Kua Omoi Nakai a Koe ke Gahua Tuga a Iesu?

“Kua fioia e ia e moto tagata tokologa, ti hohofi hana fakaalofa ki a lautolu, ha ko e mena tuga ne tau mamoe nakai fai leveki a lautolu; ti kamata ai a ia ke fakaako a lautolu.”—MAREKO 6:34.

1. Kua maama lahi ha ha kua fakatata he tau tagata e tau fua nava lahi mahaki?

TALI mai he fakamauaga tuai, tokologa e tau tagata ne fakakite e tau fua kua nava lahi mahaki. Maama e koe e kakano. Kua moua mo e fakatata e Iehova ko e Atua e fakaalofa, totonu, fakamokoi, mo e falu fua kua uho ki a tautolu. Ne tufuga e tau tagata ke he fakatai he Atua. Ti loto fakaaue a tautolu ha ko e kakano ne fakakite he tokologa e lahi he fakaalofa, totonu, fakaalofa hofihofi mo e falu fua faka-Atua, ti pihia foki he fakakite e loto manamanatu. (Kenese 1:26; Roma 2:14, 15) Liga mailoga e koe, mogoia, kua nakai tatai e puhala ne fakatata he tau tagata oti e tau fua nei.

2. Ko e heigoa e falu gahua mitaki kua taute he tau tagata, liga logona hifo kua fifitaki e lautolu a Keriso?

² Liga kua fa mahani a koe ke he tau tagata tane mo e tau fifine ne fa ahi po ke lagomatai e tau tagata gagao, fakakite e fakaalofa hofihofi ke he tau tagata matematekelea, po ke foaki fakamokoi ke he tau tagata nonofogati. Manamanatu foki, ke he tau tagata ne kua omoi he fakaalofa hofihofi a lautolu ke foaki e tau momoui ha lautolu ke gahua he tau matakavi tu mamao po ke tau fale leveki tama nakai fai matua, lautolu kua foaki e tau magaaho ke gahua he tau fale gagao po ke tau matakavi leveki pauaki, po ke tau tagata kua lali ke lagomatai a lautolu kua nakai fai kaina po ke ko lautolu kua fakapaea. Liga, falu ia lautolu kua logona hane fifitaki a lautolu ki a Iesu, ne fakatoka e fakafifitakiaga ma e tau Kerisiano. Ne totou e tautolu he tau Evagelia ne fakamaulu e Keriso e tau tagata gagao mo e fagai a lautolu ne hoge. (Mareko 1:34; 8:1-9; Luka 4:40) Ko e fakagahuahua ha Iesu ke he fakaalofa, momokoina, mo e fakaalofa hofihofi ko e fakakiteaga haia he “finagalo a Keriso,” ne kua fifitaki ai ke he Matua hana he lagi.—1 Korinito 2:16.

3. Ke moua e onoonoaga lagotatai he tau gahua mitaki ha Iesu, ko e heigoa kua lata ia tautolu ke manamanatu?

³ Kua mailoga nakai e koe kua tokologa he vaha nei ne omoi he fakaalofa mo e fakaalofa hofihofi ha Iesu ne nakai kitia e matapatu manatu he finagalo a Keriso? Moua e tautolu e maama he mena nei he manamanatu fakamatafeiga ki a Mareko veveheaga 6. Kua totou e tautolu i ai na kua ta mai e tau tagata gagao ke fakamaulu e Iesu. He talahauaga, ne ako foki e tautolu na totou afe kua o mai ki a ia ne fia hoge, ati fagai fakamana e Iesu a lautolu. (Mareko 6:35-44, 54-56) He fakamaulu a lautolu kua gagao mo e fagai a lautolu kua hoge ko e tau fakatataaga he fakaalofa hofihofi mua ue atu, ka ko e tau matapatu mena kia a ia he lagomatai e Iesu e falu? Maeke fefe mogoia ia tautolu ke fifitaki hana fakatokaaga mitaki katoatoa he fakaalofa, totonu, mo e fakaalofa hofihofi, ti pihia foki he fifitaki e ia a Iehova?

Omoi ke Talia e Tau Manako Fakaagaga

4. Ko e heigoa e fakatokaaga ma e talahauaga ia Mareko 6:30-34?

⁴ Ne hofihofi e logona hifo ha Iesu ki a lautolu ne viko takai ia ia pauaki ai ke he tau manako fakaagaga ha lautolu. Ko e tau manako ia ne mua atu e aoga, mahomo atu mai he tau manako fakatino. Manamanatu la ke he talahauaga ia Mareko 6:30-34. Ko e mena ne fakamau i ai ne hoko ke he mataafaga he Vai i Kalilaia, kua tata lahi ke he magahala he Paseka he 32 V.N. Ne fiafia e tau aposetolo, ha ko e kakano aoga lahi. He fakakatoatoa laia e fenoga mamao, ne o mai a lautolu ki a Iesu, nakai fakauaua ai he makai ke tala age ki a ia e tau mena ne iloa e lautolu. Pete ia, ne fakapotopoto mai e moto tagata. Kua lahi mahaki ai ne nakai maeke ia Iesu mo e tau aposetolo hana ke taumafa po ke okioki. Ne tala age a Iesu ke he tau aposetolo: “Ati o mai a, hoko tautolu ni, ke he mena tokanoa ke okioki fakatote ai.” (Mareko 6:31) He o atu he foulua, liga tata atu ki Kapanaumi, ne o atu a lautolu he Vai i Kalilaia ke he matakavi ogoogonoa. Ka e tafepoi atu e moto tagata hala uta mo e hoko mua a lautolu he foulua. Fefe e tali atu a Iesu? Kua ita kia a ia he fakalavelave e okioki hana? Nakai pihia!

5. Fefe e logona hifo ha Iesu ke he moto tagata ne o mai ki a ia, ti ko e heigoa ne taute atu e ia?

⁵ Ne omoomoi e loto ha Iesu he kitia e moto tagata tokologa, fakalataha mo lautolu kua gagao, ne fakatali fakamakai ai ki a ia. (Mataio 14:14; Mareko 6:44) Hagaaki ai ke he kakano ne omoomoi e fakaalofa hofihofi a Iesu mo e puhala ne tali atu e Ia, ne tohi e Mareko: “Kua fioia e ia e moto tagata tokologa, ti hohofi hana fakaalofa kia lautolu, ha ko e mena tuga ne tau mamoe nakai fai leveki a lautolu; ti kamata ai a ia ke fakaako a lautolu ke he tau mena loga.” (Mareko 6:34) Ne lahi atu e mena ne fioia e Iesu mai he tau tagata tokologa. Ne fioia e ia e tau tagata kua manako fakaagaga. Kua tatai a lautolu mo e tau mamoe pagea fano, he nakai fai leveki ke luaki a lautolu ke he lotopa uhiuhi po ke puipui a lautolu. Ne iloa e Iesu ko e tau takitaki lotu loto mao, ne talahau ai ke pehe ko e tau leveki fakaalofa, ne tiaki e tau tagata noa mo e fakaheu e tau manako fakaagaga ha lautolu. (Esekielu 34:2-4; Ioane 7:47-49) Ne kehe e puhala ne taute aki e Iesu a lautolu, ha kua taute e mena kua mitaki lahi mahaki ma lautolu. Kua kamata a ia ke fakaako a lautolu hagaao ke he Kautu he Atua.

6, 7. (a) Kua fakakite he tau Evagelia e heigoa ne tuku fakamua e Iesu he tali atu ke he tau manako he tau tagata? (e) Ko e heigoa e omoomoiaga ne fakamatala mo e fakaako a Iesu?

⁶ Mailoga la e fakapapale mo e lagomataiaga he tuku fakamua ne kitia moli ke he talahauaga taha ia. Ne tohi e Luka e mena nei, ko ia ko e ekekafo mo e mataala lahi ke he malolo tino he falu. “Ti mumui atu a lautolu kia [Iesu]; kua talia e ia a lautolu, kua vagahau atu foki kia lautolu ke he kautu he Atua, ti fakamalolo e ia a lautolu ne fia malolo.” (Luka 9:11; Kolose 4:14) Ka e nakai pihia oti ke he tau talahauaga he tau mana takitaha, ka ke he mena tupu nei, ko e heigoa ne mailoga mua he talahauaga omoomoi ha Luka? Kua moli ne fakaako e Iesu e tau tagata.

⁷ Kua tatai moli e mena nei mo e peehiaga kua fita he moua e tautolu ia Mareko 6:34. Kua fakakite fakamaali mai he kupu ia e matapatu kakano ne omoi a Iesu ke fakakite e fakaalofa hana. Ne fakaako e ia e tau tagata, he tali atu ke he tau manako fakaagaga ha lautolu. He mataulu he hana fekafekauaga, ne pehe a Iesu: “Ko e mena lata ke fakamatala e au e vagahau mitaki he kautu he Atua ke he falu a māga foki; ha ko e mena ia ne fakafano mai au.” (Luka 4:43) Ka e liga hepe agaia a tautolu ka manamanatu na fakapuloa e Iesu e fekau he Kautu ko e matagahua noa ni, he magaaho ni ka finagalo a ia ke taute e gahua fakamatala. Nakai, ko e fakaalofa hofihofi hana ma e tau tagata e matapatu fakaohooho he tufatufa atu e ia e tala mitaki ke he falu. Ko e mitaki mua ue atu ne taute e Iesu—pihia mo lautolu ne gagao, hu temoni, tau nonofogati, po ke hoge—ke lagomatai a lautolu ke iloa, talia, mo e ofania e kupu moli hagaao ke he Kautu he Atua. Ko e kupu moli ia ko e uho aoga ha ko e matagahua he Kautu he fakatokoluga e pule katoatoa a Iehova mo e foaki e tau monuina tukumalagi ma e tau tagata.

8. Fefe e logonaaga a Iesu hagaao ke he hana fakamatala mo e fakaako?

⁸ Ko e makutu ha Iesu he fakamatala hagaao ke he Kautu ko e lotouho tonu he kakano ne hau a ia ke he lalolagi. Tata atu ke he fakahikuaga he fekafekauaga hana ke he lalolagi, ne tala age a Iesu ki a Pilato: “Ko e mena hanai ne fanau mai ai au, mo e hau ai au ke he lalolagi, kia talahau e au e kupu moli. Ko lautolu oti kana ha ha he kupu moli, kua fanogonogo mai a lautolu ke he haku a leo.” (Ioane 18:37) Mailoga e tautolu ke he tau vala tala ua fakamua ko Iesu ko e tagata he tau logona hofihofi—ne leveki, mukamuka ke o atu ki ai, manamanatu, falanaki, mo e mua atu, kua fakaalofa. Kua lata ia tautolu ke loto fakaaue ke he tau fua ia hana he aga fakatagata kaeke ke manako moli a tautolu ke maama e finagalo a Keriso. Kua tatai ni e aoga ke mailoga kua putoia foki he finagalo a Keriso e tuku fakamua hana ke he gahua fakamatala mo e fakaako.

Ne Fakamafana e Ia Falu ke Fakamatala

9. Tuku fakamua ki a hai e fakamatala mo e fakaako?

⁹ Ko e tuku fakamua he fakamatala mo e fakaako—ko e fakakiteaga he fakaalofa mo e fakaalofa hofihofi—ne nakai ni ma Iesu hokoia. Ne fakamafana e ia e tau tutaki hana ke fifitaki hana tau aga, tau mena tuku fakamua, mo e tau gahua. Tuga anei, he mole e fifili e Iesu hana tau aposetolo 12, ko e heigoa ha lautolu ka taute? Kua tala mai he Mareko 3:14, 15 ki a tautolu: “Ti kotofa ai e ia e tokohogofulu ma ua ke fakalataha a lautolu mo ia, kia fakafano atu e ia a lautolu ke fakamatala atu e vagahau mitaki; Kia toka ai foki ia lautolu e pule ke fakamalolo ai e tau tagata gagao, mo e vega ai e tau temoni.” Kitia nakai e koe ha tukuaga fakamua ma e tau aposetolo?

10, 11. (a) He fakafano atu e tau aposetolo, ko e heigoa ne tala age e Iesu ke taute e lautolu? (e) Ko e heigoa e hagaaki kakano he fakafano atu e tau aposetolo?

¹⁰ Nakai leva, ne fakamalolo e Iesu e 12 ke fakamaulu e falu mo e vega e tau temoni. (Mataio 10:1; Luka 9:1) Ti fakafano e ia a lautolu he fenoga ke he “tau mamoe galo he faoa a Isaraela.” Ke taute e heigoa? Ne hataki a Iesu ki a lautolu: “Ka e o a a mutolu mo e fakamatala atu, kia pehe atu, Kua tata mai tuai e kautu he lagi. Kia fakamalolo e mutolu e tau tagata gagao, kia fakamea e tau tagata lepela, kia fakamamatike e tau tagata mamate, kia vega e tau temoni.” (Mataio 10:5-8; Luka 9:2) Ka ko e heigoa moli ne taute e lautolu? “Ti o atu a lautolu, mo e [1] fakamatala atu kia tokihala e tau tagata. [2] Na tokologa foki e tau temoni ne vega e lautolu, tokologa foki e tau tagata gagao ne fakatakai e lautolu ke he magalolo, mo e fakamalolo ai.”—Mareko 6:12, 13.

¹¹ Ha kua nakai totoku fakamua e fakaakoaga ke he falu a mena, kua kelea lahi kia ke totou ke he tau mena na i luga ke tuku fakamua po ke tau manatu ne putoia ai? (Luka 10:1-9) Kia nakai fakateaga foki e tautolu e tumau he fakaakoaga ne talahau fakamua ke he fakamaulu. Manamanatu la ke he tala he mena nei. Ato fakafano atu e toko 12 he tau aposetolo, ne kua hofihofi e logonaaga a Iesu ha ko e tuaga he moto tagata. Totou ai e tautolu: “Kua haele fano a Iesu ke he tau māga oti, mo e tau magamotu, kua fakaako ke he tau manako ha lautolu, mo e fakamatala e vagahau mitaki he kautu, kua fakamalolo foki e ia e tau gagao oti, mo e tau tagata mamahi oti he motu. Kua fioia e ia e lanu tagata, ati fakaalofa hofihofi ai a ia kia lautolu, ne fakafita a lautolu, mo e tiaki atu ai, tuga e tau mamoe nakai fai leveki a lautolu. Ati tala age ai a ia ke he hana tau tutaki, Kua loga e tau saito ke helehele, ka ko e tau tagata gahua, kua tokogaogoa a lautolu. Ko e mena ia, kia olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.”—Mataio 9:35-38.

12. Ko e heigoa e finagalo lafi ki ai he tau gahua fakamana ne taute e Iesu mo e tau aposetolo?

¹² He fakalataha mo ia, kua hufia he tau aposetolo e falu mena he finagalo a Keriso. Kua logona e lautolu ko e fakaalofa moli mo e fakaalofa hofihofi ke he tau tagata ne putoia ai e fakamatala mo e fakaako hagaao ke he Kautu—ko e matapatu haia he tau gahua mitaki ha lautolu. Tatai mo e mena ia, ko e tau gahua mitaki he puhala lagomatai fakatino, tuga e fakamalolo a lautolu ne gagao, kua lahi atu e mena ne lagomatai ke he tau tagata kua manako lagomatai. He manamanatu e koe, liga futiaki e falu tagata ha ko e tau fakamauluaga mo e foaki fakamana he tau mena kai. (Mataio 4:24, 25; 8:16; 9:32, 33; 14:35, 36; Ioane 6:26) Molea atu he lagomatai fakatino, ko e tau gahua moli ia ne omoi e tau tagata kitekite ke mailoga a Iesu ko e Tama he Atua mo e “ko e perofeta” ne talahau tuai mai e Mose.—Ioane 6:14; Teutaronome 18:15.

13. Ko e heigoa e matagahua ma e “perofeta” ka hau ne peehi mai he perofetaaga ia Teutaronome 18:18?

¹³ Ko e mua ue atu he ha ko Iesu ko e “perofeta”? Ko e heigoa e matapatu gahua ne talahau tuai mai ma hana? Kua talahaua kia e “perofeta” he taute e tau fakamauluaga fakamana po ke foaki hofihofi e tau mena kai ma lautolu ne hoge? Ne talahau tuai mai he Teutaronome 18:18: “To fakatu e au ma lautolu, e tau matakainaga ha lautolu ha perofeta tuga na koe [ma Mose]; to tuku atu foki e au haku a tau kupu ke he hana gutu, ti vagahau atu e ia kia lautolu e tau mena oti ni, ke poaki atu ai e au kia ia.” Ti he ako foki he tau aposetolo ke moua mo e fakakite e tau logonaaga hofihofi, ne fakahiku e lautolu e finagalo a Keriso ke fakamoli foki ke he ha lautolu a gahua fakamatala mo e fakaako. Ko e mena kua mahomo atu e mena ia ne taute e lautolu ma e tau tagata. Kakano he mena ia, to moua he tau tagata gagao mo e tau tagata nonofogati e tau lagomatai tukulagi, nakai ni fakaku ke he loa he moui he tagata po ke gahoa he tau mena kai.—Ioane 6:26-30.

Feaki e Finagalo a Keriso he Vaha Nei

14. Kua lauia fefe e finagalo a Keriso he fakamatalaaga ha tautolu?

¹⁴ Nakai fai ia tautolu ka kehe atu e kitekite ke he finagalo a Keriso ke he senetenari fakamua—ki a Iesu mo e tau tutaki fakamua ne kua tohi he aposetolo ko Paulo hagaao ki ai: “Ka kua moua e tautolu e finagalo a Keriso.” (1 Korinito 2:16) Ti mautali a tautolu ke talahau kua fiafia a tautolu ke fakamatala e tala mitaki mo e ke taute tutaki. (Mataio 24:14; 28:19, 20) Ka e, kua aoga lahi ke fakaata ha tautolu ni a tau manatu he taute e gahua ia. Nakai mai he manamanatu ko e matagahua noa ni. Ko e fakaalofa ke he Atua ko e matapatu kakano ne fakalataha a tautolu ke he fekafekauaga, mo e tuga moli a Iesu kua putoia e omoomoi he fakaalofa hofihofi ke fakamatala mo e fakaako.—Mataio 22:37-39.

15. Ko e ha kua lata ai e fakaalofa hofihofi ke he ha tautolu a fekafekauaga?

¹⁵ Moli, nakai mukamuka tumau ke logona hifo e fakaalofa hofihofi ma lautolu ne nakai auloa ke he taofiaga ha tautolu, mua atu ka fehagai a tautolu mo e favale, tiaki, po ke totokoaga. Ka e, ka galo e fakaalofa mo e fakaalofa hofihofi ha tautolu ma e tau tagata, to galo foki e tautolu e omoomoiaga kua lata he fakalataha ke he fekafekauaga Kerisiano. Ti feaki fefe e tautolu e fakaalofa hofihofi? Lali a tautolu ke kitia e tau tagata tuga ne fioia e Iesu, kua “tiaki atu ai, tuga e tau mamoe nakai fai leveki a lautolu.” (Mataio 9:36) Nakai kia ko e hagaao e mena ia ke he tokologa he vaha nei? Ne kua tiaki mo e fakapouli fakaagaga he tau leveki lotu fakavai a lautolu. Ti ko e fua, nakai iloa e lautolu e takitakiaga tomatoma ne moua he Tohi Tapu po ke tau tutuaga he Parataiso ka nakai leva ti ta mai he Kautu he Atua ke he lalolagi ha tautolu. Kua fehagai a lautolu mo e tau mena vihi he moui he tau aho takitaha—putoia e hoge, mavehevehe he magafaoa, gagao, mo e mate—ka e nakai moua e amaamanakiaga he Kautu. Ha ha ia tautolu e manako ha lautolu: ko e tala mitaki fakahao moui he Kautu he Atua ne fakatu mogonei he lagi!

16. Ko e ha ne manako a tautolu ke fakamatala e tala mitaki ke he falu?

¹⁶ Ti ka manamanatu mogoia a koe ke he tau manako fakaagaga ha lautolu ne tu takai ia koe, nakai kia omoi e loto hau ke manako ke taute katoatoa e mena kua maeke ia koe ke tala age ki a lautolu e finagalo fakaalofa he Atua? E, ko e gahua ha tautolu haia he fakaalofa hofihofi. Ka fakaalofa a tautolu ke he tau tagata tuga ne taute e Iesu, to kitia moli ke he leo vagahau ha tautolu, fofoga he tau mata ha tautolu, puhala fakaako ha tautolu. To taute he tau mena oti ia e fekau ha tautolu ke futia ki a lautolu “ne kotofa ke he moui tukulagi.”—Gahua 13:48.

17. (a) Ko e heigoa falu puhala ke fakatata e tautolu e fakaalofa mo e fakaalofa hofihofi ma e falu? (e) Ko e ha kua nakai lata ko e fifiliaga noa ni e taute he tau gahua mitaki po ke fakalataha ke he fekafekauaga?

¹⁷ Ko e fakaalofa mo e fakaalofa hofihofi ha tautolu kua lata moli ke fakakite ke he moui katoa ha tautolu. Lauia ai e mena nei he totonu atu ha tautolu ki a lautolu ne mativa, gagao, mo e nonofogati—he taute e tautolu e mena mitaki ke fakatotoka ha lautolu a matematekelea. Kua fakakatoatoa ai e tau laliaga ha tautolu ke he tau kupu mo e tau gahua ke utakehe e mamahi ha lautolu ne galo e tau fakahele ke he mate. (Luka 7:11-15; Ioane 11:33-35) Ka ko e fakakiteaga pihia he fakaalofa, totonu, mo e fakaalofa hofihofi kua nakai lata ke eke mo matapatu hagaaki he tau gahua mitaki ha tautolu, he tuga e fakalataha a lautolu mo e falu tagata fakatu lagomatai. Kua lahi atu e aoga tukulagi he tau laliaga ne omoomoi he tau fua faka-Atua pihia ka kua kitia ai ke he gahua fakamatala mo e fakaako Kerisiano. Liu manatu e mena ne talahau e Iesu ke he tau takitaki lotu Iutaia: “Kua ta atu e mutolu e mena ne hogofulu aki e mili, mo e aneto, mo e kumina; ka kua tiaki e mutolu e tau mena he fakatufono ne mua, ko e mahani tututonu, mo e fakaalofa, mo e fakamoli; kua lata ni kane eke e mutolu e mena ia, ti ua tiaki foki e tau mena na.” (Mataio 23:23) Kua nakai fili a Iesu ke he tau mena nei po ke aina—ke lagomatai e tau tagata ke he tau mena fakatino po ke fakaako a lautolu aki e tau mena fakaagaga foaki moui. Ne taute ua e Iesu. Ne maaliali agaia ko e hana gahua fakaako ne mua ue atu ha ko e mitaki ne fakave e ia kua liga eke mo lagomatai tukulagi.—Ioane 20:16.

18. Ko e heigoa kua lata he manamanatu ha tautolu ke he finagalo a Keriso ke omoi a tautolu?

¹⁸ Ko e fiafia ha ia ha tautolu ha kua fakakite e Iehova e finagalo a Keriso ki a tautolu! Puhala mai he tau Evagelia, kua iloa mitaki e tautolu e tau manatu, tau logona hifo, tau mahani, tau gahua, mo e tau mena tuku fakamua he tagata ne mua he moui fakamua atu. Ko e fifiliaga ni ha tautolu ke totou, manamanatu hokulo, ti fakagahuahua e mena ne fakakite mai he Tohi Tapu hagaao ki a Iesu. Manatu, ka manako moli a tautolu ke gahua tuga a Iesu, kua lata ia tautolu ke ako fakamua ke manamanatu, logona hifo, mo e fokifoki fakamitaki e tau mena oti tuga he taute e ia, ke he ha tautolu a otiaga he lotomatala ko e tau tagata nakai mitaki katoatoa. Ti kua lata mogoia ia tautolu ke fifili ke feaki mo e fakatata e finagalo a Keriso. Nakai fai puhala mitaki foki ke moui, nakai fai puhala mitaki foki ke taute ke he tau tagata, mo e nakai fai puhala mitaki foki ma tautolu mo e falu ke fakatata atu ki a ia ne fakaata mitaki katoatoa a ia, ko e ha tautolu a Atua hofihofi, ko Iehova.—2 Korinito 1:3; Heperu 1:3.

To Tali Fefe a Koe?

• Ko e heigoa e maamaaga ne foaki he Tohi Tapu ke he puhala ne fa tali atu a Iesu ke he tau manako he tau tagata?

• Ko e heigoa ne peehi e Iesu he fekau atu e tau tutaki hana?

• Fakakite fefe e tautolu e “finagalo a Keriso” he tau gahua ha tautolu?

[Lau Kato he fakatino he lau 19]

[Fakatino he lau 20]

Ko e heigoa e mitaki ue atu ka taute he tau Kerisiano ma e falu?