2000—Ko e Tau Mahuiga Kia?
KUA fai mena kehe kia ne hagaao ke he tau 2000? Ko e tau tagata ne nonofo he tau motu he Fahi Lalo kua talahau ko e tau ke fakamua aki a ia he afetau ke tolu aki. Ko e tau tauteuteaga matafeiga ke fakamanatu ai hane fa e taute. Ko e tau tula hila kua fakatu ke totou aki e tau tama sekone ato mavatavata mai e afetau fou. Ko e tau koli Fakafiafia he Afiafi Tau Fou kua fakatokatoka ai. Ko e tau tapulu miti kua tohi ai e tau kupu he fakaotiaga he afetau kua hane fakafua he tau fale koloa he tau maaga i tua pihia foki ke he tau fale koloa lalahi he loto taone.
Ko e tau lotu, lalahi mo e ikiiki, to matutaki ke he tau faiagahau he tau katoa. He mataulu he tau ka hau, kua amanaki ke fenoga atu e Pope ko John Paul II ki Isaraela ke takitaki e mena ne ui he tau Katolika Roma “ko e fakamanatuaga ne mua he Lotu Katolika Roma ke he afetau.” Kua fuafua ai ke kavi ke ua mo e hafa e miliona ke he ono e miliona tagata fenoga evaeva, mai ia lautolu ne fakamoli ki a lautolu ne tuaha noa, hane pulega ke aahi atu ki Isaraela he tau ka hau.
Ko e ha ne kua tokologa koa ai e tau tagata ne pulega ke aahi atu ki Isaraela? Fakahoko kupu ma e pope, ko Roger Cardinal Etchegaray, taha tagata ofisa he Vatikana, ne pehe: “Ko e tau 2000 ko e fakamanatuaga he Keriso mo e hana moui he motu nai. Ti kua lata pauaki e Pope ke hau ki hinei.” Kua matutaki fefe e tau 2000 ke he Keriso? Ko e tau 2000 kua talahaua ke fakamailoga tonu e 2,000 he tau tau mai he fanauaga he Keriso. Ka e pihia kia? To kitia e tautolu.
Ko e tau 2000 kua mua atu e aoga ke he tau tagata he falu matakau fakalotu. Kua talitonu a lautolu ko e he tau ka hau po ke ha, to liu mai a Iesu ke he Mouga ko Olive ti ko e tauaga i Amaketo, ne totoku i loto he tohi a Fakakiteaga, to fakahoko ai he pahua a Mekito. (Fakakiteaga 16:14-16) He talifaki ke he magaaho nei, kua toko teau e tau tagata mai T.F.K. hane fakafua e tau kaina mo e loga he tau koloa ha lautolu mo e o ke nonofo i Isaraela. Ma lautolu ne nakai maeke ke toka e tau kaina, ne mavehe e tagata evagalia i T.F.K. ke fakakite e liu mai ha Iesu he televisoni—he tau lanu kehekehe!
He tau motu he tau Fahi Lalo, ko e tau pulega ke ta mai e afetau ke tolu aki kua tupu tolomaki. Ka ko e tau tagata he falu motu, hane fa e feiga ni ke he tau gahua fa mahani ha lautolu. Ko e tau tagata nei—ko e laulahi he puke tagata he lalolagi—kua nakai talitonu ko Iesu ha Nasareta ko e Mesia. Ti nakai talia foki e lautolu e fakatokaaga F.K.-A.D. ma e vaha.a Tokologa e tau Musilimi, ke fakatai ki ai, ne fakaaoga ni ha lautolu a kalena, ne hagaaki ke he tau ka hau mo 1420—nakai 2000. Ne fakanumera he tau Musilimi e tau tau he vaha ne hola e perofeta ko Muhammad mai i Mecca ki Medina. Pete ia, kua fakaaoga he tau tagata he lalolagi katoa kavi ke 40 e tau kalena kehekehe.
Kua lata kia e tau 2000 ke kakano ke he tau Kerisiano? Ko Ianuari 1, 2000, ko e vaha mua ue atu moli kia? Ko e tau huhu nei to tali he vala tala ka mui mai.
[Matahui Tala]
a He fakaholoaga he tau vaha ko e F.K.-A.D., ko e tau mena tutupu ato hoko e fanauaga ha Iesu kua tohia ko e tau tau “F.K.” (fakamua to Keriso); ko e tau mena ne tutupu he mole atu kua fakamailoga ko e tau tau “A.D.” (Anno Domini—“he tau he Iki ha tautolu.”) Pete he pihia, kua manako ni falu a tagata fakaako tokoluga ke fakaaoga e talahauaga fa mahani ko e “F.V.N.” (fakamua to Vaha Nei ha tautolu” mo e “V.N.” (he Vaha Nei ha tautolu.)