Tau Huhu Mai he Tau Tagata Totou

Fefe e onoonoaga he Tau Fakamoli a Iehova ke he vili?

Ha ha i ai e tau matapatu fakaakoaga mahino kua fakatoka mai he Tohi Tapu ke maeke he tau fekafekau he Atua ke taute e onoonoaga tonu ke he mena nei. Pete ia, nakai fai matapatu fakaakoaga kua totoko ke he matagahua vili hokoia. Ma e fakatai, nakai fai kakano ko e ha ne nakai vili ai e matakau he tau pule fakatufono ke maeke ke hokotia ke he tau fifiliaga kua lauia e kaufakalatahaaga ha lautolu. Ko e tau fakapotopotoaga he Tau Fakamoli a Iehova kua fa taute e tau fifiliaga hagaao ke he tau magaaho feleveia mo e fakaaoga e tau koloa he fakapotopotoaga he vili mo e hiki lima.

Ko e heigoa, mogoia e vili he tau fifiliaga fakapolitika? Moli, ke he falu motu fakatemokarasi, ko e tokologa ke hokotia ke he 50 e pasene he puke tagata ne nakai hoko atu ke vili he aho vili. Ma e Tau Fakamoli a Iehova, ne nakai fakatauhele a lautolu mo e tonuhia he falu ke vili; po ke nakai taute e lautolu ha matagahua he foliaga ke totoko ke he tau viliaga fakapolitika. Kua fakalilifu mo e kaufakalataha a lautolu mo e tau pule ne kua fifili moli ke he tau viliaga ia. (Roma 13:1-7) Kaeke ke vili na lautolu ma e taha tagata he viliaga, igatia ni e Tau Fakamoli a Iehova mo e taute e fifiliaga ne fakave ke he manamanatuaga fakaako he Tohi Tapu mo e maamaaga he hana matagahua ke he Atua mo e Fakatufono. (Mataio 22:21; 1 Peteru 3:16) He taute e fifiliaga fakatagata nei, kia manamanatu e Tau Fakamoli ke he tau fahi loga.

Fakamua, ne pehe a Iesu Keriso hagaao ke he tau tutaki hana: “Ha ko e mena nakai ko e tau tagata he lalolagi a lautolu; tuga na au, nakai ko e tagata he lalolagi au.” (Ioane 17:14) Kua uta fakahokulo he Tau Fakamoli a Iehova e matapatu fakaakoaga nei. He “nakai ko e tau tagata he lalolagi,” kua tuuho a lautolu ke he tau mena fakapolitika he lalolagi.​—Ioane 18:36.

Ua aki, ne hagaao e aposetolo ko Paulo ki a ia ko e “ogo” he hukui a Keriso ke he tau tagata he vaha hana. (Efeso 6:20; 2 Korinito 5:20) Kua talitonu e Tau Fakamoli a Iehova ko Iesu Keriso he magaaho nei kua eke mo Patuiki he Kautu he Atua he lagi, ti ko lautolu, tuga e tau hukui kua lata ke fakailoa e mena nei ke he tau motu. (Mataio 24:14; Fakakiteaga 11:15) Kua amanaki ke he tau hukui ke tuuho mo e nakai he fakatauhele ke he tau mena fakatufono he tau motu ne kua fakafano a lautolu ki ai. Ha ko e tau hukui he Kautu he Atua he lagi, kua logona pihia foki e Tau Fakamoli a Iehova he nakai fakatauhele ke he tau mena fakapolitika he tau motu ne nonofo ai a lautolu.

Ko e mena ke tolu aki ke manamanatu ki ai ko lautolu kua fai vala he vili ke he tagata gahua kua fai fakalagoaga ma e mena kua taute e ia. (Fakatatai 1 Timoteo 5:22, The New English Bible.) Kua lata e tau Kerisiano ke manamanatu fakamitaki kua maeke nakai ia lautolu ke hahamo e matagahua ia.

Fa aki, kua uho moli e fakalatahaaga faka-Kerisiano ha lautolu ko e Tau Fakamoli a Iehova. (Kolose 3:14) Ka putoia e tau lotu ke he tau politika, ko e fua kua fa mavehevehe e tau tagata i ai. He fifitaki ki a Iesu Keriso, kua fakamamao e Tau Fakamoli a Iehova he putoia ke he tau mena fakapolitika mo e fakatumau e kaufakalatahaaga Kerisiano ha lautolu.​—Mataio 12:25; Ioane 6:15; 18:36, 37.

Lima aki mo e fakahikuaki, ko e fakamamao ha lautolu mai he tau mena fakapolitika kua foaki ke he Tau Fakamoli a Iehova e ataina ke vagahau e fekau he Kautu ke he tau tagata ne putoia ai ke he tau mena fakapolitika.​—Heperu 10:35.

He onoono ke he tau matapatu fakaakoaga faka-Tohiaga Tapu ne fakatoka mai i luga, he tau motu loga kua taute he Tau Fakamoli a Iehova e fifiliaga fakatagata nakai ke vili ke he tau fifiliaga fakapolitika, mo e tokanoaaga ha lautolu ke taute e tau fifiliaga kua lalago e fakatufono he motu. Ka e kua mogoia ka manako e fakatufono ke vili e tau tagata he motu? Ko e mena ia, kua igatia ni e Fakamoli mo e taute e fifiliaga he fakave ke he Tohi Tapu hagaao ke he puhala ke taute aki e tuaga. Ka fifili taha ke fano ke he fale vili, ko e fifiliaga ni hana a ia. Ko e mena kua taute e ia he fale vili ko e mena ni hana a ia mo e Tufuga.

Ko e fufuta he The Watchtower, Novema 15, 1950, he lau 445 mo e 446, ne talahau: “Kua taute e Kaisara e tau tagata oti he motu ke vili . . . kia o e [Tau Fakamoli] ke he tau fale vili mo e vili ai. He mena nei ne ui ki a lautolu ke fakamailoga e laupepa vili po ke tohi ko e tu a lautolu he fahi fe. To taute ni he tau tagata vili e laupepa vili ha lautolu. He mena nei ki mua he Atua kua ha ha i ai hana tau fakamoli kua lata ke gahua lagotatai mo e hana tau fakatufono mo e fakatatai atu ke he tua ha lautolu. Nakai ko e matagahua ha tautolu ke fakaako ki a lautolu e mena kua lata ke taute aki e laupepa vili.”

Ka e kua ko e fifine Kerisiano ne nakai ko e tane talitonu kua peehi a ia ke vili? Kia omaoma a ia ke he hana tane, tuga ni e tau Kerisiano kua omaoma ke he tau tui ne mua. (Efeso 5:22; 1 Peteru 2:13-17) Ka omaoma a ia ke he tane hana mo e fano ke he fale vili, ko e fifiliaga fakatagata ni hana a ia. Nakai fai tagata ke tuhituhi a ia.​—Fakatatai Roma 14:4.

Ka e kua e motu kua nakai peehi he fakatufono ke vili ka e tokologa kua totoko a lautolu ki a lautolu kua nakai o ke he fale vili​—liga kua fakatapakupaku a lautolu ke he hagahagakelea fakatino? Ka e kua ka nakai omoi fakamatafakatufono e tau tagata takitokotaha ke vili, ne kua fakahala lahi mahaki ke he falu puhala kaeke ke nakai o a lautolu ke he fale vili? He tau tuaga nei mo e pihia, kia taute ni he Kerisiano e fifiliaga hana. “Ha ko e mena to igatia e tagata mo e fua hana ni a kavega.”​—Kalatia 6:5.

Liga to ha ha i ai e tau tagata kua tupetupe ka onoono a lautolu ke he magaaho vili he motu ha lautolu, kua o falu Fakamoli a Iehova ke he fale vili ka e nakai o falu. To liga pehe a lautolu, ‘Nakai lagotatai oti e Tau Fakamoli a Iehova.’ Kua lata e tau tagata ke mailoga, ko e tau mena ne putoia ke he tau manamanatuaga he tau tagata takitokotaha tuga anei, kua igatia e tau Kerisiano takitokotaha mo e taute ni hana fifiliaga ki mua ha Iehova ko e Atua.​—Roma 14:12.

Ko e ha fifiliaga fakatagata ni ne taute he Tau Fakamoli a Iehova ke he ha tuaga kehekehe pehenei, kia leveki e lautolu e tuuho mo e ataina faka-Kerisiano ha lautolu ke tutala. He tau mena oti, kua falanaki a lautolu ki a Iehova ko e Atua ke fakamalolo a lautolu, foaki ki a lautolu e pulotu, mo e lagomatai a lautolu ke fakamamao mai he toka kehe e tua ha lautolu he ha puhala ni. Ti fakakite e lautolu e mauokafua ke he tau kupu he salamo: “Ha ko koe ni ko e haku a maka tumau, mo e haku a kolo; kia takitaki mo e leveki e koe au ha ko e hau a higoa.”​—Salamo 31:3.