Vala 4
Kua Fakatikai e Kerisitenitome e Atua mo e Tohi Tapu
1, 2. Ko e ha ne nakai fakalilifu falu tagata ke he Tohi Tapu, ka ko e heigoa ne talahau he Tohi Tapu?
Ko e tau tagata he tau motu loga kua fakamamao mai he Tohi Tapu mo e nakai fakalilifu ki ai ha ko e tau mahani kelea ha lautolu ne talahau teao ke mumuitua ki ai. He falu a motu kua talahau ko e Tohi Tapu ko e tohi kua takitaki atu ke he felakutaki, ko e tohi he tagata tea, mo e ko e tohi kautaha ke he pule malolo he tau motu kehe. Ka kua hepe e tau manatu nei.
2 Ko e Tohi Tapu, ne tohia he Loto Uho he Fahi Uta, kua nakai lago ke he tau felakutaki he tau motu kehe mo e fofoaga ne taute he vaha loa ke he higoa he faka-Kerisiano. Ke he taha fahi, ka totou e Tohi Tapu mo e ako e tau fakaakoaga faka-Kerisiano moli ne fakaako e Iesu, to kitia e koe kua fakatikai lahi he Tohi Tapu e tau felakutaki, mahani feuaki, mo e ekefakakelea ke he falu. Ti ko e tau tagata lotokai ne hepehepe, nakai ko e Tohi Tapu. (1 Korinito 13:1-6; Iakopo 4:1-3; 5:1-6; 1 Ioane 4:7, 8) Ti kia nakai fakaata e mahani fakahanoa he tau tagata fulukovi ne nonofo mamao ke he hatakiaga mitaki he Tohi Tapu ke taofi a koe he moua e aoga mai he tau mena uho i loto.
3. Ko e heigoa ne talahau he tau mena tutupu he fakamauaga tuai hagaao ki a Kerisitenitome?
3 Putoia kia lautolu ne nakai nonofo ke he Tohi Tapu ko e tau tagata mo e tau motu a Kerisitenitome. Kua kitia a “Kerisitenitome” mo vala he lalolagi ne holofa ai e faka-Kerisiano. Kua lahi ni ki a lautolu he Fahi Lalo he lalolagi mo e tau fakaakoaga he tau tapu i ai, ne kua kamata ke mahuiga ke he kavi he senetenari ke fa aki V.N. Kua ha ha he Kerisitenitome e Tohi Tapu ke he tau senetenari, mo e piu e tau akoako hana ke fakaako mai ai mo e eke mo tau hukui he Atua. Ka e fakaako nakai he tau akoako mo e tau misionare a Kerisitenitome e kupu moli? Fakakite moli kia he tau gahua ha lautolu e Atua mo e Tohi Tapu? Haia moli kia e faka-Kerisiano he Kerisitenitome? Nakai. Tali mai he kamataaga he lotu hana he senetenari ke fa aki, ne kitia moli a Kerisitenitome ko e faitaua ke he Atua mo e ke he Tohi Tapu. E, kua kitia moli ai he tau mena tutupu he fakamauaga tuai kua fakatikai e Kerisitenitome e Atua mo e Tohi Tapu.
Tau Taofiaga Nakai Faka-Tohi Tapu
4, 5. Ko e heigoa e tau taofiaga nakai faka-Tohi Tapu ne fa e fakaako he tau lotu?
4 Ko e tau matapatu taofiaga a Kerisitenitome kua fakave nakai ke he Tohi Tapu ka e ke he tau tala he vaha i tuai—mai i Heleni, Aikupito, Papelonia, mo e falu foki. Ko e tau fakaakoaga tuga e solu he tagata ne nakai maeke ke mate, fakakikiveka tukulagi he afi i helo, pulekatolia, mo e Tolu Taha (tolu e tagata ka e taha ne ulu Atua) kua nakai moua i loto he Tohi Tapu.
5 Ke fakatai ki ai, onoono atu la ke he fakaakoaga to fakakikiveka tukulagi e tau tagata kelea he afi i helo. Fefe a koe ke he manatu nei? Kua kitia he tokologa mo mena fakalialia. Kua nakai mitaki e mena ia he mailoga e lautolu ke fakakikiveka tukulagi he Atua e tau tagata, tokai a lautolu ke mamahi tukulagi. Ko e manatu kelea muitui pihia kua mamao mai he Atua he Tohi Tapu, “ha ko e Atua ko e fakaalofa a ia.” (1 Ioane 4:8) Kua maaliali ai e Tohi Tapu ko e fakaakoaga pihia ‘nakai ko e manatu’ he Atua Mua Ue Atu.—Ieremia 7:31; 19:5; 32:35.
6. Fakakite fefe he Tohi Tapu e hepe he fakaakoaga he solu nakai maeke ke mate?
6 He vaha nei loga e tau lotu, putoia ai e tau lotu a Kerisitenitome, ne fakaako kua igatia e tau tagata mo e solu nakai maeke ke mate, ne kua o ke he lagi po ke ki helo ka mamate ai. Nakai ko e fakaakoaga he Tohi Tapu anei. Ka kua talahau fakamaaliali mai e Tohi Tapu: “Ko lautolu kua momoui, kua iloa e lautolu to mamate a lautolu; ka ko lautolu ne mamate nakai iloa e lautolu ha mena, . . . ha kua nakai fai gahua, po ke manamanatu, po ke mena kua iloa, po ke iloilo ke he tukuaga, kua fina atu ki ai a koe.” (Fakamatalaaga 9:5, 10) Ti talahau he salamo ka mate e tagata “kua liu a ia ke he kelekele ne eke aki a ia, ko e aho ia ni kua mate ai hana tau manatu.”—Salamo 146:4.
7. Ko e heigoa e fakahala ha Atamu mo Eva he holitu e matafakatufono he Atua?
7 Liu manatu foki la, he magaaho ne holitu e Atamu mo Eva e matafakatufono he Atua, kua nakai eke e fakahala mo moui nakai maeke ke mate. Ha ko e palepale a ia, nakai ko e fakahala! Ka kua tala age kia laua to ‘liliu ke he kelekele, ha ko e mena eke mai ai a laua.’ Ne peehi age e Atua ki a Atamu: “Ha ko e efuefu ni a koe, to liu foki a koe ke he efuefu.” (Kenese 3:19) Ti ko e fakaakoaga he solu nakai maeke ke mate kua nakai ha ha he Tohi Tapu ka kua ta mai e Kerisitenitome he tau tagata nakai ko e tau Kerisiano ne moui fakamua ia lautolu.
8. Fakakite fefe he Tohi Tapu e hepe he taofiaga he Tolu Taha a Kerisitenitome?
8 Ti pihia foki e taofiaga he Tolu Taha a Kerisitenitome ne fakakite e Atua mo Atua tolu taha ne halahu lahi. Ka kua nakai moua foki e fakaakoaga ia i loto he Tohi Tapu. Ke tuga anei, he Isaia 40:25, ne talahau fakamaaliali mai e Atua: “To fakatai e mutolu au kia hai? po ko hai foki ke tatai mo au?” Kua kitia maaliali e tali: Nakai fai ke tatai mo ia. Kua talahau foki he Salamo 83:18: “[Ko] koe, ko e hāu a higoa ko IEHOVA, hoko koe ni kua Mua ue atu ke he lalolagi oti.”—Kikite foki Isaia 45:5; 46:9; Ioane 5:19; 6:38; 7:16.
9. Ko e heigoa ka talahau e tautolu hagaao ke he tau fakaakoaga he Tohi Tapu mo e hagaao ke he tau fakaakoaga he tau lotu a Kerisitenitome?
9 Ko e tau fakaakoaga he Tohi Tapu hagaao ke he Atua mo e hana tau finagalo kua kitia maali, mukamuka ke maama, mo e fakalatalata. Ka kua nakai pihia e tau fakaakoaga he tau lotu a Kerisitenitome. Kua muikau lahi, ne fakahui e lautolu e Tohi Tapu.
Tau Gahua Nakai Mahani Atua
10, 11. Ke he puhala fe ne kehe e tau fakaakoaga he Tohi Tapu ke he mena ne taute he tau lotu a Kerisitenitome?
10 He fakaako foki e tau taofiaga fakavai, kua fakatikai e Kerisitenitome e Atua mo e Tohi Tapu he tau gahua hana. Ko e mena ne taute he tau akoako mo e he tau lotu he tau senetanari kua mole, mo e kua fakatumau ke taute he vaha ha tautolu, kua kehe mai he mena ne manako e Atua he Tohi Tapu ki ai mo e kua kehe mai foki he mena ne fakaako mo e taute he Tagata Fakatu Lotu Kerisiano, ko Iesu Keriso.
11 Tuga anei, ne fakaako e Iesu e tau tutaki hana ke nakai putoia ke he tau mena fakapolitika he lalolagi nei po ke kau ke he tau felakutaki i ai. Ne fakaako foki e ia a lautolu ke loto mafola, ke oma e tau matafakatufono, ke fakaalofa ke he lalu tau katofia tagata mo e nakai fili, ti fakamakai foki ke poa e tau momoui ha lautolu ka e nakai uta e tau momoui he falu.—Ioane 15:13; Gahua 10:34, 35; 1 Ioane 4:20, 21.
12. Ko e heigoa e mena ne talahau e Iesu ka fakamailoga aki e tau Kerisiano moli?
12 E moli, ne fakaako e Iesu ko e fakaalofa ma e falu tagata foki ka fakamailoga e tau Kerisiano moli mai he tau Kerisiano fakavai, tau fakatupua. Ne tala age a ia ki a lautolu ka mumuitua ki a ia: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.”—Ioane 13:34, 35; 15:12.
13, 14. Fakakite he heigoa kua nakai hukui he tau lotu a Kerisitenitome e Atua?
13 Ka e, mai he senetenari ke he taha senetenari, kua putoia e tau akoako a Kerisitenitome ke he tau mena fakapolitika mo e kau atu ke he tau felakutaki he lalu tau motu. Kua kau atu foki a lautolu ke he tau fahi ne fetotokoaki he tau felakutaki he vaha loto a Kerisitenitome ni, tuga e tau felakutaki ne ua he lalolagi he senetenari nei. He tau felakutaki nei ko e tau akoako he tau fahi ua kua liogi ma e kautuaga, ti kua keli ni e lautolu he lotu taha ia ni e tau tagata ha lautolu ne lotu fakalataha he taha motu foki. Ka koe gahua ni a ia he tau fanau a Satani, nakai he Atua, he talahau he Tohi Tapu. (1 Ioane 3:10-12, 15) Ti, pete ni kua talahau e tau akoako mo e ha lautolu a tau tutaki ko e tau Kerisiano, kua fakahui e lautolu e tau fakaakoaga a Iesu Keriso, ne tala age ke he tau tutaki hana ke ‘tuku kehe e pelu.’—Mataio 26:51, 52.
14 Ke he tau senetenari loga kua kaufakalataha e tau lotu mo e tau pule malolo a Kerisitenitome he magaaho ne fakapaea, fakatupa, mo e ekefakakelea he tau motu ia falu tagata he magahala he vaha he pule malolo lahi. Ko e mena ia ne tupu ke he tau senetenari i Aferika. Ne hoko foki e mena nei ki Saina, he magaaho ne taute he tau motu he Fahi Lalo e fakaohoohoaga lahi, tuga he magahala he tau Felakutaki Opiami mo e Totokoaga ha Saina.
15. Ko e heigoa e tau mena kelea ne taute e Kerisitenitome?
15 Ko e tau lotu a Kerisitenitome kua tu mua foki ke favale, fakakikiveka, mo e keli foki e tau tagata ne nakai talia mo lautolu he magahala he tau senetenari ia he fakamauaga tuai ne fakahigoa ko e Tau Vaha Pouliuli. He magahala he Hopo Fakafili Katolika, ne leva ke teau e tau tau, ne poaki ke taute e tau matagahua kelea muitui, tuga e fakakikiveka mo e kelipopo, e tau tagata noa. Ko e tau tagata ne taute e mena nei ko e tau akoako mo e tau tutaki ha lautolu, ne kua pehe oti ko e tau Kerisiano. Ne lali foki a lautolu ke moumou e Tohi Tapu ke nakai maeke ke totou he tau tagata noa.
Nakai ko e Tau Kerisiano
16, 17. Ko e ha kua talahau a tautolu ko e tau lotu nakai ko e tau Kerisiano?
16 Nakai ko e tau Kerisiano e tau motu mo e tau lotu a Kerisitenitome he vaha ia mo e he vaha nei foki. Nakai ko e tau fekafekau he Atua a lautolu. Ne talahau mai hana Kupu omoomoi hagaao ki a lautolu: “Kua talahau e lautolu kua iloa e lautolu e Atua, ka kua fakatikai e lautolu a ia ke he tau gahua ha lautolu, kua eke e tau mena vihiatia, mo e faliuliu, kua nakai aoga a lautolu ke he taha gahua mitaki.”—Tito 1:16.
17 Ne talahau e Iesu kua kitia e lotu fakavai ha ko e tau gahua hana, ko e tau fua. Ne pehe a ia: “A mutolu mo e tau perofeta pikopiko; to o mai a lautolu kia mutolu mo e tau tapulu mamoe, ka ko loto ko e tau luko kakati haia. To iloa mali e mutolu a lautolu ke he tau fua ha lautolu. . . . Pihia foki e tau akau mitaki oti kua takitaha mo e fua mai e tau fua mitaki; ka ko e tau akau kelea kua fua mai e tau fua kelea. Nakai maeke ke fua mai e akau mitaki e tau fua kelea, nakai maeke foki e akau kelea ke fua mai e tau fua mitaki. Ko e tau akau oti kua nakai fua mai e tau fua mitaki, to hio ni mo e tolo ke he afi. Ko e mena foki haia ke iloa ai e mutolu a lautolu [tau perofeta pikopiko] ke he tau fua ha lautolu.”—Mataio 7:15-20.
18. Ko e heigoa ne fua mai he tau fakaakoaga mo e tau gahua ha Kerisitenitome?
18 Ti, ha ko e mena ne fakaako mo e taute e lautolu, kua fakatata he tau lotu a Kerisitenitome e pikopiko ha lautolu he mogo ne talahau kua talitonu ke he Tohi Tapu mo e matakutaku Atua mo e ko e tau Kerisiano. Kua fakatikai e lautolu e Atua mo e Tohi Tapu. He taute pihia, kua fakateteki e lautolu e totou miliona he tau tagata ati fuluhi kehe ai a lautolu mai he talitonu ki a Ia ne Mua Ue Atu.
19. Kua kakano kia e kaumahala a Kerisitenitome kua kaumahala tuai e Atua mo e Tohi Tapu?
19 Pete ni ia, ko e kaumahala he tau akoako mo e tau lotu a Kerisitenitome, pihia foki e kaumahala he falu lotu i fafo a Kerisitenitome, kua nakai kakano ko e kaumahala e Tohi Tapu. Nakai kakano foki kua kaumahala e Atua. Ka kua tala mai e Tohi Tapu ki a tautolu hagaao ki a Ia ne Mua Ue Atu kua moui moli mo e leveki mai a tautolu mo e ha tautolu a vaha anoiha. Kua fakakite mai e puhala ka palepale e ia e tau tagata loto fakamoli ne manako ke taute e mena hako, manako ke kitia e holofa he fakafiliaga tonu mo e mafola he lalolagi katoa. Kua fakakite foki e kakano ne tokai he Atua e mahani kelea mo e matematekelea mo e puhala foki ka tatafi kehe e ia a lautolu he lalolagi ne fakamatematekelea ha lalu katofia, pihia foki a lautolu ne talahau teao ke fekafekau ki a ia ka e nakai.
[Fakatino he lau 17]
“Afi Puhopuho” a Dante
[Credit Line]
Doré’s illustration of Barrators—Giampolo for Dante’s Divine Comedy
[Fakatino he lau 17]
Tolu taha a Kerisitenitome
[Fakatino he lau 17]
Tolu taha faka-Hinitu
[Credit Line]
Courtesy of The British Museum
[Fakatino he lau 17]
Tolu taha a Aikupito
[Credit Line]
Museo Egizio, Turin
[Tau Fakatino he lau 18]
Kehe mai he tau fakaakoaga ha Iesu, ne kau e tau akoako ke he tau fahi ne ua he tau felakutaki
[Credit Line]
U.S. Army photo