Lahi Fefe e Manako Hau ke he Kupu he Atua?
“Kua lahi ni haku a manako ke he hāu a fakatufono; kua manamanatu au ki ai ke he [tau] aho oti.”—SALAMO 119:97.
1. Ko e heigoa taha puhala ne fakatata he tau tagata matakutaku Atua ha lautolu a manako ma e Kupu he Atua?
TOTOU teau e tau miliona he tau tagata tane mo e tau fifine ne fai lagaki he Tohi Tapu. Ka kua ha ha ai e kehekehe he vahaloto he fai Tohi Tapu mo e manako ke he Kupu he Atua. Maeke kia e tagata ke talahau fakatonu ke manako ke he Kupu he Atua ka lavea ni a ia ke totou ai? Nakai maeke! Ke he taha fahi, ko e falu fakamua kua tote e manako ke he Tohi Tapu ka e he mogonei kua totou ai ke he tau aho oti. Ne fakaako a lautolu ke manako ke he Kupu he Atua, mo e tuga e salamo, kua taute e lautolu mogonei e Kupu he Atua mo kapeletu ha lautolu ke he ‘tau aho oti.’—Salamo 119:97.
2. Kua fakamalolo fefe e tua he taha he Tau Fakamoli a Iehova i lalo he tau tutuaga uka?
2 Ko e taha ne fakaako ke manako ke he Kupu he Atua ko Nasho Dori. Katoa mo e hana tau katofia talitonu, ne fakauka a ia ke he loga e tau hogofulu tau, he fekafekau ki a Iehova he hana motu ko Alapania. He magahala he vaha ia, kua pa e Tau Fakamoli a Iehova, ti ko e tau Kerisiano tua fakamoli nei kua temoai e tau tohi faka-Tohi Tapu ne moua. Pete ia, kua fakatumau e tua he Matakainaga Dori ke malolo. Taute fefe? “Ko e foliaga haku,” he talahau e ia, “ke totou Tohi Tapu ke tepu taha e matahola he tau aho takitaha, ne taute pihia e au ke kavi ke 60 e tau tau ato pouli e tau mata haku.” Ato vaha nei, kua nakai moua e Tohi Tapu he vagahau Alapania, ka ko Matakainaga Dori ne fakaako e ia e vagahau Heleni he vaha tama, ti totou e ia e Tohi Tapu he vagahau ia. Ko e totou tumau he Tohi Tapu ne fakamalolo e Matakainaga Dori ke he tau kamatamata kehekehe, mo e maeke foki ke fakamalolo a tautolu.
“Kia Manako Lahi” ke he Kupu he Atua
3. Ko e heigoa e aga kua lata he tau Kerisiano ke feaki ke he Kupu he Atua?
3 “Tuga e tau tama mukemuke kito fanau,” he tohia he aposetolo ko Peteru, ‘kia manako lahi ke he puke huhu he kupu nakai fakavai.’ (1 Peteru 2:2) Tuga ne tama mukemuke ne hoge lahi ma e puke huhu he matua fifine hana, ko e tau Kerisiano ne mataala ke he manako fakaagaga ha lautolu kua moua e fiafia katoatoa he totou e Kupu he Atua. Pihia nakai he logona e koe? Ka nakai, aua neke fakaatukehe. Maeke foki ia koe ke feaki e manako lahi ma e Kupu he Atua.
4. Ko e heigoa kua putoia ke totou mau e Tohi Tapu he tau aho oti?
4 Ke taute pihia, fakamua kia akonaki e koe a koe ke totou tumau e Tohi Tapu, ke he tau aho oti ka maeke. (Gahua 17:11) Liga to nakai maeke ia koe ke fakamole taha e matahola he tau aho takitaha ke totou Tohi Tapu tuga ne taute e Nasho Dori, ka e tuga a ia liga maeke ia koe ke toka he mavao taha magaaho he tau aho takitaha ke manamanatu ke he Kupu he Atua. Tokologa e tau Kerisiano ne aala tuai ke manamanatu fakahokulo ke he tau kupu he Tohi Tapu. Ka ko e heigoa foki ha puhala mitaki lahi ke kamata aki e aho? Falu kua manako ke fakaoti e aho he totou Tohi Tapu ato o ke momohe. Ka kua totou Tohi Tapu agaia falu he ha mogo kua lata. Ko e mena mua ko e totou tumau e Tohi Tapu. Oti, ti toka taha magaaho ke manamanatu fakahokulo ke he mena ne totou e koe. Kia kikite a tautolu ke he falu fakafifitakiaga he tau tagata takitokotaha ne aoga mai he totou mo e manamanatu fakahokulo ke he Kupu he Atua.
Ko e Salamo ne Manako ke he Fakatufono he Atua
5, 6. Pete liga nakai iloa e tautolu e higoa hana, ko e heigoa ka ako e tautolu hagaao ki a ia ne tohia e Salamo ke 119 aki he totou mo e manamanatu fakahokulo ke he mena ne tohia e ia?
5 Ko e tagata tohia he Salamo ke 119 aki kua ha ha ai moli e loto fakaaue hokulo ma e Kupu he Atua. Ko hai ne tohia e salamo ia? Kua nakai fakahigoa he Tohi Tapu a ia. Ha ko e tau kupu i loto, kua fai mena a tautolu ne iloa hagaao ki a ia, mo e iloa e tautolu kua nakai noa e moui hana mo e tau lekua. Ko e falu ne fioaki mo ia ne pehe ke tapuaki ki a Iehova kua nakai fai manako ke he tau matapatu fakaakoaga he Tohi Tapu tuga a ia. Pete ni ia, ne nakai fakaata he salamo e tau mahani ha lautolu ke taofi a ia he taute e mena hako. (Salamo 119:23) Kaeke nofo po ke gahua a koe mo e tagata ne nakai fakalilifu e tau fakatufono he Tohi Tapu, maeke ia koe ke kitia e tatai he vahaloto he tuaga he salamo mo e hau ni.
6 Pete ko e tagata mahani Atua, kua nakai molea ki mua e tututonu he salamo. Ne talahau fakamoli e ia hana tau nakai mitaki katoatoa. (Salamo 119:5, 6, 67) Ka kua nakai fakaata e ia e hala ke pule ki a ia. “To eke ha kia e fuata ke fakamea hana tau mahani?” he huhu e ia. Hana tali: “Kia leoleo ki ai ke lata mo e hāu a tau kupu.” (Salamo 119:9) Ti, he peehi mai e mitaki he fakaohoohoaga malolo he Kupu he Atua, ne pehe foki e salamo: “Ne tuku e au hāu a tau vagahau ke he loto haku, neke hala au ki mua hāu.” (Salamo 119:11) Ko e fakaohoohoaga ka lagomatai a tautolu ke kalo mai he hala ke he Atua kua malolo moli!
7. Ko e ha kua mua atu ke he tau tagata fuata ke mataala ke he lata ke totou Tohi Tapu he tau aho oti?
7 Lata he tau Kerisiano ke mailoga e tau kupu he salamo. Ko e tau Kerisiano fuata kua kamatamata he vaha nei. Kua manako lahi e Tiapolo ke fakakelea e atuhau ikiiki agaia ne tapuaki ki a Iehova. Ko e foliaga ha Satani ke fakataki e tau Kerisiano fuata ke mahala ke he tau manako he tino mo e holitu e tau matafakatufono he Atua. Ko e tau kifaga mo e tau polokalama he televisoni kua fakatata tumau e manamanatuaga he Tiapolo. Ko e tau tagata he tau polokalama pihia kua fulufuluola mo e totonu; ko e tau mahani feuaki he vahaloto ia lautolu kua eke mo mena kua lata. Ko e manatu ne tuku mai? ‘Kua mitaki he tau tagata nakai la mau ke putoia ke he matutakiaga he mahani fakatane mo e fifine ka fakaalofa moli e taha ke he taha.’ Momoko lahi, he tau tau takitaha ko e numera he tau Kerisiano fuata kua hele he tau manamanatu pihia. Ko e falu kua hokotia ke moumou e tua ha lautolu. Ti kua fekefeke mai e peehiaga! Ka kua lahi mahaki kia e peehiaga ti nakai maeke ia mutolu ko e tau tagata fuata ke fehagai ki ai? Nakai pihia! Kua foaki e Iehova e puhala ma e tau Kerisiano fuata ke kautu mai he tau manako nakai mitaki ia. Maeke ia lautolu ke totoko ke he ha kanavaakau ne fakaaoga he Tiapolo he ‘leoleo ki ai ke lata mo e tau Kupu he Atua, he tuku e tau vagahau he Atua he loto ha lautolu.’ Lahi fefe e magaaho ne fakatoka e koe ke totou fakatagata tumau e Tohi Tapu mo e manamanatu fakahokulo ki ai?
8. Maeke fefe he tau fakafifitakiaga ne fakakite i loto he paratafa nei ke lagomatai a koe ke tupu tolomaki e loto fakaaue ma e Fakatufono faka-Mose?
8 Ne talahau he tagata ne tohia e salamo ke 119 aki: “Kua lahi ni haku a manako ke he hāu a fakatufono.” (Salamo 119:97) Ke he fakatufono fe ne hagaao a ia ki ai? Ke he kupu fakakite a Iehova, fakalataha mo e tohi Fakatufono faka-Mose. He kitia fakamua ai liga fakaheu he falu e tau tohi Fakatufono nei ke tuai ti manatu ko e maeke fefe e tagata ke manako ki ai. Pete ni ia, he manamanatu fakahokulo a tautolu ke he tau vala kehekehe he Fakatufono faka-Mose, tuga ne taute he salamo, maeke ia tautolu ke kitia moli e pulotu i tua he Fakatufono ia. Kehe mai he tau vala fakaperofeta loga he Fakatufono, ha ha ai e tau fakatufono ke he fakameaaga mo e tau mena kai, ne fakamalikiti aki e puhala mea mo e tino malolo mitaki. (Levitika 7:23, 24, 26; 11:2-8) Ne fakamalolo he Fakatufono e mahani fakamoli he tau feua pisinisi mo e tomatoma e tau Isaraela ke fakakite e maamaaga ke he tau katofia tapuaki auloa ne manako lahi. (Esoto 22:26, 27; 23:6; Levitika 19:35, 36; Teutaronome 24:17-21) Ko e tau fakafiliaga kua taute mo e nakai fakamailoga. (Teutaronome 16:19; 19:15) He iloa mitaki he tagata tohia he Salamo ke 119 aki e moui, kua nakai fakauaua ai kua fioia e ia e mitaki he tau mena ma lautolu ne fakagahuahua e Fakatufono he Atua, ti ko e hana manako lahi ki ai kua malolo fakahaga. Tatai mo e vaha nei, he kautu e tau Kerisiano he fakagahuahua e tau matapatu fakaakoaga he Tohi Tapu, ne tolomaki foki e fakaalofa mo e loto fakaaue ha lautolu ma e Kupu he Atua.
Ko e Tama Patuiki ne Toa ke Kehe
9. Ko e heigoa e aga ne feaki he Patuiki ko Hesekia ke he Kupu he Atua?
9 Ko e tau kupu he Salamo ke 119 aki kua fakatautau mitaki mo e mena ne iloa e tautolu ki a Hesekia he tama patuiki tote agaia a ia. Talahau he falu tagata fakaako ke he Tohi Tapu ko Hesekia ne tohia e salamo. Pete he nakai iloa mitaki e mena nei, ka kua iloa e tautolu e fakalilifu lahi ha Hesekia ma e Kupu he Atua. He puhala he moui hana, ne fakakite e ia kua fakatautau mo e loto katoa a ia mo e tau kupu he Salamo 119:97. Ki a Hesekia ne talahau e Tohi Tapu: “Ne pipiki ni a ia kia Iehova, ti nakai fano kehe a ia he mui atu kia ia, ka e omaoma a ia ke he hana tau poaki ne poaki mai ai e Iehova ia Mose.”—2 Tau Patuiki 18:6.
10. Ko e heigoa e fakamafanaaga he fakafifitakiaga a Hesekia ke he tau Kerisiano ne nakai feaki hake he tau matua mahani Atua?
10 Mai he tau fakamauaga oti, kua nakai tupu hake a Hesekia he magafaoa mahani Atua. Ko e hana matua tane, ko e Patuiki ko Ahasa, ko e tagata tapuaki tupua nakai tua ne tugi moui taha he tau tama tane hana—ko e matakainaga ni ha Hesekia—mo poa ke he tau atua fakavai! (2 Tau Patuiki 16:3) Pete ni ko e fakafifitakiaga kelea nei, kua maeke a Hesekia ke “fakamea hana tau mahani” mai he tau fakaohoohoaga pouliuli he pipiki atu ke he Kupu he Atua.—2 Nofoaga he Tau Patuiki 29:2.
11. He kitia e Hesekia, ko e heigoa ne tupu ke he matua tane nakai tua fakamoli hana?
11 He lahi hake a Hesekia, ne kitia moli e ia e puhala ne taute he matua tane tapuaki tupua hana e tau matagahua he Motu. Ne viko takai a Iuta he tau fi. Ha ha ai a Resina, ko e patuiki a Suria, ne fakalataha mo e Patuiki ko Peka ha Isaraela ke pa takai a Ierusalema. (2 Tau Patuiki 16:5, 6) Ha ha ai e tau tagata Etoma mo e tau tagata Filisitia, ne kautu e fakahaupo ki Iutaia mo e fofo foki falu maga i Iuta. (2 Nofoaga he Tau Patuiki 28:16-19) Fehagai fefe a Ahasa mo e tau matematekelea nei? He nakai ole lagomatai ki a Iehova ke tau ki a Suria, ne haga a Ahasa ke he patuiki a Asuria, ti fakavaivai a ia aki e tau auro mo e tau ario, katoa mo e tau koloa ne tatanaki he faituga. Ka kua nakai ta mai he mena nei e mafola tukulagi ki Iuta.—2 Tau Patuiki 16:6, 8.
12. Ko e heigoa ha Hesekia ka taute ke kalo mai he liu taute e tau puleheu he hana matua?
12 Ke fakahiku aki, ne mate a Ahasa ti eke a Hesekia mo patuiki he 25 e tau tau he moui. (2 Nofoaga he Tau Patuiki 29:1) Pete he fuata lahi a ia, ka e nakai auhia he mena nei a ia he eke mo patuiki monuina. He nakai fifitaki e mahani he hana matua tane nakai tua fakamoli, ne pipiki a ia ke he Fakatufono a Iehova. Kua putoia ai e poakiaga pauaki ma e tau patuiki: “Ka nofo foki [e patuiki] he nofoaiki he hana kautu, ti tohi ai e ia mana e tohi he fakatufono nai mai he tohi na ha i mua he tau ekepoa ko e tau tagata Levi. Kia ha ha ia ia e tohi ia, kia totou ai e ia ke he tau aho oti he hana moui; kia fakaako a ia ke matakutaku ai kia Iehova hana Atua; mo e omaoma ni a ia ke he tau kupu oti he fakatufono nai.” (Teutaronome 17:18, 19) He totou e Kupu he Atua he tau aho oti, to iloa e Hesekia ke matakutaku ki a Iehova mo e kalo mai he liu taute e tau puleheu he hana matua nakai mahani Atua.
13. Maeke fefe he Kerisiano ke mauokafua ke he kakano fakaagaga, ko e tau mena oti ne taute e ia to monuina?
13 Nakai ni kua fakamafana ke he tau patuiki a Isaraela ke manamanatu tumau ke he Kupu he Atua ka kua lata e tau Isaraela matakutaku Atua ke taute pihia foki. Ne fakamaama he Salamo ke taha aki, e tagata fiafia moli ko ia ne ‘fiafia ke he fakatufono a Iehova, ti manamanatu a ia ke he tau fakatufono hana ke he aho katoa mo e po.’ (Salamo 1:1, 2) Ke he tagata pihia, ne pehe e salamo: “To monuina foki a ia ke he tau mena oti kana ke eke e ia.” (Salamo 1:3) Ke he taha fahi, ko ia ne lolelole e tua ki a Iehova ko e Atua, ne pehe e Tohi Tapu: “Ko e tagata loto fakauaua a ia, kua hikihikifano ke he hana tau mahani oti.” (Iakopo 1:8) Kua manako oti a tautolu ke fiafia mo e monuina. Ko e totou Tohi Tapu tumau mo e kakano lahi ka lafi ke he fiafia ha tautolu.
Fakamalolo he Kupu he Atua a Iesu
14. Fakakite fefe e Iesu e manako ma e Kupu he Atua?
14 He taha magaaho, ne moua he tau matua ha Iesu a ia he vahaloto he tau faiaoga he faituga i Ierusalema. Ko e tau pulotu nei he Fakatufono he Atua “kua ofomate . . . ke he loto matala hana mo e hana tau kupu ne tali atu”! (Luka 2:46, 47) Ko e magaaho ne 12 laia e tau tau ha Iesu. E, kua pihia foki e vaha tama agaia, ne kitia maali e olioli lahi hana ma e Kupu he Atua. Mogo fakamui, ne fakaaoga e Iesu e tau Tohiaga Tapu ke akonaki e Tiapolo, he talahau: “Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.” (Mataio 4:3-10) Nakai leva, ne fakamatala a Iesu ke he tau tagata he hana maga ko Nasareta, he fakaaoga e tau Tohiaga Tapu.—Luka 4:16-21.
15. Fakatoka fefe e Iesu e fakafifitakiaga he magaaho ne fakamatala a ia ke he falu?
15 Ne tumau a Iesu ke fatiaki mai he Kupu he Atua ke papale aki e tau fakaakoaga hana. Ko e lanu tagata ne fanogonogo ki a ia kua “ofomate ai . . . ke he hana tau kupu.” (Mataio 7:28) Ti nakai ofo—ko e tau fakaakoaga a Iesu kua mai ni ia Iehova ko e Atua! Ne pehe a Iesu: “Ko e haku a tau kupu, nakai ko e haku, ka ko e hana ne fakafano mai au; ko ia ke talahau e ia a ia, kua kumi e ia e fakahekeaga māna ni; ka ko ia ne kumi e fakahekeaga hana ne fakafano mai a ia, kua fakamoli a ia, nakai fai mahani hepehepe a ia.”—Ioane 7:16, 18.
16. Hoko ki fe e fakatataaga he manako ha Iesu ma e Kupu he Atua?
16 Nakai tuga e tagata ne tohia e Salamo ke 119 aki, kua “nakai fai mahani hepehepe” ia Iesu. Kua nakai fai hala a ia, ko e Tama he Atua, ne “fakatokolalo e ia a ia, ne oma e ia kua hoko ke he mate.” (Filipi 2:8; Heperu 7:26) Ka e pete ni he mitaki katoatoa a ia, ne ako mo e oma e Iesu e Fakatufono he Atua. Ko e kei ainei ke he hana malolo ke fakatumau hana loto fakamoli. He magaaho ne fakaaoga e Peteru e pelu he lali ke puipui hana Iki neke tapaki, ne akonaki e Iesu e aposetolo mo e huhu age: “Piko kia a koe nakai maeke ia au ke ole atu ainei ke he haku a Matua, ti fekau mai e ia kia au e tau agelu ne mua he tokologa ke he tau lekeona ne hogofulu ma ua? Ti fakamoli ai fefe e tau Tohi kaeke ke pihia, kia hoko ni e tau mena ia ke lata ai?” (Mataio 26:53, 54) E, ke fakamoli e tau Tohiaga Tapu kua kakano lahi ki a Iesu ke he laveaki mai he mate fakakikiveka mo e fakama. Ko e manako ne mua haia ma e Kupu he Atua!
Falu Tagata Fifitaki ki a Iesu
17. Aoga fefe e Kupu he Atua ke he aposetolo ko Paulo?
17 Ne tohia he aposetolo ko Paulo ke he tau katofia Kerisiano: “Kia fifitaki mai a mutolu kia au, tuga na au kia Keriso.” (1 Korinito 11:1) Ke tuga hana Iki, ne feaki e Paulo e olioli lahi ma e tau Tohiaga Tapu. Ne talahau e ia: “Mai loto haku kua fakahelehele lahi e au e Fakatufono he Atua.” (Roma 7:22, The Jerusalem Bible) Ne fatiaki tumau e Paulo e Kupu he Atua. (Gahua 13:32-41; 17:2, 3; 28:23) He magaaho ne foaki e ia e tau fakaakoaga fakahiku hana ki a Timoteo, ko e fekafekau katofia, ne peehi e Paulo e vala aoga lahi kua lata he Kupu he Atua ke gahua he tau moui he tau aho takitaha he ‘tau tagata oti he Atua.’—2 Timoteo 3:15-17.
18. Talahau taha fakafifitakiaga he taha tagata, he vaha nei, ne fakakite e lilifu ma e Kupu he Atua.
18 Tokologa e tau fekafekau tua fakamoli ha Iehova he vaha nei ne fifitaki pihia e manako ha Iesu ma e Kupu he Atua. He mataulu he senetenari nei, ne moua he fuata tane e Tohi Tapu mai he kapitiga. Ne fakamaama mai e ia e lauiaaga he mena fakaalofa uho nei ki a ia: “Fakamalolo lahi au ke totou taha vala he Tohi Tapu he moui haku ke he tau aho oti.” Ko e fuata tane ia ko Frederick Franz, mo e hana manako ke he Tohi Tapu ne fakataki atu a ia ke olioli e moui hololoa mo e monuina he fekafekauaga a Iehova. Kua manatu hofihofi a ia ha ko e hana a lotomatala ke fatiaki manatu e tau veveheaga katoa he Tohi Tapu.
19. Setulu fefe he falu e totou Tohi Tapu fakafahi tapu ma e Aoga Fekafekau Fakateokarasi?
19 Kua tuku he Tau Fakamoli a Iehova e peehiaga lahi ke totou tumau e Tohi Tapu. He tau fahitapu takitaha, he tauteute ma e taha feleveiaaga Kerisiano ha lautolu, ko e Aoga Fekafekau Fakateokarasi, ne totou e lautolu e falu veveheaga he Tohi Tapu. Ko e tau fakamaamaaga he totou Tohi Tapu kotofa kua tutala ki ai he magahala he feleveiaaga. Falu Fakamoli ne mukamuka ke vevehe e totou Tohi Tapu he fahitapu ke fitu e vala mo e totou taha e vala he tau aho takitaha. He totou ai a lautolu, ne hagaaki a lautolu ke he manatu i ai. Ka fai magaaho, ne taute foki e lautolu e tau kumikumiaga ha ko e lagomatai he tau tohi fakave ke he Tohi Tapu.
20. Ko e heigoa kua lata ke maeke ke fai magaaho ke totou tumau e Tohi Tapu?
20 Liga lata ia koe ke ‘fakaaoga e tau aho’ mai he falu matagahua ke totou tumau e Tohi Tapu. (Efeso 5:16) Ka ko e aoga mai ai, to mua atu ke he ha mena foaki noa. He feaki hake e koe e aga mau ke totou Tohi Tapu he tau aho oti, ko e manako hau ma e Kupu he Atua to tupu tolomaki. Nakai leva mogoia, to omoi a koe ke talahau tuga e salamo: “Kua lahi ni haku a manako ke he hāu a fakatufono; kua manamanatu au ki ai ke he [tau] aho oti.” (Salamo 119:97) Ko e aga pihia ka ta mai e tau aoga mahaki he mogonei mo e vaha anoiha, tuga ka fakakite he vala tala ka mui mai.
Manatu Nakai e Koe?
◻ Fakakite fefe he Salamo ke 119 aki e manako hokulo ma e Kupu he Atua?
◻ Ko e heigoa e tau fakaakoaga ka futia mai e tautolu he tau fakafifitakiaga a Iesu mo e ha Paulo?
◻ Maeke fefe ia tautolu ke tutupu fakatagata he manako ha tautolu ma e Kupu he Atua?
[Tau Fakatino he lau 22]
Kua taute he tau patuiki tua fakamoli ke totou tumau e Kupu he Atua. Pihia nakai a koe?
[Fakatino he lau 24]
Pihia foki he tote, ne tokai ia Iesu e manako ma e Kupu he Atua