Fakaakoaga—Fakaaoga ke Fakaheke a Iehova
“Ko ia ke talahau e ia a ia, kua kumi e ia e fakahekeaga māna ni; ka ko ia ne kumi e fakahekeaga hana ne fakafano mai a ia, kua fakamoli a ia.”—IOANE 7:18.
1. Ne kamata he magaaho fe mo e fefe e fakaholoaga fakaako?
KO E mena kamata mai i tigahau e fakaakoaga. He mole vave ni e Atua ko Iehova, ko e Faiaoga Lahi Mahaki mo e Takitaki Fakaako, he tufugatia e tama uluaki hana, ne taute ai e fakaholoaga fakaako ke kamata. (Isaia 30:20; Kolose 1:15) Ko Ia hanai kua maeke ke ako mai ia ia ko e Faiaoga Lahi Mahaki ni! Mai he miliona e tau vaha he feoaki tata lahi mo e Matua, ne moua ai he Tama ia—ne kua iloaina ko Iesu Keriso—e fakaakoaga kua mua ue atu e uho hagaao ke he tau fua mitaki, tau gahua, mo e tau finagalo he Atua ko Iehova. He magaaho fakamui, he moui ko e tagata he lalolagi, kua maeke ai a Iesu ke pehe: “Nakai eke noa foki e au ha mena, ha ko e mena tuga ne fakaako mai he haku a Matua kia au, ko e tau mena ia ne tala atu ai e au.”—Ioane 8:28.
2-4. (a) Hagaao ke he veveheaga 7 a Ioane, ko e heigoa e tau tutuaga ne putoia ai e fakalatahaaga a Iesu ke he kaiaga Galue he Tau Fale Api he tau 32 V.N.? (e) Ko e ha ai ne nakai maama he tau Iutaia e iloilo a Iesu ke fakaako?
2 Kua fakaaoga fefe e Iesu e fakaakoaga ne moua e ia? Ke he vaha katoa he fekafekauaga hana he lalolagi, ne kua tolu mo e hafa e tau, nakai lolelole a ia ke foaki atu ke he falu e tau mena ne ako e ia. Ka e ha ha i mua he loto e kakano ne taute ai e mena nei. Mo e ko e heigoa e mena ia? Kia kumikumi la tautolu ke he tau kupu a Iesu he veveheaga 7 a Ioane, ne fakamaama mai e ia e punaaga mo e kakano he fakaakoaga hana.
3 Kia manamanatu la ke he tuaga. He vaha mateafu he tau 33 V.N., kua teitei tolu e tau tau he mole mai e papatiso a Iesu. Kua tolo e tau Iutaia ki Ierusalema ma e kaiaga Galue he Tau Fale Api. Ke he tau aho gahoa fakamua he kaiaga galue, kua loga lahi e tau tala hagaao ki a Iesu. He magaaho kua lotoga e kaiaga galue, ne fina atu ai a Iesu ke he faituga mo e kamata ke fakaako. (Ioane 7:2, 10-14) Tuga ne fa taute e ia, ne fakakite moli ai e ia a ia ko e Faiaoga lahi mahaki ni.—Mataio 13:54; Luka 4:22.
4 Kua pehe mai e kupu 15 he veveheaga 7 a Ioane: “Ati ofo ai e tau tagata Iutaia, kua pehe age, Kua pulotu fefe e tagata nei, nakai fakaako a ia?” Maama nakai e koe ko e ha ai ne nakai maama e lautolu? Kakano ha ko e mena nakai fano a Iesu ke he ha aoga rapai, ti kua nakai fai fakaakoaga a ia—ke he ha lautolu a tau manamanatu! Ka e, kua mukamuka ia Iesu ke moua mo e totou e tau maga tohi he tau Tohiaga Tapu. (Luka 4:16-21) Ae, kua maeke foki he kamuta Kalilaia nei ke fakaako ki a lautolu e Matafakatufono a Mose! (Ioane 7:19-23) Ka e maeke ai fefe mogoia e mena nei?
5, 6. (a) Kua fakamaama mai fefe e Iesu e punaaga he tau fakaakoaga hana? (e) Ke he puhala fe ne fakaaoga e Iesu hana fakaakoaga?
5 Ne fakamaama mai e Iesu, tuga ka totou e tautolu he tau Ioa 7 kupu 16 mo e 17: “Ko e haku a tau kupu, nakai ko e haku, ka ko e hana ne fakafano mai au. Ka manako taha ke eke hana finagalo, ti iloa ai e ia e tau kupu, po ke mai he Atua, po ke vagahau noa ni e au.” Ne manako a lautolu ke iloa ko hai ne fakaako a Iesu, mo e tala age fakalapalapa e ia ki a lautolu ko e mai he Atua hana fakaakoaga!—Ioane 12:49; 14:10.
6 Kua fakaaoga fefe e Iesu hana fakaakoaga? Tuga ne fakamau ia Ioane 7:18, ne pehe a Iesu: “Ko ia ke talahau e ia a ia, kua kumi e ia e fakahekeaga māna ni; ka ko ia ne kumi e fakahekeaga hana ne fakafano mai a ia, kua fakamoli a ia, nakai fai mahani hepehepe a ia.” Kua lata tonu ai he fakaaoga e Iesu hana fakaakoaga ke tuku atu e fakahekeaga ki a Iehova, ko ‘Ia ko e iloilo katoatoa’!—Iopu 37:16.
7, 8. (a) Kua lata ke fakaaoga fefe e fakaakoaga? (e) Ko e heigoa e tau matapatu folia ne fa, he fakaakoaga lagotatai?
7 Kua ako tuai e tautolu e fakaakoaga uho mai ia Iesu—kua lata ke fakaaoga e fakaakoaga, nakai ke fakaheke a tautolu, ka ke tuku atu e fakahekeaga ki a Iehova. Kua nakai fai puhala mua atu foki ke fakaaoga fakamitaki e fakaakoaga. Ti maeke fefe, mogoia, a koe ke fakaaoga e fakaakoaga, ke tuku atu e fakahekeaga ki a Iehova?
8 Ko e kakano he fai fakaakoaga ko e “fakamahani he tau fakaakoaga pauaki mo e fakataitaiaga ne fai takitaki pule feua, mua [atu] ke he makaka tufuga, taha faga gahua pauaki, po ke feua.” Kia manamanatu la tautolu he magaaho nei ke he fa e tau matapatu folia he fakaakoaga lagotatai, ko e maeke fefe ke fakaaoga oti e tau mena nei ke fakaheke ki a Iehova. Kua lata he fakaakoaga lagotatai ke lagomatai a tautolu (1) ke iloa lahi ke totou, (2) ke iloilo ke tohitohi, (3) ke tupu tolomaki e manamanatuaga mo e mahani mitaki, mo e (4) ke moua e tau fakamahaniaga aoga ne kua lata mo e moui he tau aho oti.
Ako ke Iloa Lahi ke Totou
9. Kua aoga lahi he ha ke eke ko e tagata iloa lahi ke totou?
9 Kua tohi fakamua e ako ke iloa lahi ke totou. Ko e ha ai, ko e mena aoga lahi, ke eke ko e tagata kua iloa lahi ke totou? Kua fakamaama mai he The World Book Encyclopedia: “Ko e totou . . . ko e fakaveaga he akoaga mena mo e ko e taha mai he tau iloilo kua aoga lahi ke he moui he tau aho oti. . . . Ko e tau tagata ne iloa lahi ke totou ka lagomatai ke talaga e kaufakalatahaaga monuina mo e muhu mena aoga. Mo e he magaaho taha, kua eke foki ha lautolu ni a tau momoui ke olioli he katoatoa lahi mo e mamakona.”
10. Kua lagomatai fefe he totouaga he Kupu he Atua a tautolu ke olioli e tau momoui he katoatoa mo e mamakona lahi?
10 Ka maeke ai he totou noa ke lagomatai a tautolu ke olioli e “tau momoui he katoatoa lahi mo e mamakona,” kua pihia moli lahi foki ni e mena nei ka totou e Kupu he Atua! Kua maeke he tau totou pihia ke hafagi ha tautolu a tau loto manamanatu mo e tau loto ke he tau manamanatu mo e tau finagalo a Iehova, mo e taute ai he maamaaga mahinohino ke he tau mena ia ke fai kakano e tau momoui ha tautolu. Ke lafi ki ai, ne tala mai ia Heperu 4:12: “Ko e kupu he Atua kua moui ia, mo e gahua malolo.” He totou e tautolu e Kupu he Atua mo e manamanatu fakahokulo ki ai, kua futia ai a tautolu ki a Ia ko e hana Punaaga, mo e kua omoomoi a tautolu ke hiki e tau momoui ha tautolu ke eke ke fakafiafia lahi a ia. (Kalatia 5:22, 23; Efeso 4:22-24) Kua futia foki a tautolu ke foaki atu ke he falu e tau kupu moli uho ne totou e tautolu. Kua tuku atu he tau mena oti nei e fakahekeaga ki a Ia, ko e Faiaoga Lahi Mahaki, ko e Atua ko Iehova. Kua moli ni kua nakai ha ha i ai ha puhala ne kua mua atu e mitaki ke fakaaoga ha tautolu a tau iloilo ke totou!
11. Kua lata he fakaholoaga lagotatai he fakaakoaga fakatagata ke ha ha i ai e heigoa?
11 Pete ko e fuata po ke fuakau, kua fakamafana mai ki a tautolu ke ako ke iloa lahi ke totou, ha ko e fai vala aoga lahi e totou he tau momoui Kerisiano ha tautolu. Ke lafi ke he totouaga mau ke he Kupu he Atua, kua lata e fakaholoaga lagotatai he fakaakoaga fakatagata ke ha ha i ai e totouaga he kupu Tohi Tapu mai he Examining the Scriptures Daily, ke totou e tau Kolo Toko mo e Awake!, mo e tauteute tuai e tau fakaakoaga ma e tau feleveiaaga Kerisiano. Ka e kua e fekafekauaga Kerisiano? Kua maali ai, ko e fakamatalaaga ke he tau tagata, tau liu ahiahi ke he tau tagata loto fiafia, mo e tau fakaakoaga Tohi Tapu ne taute he tau loto kaina ko e tau mena kua lata oti ke iloa lahi ke totou.
Ako ke Maama e Puhala Tohitohi
12. (a) Kua aoga lahi he ha ke ako ke maama e puhala tohitohi? (e) Ko e heigoa e mena tohia mua ue atu ne kua taute?
12 Ko e folia ke ua aki, kua lata he fakaakoaga lagotatai ke lagomatai a tautolu ke ako ke maama e puhala tohitohi. Nakai ni kua fakailoa mai he tau mena tohia ha tautolu e tau kupu mo e tau manamanatu ka kua fakamau tumau foki a lautolu. Ke he loga mo loga e tau senetenari he vaha ia, ne fakamau hifo he 40 e tau tagata tane Iutaia ke he tau lau pepa kome po ke tau kili manu e tau kupu ne kua eke mo tau Tohiaga Tapu mai he agaga. (2 Timoteo 3:16) Kua moli ni, ko e tau mena tohia mua ue atu na nei, ne kua eke ke taute! Kua nakai fakauaua ai ko Iehova ne takitaki e tau lagakiaga mo e liu lagalagakiaga foki he tau kupu tapu ia mai he tau senetenari, ati kua maeke ai e tau mena ia ke hohoko mai ki a tautolu, ko e tau mena kua maeke ke falanaki ki ai. Fakaaue nakai a tautolu he taute e Iehova hana tau kupu ke tohi hifo, ka e nakai falanaki ke he tala talahau-gutu?—Fakatatai Esoto 34:27, 28.
13. Kua fakakite mai he heigoa ko e iloa he tau Isaraela ke tohitohi?
13 He vaha i tuai, ko e falu vahega tagata pauaki ni hokoia ne moua e monuina, tuga e tau tohi kupu i Mesopotamia mo Aikupito, ne iloa ke totou mo e tohitohi. Ti kua kehe lahi mahaki mai ai he tau motu, ne fakamafana ke he tau tagata oti i Isaraela ke iloa ke totou mo e tohitohi. Ko e poakiaga ia Teutaronome 6:8, 9 ke he tau Isaraela ke tohi he tau pou he tau gutu fale ha lautolu, pete ni kua maali lahi ko e mena fakatai, ka e fakahaha mai e mena ia ko e iloa a lautolu ke tohitohi. Mai he vaha tote, kua fakaako e tau fanau ke tohitohi. Ko e Kalena Kasera, ko e taha he tau fakafifitakiaga tuai lahi ke he tau mena tohia Heperu he vaha ia, ko e mena kua pehe e falu tagata fakaako tokoluga ko e tohi ako manatu he tama tane aoga.
14, 15. Ko e heigoa e falu puhala mitaki mo e aoga ke fakaaoga e iloilo ke tohitohi?
14 Ka e maeke fefe ia tautolu ke fakaaoga ke he puhala kua mitaki mo e aoga e iloilo ke tohitohi? Kua mitaki moli ke fakamau e tau vala tala he tau feleveiaaga Kerisiano, tau toloaga, mo e tau fonoaga. Kua maeke he tohi, pete ni ko e “tau kupu gahoa,” ke foaki atu e fakamafanaaga ke he tagata ne gagao po ke ke fakaaue atu ke he matakainaga tane po ke matakainaga fifine fakaagaga ne mahani fakaalofa po ke fakamokoi ki a tautolu. (1 Peteru 5:12) Ka mate taha fakahele he taha tagata he fakapotopotoaga, kua maeke he tama tohi ku po ke tama laupepa tohia ke vagahau “fakamafana” atu ke he tagata ia ma tautolu. (1 Tesalonia 5:14) Ne fakamaama mai he matakainaga fifine Kerisiano ne mate e matua fifine he kai he kanesa: “Kua mitaki lahi e tohi ne tohi mai he taha kapitiga ki a au. Kua lagomatai lahi moli he mena ia, kakano he maeke ia au ke liu mo e liu foki ke totou.”
15 Ko e puhala ne kua mua atu e mitaki ke fakaaoga e iloilo ke tohitohi, ko e ke ta atu e fakahekeaga ki a Iehova he tohi he taha tohi ke foaki atu e fakamoliaga ke he Kautu. He falu magaaho liga ko e mena naia kua lata ke maeke ke matutaki mo e tau tagata loto fiafia fou ne nonofo he tau matatepu tu kikioka. Liga taute ai he gagao he falu magaaho ke uka fakaku a koe ke fano ke he taha fale mo e taha fale. Liga maeke he tohi ke talahau e mena ne fa mahani a koe ke talahau ka fakafeao mo e tagata.
16, 17. (a) Ko e heigoa e mena tupu kua fakakite ko e uho e tau tohi ne tohi ke foaki atu e fakamoliaga ke he Kautu? (e) Maeke nakai ia koe ke talahau e taha mena tupu pihia?
16 Kia manamanatu la ke he taha mena ne tupu. Kua loga e tau tau kua mole ne tohi e taha Fakamoli e tohi ke foaki atu e fakamoliaga ke he Kautu ke he fifine takape he taha tagata tane ne mate ne tohia he nusipepa he matakavi hana. Kua nakai fai tali ne moua. Ka e ia Novema he tau 1994, kua 21 e tau tau he mole mai, ne fai tohi e Fakamoli ne moua mai he tama fifine he fifine takape. Kua tohia e tama fifine:
17 “Ia Apelila he tau 1973, ne tohi a koe ke he matua fifine haku ke fakamafana a ia he mole he mate e matua tane haku. Ne hiva e tau he moui haku he magaaho ia. Ne fakaako Tohi Tapu foki ni e matua fifine haku, ka e he magaaho nei nakai la eke a ia ko e fekafekau ha Iehova. Pete ni, ko e fakaakoaga hana ne maeke ai au fakamui ke iloa e kupu moli. He tau 1988, ne kamata au ke fakaako e Tohi Tapu—15 e tau tau ne mole mai he moua e tohi hau. Ia Mati 9, he tau 1990, ne papatiso ai au. Kua fakaaue lahi mahaki a au ke he tohi hau he tau tau loga kua mole mo e kua fiafia lahi ke fakailoa atu ki a koe, kua tupu e tau tega ia ne to e koe, ha ko e lagomatai a Iehova. Ne mai he matua fifine haku e tohi hau ke toka e au, mo e manako au ke iloa ko hai a koe. Kua manako lahi au ke hoko atu e tohi nei ki a koe.” Kua hoko e tohi he tama fifine, ne tohi ai foki hana nofoaga mo e numela telefoni ke he Fakamoli ne tohi e tohi he loga e tau tau kua mole. Ke he hau a manamanatuaga kitiala e mena fakaofo ke he fifine fuata lahi he magaaho ne telefoni atu e Fakamoli—mo e ko e mena tohitohi agaia foki a ia ke foaki atu e amaamanakiaga he Kautu ke he falu!
Tupu Tolomaki e Manamanatuaga, Mahani Mitaki, mo e Fakaagaga
18. He vaha Tohi Tapu, kua taute fefe he tau mamatua e tau fakaakoaga ke he manamanatuaga mo e mahani mitaki he tau fanau ha lautolu?
18 Ko e folia ke tolu aki ko e lata e fakaakoaga lagotatai ke lagomatai a tautolu ke tupu tolomaki e manamanatuaga mo e mahani mitaki. He vaha Tohi Tapu ko e fakaakoaga ke he manamanatuaga mo e mahani mitaki ke he tau fanau ko e taha he tau matagahua mua he tau mamatua. Nakai ni kua fakaako e tau fanau ke totou mo e tohitohi ka e, kua mua atu e aoga, ke fakaako e Matafakatufono he Atua, ne kua putoia oti ha lautolu a tau gahua he moui. Kua ha ha i ai he fakaakoaga e tau takitakiaga ke he tau kotofaaga fakalotu ha lautolu mo e tau matapatu fakaakoaga ne pule ke he fakamauaga, fakafetuiaga fakamagafaoa, mo e mahani mitaki he fahi fakatane mo e fifine, mo e ha lautolu foki a tau kotofaaga ne kua lata ke taute ke he ha lautolu a tau tagata. Ne lagomatai he fakaakoaga pihia a lautolu ke tupu tolomaki nakai ni ke he manamanatuaga mo e mahani mitaki ka e fakaagaga foki.—Teutaronome 6:4-9, 20, 21; 11:18-21.
19. Maeke a tautolu ke moua i fe e fakaakoaga kua fakakite ki a tautolu e tau mena uho he mahani mitaki mo puhala he moui mo e tau mena ka lagomatai aki a tautolu ke tupu fakaagaga?
19 Ka e kua he vaha nei? Ko e mena aoga lahi e fakaakoaga i tua ne mitaki. Kua lagomatai a tautolu ke tupu tolomaki e manamanatuaga. Ka e maeke ia tautolu ke haga ki fe ma e fakaakoaga ka fakakite ki a tautolu e tau mena uho he mahani mitaki mo puhala he moui, mo e tau mena ka lagomatai aki a tautolu ke tupu tolomaki fakaagaga? I loto he fakapotopotoaga Kerisiano, kua maeke ia tautolu ke moua e fakaholoaga he fakaakoaga fakateokarasi, ko e mena nakai maeke ke moua he ha mena he lalolagi. Kakano he puhala mai he ha tautolu a tau fakaakoaga fakatagata ke he Tohi Tapu mo e tau tohi ne fakave ke he Tohi Tapu mo e tau fakaakoaga foki ne foaki mai he tau feleveiaaga he fakapotopotoaga, tau toloaga, mo e tau fono, kua maeke a tautolu ke moua e fakaakoaga uho hololoa tumau nei—ko e fakaakoaga he Atua—kua nakai totogi tupe! Ko e heigoa mogoia ne fakaako mai ki a tautolu?
20. Ko e heigoa ne fakaako mai he fakaakoaga faka-Atua ki a tautolu, mo e ko e heigoa e tau fua ne tupu mai?
20 He magaaho ne kamata a tautolu ke fakaako Tohi Tapu, kua ako e tautolu e tau fakaakoaga mukamuka he Tohiaga Tapu, “ko e tau kupu fakamua.” (Heperu 6:1) Mo e he fakatumau a tautolu, kua uta e tautolu ki loto e “tau mena kakano”—ko e mena ia, ko e tau mena hokulo he kupu moli. (Heperu 5:14) Ka e mua atu he mena ia, kua ako e tautolu e tau matapatu fakaakoaga he mahani Atua ne fakaako mai ki a tautolu ke eke e tau momoui ha tautolu ke tuga e tau momoui ne manako e Atua ki ai. Ma e fakatai, kua ako e tautolu ke kalo kehe mai he tau aga mo e tau mahani taute mau ne ‘fakakelea ai e tino’ mo e ke fakalilifu ke he pule malolo mo e ke he tagata mo e tau koloa he falu. (2 Korinito 7:1; Tito 3:1, 2; Heperu 13:4) Ke lafi ki ai, kua eke a tautolu ke mailoga ko e mena aoga lahi ke mahani fakamoli mo e fakamakutu he gahuaaga ha tautolu, mo e ko e mena uho ke muitua e moui ke he tau poakiaga he Tohi Tapu hagaao ke he mahani mitaki fakatane mo e fifine. (1 Korinito 6:9, 10; Efeso 4:28) He holo ki mua a tautolu he fakagahua e tau matapatu fakaakoaga ia he tau momoui ha tautolu, kua tupu fakaagaga a tautolu, mo e fakahokulo ai e fakafetuiaga ha tautolu mo e Atua. Ko e taha mena foki, kua taute he mahani Atua a tautolu mo tau tagata mitaki he motu, pete ni ko e nonofo a tautolu i fe. Mo e liga omoi he mena nei e falu ke fakaheke e Punaaga he fakaakoaga faka-Atua—ko e Atua ko Iehova.—1 Peteru 2:12.
Fakamahaniaga Kua Aoga ma e Moui he Tau Aho Oti
21. Ko e heigoa e fakamahaniaga aoga ne moua he tau fanau he vaha Tohi Tapu?
21 Ko e folia ke fa aki he fakaakoaga lagotatai ko e ke foaki ke he tagata e fakamahaniaga kua aoga, ne kua lata mo e moui he tau aho oti. Kua fakalataha e fakamahaniaga kua aoga he matagahua fakaako he matua he vaha Tohi Tapu. Kua fakaako ke he tau tama fifine e tau gahua kaina. Kua fakakite mai he veveheaga fakahiku he Tau Fakatai 31:10-31 ko e liga loga lahi mo e kehekehe foki e tau mena ia. Ti kua fakakoloa ai e tau tama fifine ke vilo filo, lalaga, kaitunu mo e taute e tau levekiaga he loto kaina, fakafua mena, mo e fakatau fale mo e vala kelekele. Ne fa mahani ke fakaako ke he tau tama tane e tau gahua mau he matua tane, ko e gahua fonua po ke taha gahua pauaki po ke taha makaka tufuga. Ne ako e Iesu e gahua tafale mai he matua tane hiki hana, ko Iosefa; ti kua ui ai a ia nakai ni ko e “tama he tagata tafale” ka ko e “tagata tafale” foki.—Mataio 13:55; Mareko 6:3.
22, 23. (a) Kua lata e fakaakoaga ke tauteute tuai e tau fanau ma e heigoa? (e) Ko e heigoa e kakano ha tautolu ne fifili ai ke fakalahi hake e fakaakoaga pete ni kua tuga ko e aoga lahi?
22 Kua pihia foki he vaha nei, fakalataha ke he fakaakoaga lagotatai mitaki e tauteuteaga tuai ke iloa ke leveki e tau mena hogeia he magafaoa he taha aho i mua. Kua fakakite mai he tau kupu he aposetolo ko Paulo, ne moua ia 1 Timoteo 5:8, ko e matagahua tapu he tagata ke moua e tau levekiaga ma e hana magafaoa. Ne tohi e ia: “Kaeke kua nakai leveki e taha hana faoa, ti au atu kia lautolu kua nonofo mo ia, kua fakatikai e ia e tua, kua mua foki hana kelea kia ia kua faliuliu.” Kua lata ai mogoia e fakaakoaga, ke tauteute tuai e tau fanau ma e tau matagahua ka lago ke he tau momoui ha lautolu mo e fakakoloa fakamitaki foki a lautolu ke eke ko e tau tagata malolo he gahua he kaufakalatahaaga.
23 Kua lata ke lahi fefe e fakaakoaga tua ka tutuli a tautolu ke moua? Liga kehekehe e mena nei mai he taha motu ke he taha motu. Kaeke kua lata mo e tau gahua ke fakalahi hake e fakamahaniaga mai he mena tote kua lata ne fakatoka he fakatufono, ko e mena he tau mamatua a ia ke takitaki e tau fifiliaga he ha lautolu a tau fanau hagaao ke he tau fakaakoaga po ke fakamahaniaga tokoluga foki, he fuafua e tau mena aoga ka moua mo e tau mena fakalavelave he tau kumikumiaga fakalahi pihia. Ka e kua lata ko e heigoa foki e kakano ne loto ai taha ke fifili ke holo hake ke he fakaakoaga tokoluga pete ni kua tuga ko e mena aoga lahi? Kua moli, nakai ha ko e maukoloa, fia kitia, po ke fakahekeaga. (Tau Fakatai 15:25; 1 Timoteo 6:17) Kia manatu e fakaakoaga ne ako e tautolu mai he fakafifitakiaga a Iesu—kua lata e fakaakoaga ke tuku atu e fakahekeaga ki a Iehova. Kaeke kua fifili a tautolu ke fakalahi hake e fakaakoaga, kua lata ne kakano ha tautolu ke maeke ni a tautolu ke moua e tau levekiaga ha tautolu ne lata, mo e ata ai a tautolu ke fekafekau lahi ki a Iehova he fekafekauaga Kerisiano.—Kolose 3:23, 24.
24. Ko e heigoa e fakaakoaga ne ako mai ia Iesu, ne kua nakai lata ia tautolu ke nimo?
24 Kia eke ai a tautolu mogoia, ke fakamakutu he ha tautolu a tau laliaga ke moua e fakaakoaga i tua ne lagotatai. Kia fakaaoga fakamitaki katoatoa e tautolu e tau fakaholoaga he fakaakoaga faka-Atua, ne foaki mai he fakatokatokaaga a Iehova. Mo e kia nakai nimo e tautolu e fakaakoaga uho ne ako mai e tautolu ia Iesu Keriso, ko e tagata ne mua ue atu e fakaakoaga mai he ha tagata ne nofo he lalolagi nei—ko e lata ke fakaaoga e fakaakoaga, nakai ke fakaheke a tautolu, ka e ke tuku atu e fakahekeaga ke he Faiaoga lahi mahaki, ko e Atua ko Iehova!
Ko e Heigoa e Tali Hau?
◻ Fakaaoga fefe e Iesu hana fakaakoaga?
◻ Kua aoga lahi he ha ke ako ke iloa lahi ke totou?
◻ Maeke fefe ia tautolu ke fakaaoga e iloilo ke tohitohi ke tuku atu e fakahekeaga ki a Iehova?
◻ Kua maeke fefe he fakaakoaga he Atua ke lagomatai a tautolu ke tupu e tau mahani mitaki mo e ke he tau mena fakaagaga?
◻ Ko e heigoa e fakamahaniaga aoga kua lata ke ha ha ai he fakaakoaga lagotatai?