Ne Fakauka a Iopu​—Ti Maeke Foki a Tautolu!

“Kitiala, kua talahau e tautolu kua monuina a lautolu kua fakauka.”​—IAKOPO 5:11.

1. Ko e heigoa ne talahau he taha Kerisiano tino motua hagaao ke he hana tau mena uka?

‘TUTULI he Tiapolo au! Kua logona hifo au tuga na Iopu!’ Mo e tau kupu pihia ne fakailoa e A. H. Macmillan hana tau logonaaga hifo ke he kapitiga tata he matapatu kaina he Tau Fakamoli a Iehova. Ko e Matakainaga Macmillan ne fakaoti hana moui he lalolagi ia Aokuso 26, 1966, he 89 e tau tau he moui. Ne iloa e ia ko e tau mena mitaki he fekafekau mo e mahani fakamoli he tau Kerisiano fakauku tuga a ia to “muimui atu kia lautolu.” (Fakakiteaga 14:13) Kua moli, to fakaholo atu na lautolu ke taute tumau e fekafekauaga a Iehova he liu tu mai ke he moui nakai maeke ke mate i luga he lagi. Kua olioli lahi ai hana tau kapitiga ha kua moua he Matakainaga Macmillan e palepale ia. He tau tau fakahikuhiku hana he lalolagi, pete ni, ne hohoko e tau mena uka kehekehe ki a ia, fakalataha mo e tau vihi he malolo tino ne kua taute ai a ia ke kitia lahi e tau laliaga a Satani ke moumou hana mahani hakohako ke he Atua.

2, 3. Ko hai a Iopu?

² He magaaho ne pehe e Matakainaga Mac­mil­lan ko e logona hifo a ia tuga na Iopu, kua hagaao e tala hana ke he tagata ne kua fakauka ke he tau kamatamata lahi mahaki he tua. Ne moui a Iopu he “motu ko Usa,” kua liga ha ha he fahi tokelau a Arapi. Ko e ohi he tama tane a Noa, ko Semu, ko e tagata tapuaki ha Iehova a ia. Kua tuga ko e hoko e tau kamatamata ki a Iopu he taha magaaho he magahala ne kua mate a Iosefa mo e vaha ne fakakite moli e ia ni ko Mose ko e mahani tonu. He magahala he magaaho ia kua nakai fai tagata he lalolagi ne kua tatai mo e mahani Atua fakamoli a Iopu. Ne onoono a Iehova ki a Iopu ko e tagata mahani hakohako, mahani tonu, tagata matakutaku Atua.​—Iopu 1:1, 8.

³ Ha ko e “mua ue atu foki . . . he tau tagata oti ke he faahi uta,” kua tokologa e tau fekafekau a Iopu, mo e hana tau fuifui manu kua hoko ke he numela 11,500. Ka e kua mua atu lahi e tau maukoloa fakaagaga ki a ia. Ke tuga e tau mamatua mahani Atua he vaha nei, kua ligaliga lahi ko e fakaako e Iopu ke he hana tau tama tane tokofitu mo e tau tamafifine tokotolu hagaao ki a Iehova. Ti pihia foki ni he o tuai a lautolu nakai nonofo he kaina hana, kua eke a ia mo ekepoa he magafaoa he foaki hake e tau poa ma lautolu, neke liga kua agahala a lautolu.​—Iopu 1:2-5.

4. (a) Kua lata he ha e tau Kerisiano ne lauia he favaleaga ke manamanatu ke he tagata ko Iopu? (e) Hagaao ki a Iopu, ko e heigoa e tau huhu ka onoono a tautolu ki ai?

⁴ Ko Iopu e tagata ke manamanatu ki ai e tau Kerisiano ne lauia he tau favale ke maeke ai ke fakamalolo aki na lautolu ni ke fakauka fakatekiteki. “Kitiala!” he tohia he tutaki ko Iakopo. “Kua talahau e tautolu kua monuina a lautolu kua fakauka; kua fanogonogo a mutolu ke he fakauka a Iopu, kua iloa foki e mutolu e fakahikuaga ha he Iki, kua fakaalofa fakalahi mai e Iki mo e hofihofi noa.” (Iakopo 5:11) Ke tuga a Iopu, kua lata e tau tutaki fakauku a Iesu mo e “moto tagata tokologa” he vaha nei ke fakauka ke fahia ke kautu mai he tau kamatamata ke he tua. (Fakakiteaga 7:1-9) Ti, ko e heigoa e tau mena uka ne kua fakauka a Iopu ki ai? Ko e tutupu he ha a lautolu? Mo e maeke fefe ia tautolu ke fai mena aoga ka moua mai he hana tau mena ne fa mahani ki ai?

Ko e Matakupu Kaka Lahi

5. Kua nakai iloa e Iopu, ko e heigoa ne hoko i luga he lagi?

⁵ Ne nakai iloa e Iopu, kua fakatu hake ne fai e matakupu lahi mahaki i luga he lagi. He taha aho “ti o mai ai e tau tama tane he Atua ke tutu ai a lautolu ki mua a Iehova.” (Iopu 1:6) Kua ha ha i ai e Tama fuataha he Atua, ko e Kupu. (Ioane 1:1-3) Kua ha ha i ai foki e tau agelu tututonu mo e tau agelu liuliu ko e “tau tama tane he Atua.” (Kenese 6:1-3) Kua ha ha i ai a Satani, ha ko e mena to nakai hoko hana liti hifo mai he lagi ato mole ai he fakatu hake e Kautu he tau 1914. (Fakakiteaga 12:1-12) He vaha a Iopu, kua fakatu hake e Satani e matakupu kaka lahi. Kua eke hane fai a ia ke talahau e huhu kua fakatuaha ke he tonuhia he pule katoatoa a Iehova ke he Hana tau mena momoui oti kana.

6. Ko e heigoa ne lali a Satani ke taute, mo e tukumale pikopiko fefe e ia a Iehova?

⁶ “Ne hau i fe a koe?” he huhu a Iehova. Ne tali age a Satani: “Kua hau au he fano feliuaki ke he lalolagi, mo e faifano ai.” (Iopu 1:7) Kua fa e kumi tagata a ia ke faiola. (1 Peteru 5:8, 9) He moumou e mahani hakohako he tau tagata ne fekafekau ki a Iehova, kua lali a Satani ke fakakite moli ko e nakai fai tagata ka omaoma katoatoa ke he Atua mai he loto fakaalofa. He tala ke he matakupu, ne huhu a Iehova ki a Satani: “Kua manamanatu nakai a koe ke he fekafekau haku ko Iopu, kua nakai ha ha i ai taha ke tatai mo ia ke he lalolagi, ko e tagata mahani hakohako mo e mahani tonu, kua matakutaku a ia ke he Atua mo e kalo kehe mo e tau mena kelea?” (Iopu 1:8) Kua fakafeleveia e Iopu e tau mahani faka-Atua ne kua mailoga hana nakai mitaki katoatoa. (Salamo 103:10-14) Ka e fia tali kupu a Satani: “Kua matakutaku noa kia a Iopu ke he Atua? Nakai kia pa takai ai e koe a ia, mo e hana fale, katoa mo e hana tau mena oti ke he tau faahi oti? kua fakamonuina e koe e gahua he hana tau lima, kua fakaloga ai foki hana tau manu ke he fonua.” (Iopu 1:9, 10) Ti kua tukumale pikopiko ai he Tiapolo a Iehova he fakahaha ko e nakai fai tagata ne fakaalofa mo e tapuaki ki a Ia he fakaaue lahi ki a Ia ni ka e ko e fakavaivai koloa aki e Ia e tau mena momoui ke fekafekau ki a Ia. Ne fakahaha a Satani ko e fekafekau a Iopu ke he Atua he lotokai ke he tau mena ka moua, nakai mai he loto fakaalofa.

Tukimomo e Satani!

7. Ke he puhala fe ne paleko he Tiapolo e Atua, mo e tali fefe e Iehova?

⁷ “Ka kia,” he talahau mai e Satani, “fakaolo atu a e koe e lima hau mo e pipiki atu ke he hana tau mena oti, ti vagahau kelea ai a ia kia koe ki mua hau ni.” To tali fefe e Atua ke he paleko fakatagata lahi ia? “Kitiala,” he talahau e Iehova. “Ha ha he lima hau e tau mena oti hana, ka ko ia, aua neke fakaolo atu e koe hau a lima kia ia.” Kua pehe e Tiapolo ko e tau koloa oti kana ha Iopu ko e tau mena fakamonuina, ati tupu lahi ai, mo e pa takai he puipuiaga. Kua fakaata he Atua a Iopu ke matematekelea, ka e nakai maeke ke aamo hana tino. Kua fakafekefeke ke taute e mahani kelea mahaki foili, ne toka e Satani e toloaga.​—Iopu 1:11, 12.

8. (a) Ko e heigoa e tau koloa a Iopu ne galo? (e) Ko e heigoa e kupu moli hagaao ke he “afi he Atua”?

⁸ Kua nakai leva, kua kamata e tukimomo faka-Satani. Taha mai he tau fekafekau a Iopu ne tala age ki a ia e tala kelea nei: “Ne toho he tau povi e tau arote ke he fonua; ne kai mena ai foki e tau asini fifine ke he tapa ha lautolu; Ti feoho mai e tau tagata Sihipa, mo e fofo ai a lautolu; kua kelipopo foki e lautolu e tau fekafekau ke he pelu.” (Iopu 1:13-15) Kua uta kehe ai e pa takai he puipuiaga ke he tau koloa a Iopu. Kua teitei ke fakahoko agataha ai, e malolo hakotika fakatemoni, ha ko e mena hokotaki mai foki e taha fekafekau: “Kua to e afi he Atua mai he lagi, kua huhunu ai e tau mamoe mo e tau fekafekau.” (Iopu 1:16) Ko e tevolo fakateteki ha he taute ke tuga ko e Atua ne taute e tau mena matematekelea ia foki ke he hana ni a tau fekafekau! Ha ko e mena hifo mai he lagi e lupa hila, ti kua mukamuka lahi ai ke tuku aki a Iehova, ka e kua moli ni ko e afi ko e mena puna mai he tau temoni.

9. He tomo ai e tau koloa ne lauia fefe e fakafetuiaga a Iopu mo e Atua?

⁹ He fakatumau a Satani ke tukimomo, ne hokotaki atu e taha fekafekau foki kua uta he tau Kaletaia e tau kamela a Iopu mo e kua kelipopo oti e tau kau fekafekau. (Iopu 1:17) Pete ni kua tomo e koloa a Iopu, kua nakai moumou he mena nei hana fakafetuiaga mo e Atua. To maeke nakai ia koe ke fakauka ka galo e tau koloa loga hau ka e nakai moumou hau a mahani hakohako ki a Iehova?

Hoko Fakalutukia e Matematekelea Lahi Mahaki

10, 11. (a) Ko e heigoa ne tutupu ke he fanau tokohogofulu a Iopu? (e) He mole he mamate e fanau a Iopu, fefe hana a onoonoaga ki a Iehova?

¹⁰ Kua nakaila oti e Tiapolo mo Iopu. Kua ha ha agaia ni e taha fekafekau foki ne hokotaki atu: “Ne kai mena mo e inu uaina ai e tau tama tane hau mo e hau e tau tama fifine ke he fale he tagata fakamua ha lautolu; Ti kitiala, ne agi mai e matagi lahi mai he vao, ne pehi mai ke he tau hika ne fa he fale, ti veli ai ni ki luga he fanau, ti mamate ai a lautolu, kua hao au, hoko au ni tokotaha ke tala atu ai kia koe.” (Iopu 1:18, 19) To liga pehe a lautolu ne iloa mena hehe ko e moumouaga ne fakatupu mai he matagi ia ko e ‘gahua ni he Atua.’ Ka e taha e mena, kua aamo he malolo fakatemoni a Iopu he mena kua mua atu e fakamamahi.

¹¹ He momoko lahi mahaki, ne “hehe [e Iopu] hana tapulu, mo e hifi e ia hana ulu; ti fakaveli fakafohifo ai a ia ke he kelekele.” Ka e, fanogonogo la ke he hana tau kupu. “Ne foaki mai ai e Iehova, kua uta kehe foki e Iehova; kia monuina ai e higoa a Iehova.” Kua lafi mai foki he fakamauaga: “Nakai hala a Iopu he tau mena oti na, ti nakai pehe foki a ia kua goagoa e Atua.” (Iopu 1:20-22) Kua kaumahala agaia foki a Satani. Ai kua kaeke kua hohoko ki a tautolu e mauku mo e momoko lahi ha ko e tau fekafekau he Atua? Ko e loto fakamoli lahi nakai fulukovi ki a Iehova mo e falanaki ki a ia ka maeke ai a tautolu ke fakauka ko e tau tagata kua taofi mau e mahani hakohako, tuga ne taute e Iopu. Kua maeke moli a lautolu ne fakauku mo e ha lautolu a tau hoa ne kua ha ha ai e amaamanakiaga ke he lalolagi ke moua ai e fakamafanatiaaga mo e malolo mai he fakamauaga tala nai ke he fakaukaaga a Iopu.

Hane Kaka Lahi e Matakupu

12, 13. He taha toloaga foki i luga he lagi, ne ui a Satani ma e heigoa, mo e fefe e tali he Atua?

¹² Kua nakai leva ne ui foki e Iehova e taha toloaga ki mua hana i luga he lagi. Kua nakai tuai fai fanau a Iopu, ko e tagata tane mativa, kua tuga ko e fakamalaia he Atua, ka e mauokafua agaia ni hana mahani hakohako. Kua moli, ko e mena to nakai talahau fakamoli e Satani ko e tau mena fakavai e tau tukumale hana ke he Atua mo Iopu. He magaaho nai kua teitei logona ai he “tau tama tane he Atua” e taufetoko mo e tali he utauta e Iehova e Tiapolo ke tamai ai e matakupu ke fakakite moli fakaoti.

¹³ He ui ki a Satani ke fai tali, ne huhu a Iehova: “Ne hau i fe a koe?” Ko e tali? “Kua hau au he fano feliuaki ke he lalolagi, mo e faifano ai.” Kua liu ai foki a Iehova ke futiaki e tau onoonoaga ke he fekafekau mahani hakohako, mo e mahani tonu, matakutaku Atua hana ko Iopu, ne kua taofimau agaia hana mahani hakohako. Ne tali e Tiapolo: “Ko e kili ke totogi aki e kili; ko e tau mena oti foki ha ha he tagata, to ta age e ia ke totogi aki hana moui. Ka e fakaolo atu e koe hau a lima mo e piki atu ke he hana tau hui motua mo e hana kakano, po ke vagahau kelea atu nakai a ia kia koe ki mua hau?” Ti kua pehe e Atua: “Kitiala, ha ha he lima hau a ia, ka ko e hana moui kia fakahao ai e koe.” (Iopu 2:2-6) He fakahaha ko e nakaila uta kehe oti e Iehova e tau pa puipui, ne ui a Satani ke aamo e tau huimotua mo e kakano a Iopu. Kua nakai fakaata e Tiapolo ke kelipopo a Iopu; ka e iloa e Satani ko e to fakamamahi he tino gagao a ia mo e taute ai ke tuga ko e matematekelea he fakahala he Atua ma e tau agahala galo.

14. Ko e heigoa ne ta aki e Satani a Iopu, mo e nakai maeke he ha e ha tagata ke fakaokioki a ia ne matematekelea?

¹⁴ He toka ke fano kehe mai he toloaga ia, ne fakaholo atu a Satani mo e loto kelea mahaki foili ne fiafia lahi mahaki. Ne ta e ia a Iopu aki e “gagao fufula kelea, ne kamata mai he tau aloalohui hana, ti hoko atu kehe hana tumuaki ulu.” Kua matematekelea lahi ha a Iopu he fakauka he nofo a ia he efuefu mo e volu aki e ia ni e kapa kapiniu kelekele a ia! (Iopu 2:7, 8) Kua nakai fai ekekafo kua maeke ke lagomatai a ia mai he tatalu mamahi lahi mahaki, teteki lahi, mo e fakama lahi nei, ha ko e mena fakatupu he malolo faka-Satani. Ko Iehova ni hokoia kua maeke ke fakamaulu a Iopu. Kaeke ko koe ko e fekafekau tatalu he Atua, kia nakai nimo kua maeke e Atua ke lagomatai a koe ke fakauka mo e maeke ke foaki atu ki a koe e moui he lalolagi fou nakai fai gagao.​—Salamo 41:1-3; Isaia 33:24.

15. Ko e heigoa ne ole fakamakamaka e hoana a Iopu ke taute e ia, mo e fefe hana tali?

¹⁵ Ati hoko fakamui, ne pehe e hoana a Iopu: “Kua taofi agaia kia e koe hau a mahani hakohako? kia vagahau kelea a a koe ke he Atua, mo e mate ai a koe.” Kua fakakite mai he “mahani hakohako” e loto fakamoli ne hakohako, mo e liga kua tuina hana tau kupu ke taute aki a Iopu ke kaialu ke he Atua. Ka e tali a Iopu: “Kua vagahau mai e koe, tuga he vagahau he taha he tau fifine goagoa; ke talia kia e tautolu e tau mena mitaki mai he Atua, ka e nakai kia talia ai foki e tautolu e tau mena kelea?” Kua nakai gahua foki e lagatau nei ha Satani, ha kua talahau mai ki a tautolu: “Nakai hala ai a Iopu ke he hana tau laugutu he tau mena oti na.” (Iopu 2:9, 10) Ka e liga to pehe e tau faoa he magafaoa tino ne totoko ko e taute mena fakagoagoa a tautolu he mategugu lahi he tutuli e tau folia Kerisiano mo e ole fakamakamaka ki a tautolu ke tiaki e Atua ko Iehova. Ke tuga a Iopu, kua maeke a tautolu ke fakauka ke he kamatamata pihia kakano he fakaalofa a tautolu ki a Iehova mo e manako ke fakaheke hana higoa tapu.​—Salamo 145:1, 2; Heperu 13:15.

Tokotolu e Tagata Fakavai Fakatokoluga

16. Ko hai ne pehe ko e o mai ke fakamafana a Iopu, ka e fakaholoholo fefe e Satani a lautolu?

¹⁶ Ko e mena ne kua kitia fakamui ko e taha lagatau faka-Satani foki, kua tokotolu e “tau kapitiga” ne pehe ko e o mai ke fakamafana a Iopu. Taha ko Elifasa, liga mai he ohi a Aperahamo ia Esau. Ha kua vagahau fakamua ai a Elifasa, liga ko e uluaki a ia ia lautolu. Kua ha ha i ai foki, a Pilitati, mai he ohi a Sua, ko e taha tama tane a Aperahamo mai ia Ketura. Ko e tagata tane ke tolu aki ko Sofara, ne ui ko e tagata Naama ke fakakite aki hana magafaoa po ke kaina ne nonofo mau ai, liga he fahi tokelau-lalo i Arapi. (Iopu 2:11; Kenese 25:1, 2; 36:4, 11) Kua tuga na lautolu ne lali ke taute e Tau Fakamoli a Iehova ke tiaki e Atua he vaha nei, ko e kau tokotolu nei mena fakaholoholo e Satani he lali ke taute a Iopu ke talahau fakatonu ko e agahala ka ko e tau tukumale pikopiko ni mo e moumou ai hana mahani hakohako.

17. Ko e heigoa ne taute he kau tokotolu ne ahi atu, mo e heigoa ne nakai taute e lautolu ke fitu e aho mo e fitu e po?

¹⁷ Kua fakatata he kau tokotolu e momoko lahi he tagi aue, hehe ha lautolu a tau tapulu, mo e gana ai e tau efuefu he tau ulu ha lautolu. Ka e kua nonofo fakalataha ai a lautolu mo Iopu ke fitu e aho mo e fitu e po ka e nakai vagahau e taha kupu fakamafana! (Iopu 2:12, 13; Luka 18:10-14) Ko e kau tokotolu fakavai fakatokoluga nei kua teao noa mo e tau mena fakaagaga kua nakai fai mena fakamafanatia a lautolu ke talahau hagaao ki a Iehova mo e hana tau maveheaga. Ka e, kua hepehepe ha lautolu a tau manamanatu mo e kua mautali ke fakaaoga a lautolu ke totoko ki a Iopu ka nakai leva he mole he fakalilifu a lautolu ke he tau aga maanu tuai ki mua he tau tagata. Ti kua fulufuluola ai, fakamua to oti e tau aho fitu he fakanono ai, kua hau e tagata tane fuata ko Elihu mo e nofo he mena mamao kua maeke ke logona e tau tutalaaga.

18. Kua kumi he ha a Iopu ke moua e mafola he mate?

¹⁸ Ati fakaoti tuai e Iopu e fakanonoiki. He nakai moua e ha fakamafanaaga mai he kau tokotolu ne ahi mai, ne kaialu e ia e aho ne fanau mai a ia mo e fakatuogo ko e ha ne fakaloaloa ai hana moui matematekelea. Kua kumi a ia ke moua e mafola he mate, kua nakai manamanatu ko e to maeke a ia ke liu ke loto olioli moli foki ato mate a ia, ha ko e magaaho nei kua nofogati, maanu, mo e kua kelea lahi e gagao. Ka e nakai toka he Atua ke aamo a Iopu ke hoko ke he mate.​—Iopu 3:1-26.

Kua Tukimomo he Kau Tukumale a Iopu

19. Ke he heigoa ne kua tukumale pikopiko aki e Elifasa a Iopu?

¹⁹ Ne vagahau fakamua a Elifasa he tau fono laga tolu ne kua kamatamata foki e mahani hakohako a Iopu. He hana vagahau fakamua, ne huhu a Elifasa: “Po ko hai foki ne mahani tututonu ka e fakaoti a ia?” Ti pehe ai hana manamanatu fakahiku liga kua taute e Iopu e taha mena kelea ke moua ai e fakahala he Atua. (Iopu, tau veveheaga 4, 5) He hana vagahau ke ua aki, ne fakafiufiu e Elifasa e pulotu a Iopu mo e huhu: “Ko e heigoa kia e mena kua iloa e koe, nakai iloa e mautolu?” Ne fakahaha a Elifasa ko e lali a Iopu ke fakakite ko e mua a ia ni he Mua Ue Atu. He fakaoti hana tukimomomomo ke ua aki, ne ta e ia e fakatino ki a Iopu ko e agahala tuga ne tagata ne tiaki e taofiaga, fakavaivai, mo e fakavaia. (Iopu, veveheaga 15) He hana vagahau fakahiku, ne tukumale pikopiko e Elifasa a Iopu ke he tau holifono loga​—fofo mena, lima pili nakai fakaolo e falaoa mo e vala vai ne kuku lahi a lautolu ne nonofogati, fakapehia e tau takape mo e fanau nakai fai mamatua.​—Iopu, veveheaga 22.

20. Kua hagahaga fefe e tukimomo ha Pilitati ki a Iopu?

²⁰ Ha ko e tagata ke vagahau ke lagauaaki he tau fono ne tolu, ne fa mahani a Pilitati ke muitua ke he matapatu tala ne fakatoka e Elifasa. Kua ku e tau fakamatalaaga a Pilitati ka e mania lahi. Ne tukumale foki e ia e fanau a Iopu he taute mena hepehepe mo e kua lata ai ke mamate. Fakalataha mo e manamanatuaga hepehepe ia, ne fakaaoga e ia e fakataiaga nei: Kua tuga e tau kome mo e tau aaku ne pakupaku mo e mamate he nakai fai vai, ti kua pihia ai foki a “lautolu oti kua nimo ia lautolu e Atua.” Kua moli e talahauaga ia, ka e nakai hagaao ki a Iopu. (Iopu, veveheaga 8) Kua fakavahega e Pilitati e tau matematekelea a Iopu tuga e tau mena ka hohoko ki a lautolu ne mahani kelea. (Iopu, veveheaga 18) He hana vagahau fakaku ke tolu aki, ne taufetoko a Pilitati ko e tagata “ko e uaga” “ko e kelemutu” mo e kua nakai mea ai ki mua he Atua.​—Iopu, veveheaga 25, fakatatai NW.

21. Ko e heigoa ne tukumale aki e Sofara a Iopu?

²¹ Ko Sofara e tagata ke tolu aki ke vagahau he fono. Fa mahani hana tau manamanatu ne talahau ke muitua ke he ha Elifasa mo Pilitati. Ne tukumale e Sofara a Iopu ko e mahani kelea mo e ole fakamakamaka ki a ia ke tuku kehe hana tau mahani agahala. (Iopu, tau veveheaga 11, 20) He mole e tau fono ne ua ne oti e vagahau ha Sofara. Kua nakai fai mena foki a ia ke lafi ke he fono ke tolu aki. Ka e ke he tau magaaho oti ia, ne loto toa a Iopu ke tali ki a lautolu ne tukumale a ia. Ke tuga a nai, he taha magahala ne pehe a ia: “Ko e tau tagata fakamafana fakahukia a mutolu oti. To nakai kia fakahiku ai e tau kupu fakateaga?”​—Iopu 16:2, 3.

Maeke Ia Tautolu ke Fakauka

22, 23. (a) Ke tuga e mena ne tupu ki a Iopu, to lali fefe e Tiapolo ke moumou ha tautolu a mahani hakohako ke he Atua ko Iehova? (e) Pete ni ko e fakauka a Iopu ke he tau kamatamata kehekehe, ko e heigoa ka liga huhu a tautolu hagaao ke he hana aga?

²² Ke tuga a Iopu, kua liga fehagai a tautolu mo e loga he tau mena uka he magaaho taha, mo e kua liga fakaaoga e Satani e fakaloleloleaga po ke falu mena moli he hana laliaga ke moumou ha tautolu a tau mahani hakohako. To liga lali a ia ke fuluhi kehe a tautolu ke totoko ki a Iehova kaeke kua hoko ki a tautolu e mena uka fakafua tupe. Kaeke kua mate taha fakahele po ke kua fa mahani a tautolu ke nakai mitaki e malolo tino, to liga lali a Satani ke fakalagalaga a tautolu ke tuku aki e Atua. Ke tuga e tau kapitiga a Iopu, liga to tukumale pikopiko foki he taha tagata a tautolu. Ke tuga he fakakite mai he Matakainaga Macmillan, liga kua ‘fa e tutuli’ e Satani ‘a tautolu,’ ka e maeke a tautolu ke fakauka.

²³ Tuga he fita he kitia e tautolu, kua fakauka a Iopu ke he hana tau mena uka kehekehe. Ka e taha e mena ne fetamakina ni ka ia ke fakauka? Ne malipilipi kia hana agaga? Kia o mai la a tautolu ke kitia kaeke ko e galo oti moli kia e tau amaamanakiaga a Iopu.

To Tali Fefe a Koe?

◻ Ko e heigoa e matakupu lahi mahaki ne lagaki hake e Satani he vaha a Iopu?

◻ Ko e heigoa ne kua kamatamata lahi mahaki aki a Iopu?

◻ Ko e heigoa he “tau kapitiga” tokotolu a Iopu ne kua tukumale aki a ia?

◻ Ke tuga e mena ne tupu ki a Iopu, to liga lali fefe a Satani ke moumou ha tautolu a mahani hakohako ki a Iehova?

[Fakatino he lau 6]

A. H. Macmillan