Tau Matua—Ko e Heigoa e Vaha Anoiha ne Manako a Koe ma e Fanau Hau?
“Ko e tau fuata katoa mo e tau tamāfine, . . . Kia fakaheke a lautolu ke he higoa a Iehova.”—SALAMO 148:12, 13.
1. Ko e heigoa e tau kapaletu he tau matua ma e tau tama ha lautolu?
FAI matua nakai ne nakai kapaletu lahi ke he vaha anoiha he tau tama ha lautolu? Ko e magaaho ne fanau—po ke ato fanau e mukemuke—kua kamata e tau matua ke tupetupe ke he moui hana. To tino malolo nakai a ia? To tupu malolo nakai a ia? He lahi hake fakahaga e tama, ha ha i ai foki e falu kapaletu. Ke he laulahi, kua manako e tau matua ma e mitaki ni ma e tau fanau ha lautolu.—1 Samuela 1:11, 27, 28; Salamo 127:3-5.
2. Ko e ha ne tokologa e tau matua he vaha nei ne malolo e logonaaga ke moua he tau tama ha lautolu e olioli he moui mitaki ka tutupu hake a lautolu?
2 He lalolagi he vaha nei ko e paleko ma e tau matua ke foaki e mena kua mitaki ma e tau tama ha lautolu. Tokologa e tau matua ne moua e tau tuaga uka—he tau felakutaki, tau fekehekeheaki fakapolitika, tau tuaga uka fakatupe, tau mamahi fakatino mo e manamanatuaga, mo e falu foki. Pauaki ai, ko e manako he tau loto ha lautolu ke nakai pihia e tau tama ha lautolu. He tau motu mautu, kua mailoga he tau matua e tau tama he tau kapitiga mo e tau magafaoa ha lautolu kua kautu ke he tau gahua tokoluga mo e olioli e tau momoui ne tuga kua kautu. Ti, kua omoomoi e tau logonaaga ha lautolu ke taute e tau mena ne maeke ia lautolu ke mailoga kua maeke foki he tau tama ha lautolu ke olioli e moui hagahaga mitaki mo e tokotoko mitaki—ko e moui mitaki—ka lalahi hake a lautolu.—Fakamatalaaga 3:13.
Fifili e Moui Mitaki
3. Ko e heigoa e fifiliaga ne taute he tau Kerisiano?
3 Ko e tau tutaki ha Iesu Keriso, ne fifili e tau Kerisiano ke tukulele ha lautolu a tau momoui ki a Iehova. Ne uta e lautolu ke he tau loto ha lautolu e tau kupu ha Iesu: “Ka fia mui mai taha kia au, ua omaoma a ia kia ia, ka e nikiti e ia hana [“akau fakakikiveka,” NW] ke he tau aho oti, ti mui mai kia au.” (Luka 9:23; 14:27) E, ko e moui he Kerisiano kua putoia e foaki noa. Ka e, nakai ko e moui nofogati mo e nakai fiafia. Kehe ai, ko e moui fiafia mo e makona—ko e moui mitaki—ha kua putoia e foaki, ti tuga he talahau e Iesu, “kua mua e monuina hana ke foaki atu, ke he monuina hana ke talia mai.”—Gahua 20:35.
4. Ko e heigoa ne tomatoma e Iesu ke he tau tutaki hana ke tutuli?
4 Ko e tau tagata he vaha ha Iesu ne nonofo i lalo he tau tutuaga uka lahi. He lafi ke gahua ke lata mo e moui, kua fakauka a lautolu ke he pule favale he tau Roma mo e tau pehiaaga vevela he tau tagata lotu papa mao. (Mataio 23:2-4) Ka e, tokologa ne logona fiafia hagaao ki a Iesu ne tuku kehe e tau tutuliaga fakatagata—pihia mo e tau gahua—ti eke mo tau tutaki hana. (Mataio 4:18-22; 9:9; Kolose 4:14) Kua fakahagahaga kelea mo e moumou kia he tau tutaki ia e vaha anoiha ha lautolu? Mailoga e tau kupu ha Iesu: “Kaeke ke toka e taha e tau fale, po ke tau matakainaga, po ke lafu mahakitaga, po ke matua tane, po ke matua fifine, po ke hoana, po ke tau fanau, po ke tau kaina, ha ko e haku a higoa, to moua e ia takiteau māna, to eke foki māna e moui tukulagi.” (Mataio 19:29) Ne tala age a Iesu ke he tau tutaki hana kua iloa he Matua he lagi e tau manako ha lautolu. Ne tomatoma mogoia a ia ki a lautolu: “Ka kia kumikumi fakamua a mutolu ke he kautu he Atua mo e hana tututonu, ati lafi atu ai e tau mena oti ia kia mutolu.”—Mataio 6:31-33.
5. Fefe e logonaaga he falu matua hagaao ke he fakamoliaga ha Iesu to leveki he Atua e tau fekafekau hana?
5 Nakai fai kehe e vaha nei. Iloa e Iehova e tau manako ha tautolu, ti ko lautolu ne tuku fakamua e Kautu he tau momoui ha lautolu, mua atu ki a lautolu ne tutuli e fekafekauaga mau, kua mavehe foki to leveki e ia a lautolu. (Malaki 3:6, 16; 1 Peteru 5:7) Pete ia, ko e falu matua, kua fakauaua ke he mena nei. Ke he taha fahi, kua manako a lautolu ke kitia e tau tama ha lautolu kua holo ki mua he gahua a Iehova, liga nakai leva ti huhu atu ke he fekafekauaga mau. He taha fahi, ko e manamanatu ke he tuaga fakatupe mo e gahua he lalolagi he vaha nei, kua logona hifo e lautolu e aoga ma lautolu ne ikiiki ke moua mua e fakaakoaga mitaki ke maeke ia lautolu ke moua e tau lotomatala kua lata ma e gahua mitaki po ke taha mena mo paletua ki ai kaeke ke fai mena manako. Ke he tau matua pihia, ko e fakaakoaga mitaki kua fa kakano ko e fakaakoaga tokoluga atu.
Tauteute ma e Vaha Anoiha
6. Ko e heigoa e puhala ne fakaaoga he vala tala nei e tau kupu “fakaakoaga tokoluga atu”?
6 Ko e fakatokaaga he fakaakoaga kua kehekehe he tau motu takitaha. He tau Fahi Kaufakalataha, ma e fakatai, kua 12 e tau he foaki he tau aoga fakatufono e fakaakoaga kua latatonu. Mole ia, liga fifili he tau tama aoga ke o atu ke he univesiti po ke koliti ke fa po ke loga e tau tau, takitaki atu ke he tikulī he bachelor po ke tau fakaakoaga he paase ma e tau gahua ke he tau vai fakaekekafo, matafakatufono, enesinia, mo e falu foki. Kua kakano pihia e fakaakoaga univesiti ka fakaaoga he vala tala nei e tau kupu “fakaakoaga tokoluga atu.” Ke he taha fahi, ha ha i ai e tau aoga fakamahani ke he matagahua, ne foaki e tau course kuku ke moua e setifikete (certificate) po ke tipiloma ke he falu matafeua po ke gahua.
7. Ko e heigoa e tau peehiaga ne fakatapakupaku e tau tama aoga ki ai he tau aoga tokoluga?
7 Ko e puhala he vaha nei ma e tau aoga tokoluga ke tauteute e tau tama aoga i ai ma e fakaakoaga tokoluga atu. Ke moua e foliaga nei, laulahi he tau aoga tokoluga ne hagaaki ke he tau matakupu fakaako ne fakamalolo aki e tau tama aoga ke lalahi e tau ola he tau kamatamata ke huhu ke he univesiti ka e nakai ke he tau course ke lagomatai aki e tau tama aoga ke kumi gahua. Ko e tau tama he aoga tokoluga he vaha nei kua peehi malolo he tau faiaoga, tau tagata fakatonutonu, mo e tau kapitiga aoga ke foli ke huhu he tau univesiti ne mitaki lahi mahaki, ka amanaki a lautolu ke moua e tau tikulī ka hafagi ki a lautolu e puhala ke moua e tau gahua mitaki mo e totogi lahi.
8. Ko e heigoa e tau fifiliaga kua fakafelau mo e tau matua Kerisiano?
8 Ti ko e heigoa, mogoia, he tau matua Kerisiano ka taute? Moli, kua manako a lautolu ke he tau tama ha lautolu ke kautu he o he aoga mo e ako e tau lotomatala kua lata ke lalago aki a lautolu anoiha. (Tau Fakatai 22:29) Ka kua lata kia ia lautolu ke fakaata e tau tama ha lautolu ke omoomoi he aga fetoko ma e muhu koloa mo e kautu? Ko e heigoa e tau vahega foliaga ne tuku e lautolu i mua he tau fanau, he puhala vagahau po ke fakafifitakiaga fakatagata? Kua gahua fakalahi falu matua mo e fakaputu e tupe ke maeke ke fakafano e tau tama ha lautolu ke he tau fakatokatokaaga he tau aoga tokoluga ka hoko mai e magaaho. Kua makai e falu ke nonofo kaitalofa ma e kakano nei. Ko e totogi he fifiliaga pihia, mogoia, kua nakai fuafua hokoia ke he tau tupe. Ko e heigoa e totogi he tutuli e fakaakoaga tokoluga atu he vaha nei?—Luka 14:28-33.
Ko e Totogi he Tutuli e Fakaakoaga Tokoluga Atu
9. Ko e heigoa ka talahau hagaao ke he tupe ka totogi he fakaakoaga tokoluga atu he vaha nei?
9 Ka manamanatu a tautolu ke he totogi, kua fa manamanatu a tautolu ke he tupe fakamole. He falu motu, ko e fakaakoaga tokoluga atu kua fa totogi he fakatufono ke nakai totogi ai he tau tama aoga ne kautu e tau fakaakoaga. Ka e, he laulahi he tau motu, kua tauuka lahi fakahaga e fakaakoaga tokoluga atu. Ne talahau he vala tala New York Times Op-Ed: “Ne fa hagaao ke he tau fakaakoaga tokoluga atu ko e enisini ne hafagi e tau puhala. Mogonei, kua fakamoli e veha he fai mena mo e nakai fai mena.” He falu kupu, ko e fakaakoaga tokoluga atu kua mafiti fakahaga mo lotouho he monuina mo e matalahi he fakatokatokaaga nei. Kua lata kia e tau matua Kerisiano ke fifili e foliaga pihia ma e fanau ha lautolu?—Filipi 3:7, 8; Iakopo 4:4.
10. Matutaki lahi fefe e fakaakoaga tokoluga atu ke he fakatokaaga nei ne tolomaki ki mua?
10 Pihia foki ka nakai totogi e fakaakoaga tokoluga atu, ka e fai matagahua agaia ne putoia ki ai. Ma e fakatai, kua talahau he Wall Street Journal he taha motu Asia he Fahi Toga ki uta, kua taute he fakatufono e “fakaveaga he aoga ne tuga e piramiti ne omoi fakatokoluga e tau tama aoga iloilo lahi ke he tapunu.” “Ko e tapunu” kua kakano lahi ke hokotia atu ke he tau aoga tokoluga ue atu he lalolagi—ko Oxford mo Cambridge i Igilani, ko e tau aoga Ivy League he tau Fahi Kaufakalataha, mo e falu. Ko e ha ne foaki he fakatufono e fakaholoaga loagitu pihia? “Ke omoi aki e tuaga fakatupe he motu,” he talahau he hokotaki. Kua teitei nakai totogi e fakaakoaga, ka ko e tau palepale ka moua he tau tama aoga ko e moui ne hufia lahi ke he fakatokaaga nei ne tolomaki ki mua. Pete ko e puhala he moui a ia kua lahi e tutuli he lalolagi, ko e mena kia a ia ne manako e tau matua Kerisiano ma e tau tama ha lautolu?—Ioane 15:19; 1 Ioane 2:15-17.
11. Ko e heigoa he tau hokotaki ne fakakite hagaao ke he fakaaoga hehe he kava mo e mahani feuaki he vahaloto he tau tama aoga univesiti?
11 Ti ha ha ai e takatakaiaga. Ko e tau nonofoaga he univesiti mo e koliti kua fakalialia ha ko e tau mahani kelea—ko e fakaaoga fakahehe he tulaki mo e kava, mahani feuaki, kaiha, fakamatematekelea, mo e falu atu foki. Manamanatu ke he fakaaoga hehe he kava. He hokotaki ke he inu kava kelea, ko e inu ni ke konahia, he pehe e mekasini New Scientist: “Kavi ke he 44 e pasene he [tau tama aoga univesiti he Fahi Kaufakalataha] ne fa kona lagataha he ua e vaha tapu.” Ko e lekua taha ia ke he tau fuata ikiiki i Ausetalia, Peritania, Rusia, mo e falu matakavi foki. Ka hoko ke he mahani feuaki, ko e tau vagahau he tau tama aoga he vaha nei kua hagaao ke he “femomoheaki he taha e po,” ne hagaao ke he hokotaki he Newsweek “kua fakamaama ko e lagataha e taute e mahani feuaki—kamata mai he taufigita ke hoko ke he mahani fakatane mo e fifine—he vahaloto he tau tagata mahani ne nakai fai fakatokaaga ke tutala ki ai he magaaho fakamui.” Kua fakakite he tau kumikumiaga mai he 60 ke he 80 e pasene he tau tama aoga ne taute e tau vahega mahani pehenei. “Kaeke ko e tama aoga mitaki a koe,” he talahau he taha tagata kumikumi, “taute e koe e tau mahani ia.”—1 Korinito 5:11; 6:9, 10.
12. Ko e heigoa e tau pehiaaga ne fakatapakupaku e tau tama aoga koliti ki ai?
12 He lafi ke he takatakaiaga kelea, ha ha i ai e peehiaga he tau gahua aoga mo e tau kamatamata. Pauaki ai, kua lata he tau tama aoga ke fakaako mo e taute e tau gahua aoga ne uta ki kaina ke paase e tau kamatamata. Ha ha i ai foki e falu ne lata ke gahua vala magaaho ai ka e o agaia he aoga. Ko e tau mena oti nei kua fofo lahi e tau magaaho mo e malolo ha lautolu. To lahi fefe, mogoia, e magaaho ma e tau gahua fakaagaga? Ka malikiti e peehiaga, ko e heigoa ka fakatoka? To tuku mua agaia nakai e Kautu, po kua tuku tuai ke he mafoa? (Mataio 6:33) Kua tomatoma he Tohi Tapu e tau Kerisiano: “Hanai, a mutolu kia o fakalaulau a mutolu; nakai tuga ne tau tagata goagoa ka kia tuga e tau tagata iloilo. Kia [“fakatau e tau magaaho ne lata ma mutolu,” NW], ha kua kelea e tau aho ainei.” (Efeso 5:15, 16) Ko e momoko ha ia ha kua mokulu kehe e falu mai he tua ha ko e fua he fofo lahi e tau magaaho mo e malolo ha lautolu po ke he vihu ke he mahani nakai faka-Tohi Tapu, he koliti!
13. Ko e heigoa e tau huhu kua lata he tau matua Kerisiano ke manamanatu ki ai?
13 Moli, nakai ni ko e nonofoaga koliti po ke univesiti ne ha ha i ai e mahani feuaki, mahani kelea, mo e tau pehiaaga. Ka e, tokologa e tau fuata he lalolagi ne onoono ke he tau mena pihia ko e vala he fakaakoaga, ti nakai fai kelea ki ai. Kua fakatapakupaku pauaki kia he tau matua Kerisiano e tau tama ha lautolu ke he takatakaiaga pihia ke fa po ke loga e tau tau? (Tau Fakatai 22:3; 2 Timoteo 2:22) Kua aoga kia e tau fua ka moua e lautolu ne ikiiki he nakai mailoga e hagahaga kelea kua putoia ai? Ti aoga lahi, ko e heigoa ha lautolu ne ikiiki ne ako ke he tau mena kua lata ke tuku mua he tau momoui ha lautolu?a (Filipi 1:10; 1 Tesalonia 5:21) Kua lata he tau matua ke manamanatu fakahokulo mo e liogi hagaao ke he tau huhu nei, ti pihia ke he hagahaga kelea he fakafano e tau tama ha lautolu ke he aoga he taha taone po ke taha motu.
Ko e Heigoa e Falu Fifiliaga?
14, 15. (a) Pete ne tau manatu talahaua, ko e heigoa e fakatonuaga he Tohi Tapu kua aoga he vaha nei? (e) Ko e heigoa e tau huhu kua maeke ia lautolu ne ikiiki ke huhu hifo ki a lautolu?
14 He vaha nei, ko e manatu talahaua ke maeke he tau fuata ikiiki ke kautu, ko e puhala ni ke hoko ke he fakaakoaga he univesiti. Pete ia, he nakai muitua ke he mena ne talahaua, kua muitua he tau Kerisiano e tomatomaaga he Tohi Tapu: “Aua neke mahani foki a mutolu fakalataha mo e lalolagi nai, ka kia faliu a mutolu ke he liu foki fakafou he tau loto ha mutolu, kia kumikumi e mutolu po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.” (Roma 12:2) Ko e heigoa e finagalo he Atua ma e tau tagata hana, ikiiki mo e fuakau, he tuaga fakahiku nei he vaha he fakaotiaga? Ne tomatoma e Paulo a Timoteo: “Kia nofo fakalatalata a koe ke he tau mena oti, kia fakauka ke he tau mena ke mamahi ai, kia eke e gahua he tagata fakamatala vagahau mitaki, kia fakakatoatoa ni hāu a feua.” Ko e tau kupu ia kua aoga moli ki a tautolu oti he vaha nei.—2 Timoteo 4:5.
15 He nakai putoia ke he tau aga velevelekoloa he lalolagi, kua lata ke igatia a tautolu oti “kia nonofo fakalatalata”—ke he tau puhala fakaagaga ha tautolu. Kaeke ko e fuata tote a koe, huhu ki a koe ni: ‘Kua tuku kia e au e laliaga mitaki lahi mahaki haku ke “fakakatoatoa ni haku a feua,” ke eke au mo fekafekau kua lata he Kupu he Atua? Ko e heigoa e tau fakaholoaga haku he tutuli ke “fakakatoatoa” e feua haku? Kua manamanatu nakai au ke eke e fekafekauaga mau mo gahua?’ Ko e tau huhu paleko anei, mua atu ka kitia e koe e falu fuata kua eketaha ke he tau tutuliaga lotokai, he ‘kumi e tau mena lalahi’ ne manatu a lautolu to takitaki ke he vaha anoiha kua mautu. (Ieremia 45:5) Ko e tau matua Kerisiano, mogoia, kua foaki fakapulotu ke he tau tama ha lautolu mai he mukemuke e takatakaiaga mo e fakamahani fakaagaga kua hako.—Tau Fakatai 22:6; Fakamatalaaga 12:1; 2 Timoteo 3:14, 15.
16. Maeke fefe he tau matua Kerisiano ke foaki fakapulotu e takatakaiaga fakaagaga kua hako ma e tau tama ha lautolu?
16 “Kua kitekite fakamakutu lahi he matua fifine e tau lafiaga ha mautolu,” he liu manatu he uluaki he tau tama tane tokotolu he taha magafaoa nukua fekafekau mau e matua fifine ke loga e tau tau. “Ne nakai lafi a mautolu mo e tau kapitiga aoga ka e lafi ni mo lautolu he fakapotopotoaga ne aga fakaagaga mitaki. Ne uiina tumau foki e ia a lautolu he fekafekauaga mau—tau misionare, tau leveki faifano, tau tagata he Peteli, mo e tau paionia—ke he kaina ha mautolu ma e lafiaga. He fanogonogo ke he tau mena iloa ha lautolu mo e kitia e olioli ha lautolu kua lagomatai ke to ke he tau loto ha mautolu e manako ke he fekafekauaga mau.” Ko e olioli ha ia ke kitia he vaha nei e tau tama tane tokotolu ia he fekafekauaga mau—taha ne gahua he Peteli, taha ne fano he Aoga Fakaako Fekafekau, ti taha ne paionia!
17. Ko e heigoa e takitakiaga ka foaki he tau matua ki a lautolu ne ikiiki ke he fifiliaga ha lautolu ke he tau matakupu fakaako mo e fakamahani gahua? (Kikite e puha he lau tohi 29.)
17 He nakai ni foaki e takatakaiaga malolo fakaagaga, kua lata foki he tau matua ke foaki ke he tau tama ha lautolu e takitakiaga tonu ke he fifiliaga ha lautolu ke he tau matakupu fakaako he aoga mo e tau foliaga fakamahani ke he tau fanau ha lautolu. Ko e taha fuata tane, gahua mogonei he Peteli, kua pehe: “Ne paionia tokoua e tau matua haku fakamua mo e he mole e mau ha laua mo e gahua fakamalolo ke to e agaga paionia ke he magafaoa katoa. Ko e tau matakupu fakaako he aoga ne fifili e mautolu po ke tau fakatokaaga ne taute ka lauia e vaha anoiha ha mautolu, kua fakamalolo tumau e laua a mautolu ke taute e fifiliaga ka foaki ki a mautolu e magaaho lahi ke moua e gahua vala magaaho ti paionia.” He nakai fifili e tau matakupu iloilo lahi ne tauteute ke hoko atu ke he fakaakoaga he univesiti, kua lata e tau matua mo e tau tama ke manamanatu ke he tau course ne aoga he moua e gahua fakateokarasi.b
18. Ko e heigoa e tau fifiliaga ke he tau gahua kua lata ia lautolu ne ikiiki ke manamanatu ki ai?
18 Kua fakakite he tau kumikumiaga ke he loga he tau motu, kua ha ha i ai e manako lahi, nakai ke paase mai he univesiti, ka ke gahua e tau tagata ke he tau matafeua mo e tau gahua. Ne hokotaki he USA Today kua “70 e pasene he tau tagata gahua he tau hogofulu tau i mua ka nakai lata mo e tikulī ne fa e tau, ka e, ko e tikulī he paase he aoga ne fakaako ke ua e tau he koliti po ke taha vahega setifikete gahua.” Loga e tau fakatokatokaaga pihia ne foaki e tau course ke he tau lotomatala gahua ofisa, fakafou e tau matini, fakafou e tau komopiuta, palama, taute ulu, mo e falu matafeua foki. Ko e tau gahua mitaki lahi kia anei? E! Liga nakai matalahi moli ke he onoonoaga he falu, ka e foaki ai e tau koloa mo e hikihikiaga kua lata mo lautolu ne ha ha ai e fakamahani moli ke fekafekau ki a Iehova.—2 Tesalonia 3:8.
19. Ko e heigoa e puhala moli ke he moui olioli mo e makona?
19 “Ko e tau fuata katoa mo e tau tamāfine,” he ole he Tohi Tapu, “kia fakaheke a lautolu ke he higoa a Iehova; ha ko e hana higoa hokoia kua lilifu; ko e hana fakahekeaga kua homo ia ke he lalolagi katoa mo e lagi.” (Salamo 148:12, 13) He fakatatai ke he tau tuaga mo e tau palepale kua foaki he lalolagi, ko e gahua he fekafekauaga mau ki a Iehova kua nakai fakauaua ai ko e puhala moli ke he moui olioli mo e makona. Tokaloto e fakamoliaga he Tohi Tapu: “Ko e fakamonuina a Iehova, ke maukoloa ai e tagata; ti nakai lafilafi e ia ha mamahi ki ai.”—Tau Fakatai 10:22.
[Tau Matahui Tala]
a Ma e tau vala tala ha lautolu ne tuku fakamua e aoga lahi ke he fakaakoaga fakateokarasi, kikite The Watchtower, Me 1, 1982, lau tohi 3-6; Aperila 15, 1979, lau tohi 5-10; Awake! Iuni 8, 1978, lau tohi 15; mo e Aokuso 8, 1974, lau tohi 3-7.
b Kikite Awake! Oketopa 8, 1998, “He Kumi e Moui Haohao Mitaki,” lau tohi 4-6, mo Me 8, 1989, “Ko e Heigoa e Gahua kua Lata ia Au ke Fifili?” lau tohi 12-14.
Maeke Nakai a Koe ke Fakamaama?
• Ko e heigoa kua fakave ki ai he tau Kerisiano e falanakiaga he vaha anoiha kua mitaki ha lautolu?
• Ko e heigoa e tau paleko kua fehagai e tau matua Kerisiano hagaao ke he vaha anoiha he tau tama ha lautolu?
• Ko e heigoa kua lata ke manatu ka fokifoki ke tutuli e fakaakoaga tokoluga atu?
• Maeke fefe he tau matua ke lagomatai e tau tama ha lautolu ke tutuli e gahua he fekafekauaga ha Iehova?
[Puha he lau 29]
Ko e Heigoa e Uho he Fakaakoaga Tokoluga Atu?
Tokologa e tau tagata ne huhu he univesiti ne onoono lahi ke moua e tikulī ka hafagi ki a lautolu e totogi tokoluga mo e tau gahua mitaki. Ka e, fakakite he tau hokotaki he fakatufono, ko e taha ne kuata ha lautolu ne o he koliti kua moua e tikulī ke he ono e tau—tote e numera ne kautu. Pete ia, kua moua kia e gahua mitaki ha ko e tikulī ia? Mailoga e mena ne talahau he kumikumiaga mo e tau fakaakoaga fou.
“He o ke he [univesiti] i Harvard po ko Duke kua nakai amanaki ti moua e gahua mitaki mo e totogi tokoluga. . . . Nakai iloa lahi he tau kamupani e tau tama fuata ne kumi gahua. Kua liga matalahi ha ko e tipiloma tokoluga (ko e tikuli Ivy League). Ka e he magaaho fakamui, ko e tau mena ne maeke po ke nakai maeke he tau tagata kua mua atu e aoga.”—Newsweek, Novema 1, 1999.
“Ha ko e tau gahua he vaha nei kua lata mo e tau lotomatala tokoluga nakai pihia fakamua . . . , ko e tau lotomatala kua lata ma e tau gahua nei kua malolo lahi e tuaga tokoluga he lotomatala he tau aoga—ko e mefe, totou, mo e tohitohi he tama aoga kua hiva e tau he fano he aoga . . . , nakai tatai ke he lotomatala he tau koliti. . . . Nakai lata he tau tama aoga ke o he koliti ke moua e gahua mitaki, ka e lata ia lautolu ke moua e tau lotomatala lahi he aoga tokoluga.”—American Educator, Spring 2004.
“Laulahi he tau koliti kua nakai manamanatu lahi ke he lalolagi moli he tauteute e tau tama aoga ke eke mo tau tagata gahua he lalolagi ka paase a lautolu he koliti. Ko e tau aoga fakamahani . . . ne kitia ai ke tolomaki ki mua. Ko e hu ki ai ne malikiti he 48 e pasene mai he 1996 ke he 2000. . . . He magaaho nei, ko e tau tipiloma he koliti ne tauuka, fofo magaaho ne kua nakai aoga lahi.”—Time, Ianuari 24, 2005.
“Ko e tau fuafuaaga mai he U.S. Department of Labor ke hoko ke he 2005 ne vali e fakatino matakutaku ke taha mai he tolu a lautolu ne paase he fa e tau he koliti ne nakai fai gahua ne felauaki mo e tau tikulī ha lautolu.”—The Futurist, Iulai/Aokuso 2000.
He onoono ke he tau mena oti nei, kua tokologa lahi e tau tagata fakaako kua fakauaua lahi e uho he fakaakoaga tokoluga atu he vaha nei. “Kua fakaako e mautolu e tau tagata ma e tau vaha anoiha kua hepe,” he togi he hokotaki Futurist. Kehekehe ai, mailoga e mena ne talahau he Tohi Tapu hagaao ke he Atua: “Ko au ko Iehova, ko e hau a Atua, kua fakaako atu kia koe ke he tau mena ke aoga ai, kua takitaki e ia a koe ke he puhala ke fano ai a koe. Ane hagao mai a koe ke he haku tau poaki, po kua tuga ne vailele hāu a monuina; mo e tuga ne tau peau he tahi hau a tututonu.”—Isaia 48:17, 18.
[Fakatino he lau 27]
Ne toka kehe e lautolu e tau tutuliaga fakatagata ti muitua ki a Iesu
[Fakatino he lau 31]
Foaki fakapulotu he tau matua Kerisiano ke he tau tama ha lautolu mai he mukemuke e takatakaiaga malolo fakaagaga