Ko e Mitaki Mua Ue Atu he Fakaakoaga Faka-Atua
“Ko e moli ni, ko e haku a manatu kua nakai aoga e tau mena oti kana ha ko e mitaki mua ue atu he iloa [po ke, iloilo] a Keriso Iesu.”—FILIPI 3:8.
1, 2. Ko e heigoa e fifiliaga ne taute he falu Kerisiano, mo e ko e ha?
MAI he vahā tote, ko e tama aoga lotomatala lahi a Robert. He valu laia e tau haana he moui, taha he tau faiaoga haana ne finatu pauaki ke he kaina haana ti tala age ki a ia kua nakai fai mena ka fakamataofi a ia he taute ha mena. Ne fakakite e ia e amaamanakiaga to eke a ia he taha aho mo ekekafo. Ko e tau kautūaga haana he fano he aoga tokoluga ne maeke a ia ke fano he ha univesitī talahaua he motu haana. Ka e fifili e Robert ke nakai talia e tuaga ne kitia he tokologa ko e mena lagataha ni he moui ke tutuli e foliaga haana ke fekafekau ko e paionia tumau.
2 Tuga a Robert, tokologa e tau Kerisiano—fuata mo e fuakau—ne moua e tau magaaho ke holo ki mua he fakatokaaga nei. Ne fifili e falu ke nakai fakaaoga katoatoa e tau magaaho ia ati maeke ia lautolu ke tutuli e tau foliaga fakaagaaga. (1 Kori. 7:29-31) Ko e heigoa ne omoomoi e tau Kerisiano tuga a Robert ke fakalahi ha lautolu a gahua fakamatala? Lafi ke he fakaalofa ha lautolu ma Iehova, ko e kakano mua ue atu, ne loto fakaaue foki a lautolu ke he fakaakoaga faka-Atua ne mitaki mua ue atu. Kua manamanatu nakai a koe he magaaho nei ko e fēfē la e moui haau ka nakai moua e koe e iloilo he kupu mooli? He manamanatu ke he falu monuina mua ue atu kua olioli e tautolu ha kua fakaako e Iehova, to lagomatai a tautolu ke fakatumau e loto fakaaue ha tautolu ma e tala mitaki mo e ke fakamakutu he fakamatala ai ke he falu.
Monuina ke Fakaako he Atua
3. Ko e ha kua iloa mooli e tautolu kua makai a Iehova ke fakaako e tau tagata nakai mitaki katoatoa?
3 He mahani mitaki ha Iehova, kua makai a ia ke fakaako e tau tagata nakai mitaki katoatoa. He vagahau fakaperofeta hagaao ke he tau Kerisiano fakauku, ne pehē e Isaia 54:13: “To fakaako e Iehova hau a fanau oti, ti lahi e monuina he fanau hau.” Hagaao foki e matapatu fakaakoaga he tau kupu ia ke he ‘tau mamoe kehe’ he Keriso. (Ioane 10:16) Maaliali ai e mena nei mai he perofetaaga kua fakamooli he vahā ha tautolu. Ne kitia e Isaia he fakakiteaga e tau tagata mai he tau motu oti hane tafe atu ke he tapuakiaga mooli. Ne fakamaama e ia hane tala age a lautolu ke he taha mo e taha: “Kia o hake a tautolu ke he mouga a Iehova, ko e fale he Atua a Iakopo; to fakaako mai foki e ia a tautolu ke he hana tau puhala, ti o ai a tautolu ke he hana tau puhala.” (Isaia 2:1-3) Ko e lilifu ha ia ke fakaako he Atua!
4. Ko e heigoa ne manako a Iehova mai ia lautolu kua fakaako e ia?
4 Maeke fēfē ia tautolu ke aoga mai he fakaakoaga faka-Atua? Ko e matapatu poakiaga ke he tagata ke mahani molū mo e maeke ke fakaako. Ne tohi he salamo ko Tavita: “Kua mahani mitaki, mo e tututonu a Iehova. . . . To fakaako foki e ia a lautolu ne mahani molu ke he hana tau puhala.” (Sala. 25:8, 9) Ti pehē a Iesu: “Kua fakaaue [po ke, fakaheke] au kia koe ma Matua na e, ko e Iki he lagi mo e lalolagi, he ufiufi e koe e tau mena nai he tau tagata iloilo, mo e loto matala, ka kua fakakite atu ai ke he tau tama mukemuke.” (Luka 10:21) Logona nakai e koe e fakatata ke he Atua kua “foaki mai e fakaalofa noa kia lautolu kua holoilalo”?—1 Pete. 5:5.
5. Ko e puhala fe ni hokoia kua maeke ia tautolu ke moua e iloilo ke he Atua?
5 Ha ko e tau fekafekau a Iehova, kua fakamatalahi kia e tautolu a tautolu he moua e lotomatala ke iloa e kupu mooli? Nakai. He lotomatala ni ha tautolu, to nakai maeke a tautolu ke moua e iloilo he Atua. Ne pehē a Iesu: “Nakai maeke ia taha ke hau kia au, ka nakai futia mai he Matua ne fakafano mai au.” (Ioane 6:44) Puhala mai he gahua fakamatala mo e puhala he agaaga tapu, kua futia mai e Iehova e tau tagata tuga e tau mamoe, “tau mena kua manako ki ai e tau motu oti.” (Hakai 2:7) Kua loto fakaaue nakai a koe he eke mo taha ia lautolu ne futia e Iehova ke he Tama haana?—Totou Ieremia 9:23, 24.
Ko e Malolō ke Fakaholo ki Mua e Tau Momoui
6. Ko e heigoa e lauiaaga mua ue atu ne moua he tau tagata he uta e ‘iloilo kia Iehova’?
6 He fakaaoga e tau kupu fakatai fulufuluola, kua fakakite he perofetaaga ha Isaia e hikiaga he tau aga he tau tagata hane tupu he magaaho ha tautolu. Ko e tau tagata favale he magaaho fakamua kua mafola he mogonei. (Totou Isaia 11: 6-9.) Ko lautolu he taha vahā kua faitaua ke he taha mo e taha ha ko e tau kehekeheaga he tau lanu, motu, magafaoa, po ke falu feakiaga fakamotu kua fakaako ke nonofo fakalataha. Ke tuga he pehē kua “tukituki e lautolu ha lautolu a tau pelu ke eke mo tau koho.” (Isaia 2:4) Ko e heigoa e kakano ma e tau hikihikiaga lalahi nei? Kua uta he tau tagata e “maama [po ke, iloilo] kia Iehova” mo e fakagahuahua ai ke he tau momoui ha lautolu. Pete kua nakai mitaki katoatoa e tau fekafekau he Atua, ne eke a lautolu mo tau matakainaga mooli he lalolagi katoa. Kua mahuiga e tala mitaki ke he lagi mo e lalolagi katoa mo e fua mitaki ne moua mai ai kua fakakite e mitaki mua ue atu he fakaakoaga faka-Atua.—Mata. 11:19.
7, 8. (a) Ko e heigoa falu ‘kolo malolo’ ne lagomatai he fakaakoaga faka-Atua e tau tagata ke fakatokanoa mai i ai? (e) Ko e heigoa ne fakakite ko e fakaakoaga faka-Atua ne tamai e fakahekeaga ki a Iehova?
7 Ne fakatai he aposetolo ko Paulo e fekafekauaga he tau fekafekau he Atua ke he tauaga fakaagaaga. Ne tohi e ia: “Ko e tau kanavaakau he tau ha mautolu, nakai ko e tau mena he tino ia, ka ko e malolo ki mua he Atua ke ulu ai e tau kolo. Kua ulu ki lalo e tau mahalohaloaga, mo e tau mena fakatokoluga oti kua hemu ke he maama [po ke, iloilo] he Atua.” (2 Kori. 10:4, 5) Ko e heigoa falu ‘kolo malolo’ ne fakatokanoa he fakaakoaga faka-Atua e tau tagata? Ko e pehiaaga he tau fakaakoaga fakavai, tau matakutaku aitu, mo e tau pulotu fakatagata e falu ni a fakataiaga. (Kolo. 2:8) Kua lagomatai he fakaakoaga faka-Atua e tau tagata ke kautū mai he tau gahua kelea mo e ke feaki e tau mahani Atua. (1 Kori. 6:9-11) Kua fakaholo ki mua ai e moui magafaoa. Ti foaki e kakano mooli he moui ki a lautolu ne nakai fai amaamanakiaga. Kua lata lahi e fakaakoaga nei he vahā nei.
8 Taha he tau mahani ne lagomatai e Iehova e tau tagata ke feaki ko e mahani fakamooli, tuga ne fakakite he mena ne mui mai. (Hepe. 13:18) Ne talia he fifine i Initia e fakaako Tohi Tapu mo e nakai leva ti lata ai mo tagata fakailoa nakaila papatiso. Ne liu atu a ia ki kaina he taha aho mai he gahua talaga he Fale he Kautu, ne moua e ia e filifili auro (gold chain) ne kavi ke he $1,292 (N.Z.), tata atu ke he tuaga pasi. Pete he nakai muhu koloa, ne uta e ia e filifili auro ke he fale leoleo. Ne ofo lahi e leoleo! Fakamui, ne hūhū e taha leoleo ke he matakainaga fifine, “Ko e ha ne fifili a koe ke tamai e filifili auro?” He fakamaama e ia, “Ko e fakaakoaga he Tohi Tapu ne hiki au, ti ko e tagata mahani fakamooli au mogonei.” He nava lahi, ne pehē e leoleo ke he motua Kerisiano ne ō fakalataha mo e matakainaga fifine ke he fale leoleo: “Molea e 38 e miliona tagata he faahi motu ē. Ka maeke ia koe ke lagomatai hogofulu e tagata ke tuga e fifine nei, to mitaki lahi e gahua ia.” Ka manamanatu a tautolu ke he tau momoui miliona kua fakaholo ki mua ha ko e fakaakoaga faka-Atua, nakai kia ha ha ia tautolu e tau kakano loga ke fakaheke a Iehova?
9. Maeke fēfē he tau tagata ke taute e tau hikihikiaga lalahi he tau momoui ha lautolu?
9 Ko e malolō ke hiki he Kupu he Atua, fakalataha mo e lagomatai ne foaki e Iehova he puhala he agaaga tapu haana, kua fakamalolō e tau tagata ke taute e tau hikiaga lalahi he tau momoui ha lautolu. (Roma 12:2; Kala. 5:22, 23) Pehē e Kolose 3:10: “Kua fakatapulu a mutolu ke he tagata fou, ko ia kua fakafou ke he iloilo [tonu] ke fakalata ke he fakatai [H]ana kua eke a ia.” Ko e fekau i loto he Kupu he Atua, ko e Tohi Tapu, kua ha ha i ai e malolō ke fakakite e mena mooli i loto he tagata, ti maeke ke hiki e puhala ne manamanatu a ia mo e puhala foki ne logona hifo e ia ke he tau mena. (Totou Heperu 4:12.) He moua e iloilo tonu he tau Tohiaga Tapu mo e he fakalautatai e moui haana ke he tau tutūaga tututonu ha Iehova, kua maeke he tagata ke eke mo kapitiga he Atua, mo e amaamanakiaga ke moui tukulagi.
Tauteute ma e Vahā Anoiha
10. (a) Ko e ha ko Iehova he tuaga kehe ue atu ke tauteute a tautolu ma e vahā anoiha? (e) Ko e heigoa e tau hikiaga lalahi ka nakai leva ti lauia e lalolagi katoa?
10 Ko Iehova he tuaga kehe ue atu ke lagomatai a tautolu ke mautauteute ma e vahā anoiha ha kua iloa e ia e tau mena ka tutupu. Ne fifili e ia e vahā anoiha he tau tagata. (Isaia 46:9, 10) Kua fakakite he perofetaaga he Tohi Tapu “kua tata mai e aho lahi a Iehova.” (Sefa. 1:14) Hagaao ke he aho ia, to fakamooli e tau kupu he Tau Fakatai 11:4: “Nakai aoga e koloa ke he aho ke tupu ai e ita; ka ko e mahani tututonu to laveaki e ia mai he mate.” Ka hoko mai e magaaho he fakafiliaga ha Iehova ke fakahala e lalolagi ha Satani, ko e mena kua mua atu ko e tuaga ha tautolu mo e Atua. To nakai fai aoga e tupe. Kua pehē e Esekielu 7:19: “To liti ki fafo e lautolu ha lautolu a tau ario, mo e tau auro ha lautolu to eke ia mo mena kelea.” Kua maeke he iloa tuai ia ke lagomatai a tautolu ke pulotu mogonei.
11. Ko e heigoa taha puhala he fakaakoaga faka-Atua kua lagomatai a tautolu ke tauteute ma e vahā anoiha?
11 Taha puhala maaliali kua tauteute he fakaakoaga faka-Atua a tautolu ke lata mo e hauaga he aho ha Iehova ko e lagomatai a tautolu ke fakatoka e tau mena kua mua e aoga. Ne tohi he aposetolo ko Paulo ki a Timoteo: “Kia tala age ke he tau maukoloa he mouiaga nai, aua neke fakatokoluga a lautolu, aua foki neke tua ke he koloa nakai tumau, ka ko e Atua.” Pete foki ka nakai monuina a tautolu, maeke ia tautolu ke aoga mai he fakatonuaga omoomoi faka-Atua nei. Ko e heigoa ne putoia he mena ia? He nakai tanaki e tau koloa he tino, kua lata ia tautolu ke eketaha ke “mahani mitaki” mo e “kia maukoloa . . . ke he tau gahua mitaki.” He tuku fakamua e tau mena fakaagaaga he tau momoui ha tautolu ‘kia tanaki e koloa ma tautolu ni ko e fakaveaga mitaki ma e tau aho ne tatali.’ (1 Timo. 6:17-19) He puhala foaki pihia he tagata kua fakakite e lotomatala kua aoga, ha kua pehē a Iesu, “kua aoga ha ha ke he tagata kaeke ke moua e ia e lalolagi oti, ka e moumou ai hana moui?” (Mata. 16:26, 27) He kitia e tata lahi mai he aho ha Iehova, kua igatia a tautolu mo e lata ke manamanatu: ‘Ko fe e mena ne tanaki ai e au e tau koloa? Hane fekafekau kia a au ke he Atua po ko Mamone?’—Mata. 6:19, 20, 24.
12. Ko e ha kua nakai lata ia tautolu ke fakalolelole ka nakai fakalilifu he falu e gahua fakamatala ha tautolu?
12 Mua atu he “tau gahua mitaki” ne fakamau he Kupu he Atua ma e tau Kerisiano, ko e gahua fakamoui he fakamatala e Kautu mo e taute tutaki. (Mata. 24:14; 28:19, 20) Tuga ne hoko ke he senetenari fakamua, liga nakai fakalilifu he falu e gahua fakamatala ha tautolu. (Totou 1 Korinito 1:18-21.) Ka e nakai hiki he mena ia e uho he fekau ha tautolu, ti nakai fakatote hifo e aoga he foaki ke he tau tagata oti, he fai magaaho agaia ne toe ke tua ki ai. (Roma 10:13, 14) He lagomatai e tautolu e falu ke aoga mai he fakaakoaga faka-Atua, to moua e tautolu e tau monuina loga.
Fakamonuina he Taute e Tau Foakiaga
13. Ko e heigoa e tau foakiaga ne taute he aposetolo ko Paulo ke lata mo e tala mitaki?
13 Ato eke ai mo Kerisiano, ne fakaako e aposetolo ko Paulo ke kautū he fakatokaaga faka-Iutaia. He liga nakaila 13 e tau haana he moui, ne hiki a ia mai he maaga haana ko Taso ki Ierusalema ke fakaako i lalo he ako Fakatufono talahaua ko Kamalielu. (Gahua 22:3) Nakai leva, ne kamata ke kitia maali e iloilo lahi ha Paulo ke he tau tagata ne fakalataha mo ia, ti ka matutaki a ia he puhala na, to liga hoko atu a ia ke he tuaga talahaua faka-Iutaia. (Kala. 1:13, 14) He magaaho ne talia e ia e tala mitaki mo e taute e gahua fakamatala, ne toka hifo e ia e tau mena oti ia. Tokihala kia a Paulo ke he fifiliaga ne taute e ia? Nakai. Ka e tohi e ia: “Ko e haku a manatu kua nakai aoga e tau mena oti kana ha ko e mitaki mua ue atu he iloa [po ke, iloilo] a Keriso Iesu ko e haku a Iki. Ha ko ia kua nakai aoga ai kia au e tau mena oti, kua manatu foki au ko e otaota ia.”—Filipi 3:8.
14, 15. Ko e heigoa e tau monuina kua moua e tautolu he eke mo ‘tau ekegahua fakalataha mo e Atua’?
14 Tuga a Paulo, kua taute he tau Kerisiano he vahā nei e tau foakiaga ke lata mo e tala mitaki. (Mare. 10:29, 30) Kua tō noa kia a tautolu ha kua taute e mena ia? Ko Robert, ne totoku he kamataaga, ne vagahau ma e tau tagata tokologa, he pehē a ia: “Ai tokihala au ke he taha mena taha. Kua tamai he fekafekauaga mau ki a au e olioli mo e fiafia, ti kua fakaatā au ke ‘kamata mo e kitekite, kua mitaki a Iehova.’ He taute e au e tau foakiaga fakatino ke maeke ke tutuli e tau foliaga fakaagaaga, ne fakamonuina tumau e Iehova au ke mua atu ke he mena ne foaki e au. Tuga kua nakai foaki mooli e au ha mena. Ka e moua hokoia ni e au e monuina!”—Sala. 34:8; Fakatai 10:22.
15 Kaeke kua fai magaaho tuai a koe mogonei he taute e gahua fakamatala mo e fakaako atu, ti nakai fakauaua kua moua foki e koe e tau magaaho ke kamata mo e kitekite kua mitaki a Iehova. Kua fai magaaho nakai ne logona e koe e lagomatai he agaaga haana he talahau atu e koe e tala mitaki? Kitia nakai e koe e olioli he fofoga he falu he vevete e Iehova e tau loto ha lautolu ke fanogonogo ke he fekau? (Gahua 16:14) Lagomatai kia e Iehova a koe ke kautū ke he tau fakatauhele, he liga hafagi e puhala ki a koe ke fakalaulahi e gahua haau he fonua? Lalago kia e ia a koe he tau magaaho uka, he fakamalolō a koe ke fakatumau ke fekafekau ki a ia he logona hifo e koe kua nakai fahia a koe? (Filipi 4:13, NW) He logona e tautolu e lima lagomatai ha Iehova he taute e tautolu e gahua he fonua, kua mooli lahi a ia ki a tautolu mo e logona hifo foki e tautolu e tata lahi ki a ia. (Isaia 41:10) Nakai kia ko e monuina he eke mo taha he ‘tau ekegahua fakalataha mo e Atua’ ke he gahua mua ue atu he fakaakoaga faka-Atua?—1 Kori. 3:9.
16. Fēfē e logonaaga haau ke he tau laliaga mo e tau foakiaga kua taute e koe he matutaki mo e fakaakoaga faka-Atua?
16 Tokologa e tau tagata ne amaamanaki ke moua taha mena aoga tukulagi ke he vahā ne momoui a lautolu. Kua kitia foki e tautolu e tau mouaaga tokoluga he lalolagi he vahā nei kua fa mafiti ke nimo. Pete ia, ko e tau gahua he vahā foou nei hane taute e Iehova he matutaki mo e fakatapuaga he higoa haana to puipui mooli ke eke mo vala mau he tau fakamauaga tala tuai he Tau Fakamoli a Iehova. To manatu tukulagi ai. (Fakatai 10:7; Hepe. 6:10) Kia tokiofa ha tautolu a kotofaaga lilifu he taute e gahua he fakaakoaga faka-Atua ka tumau tukulagi.
To Tali Fēfē e Koe?
• Ko e heigoa ne manako a Iehova mai ia lautolu ne fakaako e ia?
• Fakaholo ki mua fēfē he fakaakoaga faka-Atua e tau momoui he tau tagata?
• Ke he tau puhala fe kua fakamonuina a tautolu he lagomatai falu ke aoga mai he fakaakoaga faka-Atua?
[Fakatino he lau 23]
Ko lautolu ne fakaako e Iehova kua eke mo tau matakainaga mooli he lalolagi katoa
[Fakatino he lau 24]
Ko e monuina kia he eke mo taha he ‘tau ekegahua fakalataha mo e Atua’?