Tau Fua Mitaki he Manako ke he Kupu he Atua
“Kia fakaalofa [ke he pulotu], ti leoleo ai e ia a koe. . . . To fakalilifu ai e ia a koe ka peka a koe kia ia.”—TAU FAKATAI 4:6, 8.
1. Ko e heigoa kua putoia ke he manako lahi he Kupu he Atua?
KE TOTOU e Tohi Tapu kua aoga lahi ma e Kerisiano. Ka ke totou fakaholo noa kua nakai fakatata he naia e manako ma e Kupu he Atua. Ka e kua ka totou he taha e Tohi Tapu ti taute e tau mena ne vihiatia he Tohi Tapu? Maali ni, kua nakai manako a ia ke he Kupu he Atua ke he puhala ne manako ki ai e tagata ne tohia e Salamo ke 119 aki. Ko e manako ke he Kupu he Atua ne fakataki a ia ke fakatautau atu mo e tau fakatufono i ai.—Salamo 119:97, 101, 105.
2. Ko e heigoa e tau fua mai he pulotu ne fakave ke he Kupu he Atua?
2 Ke nofo fakatautau atu ke he Kupu he Atua kua lata ke oopo tumau e manamanatuaga mo e puhala moui he tagata. Ko e puhala ia ne fakatata e pulotu mahani Atua, ko e kakano ke fakagahuahuae iloilo mo e maamaaga ne moua mai he fakaakoaga he Tohi Tapu. “Kia fakaalofa [ke he pulotu], ti leoleo ai e ia a koe. Kia fakaheke ā kia ia, ti fakamatalahi ai e ia a koe; to fakalilifu ai e ia a koe ka peka a koe kia ia. To ta atu e ia e foufou fulufuluola ke he ulu hāu; ko e foufou lilifu ke ta atu ai e ia kia koe.” (Tau Fakatai 4:6, 8, 9) Ko e fakamafanaaga haia ke feaki e manako ke he Kupu he Atua mo e ke leoleo foki he Kupu he Atua! Ko hai ne nakai loto ke leoleo, fakamatalahi, mo e fakalilifu?
Leoleo Mai he Haofia Kelea Tukulagi
3. Mua atu ke he tau vaha i mua, ko e ha ne kua lata ke leoleo e tau Kerisiano, mo e mai ia hai?
3 Ko e heigoa e puhala ne leoleo e tagata he pulotu ne moua mai he fakaakoaga mo e fakagahuahua e Kupu he Atua? Taha mena, kua leoleo mai a ia ia Satani ko e Tiapolo. Ne fakaako e Iesu hana tau tutaki ke liogi ma e laveakiaga mai he patu kelea, ko Satani. (Mataio 6:13) He vaha nei, ko e lata lahi ke putoia e ole nei he ha tautolu a tau liogi kua tepetepe moli. Ne liti hifo mai he lagi a Satani mo e hana tau temoni tali mai he 1914, ti ko e mena ne tupu ne “ita lahi, ha kua iloa e ia kua tote hana vaha.” (Fakakiteaga 12:9, 10, 12) He aho fakamui nei, liga kua kaka puhopuho hana ita he nakai kautu a ia he tau atu ki a lautolu “kua omaoma ke he tau poaki he Atua, mo e taofi e talahauaga kia Iesu Keriso.”—Fakakiteaga 12:17.
4. Leoleo fefe e tau Kerisiano mai he tau peehiaga mo e tau matahele ha Satani?
4 Kua fakaholo atu a Satani mo e hana ita ke uhutau ke he tau fekafekau Kerisiano nei mo e ke fakalagalaga e favaleaga kelea po ke fakatupu falu a fakaalaiaaga ke he gahua ha lautolu. Loto foki a ia ke toho e tau tagata fakapuloa he Kautu ke fakamahino atu ni ke he tau mena tuga e mahuiga fakalalolagi, manako lahi ke nofo noa, ke velevele koloa, mo e tutuli e fiafiaaga, ka e nakai ke he gahua fakamatala he Kautu. Ko e heigoa ka leoleo e tau fekafekau tua fakamoli he Atua mai he mahala atu ke he peehiaga a Satani po ke mai he hele he tau lagatau hana? Ti ko e liogi, fakafetuiaga tata mo Iehova, mo e tua ke he moli he hana tau maveheaga kua aoga lahi. Ka ko e tau mena oti nei kua matutaki ke he iloilo mo e fakamaloloaga ke oma e tau fakamanatu he Kupu he Atua. Ko e tau fakamanatu nei kua mailoga ai he totou e tau Tohi Tapu mo e tau lagomataiaga faka-Tohi Tapu, o ke he tau feleveiaaga Kerisiano, omaoma ke he tau fakatonuaga he Tohiaga Tapu mai he katofia talitonu, po ke he liogi po ke manamanatu fakahokulo ke he tau matapatu fakaakoaga he Tohi Tapu ne fakamanatu mai he agaga he Atua.—Isaia 30:21; Ioane 14:26; 1 Ioane 2:15-17.
5. Ko e puhala fe ne leoleo he pulotu mai he Kupu he Atua a tautolu?
5 Ko lautolu ne manako ke he Kupu he Atua kua leoleo ke he falu a puhala. Ke fakatai ki ai, kua puipui mai a lautolu he tau fakaatukehe he manamanatuaga mo e tau gagao he tino ne fua mai he tau mena tuga e fakaaoga fakahehe e tulaki, fakaaogaaga he tapaka, mo e mahani kelea he fakatane mo e fifine. (1 Korinito 5:11; 2 Korinito 7:1) Kua nakai fakalataha a lautolu ke he tau fakafetuiaga tupetupe he uta tala po ke tau tala fakakelea. (Efeso 4:31) Kua nakai taute a lautolu ke fakauaua he kumikumi atu ke he tau pulotu fakavaia he iloilo he lalolagi. (1 Korinito 3:19) He manako ke he Kupu he Atua, kua leoleo mai a lautolu he tau mena ka fofo e fakafetuiaga ha lautolu mo e Atua mo e amaamanakiaga he moui tukulagi. Kua nakai faihoania a lautolu he lagomatai e tau tuuta kaina ha lautolu ke tua ke he tau maveheaga homo ue atu ne tokai he Tohi Tapu, he iloa ‘to fakamoui e lautolu a lautolu, katoa mo lautolu ne fanogonogo kia lautolu.’—1 Timoteo 4:16.
6. Maeke fefe he pulotu ne fakave ke he Kupu he Atua ke leoleo a tautolu pihia foki i lalo he tau tutuaga uka?
6 Moli, ko e tau tagata oti—ko lautolu foki ne manako ke he Kupu he Atua—kua hufia ke he “vaha mo e tau mena ke tutupu ai.” (Fakamatalaaga 9:11) Kua moli ai ko e falu ia tautolu to fakafita ke he tau matematekelea pauaki, gagao lahi, tau puleheu, po ke mamate tuai. Pete ia, kua leoleo agaia a tautolu. Nakai maeke he ha matematekelea ke fakapakia tukulagi e tagata ne manako moli ke he Kupu he Atua. Ko e mena ia, kua nakai lata ia tautolu ke tupetupe lahi hagaao ke he mena ka tupu he vaha anoiha. He taute e tautolu e tau puipuiaga mitaki oti, kua mitaki ni ke toka e tau lekua ki a Iehova mo e nakai fakaata e nakai haohao mitaki he moui he vaha nei ke fofo e mafola ha tautolu. (Mataio 6:33, 34; Filipi 4:6, 7) Kia toka he loto e moli he amaamanakiaga he liu tu mai mo e he moui mitaki lahi he magaaho ka ‘fakafou he Atua e tau mena oti.’—Fakakiteaga 21:5; Ioane 11:25.
Fakamoli a Koe mo “Kelekele Mitaki”
7. Ko e heigoa e fakataiaga ne talahau e Iesu ke he lanu tagata ne o mai ke fanogonogo ki a ia?
7 Ko e aoga he hako e onoonoaga ke he Kupu he Atua kua fakamaama ai he taha he tau fakatai a Iesu. He fakapuloa e Iesu e kupu mitaki ki Palesitaina katoa, ne fakapotopoto e lanu tagata ke fanogonogo ki a ia. (Luka 8:1, 4) Ka kua nakai manako oti ke he Kupu he Atua. Moli ni, kua tokologa ne o ke fanogonogo ki a ia kakano kua loto a lautolu ke kitia e tau mana po ke ha kua fiafia a lautolu ke he puhala ofoofogia ne fakaako e ia. Ati, tala age e Iesu taha fakataiaga ke he lanu tagata: “Kua fina atu e tagata gana saito ke gana ai hana tau saito; kua gana e ia, ti mokulu ai falu ke he kauhala; kua holia, ti kai ai he tau manu lele. Kua mokulu foki falu ke he mena patu; kua tupu, ti fifigo ni, ha ko e mena nakai pala. Kua mokulu foki falu ke he vao talatala; kua tupu fakalataha a ia mo e vao talatala, ati apitia ai. Ka e mokulu falu ke he kelekele mitaki, kua tupu, kua fua mai e tau fua takiteau.”—Luka 8:5-8.
8. He fakataiaga a Iesu, ko e heigoa e saito?
8 Ne fakakite he fakatai a Iesu to kehekehe e tau tali ke he fakamatalaaga he tala mitaki, kua fakalata ni ke he loto hana ne fanogonogo. Ko e saito ne to ko e “kupu he Atua.” (Luka 8:11) Po kua talahau he taha fakamauaga, ko e saito ko e “kupu he kautu.” (Mataio 13:19) Maeke ia Iesu ke fakaaoga taha mai he tau talahauaga ia, ha ko e mataulu tala he Kupu he Atua ko e Kautu he lagi i lalo ha Iesu Keriso ko e Patuiki ko e puhala ka fakatokoluga e Iehova hana pule katoatoa mo e fakatapu hana higoa. (Mataio 6:9, 10) Kua tuga ai, mogoia, ko e saito ko e fekau he tala mitaki he Kupu he Atua, ko e Tohi Tapu. Kua fakamaama he Tau Fakamoli a Iehova e fekau he Kautu nei he to e lautolu e tau saito he fakatatai ke he To Saito fakamua, ko Iesu Keriso. Ti ko e heigoa e tali ne moua e lautolu?
9. Ko e heigoa ne fakatino he saito ne to (a) ke he kauhala? (e) ke he mena patu? (i) ke he vao talatala?
9 Ne talahau e Iesu kua mokulu falu saito ke he kauhala mo e kua holia ai. Kua hagaao ai ke he tau tagata ne lavelave lahi ke toka e tau saito he Kautu ke vakavaka he tau loto ha lautolu. Ka e, ato maeke ia lautolu ke feaki e manako ke he Kupu he Atua, ne “fina age ai e tiapolo, mo e uta kehe e kupu he tau loto ha lautolu, neke tua a lautolu, mo e fakamomoui ai.” (Luka 8:12) Falu saito ne mokulu ke he mena patu. Hagaao ai ke he tau tagata ne fiafia ke he fekau he Tohi Tapu ka e nakai toka ke gahua he tau loto ha lautolu. Ti ka hoko mai e totokoaga po ke uka lahi ia lautolu ke fakagahuahua e fakatonuaga he Tohi Tapu, “to o kehe ai a lautolu” ha kua nakai fai vakavaka a lautolu. (Luka 8:13) Ti ha ha ai a lautolu ne fanogonogo ke he kupu ka kua hufia he “fakaatukehe, mo e tau koloa, mo e tau mena fakafiafia he mouiaga nei.” He mogo fakamui, tuga e tau lakau ne vihi he tau vao talatala, kua “apitia ai.”—Luka 8:14.
10, 11. (a) Ko hai ne fakatino he kelekele mitaki? (e) Ko e heigoa kua lata ia tautolu ke taute ke “taofi” e Kupu he Atua he tau loto ha tautolu?
10 Ke fakahiku aki, ha ha ai e tau saito ne mokulu ke he kelekele mitaki. Kua tuhi ke he tau tagata ne moua e fekau mo e “loto fakamoli mo e mitaki.” Moli, kua manako oti a tautolu ke manatu kua ha ha a tautolu he vahega nei. Ka e, ke he fifiliaga fakamui, ko e manatu he Atua ne mua. (Tau Fakatai 17:3; 1 Korinito 4:4, 5) Ne talahau he Kupu hana ko e “loto fakamoli mo e mitaki” ha tautolu, ko e falu mena a ia ne fakamoli ha ko e tau gahua ha tautolu he mogonei ato mamate a tautolu po ke he magaaho ka ta mai he Atua e fakaotiaga ke he fakatokaaga kelea he tau mena nei. Kaeke mitaki e talia fakapa ha tautolu ke he fekau he Kautu, homo a ia. Pete ni ia, ko lautolu mo e tau loto fakamoli mo e mitaki ne talia e Kupu he Atua mo e “taofi ki ai . . . kua fua mai e tau fua ke he fakauka.”—Luka 8:15.
11 Ko e puhala moli hokoia ke taofi e Kupu he Atua he tau loto ha tautolu ko e totou mo e kumikumi fakatagata mo e fakalataha atu mo e tau katofia talitonu. Kua lata ai foki ke fakaaoga katoatoa e tau kai fakaagaga ne foaki he puhala ne kotofa ke leveki e tau mena fakaagaga he tau tutaki moli ha Iesu. (Mataio 24:45-47) Ha ko e tau mena pihia, ko lautolu ne taofi e Kupu he Atua he tau loto ha lautolu kua omoomoi he fakaalofa ke “fua mai e tau fua ke he fakauka.”
12. Ko e heigoa e fua kua lata ia tautolu ke fua mo e fakauka?
12 Ko e heigoa e fua ne tupu mai he kelekele mitaki? I loto he kelekele, ne tupu mai he tau tega e tau akau, ti fua mai foki e tau tega taha ia ni ne kua holofa ke fua atu foki. Tatai foki mo lautolu ne loto fakamoli mo e mitaki, ko e tega he kupu kua tupu i loto ia lautolu, fakatolomaki fakaagaga aki a lautolu ato maeke ia lautolu ke to e tega he tau loto he falu. (Mataio 28:19, 20) Mo e tau gahua to ha lautolu kua fakamailoga ai he fakauka. Ne fakakite e Iesu e aoga he fakauka he toaga he magaaho ne pehe a ia: “Ko ia ke tumau ato hoko ke he fakaotiaga, to fakamoui na ia. To fakamatala atu foki e tala mitaki nai he kautu he lalolagi oti, ke eke mo talahau ke he tau atu motu oti; ti hoko mai ai e fakaotiaga.”—Mataio 24:13, 14.
“Kia Fua Mai . . . ke he Tau Gahua Mitaki Oti”
13. Ko e heigoa e liogi ne talahau e Paulo ne matutaki mo e maama he Kupu he Atua?
13 Ne vagahau foki e aposetolo ko Paulo ke lata ke fua mai ai, mo e matutaki e ia e fua mai mo e Kupu he Atua. Ne liogi a ia ko e tau katofia talitonu hana“kua puke a mutolu ke he maama mitaki ke he . . . finagalo [he Atua], ke he pulotu oti katoa mo e loto matala kua fakalata ke he Agaga. Kia mahani a mutolu ke lata mo e Iki, kia fiafia mai a ia kia mutolu ke he tau mena oti; kia fua mai ai a mutolu ke he tau gahua mitaki oti.”—Kolose 1:9, 10; Filipi 1:9-11.
14-16. Ke fakalata atu ke he liogi a Paulo, ko e heigoa e fua ne moua e lautolu ne manako ke he Kupu he Atua?
14 Fakakite ai e Paulo ke moua e maama he Tohi Tapu nakai ko e mena fakamui a ia. Ka ko e manako ma e Kupu he Atua kua omoomoi a tautolu ke ‘mahani ke lata mo Iehova’ he fakatumau ke ‘fua mai ke he tau gahua mitaki oti.’ Ko e heigoa e gahua mitaki ia? Ke fakamatala e vagahau mitaki he Kautu ko e kotofaaga ne mua a ia ma e tau Kerisiano he tau aho fakahiku nei. (Mareko 13:10) Ke lafi ki ai, ko lautolu ne manako ke he Kupu he Atua kua fakamakai ke foaki tumau e lagomatai fakatupe ke he gahua nei. Kua fiafia lahi a lautolu ke he kotofaaga he iloa “kua fakaalofa e Atua kia ia kua foaki mo e fakamakai.” (2 Korinito 9:7) Ko e tau mena fakaalofa ha lautolu kua lagomatai aki e totogi he gahua he tau kaina Peteli ne molea e teau ne kua takitaki mai e gahua fakamatala he Kautu mo e lomi foki e tau Tohi Tapu mo e tau tohi faka-Tohi Tapu. Ko e tau mena fakaalofa ha lautolu kua lagomatai foki ke totogi e tau fonoaga lalahi faka-Kerisiano mo e ke fakafano e tau leveki o fano, tau misionare, mo e falu tagata fakamatala mau foki.
15 Falu gahua mitaki foki kua putoia ke he tau ta fale mo e levekiaga he tau fale he tapuakiaga moli. Ko e manako ma e Kupu he Atua ka omoomoi hana tau tagata tapuaki ke leveki fakamitaki e tau Fale he Toloaga mo e tau Fale he Kautu. (Fakatatai Nehemia 10:39.) Ha kua tohi i mua he tau fale pihia e higoa he Atua, kua lata ai ke fakamea mo e fakafou tumau a loto mo fafo, mo e kua lata e tau mahani ha lautolu ne tapuaki i loto he tau fale pihia ke aua fakama. (2 Korinito 6:3) Falu Kerisiano kua maeke ke mua atu e tau mena taute. Kua omoomoi he manako ma e Kupu he Atua a lautolu ke fenoga ke he tau fahi mamao ke lagomatai ke ta e tau fale fou he tapuakiaga ke he tau motu he lalolagi ne ha ha ai e manako ha kua mativa po ke nakai matala ke he fahi ia.—2 Korinito 8:14.
16 “Kia fua mai . . . ke he tau gahua mitaki oti” kua putoia ke leveki e tau matagahua fakamagafaoa mo e fakakite e kapeletu ke he tau katofia Kerisiano. Kua omoomoi he manako ma e Kupu he Atua a tautolu ke manamanatu ke he manako ha lautolu ne ‘faoa mo tautolu he tua’ mo e “ako . . . ke fakamua e mahani mitaki ke he tau faoa [ha tautolu].” (Kalatia 6:10; 1 Timoteo 5:4, 8) Ke he mena nei, ko e gahua mitaki ke aahi e tau tagata gagao mo e fakamafana a lautolu ne maanu. Ti ko e gahua mitaki haia ne taute he tau motua he fakapotopotoaga mo e he tau Komiti Matutaki Fale Gagao ke lagomatai e tau tagata takitokotaha ne fehagai mo e tau paleko he fahi fakaekekafo! (Gahua 15:29) Ti ha ha ai foki e tau matematekelea hane tupu ki mua—falu ia lautolu kua pauaki po ke falu ha ko e fakahanoa he tagata. Mo e lagomataiaga he agaga he Atua, ne feaki he Tau Fakamoli a Iehova e talahauaga mitaki ke he tau fahi loga he lalolagi he mafiti e lagomatai ne foaki ke he katofia talitonu mo e falu tagata ne lauia he tau matematekelea mo e tau tofaimoa. Ko e tau fua mitaki oti ainei ne fakakite mai ia lautolu ne manako ke he Kupu he Atua.
Tau Fua Lilifu Ue Atu Anoiha
17, 18. (a) Ko e heigoa kua taute ha ko e toaga he tega he Kautu? (e) Ko e heigoa e mena matakutakuina ka nakai leva ti kitia moli he tau tagata manako ke he Kupu he Atua?
17 Ko e toaga he tega he Kautu kua fakaholo atu ke ta mai e tau fua mitaki ue atu ke he tau tagata. He tau tau fou nei, kua molea e 300,000 he tau tagata he tau tau takitaha ne kua fakaata e fekau he Tohi Tapu ke vakavaka he tau loto ha lautolu ati hoko atu ke tukulele ha lalu tau momoui ki a Iehova mo e fakamailoga ai he kakano he papatiso he vai. Ko e vaha anoiha lilifu ue atu haia ne fakatalitali ki a lautolu!
18 Nakai leva, ko e tau tagata ne manako ke he Kupu he Atua kua iloa to matike hake a Iehova ko e Atua ke fakaheke hana higoa. “Papelonia e maga lahi,” ko e kautu he tau lotu fakavai he lalolagi, to fakaotioti ai. (Fakakiteaga 18:2, 8) Ti, ko lautolu ne nakai mahalo ke momoui lautatai ke he Kupu he Atua to fakaotioti he Patuiki ko Iesu Keriso. (Salamo 2:9-11; Tanielu 2:44) He mole atu, to ta mai he Kautu he Atua e okiokihaga tukulagi mai he holifono, felakutaki, mo e falu matematekelea. To nakai liu ke fakamafana e tau tagata ha ko e mamahi, gagao, mo e mate.—Fakakiteaga 21:3, 4.
19, 20. Ko e heigoa e lilifu mua ue atu anoiha ne tanaki ma lautolu ne manako moli ke he Kupu he Atua?
19 Ko e tau gahua mitaki lilifu ue atu haia he mogoia ka taute e lautolu ne manako ke he Kupu he Atua! Ko lautolu ne hao mai ia Amaketo to kamata e gahua olioli he fakafou e lalolagi nei ke he parataiso. To moua e lautolu e kotofa fiafia lahi he tauteute ma e tau manako he tau tagata mamate hane okioki mogonei he tau tukuaga mo e he manamanatuaga he Atua mo e amanakiaga ke fakalataha ke he fakaliu tu mai he tau tagata mamate. (Ioane 5:28, 29) He magahala ia, to tafe mai e tau takitakiaga mitaki katoatoa ke he tau tagata he lalolagi mai he Iki Pule Katoatoa, ko Iehova, he puhala he hana Tama ne fakamatalahi, ko Iesu Keriso. ‘To fofola ai e tau tohi,’ fakakite e tau fakaakoaga ha Iehova ma e lalolagi fou.—Fakakiteaga 20:12.
20 He vaha kotofa a Iehova, ko e kau katoa he tau Kerisiano fakauku tua fakamoli to ta hake ke he ha lautolu a palepale ke he lagi ko e “hakeaga fakalataha mo Keriso.” (Roma 8:17) He magahala he Pule Afe Tau ha Keriso, ko e tau tagata oti he lalolagi ne manako ke he Kupu he Atua to fakatolomaki ke he mitaki katoatoa he loto mo e tino. He mole atu e fakamoli i lalo he kamatamata fakahiku, to palepale a lautolu aki e moui tukulagi mo e to o mai ke olioli e “tokanoaaga ha ha he monuina he fanau he Atua.” (Roma 8:21; Fakakiteaga 20:1-3, 7-10) Ko e magaaho homo ue atu ha aia! Moli ni, pete he tuku mai e Iehova ki a tautolu e amaamanakiaga ke he lagi po ke he lalolagi, ko e fakauka he manako ke he Kupu he Atua mo e fakamaloloaga ke moui fakalata ke he hana pulotu ka leoleo a tautolu. Mo e he vaha anoiha ‘to fakalilifu ai e ia a tautolu ka peka a tautolu kia ia.’—Tau Fakatai 4:6, 8.
Maeke Nakai a Koe ke Fakamaama?
◻ Maeke fefe ke leoleo he manako ma e Kupu he Atua a tautolu?
◻ Ko e heigoa e saito he fakataiaga a Iesu, ti to fefe?
◻ Fakamoli fefe a tautolu mo “kelekele mitaki”?
◻ Ko e heigoa ne fakatalitali ki ai e tau fua he tagata ne manako ke he Kupu he Atua?
[Fakatino he lau 26]
Kua fakatino he saito he fakataiaga a Iesu e fekau he tala mitaki ne tokai he Kupu he Atua
[Credit Line]
Garo Nalbandian
[Fakatino he lau 27]
Fifitaki he Tau Fakamoli a Iehova e To Saito ne Mua
[Tau Fakatino he lau 28]
To olioli he tau tagata ne hao mai ia Amaketo e tau fua he lalolagi