mahani kelea, ko e pulotu ni haia.”—Iopu 28:28.

17. Ko e heigoa ne lagomatai a Iopu ke tumau e mahani fakamooli haana?

¹⁷ Ko e heigoa ne lagomatai a Iopu ke tumau e mahani fakamooli haana? Maaliali ai, ato hoko e tau matematekelea, ne fitā he feaki e ia e fakafetuiaga tata mo Iehova. Pete ne nakai fai fakamooliaga a tautolu kua iloa e ia ne paleko e Satani a Iehova, ne eketaha a Iopu ke tumau e fakamooli. Ne pehē a ia: “Ato hoko ke he aho ke mate ai au nakai toka e au haku a mahani [“fakamooli,” NW].” (Iopu 27:5) Feaki fēfē e Iopu e fakafetuiaga tata nei? Nakai fakauaua ai, ne tokiofa e ia e mena ne logona e ia hagaao ke he tau puhala fehagai he Atua mo Aperahamo, Isaako, mo Iakopo, ko e tau magafaoa mamao haana. He kitekite ke he tufugatia, ne maeke ia Iopu ke iloa loga e tau mahani a Iehova.—Totou Iopu 12:7-9, 13, 16.

18. (a) Fakakite fēfē e Iopu e mahani fakamooli haana ki a Iehova? (e) Ke he tau puhala fe kua muitua e tautolu e fifitakiaga mitaki a Iopu?

¹⁸ Ko e mena ne ako e Iopu ne fakalagalaga e manako haana ke fakafiafia a Iehova. Neke taute he tau tagata he magafaoa haana taha mena kelea ke he Atua po ke “kupu kelea . . . ke he Atua ke he tau loto ha lautolu,” ne foaki tumau e ia e tau poa. (Iopu 1:5) Pete ne kamatamata mamahi, ne vagahau fakamitaki agaia a Iopu hagaao ki a Iehova. (Iopu 10:12) Ko e fifitakiaga mitaki mooli! Kua lata foki ia tautolu ke fakaaoga tumau e iloilo tonu a Iehova mo e haana a tau finagalo. Kua taofi a tautolu ke he fakaholoaga atihake he tau matagahua fakaagaaga pihia tuga e fakaako, ō ke he feleveiaaga, liogi, mo e fakamatala e tala mitaki. Lafi ki ai, kua taute e tautolu e tau mena oti kua maeke ia tautolu ke fakailoa e higoa a Iehova. Ti tuga ni he fakafiafia he mahani fakamooli a Iopu a Iehova, ti kua fakafiafia pihia he mahani fakamooli he tau fekafekau he Atua he vahā nei e loto a Iehova. To fakatutala e matakupu nei he vala tala ka mui mai.

Manatu Nakai e Koe?

• Ko e ha ne futiaki a Iopu ke he onoonoaga ha Satani ko e Tiapolo?

• Ko e heigoa e tau kamatamata ne fakauka a Iopu ki ai, ti tali atu fēfē a ia?

• Ko e heigoa ka lagomatai a tautolu ke tumau e mahani fakamooli tuga a Iopu?

• Ko e heigoa ha tautolu kua ako hagaao ki a Satani mai he tohi a Iopu?

[Fakatino he lau 4]

Ko e tala a Iopu ne fakamataala a tautolu ke he matakupu aoga lahi he pule katoatoa he Atua ke he lagi mo e lalolagi

[Fakatino he lau 6]

Ko e heigoa e tau tuaga ka liga kamatamata e mahani fakamooli haau?