Ko e Fakatikai he Senetenari 20 Aki ke he Atua

“Kua talia he tau tagata e manatu kua nakai fai Atua mo e kua fakatokatoka e tau momoui ha lautolu ke tutokotaha, ke he mitaki po ke ke he kelea, mo e nakai fai manamanatuaga ke he Atua.”​—One Hundred Years of Debate Over God​—The Sources of Modern Atheism.

PETE ni kua fulufuluola fakamua, ko e akau tokoluga kua eke he magaaho fakamui ke matapau. Ko e hana a ha ha i ai kua fa mahani ki ai; ko e hana a tokoluga kua nakai tuai ofoofogia.

Kua tatai ai mo e nakai talitonu Atua. Pete ni kua fakalagalaga e lahi he taufetoko he magahala he senetenari 19 aki, ko e fakatikai ke he ha ha i ai he Atua kua nakai ke ofo po ke tupetupe ki ai he vaha nei. Ko e vaha fakauka nei kua fakaata e nakai talitonu Atua ke ha ha ke he fakalatahaaga mafola mo e talitonu ke he Atua.

Nakai ha ko e tokologa e tau tagata ne kua fakatikai pauaki e Atua; kua kehe lahi, ko e fua he vili mai he 11 e tau motu, mai i Amerika katoa, Europa, mo Asia ne fakakite ko e, ke he fakaavelesi, lahi fakatote mai he 2 e pasene ne talahau ko e nakai talitonu ke he Atua. Ka e pete ni ia, ko e aga nakai talitonu ke he Atua kua laulahi​—pihia foki ke he tokologa ia lautolu ne talitonu ko e ha ha i ai e Atua. Maeke ai fefe ke pihia?

Fakatikaiaga he Pule Malolo he Atua

“He falu magaaho ko e nakai talitonu Atua kua hagaao atu ni ke he tiakiaga po ke nakai fakanogonogo ke he Atua,” he talahau he The Encyclopedia Americana. Ke he kakano nei, kua tuku mai he The New Shorter Oxford English Dictionary e fakamaamaaga ke ua aki ne mui mai ke he “nakai talitonu ke he Atua”: “Ko e tagata ne fakatikai e Atua ke he tau mahani; ko e tagata nakai iloa e Atua.”​—Tau fakalifa ha tautolu.

E, kua liga talahau mai he nakai talitonu Atua e fakatikai ke he ha ha i ai he Atua po ke ke he hana a pule malolo po ke mena ua ia. Kua hagaao atu e Tohi Tapu ke he aga nakai talitonu nei ke he Atua ia Tito 1:16: “Kua talahau e lautolu kua iloa e lautolu e Atua, ka kua fakatikai e lautolu a ia ke he tau gahua ha lautolu.”​—Fakatatai Salamo 14:1.

Ko e tiakiaga pihia ke he pule malolo he Atua kua maeke ke kitia ka liu onoono atu ke he tau tagata tokoua fakamua. Kua iloa e Eva e ha ha i ai he Atua; ka e, manako a ia ke ‘tuga ne Atua ke iloa ai e mitaki mo e kelea.’ Kua fakahaha ko e maeke a ia ‘ke pule na ia ki a ia ni’ mo e fakatu ni e hana a matafakatufono ke he mahani mitaki. Magaaho fakamui ne fakalataha atu a Atamu ki a Eva ke he fakatikai nei he pule malolo he Atua.​—Kenese 3:5, 6.

Kua laulahi ka e aga ia he vaha nei? E. Ko e fakagalogalo he nakai talitonu Atua kua kitia ke he kumikumiaga ma e tutokotaha. “Ko e tau tagata he vaha nei kua fiu tuai he nonofo ke he levekiaga he Atua,” he kitia he tohi One Hundred Years of Debate Over God​—The Sources of Modern Atheism. “Ko lautolu . . . kua manako ke moui atanoa.” Ko e matafakatufono he Tohi Tapu ke he mahani mitaki kua tiaki ke tuga kua nakai fai kakano, mo e nakai moli. Ko e tau manamanatuaga he tokologa kua tuga he Aikupito ko Farao ne kua talahau fakamakamaka: “Ko hai kia a Iehova kia fanogonogo ai au ke he hana tau kupu . . . ? Nakai iloa e au a Iehova.” Ne tiaki e ia e pule malolo ha Iehova.​—Esoto 5:2.

Ko e Fakatikaiaga ha Kerisitenitome ke he Atua

Ko e fakatikai kelea lahi mahaki ke he pule malolo he Atua kua mai he vahega takitaki lotu ha Kerisitenitome, ne kua hukui e mahani toka tuai he tagata ma e tau kupu moli ne mea he Tohi Tapu. (Fakatatai Mataio 15:9.) Ke lafi ki ai, kua lago e lautolu e felakutaki fakamaligi-toto he senetenari 20 aki, ti kua tiaki e poaki faka-Tohi Tapu ke fakakite e fakaalofa moli.​—Ioane 13:35.

Kua fakatikai foki he vahega takitaki lotu e Atua he tiaki hana tau fakatufono ke he mahani mitaki​—tuga kua fakamoli, ke fakatai ki ai, he fakatumau ke hopo fakafili ha ko e mahani fakatane mo e fifine he tau akoako ke he tau tama ikiiki. Ko e tuaga a Kerisitenitome kua tatai mo e ha Isaraela i tuai mo Iuta. “Kua puke e motu ke he toto, kua puke e maga ke he mahani hepehepe,” he tala age ke he perofeta ko Esekielu, “ha kua pehe a lautolu, Kua tiaki e Iehova e lalolagi; kua nakai ni fioia e Iehova.” (Esekielu 9:9; fakatatai Isaia 29:15.) Ti kua pihia ai ne tokologa kua tiaki katoatoa e tau lotu a Kerisitenitome! Ka e kua lata nakai a lautolu ke tiaki e talitonu ke he Atua?

Ko e Kehe he Lotu Moli

He 1803, ko e pelesiteni he Tau Fahi Kaufakalataha ko Thomas Jefferson ne tohi: “Ke he tau mahani kelea he faka-Kerisiano, ko au, moli, kua totoko ki ai; ka e nakai ke he tau poakiaga moli ha Iesu ni.” E, kua ha ha i ai e fekehekeheaga ha Kerisitenitome mo e faka-Kerisiano. Loga e tau fakaakoaga ha Kerisitenitome kua fakave ke he tau kupu toka tuai he tau tagata. Kua kehe, ne fakave ni e taofiaga he tau Kerisiano moli ke he Tohi Tapu. Ti, ko e mena haia ne tohi e Paulo ke he tau Kolose he senetenari fakamua kua lata a lautolu ke moua e “maama mitaki,” “pulotu,” mo e “loto matala kua fakalata ke he Agaga.”​—Kolose 1:9, 10.

Ko e mena a nei ne kua lata ia tautolu ke amanaki mai he tau Kerisiano moli, ha kua poaki age e Iesu ke he hana a tau tutaki: “Ke eke e tau motu oti kana mo tutaki, ti papatiso atu a lautolu . . . Ti fakaako atu a mutolu kia lautolu kia omaoma ke he tau mena oti ne tala atu e au kia mutolu.”​—Mataio 28:19, 20.

He vaha nei, kua taute he Tau Fakamoli a Iehova e poaki nei ke he 231 e motu he lalolagi. Kua fakaliliu e lautolu e Tohi Tapu ke he 12 e tau vagahau mo e kua molea atu e lomi ke he 74,000,000 he tau lagakiaga. Ke lafi ki mua, he puhala mai he polokalama fakaako Tohi Tapu he kaina, kua lagomatai e lautolu he magaaho nei ti molea e 4,500,000 tagata ke ‘omaoma ke he tau mena oti ne tala mai e Iesu.’

Ko e fua he polokalama fakaako nei kua kaputia lahi e lauiaaga. Kua tamai e fakamaamaaga moli, ha kua fakave, nakai ke he tau manamanatu he tagata, ka e ke he pulotu he Atua. (Fakatai 4:18) Ke lafi ki mua, kua lagomatai ai e tau tagata he tau motu mo e tau lanu tagata oti ke taute e tau mena ne nakai maeke ai he “Fakamaamaaga” he tagata​—ke “fakatapulu . . . ke he tagata fou” ke maeke ia lautolu ke ati hake e fakaalofa moli ke he taha mo e taha.​—Kolose 3:9, 10.

Ko e lotu moli kua kautu tuai ke he senetenari 20 aki ha tautolu. Kua nakai fakatikai e Atua​—nakai ke he hana a ha ha i ai po ke hana a pule malolo. Uiina e mautolu a koe ke kitia ne koe e mena nei ha ko koe ni he ahi atu ke he taha mai he tau Fale Kautu he Tau Fakamoli a Iehova.