Fakaakoaga ne Takitaki ke he Moui
1 Ko e palepale ha ia ke kitia e fiafia he fofoga he tau tagata he maeke ia lautolu ke maama e kupu mooli mai he Kupu he Atua! Ko e folafola ke he falu e iloilo he Atua mo e hana finagalo ma e tau tagata kua makona moli. Ko e fakaakoaga pihia kua maeke ke takitaki e tagata ke he moui tukulagi.—Ioane 17:3.
2 Kakano ne Mua Ue Atu: Ko e fakaakoaga ne foaki he vaha nei ke he loga e tau puhala kehekehe mo e ke he tau mataulu tala oti kua ofoofogia. (Fakama. 12:12) Ka ko e iloilo pihia kua nakai maeke ke fakatatai e aoga ke he “tau mana he Atua.” (Gahua 2:11) Kua maeke kia he fakaakoaga ne foaki he lalolagi ke fakatata lahi e tau tagata ke he Tufuga mo e ke iloa hana finagalo? Kua lagomatai kia e tau tagata ke maama ko e heigoa e mena ka tupu ka mamate a tautolu po ke ko e ha ne lahi ai e matematekelea? Kua foaki kia e amaamanakiaga ke he tau tagata? Kua lagomatai kia ke fakatolomaki e fakatokaaga he magafaoa? Nakai. Puhala ni he fakaakoaga faka-Atua kua maeke ke moua e tautolu e tau tali moli ke he tau huhu aoga lahi he moui.
3 Kua foaki he fakaakoaga faka-Atua e mena ne nakai fai he lalolagi he vaha nei—ko e holo ki mua he mahani mitaki. Kua huo kehe he Kupu he Atua e fili lanu tagata, fakamagafaoa, mo e papale fakamotu mai he tau loto ha lautolu ne talia mo e fakagahua e tau fakaakoaga ia. (Hepe. 4:12) Kua omoi ai e tau tagata ke tiaki e tau vahega favale kehekehe ti ‘fakatapulu a lautolu ke he tagata fou.’ (Kolo. 3:9-11; Mika 4:1-3) Lafi ki ai, kua foaki he fakaakoaga faka-Atua ke he tau miliona e malolo ke fahia mai he mokulu muatua ke he tau gahua mo e tau aga kua nakai fakafiafia e Atua.—1 Kori. 6:9-11.
4 Kakano ne Mafiti Mogonei: Kua fakamataala he Faiaoga Homo Ue Atu ha tautolu a tautolu ke he kakano he tau magaaho ne nonofo ai a tautolu. Ko e tau fakafiliaga fakaperofeta hana kua toka ai e vala tala fou nukua lata ke fakapuloa ke he lalolagi oti. (Fakakite. 14:6, 7) Kua pule e Keriso he lagi, to nakai leva ti mahaikava e kautu he lotu fakavai he lalolagi, ti fakalava mai e Kautu he Atua ke moumou e tau fakatufono oti he lalolagi. (Tani. 2:44; Fakakite. 11:15; 17:16) Ti, kua mafiti ma e tau tagata ke mailoga e Patuiki he Atua hane pule mogonei, ke o kehe i Papelonia Lahi, mo e ui ke he higoa ha Iehova ke he tua. (Sala. 2:11, 12; Roma 10:13; Fakakite. 18:4) Kia fakalataha katoatoa a tautolu he folafola ke he falu e fakaakoaga kua takitaki ke he moui.