Palepale ha Iopu—Ko e Punaaga he Amaamanakiaga
“Ne mua foki he fakamonuina e Iehova a Iopu ke he hana a fakahikuaga ke he hana a kamataaga.”—IOPU 42:12.
1. Taute e Iehova e heigoa ma e hana tau tagata, pete ni kua fakalolelole lahi mahaki he tau mena uka a lautolu?
KO IEHOVA “foki kua taui mai a lautolu kua kumi fakamakutu kia ia.” (Heperu 11:6) Kua omomoi e ia foki hana tau tagata loto fakamoli ke loto malolo ke fakamatala, ke taute pihia foki pete kua fakalolelole he tau mena uka a lautolu ti tuga na lautolu ne mamate. (Iopu 26:5; Fakakiteaga 11:3, 7, 11) Kua pihia moli e mena ne hoko ke he titagata matematekelea ko Iopu. Pete ni kua fatipiko he kau fakamafana fakavai tokotolu, kua nakai fakanono a ia he matakutaku ke he tau tagata. Kua kehe ai, he tuku atu e ia e fakamoliaga loto toa.
2. Pete ni kua matematekelea a lautolu ke he tau favaleaga mo e tau mena uka, fefe fakamui e Tau Fakamoli a Iehova he tau mena uka ha lautolu?
2 Tokologa e Tau Fakamoli a Iehova he vaha nei ne fakamatematekelea he tau favaleaga lahi mahaki mo e tau mena uka lahi kua teitei mamate foki a lautolu. (2 Korinito 11:23) He tuga mogoia a Iopu, kua fakakite e lautolu e fakaalofa ke he Atua mo e taute mau e tau mahani tututonu. (Esekielu 14:14, 20) Kua hao mai foki a lautolu he tau mena uka ia ia lautolu kua mauokafua e tau loto ke fakafiafia a Iehova, kua fakamalolo ke tuku atu e fakamoliaga kua loto toa, mo e pukeina ai ke he amaamanakiaga molioli.
Tuku Age e Iopu e Fakamoliaga Loto Toa
3. Ko e faga fakamoliaga fefe ne tuku atu e Iopu he hana vagahauaga fakahiku?
3 He hana vagahauaga fakahiku, ne tuku atu e Iopu e fakamoliaga kua mua atu mai he mena ne talahau e ia he magaaho fakamua. Ne fakanono katoatoa e ia hana tau kau fakamafana fakavai. Mo e maniania e fakafiufiu he pehe a ia: “Ne lagomatai pihia a koe kia ia kua nakai fai malolo.” (Iopu 26:2) Ne fakaheke e Iopu a Iehova, ko e hana malolo ne tautau noa e fua lalolagi ha tautolu he lagi likoliko mo e tahake ti fakahili e tau aolu uha uli i luga matua he fuga kelekele. (Iopu 26:7-9) Ka e, pehe a Iopu ko e tau mena ofoofogia pihia ‘ko e tau mena hiku mai ai a Iehova a tau puhala.’—Iopu 26:14.
4. Ko e heigoa ne talahau e Iopu hagaao ke he mahani hakohako, mo e ko e ha ne pihia ai e puhala vagahau hana?
4 He iloa tonu hana nakai kelea, ne tukuogo a Iopu: “Ato hoko ke he aho ke mate ai au nakai toka e au haku a mahani hakohako.” (Iopu 27:5) Kua fekeheaki ai mo e tau hokotaki fakavai ne tatolo ki a ia, ne nakai taute e ia ha mena ke lata tonu ai mo e tau mena ne hohoko ki a ia. Ne iloa e Iopu ko e nakai fanogonogo a Iehova ke he tau liogi he tau tagata tiaki taofiaga ka e to taui mitaki a lautolu ne mahani hakohako. Kua liga fakamanatu mai he mena nei ki a tautolu kua teitei tuai e afa ha Amaketo ke uta kehe a lautolu ne mahani kelea he ha lautolu a tau tutuaga malolo, mo e to nakai hao mai a lautolu he lima nakai toka he Atua. Ato hoko mai e magaaho ia, to o fano ai e tau tagata a Iehova he mahani hakohako ha lautolu.—Iopu 27:11-23.
5. Fakamaama fefe e Iopu e pulotu moli?
5 Kia manamanatu la ke he kau iloilo fakalalolagi tokotolu ne fanogonogo he fakakite e Iopu kua fakaaoga he tagata hana tau makaka ke moua e auro, ario, mo e falu koloa uho i lalo he kelekele mo e lalo he tahi. “Ha ko e,” he talahau e ia, ko e “iloilo kua mua hana mitaki ke he tau penina.” (Iopu 28:18) Kua nakai maeke he kau fakamafana fakavai ki a Iopu ke fakatau e pulotu moli. Ko e hana punaaga ko e Tufuga he matagi, he uha, he lupa hila, mo e pakulagi. Kua moli, ko e “matakutaku ke he Iki, ko e iloilo ni haia; ko e kalo kehe mo e mahani kelea, ko e pulotu ni haia.”—Iopu 28:28.
6. Kua vagahau he ha a Iopu hagaao ke he hana moui fakamua?
6 Pete ni hana tau matematekelea, ne nakai oti a Iopu he fekafekau ki a Iehova. Kua kehe he nakai fuluhi kehe mai he Tokoluga Muatua, kua loto lahi e tagata tane mahani hakohako nei ke he hana ‘fakafetui mo e Atua’ ke tuga ai fakamua. (Iopu 29:4) Ne nakai palau a Iopu he magaaho ne liu a ia talahau ko e ‘laveaki e ia e tagata matematekelea, eke e mahani tututonu mo hana tapulu, eke mo matua tane he tau tagata matematekelea.’ (Iopu 29:12-16) Ka e, kehe he tokutoku e ia e tau mena moli he moui hana ko e fekafekau mahani fakamoli a Iehova. Kua ati hake nakai e koe e taha fakamauaga mitaki pihia? Kua moli, ko e fakatapakupaku foki e Iopu, ko e fakavai e tau hokotaki ne talahau he kau tokotolu mahani tututonu fakatupua.
7. Ko e faga tagata fefe a Iopu?
7 Ne feki e tau tagata tane fuata ki a Iopu ‘ko e tau matua ha lautolu ne vihia a ia ke tuku fakalataha, mo e tau kuli he hana a fuifui mamoe.’ Ne fakavihia a ia mo e tauanu a ia. Pete ni kua matematekelea lahi mahaki a ia, kua nakai fakakite ki a Iopu ha mena fakaalofa. (Iopu 30:1, 10, 30) Kakano he loto fakamoli katoatoa a ia ki a Iehova, he pihia ai, kua mea hana logonaaga hifo mo e kua maeke ai ke pehe: “Kia fafati ai au ke he fua tautau tonu, kia iloa ai he Atua haku a mahani hakohako.” (Iopu 31:6) Nakai ko e tagata faivao po ke fatuakiloto kelea a Iopu, mo e nakai kaumahala a ia ke lagomatai a lautolu ne nonofogati. Pete ni ko e maukoloa a ia fakamua, ne nakai falanaki a ia ke he tau muhukoloa he tino. Ko e taha mena foki, ne nakai taute e Iopu e tapuakiaga ke he tupua ta he tuku atu e loto fakamoli ke he tau mena nakai momoui pihia, tuga e mahina. (Iopu 31:26-28) He falanaki ke he Atua, kua fakatoka e ia e fakafifitakiaga mitaki ko e tagata kua taofimau e mahani hakohako. Pete ni hana tau matematekelea oti kana mo lautolu ko e tau fakamafana fakavai ne ha ha i ai, kua taute e Iopu e puipuiaga makaka lahi mo e foaki atu e fakamoliaga kua mua atu e homo. He oti ai hana tau kupu, ne onoono atu a ia ke he Atua ko e hana Ikifakafili mo e Foaki Palepale.—Iopu 31:35-40.
Vagahau a Elihu
8. Ko hai a Elihu, mo e fakakite fefe e ia e mahani fakalilifu mo e loto malolo?
8 He mena tata atu ko e tagata tane fuata ko Elihu, ko e ohi a Nakori ko e tama tane a Pusa mo e kua eke ai ko e matakainaga toto mamao he kapitiga a Iehova ko Aperahamo. (Isaia 41:8) Ne fakakite e Elihu e mahani fakalilifu ke he tau patu tagata tane he fanogonogo ke he tau fahi ne ua he fono. Ka e, vagahau mo e loto malolo a ia ke he tau mena kua hepe a lautolu. Ke tuga a nai, ne velagia hana ita ki a Iopu “he talahaua e ia a ia kua tututonu, ka e nakai ko e Atua.” Kua mua atu e ita lahi ha Elihu ke he kau fakamafana fakavai tokotolu. Kua eke ha lautolu a tau talahauaga ke tuga ko e fakamatalahi e Atua ka e kua ekefakakelea moli ni a ia he kau ke he fahi fetoko a Satani. ‘Kua puke ke he tau kupu’ mo e omomoi ai he agaga tapu, kua eke a Elihu mo fakamoliaga nakai fakamailoga tagata a Iehova.—Iopu 32:2, 18, 21.
9. Fakakite fefe e Elihu e liuaki maiaga a Iopu?
9 Kua mua atu ne manamanatu ha Iopu ke he hana ni a fakamatalahi mai he Atua. Kua moli ni, ne taufetului a ia mo e Atua. He tata lahi e solu a Iopu ke he mate, ka e pete ia, kua ha ha ai e fakakiteaga ke he liuaki maiaga. Fefe e mena ia? Kua pehe, kua hoko a Elihu ke talahau kua uhoaki he fiafia pauaki a Iehova ke age ki a Iopu e fekau nei: “Kia laveaki mai a ia, neke hifo a ia ke he luo; kua moua e au e mena ke taui aki a ia. Kua liu moui mitaki hana tino ke homo atu ke he tino he tama tote; to liu foki a ia ke he hana vaha fuata.”—Iopu 33:24, 25.
10. Lahi fefe e kamatamataaga a Iopu, ka e heigoa kua iloa moli e tautolu ke he kitiaaga ia 1 Korinito 10:13?
10 Ne fakahako e Elihu a Iopu he talahau ko e nakai fai aoga ka fiafia ke he Atua he fakatumau ke mahani hakohako. Ne pehe a Elihu: “Kia mamao mo e Atua ke mahani kelea ai a ia, mo Ia hana e malolo oti kana ke mahani hepehepe a ia. Ha kua taui atu e ia ke he tagata hana ni a gahua.” Ne ohooho a Iopu he pehi lahi ne ia hana tututonu, ka e taute pihia e ia ka e nakai iloa katoatoa po ke loto matala. Ne lafi atu a Elihu: “Kia kamatamata fakaoti a Iopu, he tali ai a ia tuga ne tau tagata mahani kelea.” (Iopu 34:10, 11, 35, 36) Kua pihia foki, ko e ha tautolu a tua mo e mahani hakohako kua maeke ni ke fakakite moli katoatoa kaeke kua ‘kamatamata fakaoti’ ke he falu puhala. Ka e pete ni ia, to nakai toka he Matua fakaalofa ha tautolu i luga he lagi a tautolu ke kamatamata ti nakai fahia.—1 Korinito 10:13.
11. Ka fakamamahi lahi mai e tau kamatamata, lata ke manatu e tautolu e heigoa?
11 He fakaholo atu a Elihu, ke liu fakakite foki e ia ko e molea e kelea lahi e pehi ha Iopu ke he hana ni a mahani tututonu. Kua lata lahi ni ke ono fakatonu ki a ia ko e ha tautolu a Taute Homo Ue Atu. (Iopu 35:2, 6, 10) Ne pehe a Elihu: “Nakai fakamoui [he Atua] a lautolu ne mahani kelea; ka e eke e ia e fakafiliaga ma lautolu ne matematekelea.” (Iopu 36:6) Kua nakai fai tagata kua maeke ke tuhituhi ke he tau puhala he Atua mo e pehe ko e nakai tututonu a ia. Kua mua atu e tokoluga hana mai he mena ne iloa e tautolu, mo e hana tau tau he moui kua nakai fai fakahikuaga. (Iopu 36:22-26) Ka fakamamahi lahi mai e tau kamatamata, kia manatu kua tututonu ha tautolu a Atua moui tukumalagi mo e to taui mitaki e ia a tautolu ma e ha tautolu a tau gahua mahani fakamoli ke he hana fakahekeaga.
12. Ko e heigoa ne fakakite mai he tau talahauaga fakahiku a Elihu hagaao ke he fakahokoaga he fakafiliaga he Atua ke he tau tagata kelea?
12 He vagahau agaia a Elihu, kua hane hake mai e afa. He fakatata mai, kua kamata hana ate ke hopo mo e vivi. Ne vagahau a ia ke he tau mena lalahi mahaki ne taute e Iehova mo e pehe: “Iopu na e, kia fanogonogo mai a ke he tau mena nai; kia tu mai a, mo e manamanatu a ke he tau mana he Atua.” Ke tuga a Iopu, kua lata a tautolu ke manamanatu ke he tau gahua ofoofogia lahi mo e lilifu matakutakuina he Atua. “Ka ko Ia hana e malolo oti kana, nakai ni maeke kia tautolu ke iloa a ia,” he talahau e Elihu. “Kua mua ue atu hana malolo; kua pihia foki a ia he fakafili mena, kua homo atu foki hana tututonu, to nakai fakamamahi ai e ia. Ko e mena ia kua matakutaku ai e tau tagata kia ia.” (Iopu 37:1, 14, 23, 24) Ko e tau kupu fakahiku a Elihu kua fakamanatu mai ki a tautolu kua nakai leva ko e magaaho ka fakahoko he Atua e fakafiliaga ke he tau tagata mahani kelea, to nakai eke fakatote e ia e fakafiliaga tonu mo e tututonu mo e to fakahao mai a lautolu ne matakutaku ki a ia ko e tau tagata tapuaki ne fakalilifu lahi. Ko e monuina lahi ha, ke ha ha ia lautolu ne taofimau e mahani hakohako ne mailoga ko Iehova ko e Pule Katoatoa he Lagi mo e Lalolagi Katoatoa! Kia fakauka ke tuga ne taute e Iopu, mo e kia nakai toka e Tiapolo ke futiaki mai a koe he hau a nofoaga monuina ia lautolu nei he fuifui fiafia.
Tali e Iehova a Iopu
13, 14. (a) Hagaao ke he heigoa ne kamata aki e tau huhu a Iehova ki a Iopu? (e) Ko e heigoa foki a falu mena kua maeke ke ako mai he falu huhu ne huhu age he Atua ki a Iopu?
13 Liga kua ofogia ni a Iopu he magaaho ne vagahau mai a Iehova ki a ia he agi he matagi afa! Ko e afa ia ko e gahua he Atua, kua nakai tuga e matagi lahi mahaki ne fakaaoga e Satani ke uulu aki e fale mo e kelipopo e fanau a Iopu. Ne galo e leo ha Iopu he huhu atu e Atua: “Ko fe kia a koe he fakavē ai e au e lalolagi? . . . Ko hai foki ne fakatoka hifo ai hana maka he malokuaga; He lologo fakalataha e tau fetu he pogipogi, mo e kalaga fiafia ai e tau tama tane oti he Atua?” (Iopu 38:4, 6, 7) Kua age mo e age e Iehova e tau huhu ki a Iopu hagaao ke he tahi, hana tau aolu, ke he matafatafa ata he aho, ke he gutuhala he mate, maama mo e pouli, mo e tau pipiaga he fuhifuhi fetu. Kua nakai maeke a Iopu ke talahau ha mena he magaaho ne huhu ki a ia: “Kua iloa nakai e koe e tau fakatufono he lagi?”—Iopu 38:33.
14 Kua fakakite mai ai he falu huhu ko e magaaho fakamua ato tufugatia e tagata tane mo e age ki a ia e pule ke he tau ika, manu lele, tau manu huifa, mo e tau mena totolo, kua fagai he Atua a lautolu—mo e nakai fai lagomatai po ke tomatomaaga ne moua mai he ha tagata. Kua tokutoku foki he falu huhu a Iehova, e rema, e renani, mo e solofanua. Ne huhu atu ki a Iopu: “Ko e kupu hāu kia kua lele hake ki luga e aeto mo e eke ai hana fata ke he mena tokoluga.” (Iopu 39:27) Nakai pihia! Kia manamanatu la ke he mena ne taute e Iopu he magaaho ne huhu e Atua ki a ia: “To taufetoko kia a ia ne akonaki mai mo Ia hana e malolo oti kana?” Kua nakai ofo ai he pehe a Iopu: “Kitiala, kua kelea ni au ko e heigoa kia e mena ke tali atu ai au kia koe? kua tuku e au haku lima ke he gutu haku.” (Iopu 40:2, 4) Ha ko e mena hako tumau na Iehova, ti kaeke ke kamatamata a tautolu ke gugu ki a ia, kua lata na tautolu ke ‘tuku ha tautolu a tau lima ke he tau gutu ha tautolu.’ Kua fakamatalahi foki he tau huhu he Atua hana mua ue atu, lilifu muatua, mo e malolo, tuga ne fakatata mai he tau tufugatiaaga.
Pehemota mo Leviatana
15. Ne fa mahani ke manamanatu ko e Pehemota ko e manu fe, mo e ko e heigoa e falu aga hana?
15 Ne mui atu a Iehova ke talahau a Pehemota, ne fa mahani ke iloa ko e hipotomati. (Iopu 40:15-24) Kua mua atu e fulufuluola ha ko e hana tino lahi makimaki, mamafa lahi mahaki, mo e kili kafilo, ti kua ‘kai motie’ e manu huifa kai laukou nei. Ko e punaaga he hana malolo kua ha ha ai he tau patupula mo e tau hokohoko manava hana. Ko e tau huimotua he tau hui hana kua malolo ni tuga e “tau hui apakula.” Ne nakai hopoate e pehemota ka tafea lahi e tau vai ka e mukamuka lahi ke kakau atu ke he tafea.
16. (a) Ko e fakamaamaaga ke he Leviatana kua lata tonu mo e manu fe, mo e ko e heigoa a falu mena moli hagaao ki ai? (e) Ko e malolo a Pehemota mo Leviatana kua talahau mai e heigoa hagaao ke he fakamoliaga he tau kotofaaga ke he ha Iehova a fekafekauaga?
16 Kua huhu foki e Atua ki a Iopu: “Kua maeke kia ke futi e koe e leviatana ke he matau, po ke taofi hifo e koe hana alelo ke he toua?” Kua lata tonu e fakamaamaaga ke he Leviatana mo e korokotala. (Iopu 41:1-34) Kua nakai loto ke taute e ha maveheaga mafola mo taha, mo e kua nakai fai tagata iloilo kua folifoli lahi ke fia fakalagalaga e ia e manu totolo nei. Kua nakai maeke he tau kakau fana ke vega kehe ai, mo e “kua kata foki a ia ke he tau tao ne fakavivivivi.” Kua taute he Leviatana kua ita lahi mahaki e toka ke puna tuga ne ulo lolo ne puna. Kua moli ko e mua atu he malolo a Leviatana mo Pehemota ia Iopu ne lagomatai ai ke fakatokolalo aki a ia. Kua lata foki a tautolu ke fakatokolalo ke talia ko e nakai ni ko e malolo lahi ha tautolu. Ka kua lata a tautolu ke moua e pulotu mo e malolo ne foaki mai he Atua ke kalo mai he tau fakahukia a Satani, ko e Gata, mo e fakamoli ai ha tautolu a tau kotofaaga he fekafekauaga a Iehova.—Filipi 4:13; Fakakiteaga 12:9.
17. (a) Maeke fefe a Iopu ke ‘kitia e Atua’? (e) Ko e heigoa ne fakakite moli mai he tau huhu ne nakai maeke a Iopu ke tali, mo e maeke fefe he mena nei ke lagomatai a tautolu?
17 Kua fakatokolalo katoatoa, ne mailoga e Iopu hana onoonoaga hepe mo e talahau fakatonu ko e vagahau a ia mo e nakai iloa. Ka e, kua fakailoa hana tua ko e to maeke a ia ke ‘kitia e Atua.’ (Iopu 19:25-27) To maeke fefe e mena ia ke tupu, ha ko e mena nakai maeke ha tagata ke kitia a Iehova mo e moui ai? (Esoto 33:20) Hanai moli, ne kitia e Iopu e fakakiteaga he malolo faka-Atua, logona e kupu he Atua, mo e hafagi ai hana tau mata he loto maamaaga ke kitia e kupu moli hagaao ki a Iehova. Ti eke ai a Iopu ke ‘tokihala ke he efuefu mo e efuefuafi.’ (Iopu 42:1-6) Ko e tau huhu loga ne nakai maeke a ia ke tali kua fakakite moli ai e mua ue atu he Atua mo e kua fakakite ai ko e tote ne tagata, ti pihia foki a ia ne loto fakamoli lahi ki a Iehova tuga a Iopu. Kua lagomatai he mena nei a tautolu ke kitia ko e ha tautolu a tau mena ne loto ki ai kua nakai lata ke mua atu mai he fakatapuaga he higoa a Iehova mo e fakamatalahi he pule katoatoa hana. (Mataio 6:9, 10) Kua lata ko e manamanatuaga ne mua ha tautolu ko e fakatumau ke mahani hakohako ki a Iehova mo e fakalilifuaga he hana higoa.
18. Ko e heigoa he kau fakamafana fakavai ki a Iopu kua lata ke taute?
18 Ka e kua, mogoia, e tau tagata tututonu fakatupua ne fakamafana fakavai? Kua tonu foki ni a Iehova ka kelipopo a Elifasa, Pilitati, mo Sofara he nakai vagahau fakamoli hagaao ki a ia, tuga ne taute e Iopu. “Kia uta ai a mutolu fitu e povi tane, mo e fitu e mamoe tane, mo e o age a mutolu ke he haku a fekafekau ko Iopu,” he talahau he Atua, “kia eke ai e mutolu e poa huhunu ma mutolu; ti liogi ai ma mutolu haku a fekafekau ko Iopu.” Kua eke ni e kau tokotolu ke fakatokolalo ne lautolu a lautolu ni ke mumuitua ke he mena ia. Kua lata a Iopu ne taofimau e mahani hakohako ke liogi ma lautolu, mo e kua maeke ai a Iehova ke talia hana liogi. (Iopu 42:7-9) Ka e kua e hoana a Iopu, ne ole fakamakamaka ki a ia ke kaialu e Atua ti mate? Kua tuga ko e liu a ia fakafeilo mo ia ha ko e fakaalofa hofihofi noa he Atua.
Foaki Mai he Tau Palepale ne Mavehe e Amaamanakiaga ki a Tautolu
19. Mai he tau mena a Iopu, ne fakakite fefe e Iehova Hana malolo mua ue atu mai he Tiapolo?
19 He eke agataha he oti a Iopu he fakaatukehe ke he hana matematekelea mo e kua liuaki foki ke he fekafekauaga he Atua, ne hiki e Iehova e tau mena maana. He oti e liogi ha Iopu ma e kau tokotolu, ne eke e Atua ke ‘liuaki mai he paeaaga hana’ mo e age ki a ia “ko e tau mena oti ha ha ia ia fakamua kua takiua.” Ne fakakite e Iehova Hana malolo mua ue atu i luga he Tiapolo he fakaliutua e lima fakamalaia gagao a Satani mo e fakamaulu a Iopu. Ne popoka kehe foki he Atua e tau kau temoni mo e taofi kehe a lautolu he liu pa takai foki a Iopu aki Hana tau agelu puipui.—Iopu 42:10; Salamo 34:7.
20. Ke he tau puhala fe ne taui mo e fakamonuina e Iehova a Iopu?
20 Kua o mai tumau e tau lafu matakainaga a Iopu, tau mahakitaga, mo e tau kapitiga fakamua ke kai fakalataha mo ia, kua togitogi mo ia, mo e fakamafana ki a ia ha ko e tau malaia ne fakaata e Iehova ke hohoko ki a ia. Kua takitaha a lautolu mo e age tupe ki a Iopu mo e mama auro. Ne mua atu e fakamonuinaaga ne taute e Iehova fakamui ki a Iopu mai he hana kamataaga, ti moua ai e ia 14,000 mamoe, 6,000 kamela, 1,000 e laulahi he tau povi, mo e 1,000 asini fifine. Kua liu foki a Iopu ke tokofitu e tama tane mo e tokotolu e tama fifine, kua tatai ni mo e numela ne ha ha ia ia he magaaho fakamua. Ko e hana tau tama fifine—ko Timaima, Kesia, mo Kerenapuka—ko e tau fifine kua mua atu e tino mitaki he motu, mo e age ai foki e Iopu e tau tufaaga fakalataha mo e tau lafu tugaane ha lautolu. (Iopu 42:11-15) Ke lafi ki ai, ne eke ai a Iopu ke 140 foki e tau tau ne moui mo e fa e hau he hana ohi ne kitia. Kua pehe ai e fakahikuaga he fakamauaga: “Ti mate a Iopu, kua motua, kua katoatoa foki hana tau aho.” (Iopu 42:16, 17) Ko e fakaloaloa he hana moui ko e gahua mana he Atua ko Iehova.
21. Lagomatai mai fefe ki a tautolu e fakamauaga he Tohiaga Tapu ki a Iopu, mo e ko e heigoa kua lata ke loto malolo a tautolu ke taute?
21 Ko e fakamauaga he Tohiaga Tapu ki a Iopu kua taute ai a tautolu ke iloa lahi e tau lagatau a Satani mo e lagomatai ai a tautolu ke kitia ko e matutaki fefe e pule katoatoa he lagi mo e lalolagi katoatoa ke he mahani hakohako he tagata. Ke tuga a Iopu, ko lautolu ne fakaalofa ke he Atua to kamatamata ai. Ka e maeke a tautolu ke fakauka tuga ne taute e Iopu. Ne hao mai a ia he hana tau mena uka fakalataha mo e tua mo e amaamanakiaga, mo e kua loga lahi hana tau palepale. Ha ko e tau fekafekau a Iehova he vaha nei, kua ha ha ia tautolu e tua mo e amaamanakiaga moli. Mo e kua homo ue atu ha e amaamanakiaga ne kua fakatoka he Taui Lahi Mahaki ki mua ia tautolu takitokotaha! He tokaloto e palepale i luga he lagi to lagomatai ai a lautolu ne fakauku ke fekafekau fakamoli ke he Atua mai he ha lautolu a tau momoui ne toe agaia ke he lalolagi. Tokologa ne ha ha i ai e amaamanakiaga ke he lalolagi ka nakai mamate, ka ko lautolu ne kua fita to moua ai e palepale he liu tu mai ke he lalolagi Parataiso, fakalataha mo Iopu ni. Fakalataha mo e amaamanakiaga moli pihia he tau loto mo e loto manamanatu, kia lata a lautolu oti ne fakaalofa ke he Atua ke fakakite moli ko e pikopiko a Satani he tu mo e mauokafua he fahi a Iehova ko e tau tagata kua taofimau e mahani hakohako mo e tau lagomatai kua malolo lahi ke he hana pule katoatoa he lagi mo e lalolagi katoatoa.
To Tali Fefe a Koe?
◻ Ko e heigoa e falu mena ne talahau e Iopu he hana tali fakahiku ke he hana tau tagata fakamafana fakavai?
◻ Kua fakakite moli fefe e Elihu ko e fakamoliaga nakai fakamailoga tagata ha Iehova?
◻ Ko e heigoa e falu huhu he Atua ki a Iopu, mo e aoga fefe a lautolu?
◻ Kua aoga fefe ki a koe e fakamauaga he Tohiaga Tapu ki a Iopu?
[Tau Fakatino he lau 16]
Ko e tau talahauaga a Iehova ke he Pehemota mo e Leviatana ne lagomatai ke fakatokolalo a Iopu