“Kia Mataala a Koe ke he Gahua ne Tuku Atu kia Koe ha he Iki”
“[“Kia mataala,” NW] a koe ke he gahua ne tuku atu kia koe ha he Iki, kia fakamau ai.”—KOLO. 4:17.
1, 2. Ko e heigoa e matagahua ne ha ha he tau Kerisiano ke he tau tagata?
HA HA ia tautolu e matagahua uho lahi ke he tau tagata ne momoui viko ia tautolu. Ko e fifiliaga ne taute e lautolu mogonei kua kakano ke momoui po ke mamate he magaaho “matematekelea lahi.” (Fakakite. 7:14) Ko e tagata tohia omoomoi he tohi he Tau Fakatai ne pehē: “Kia laveaki e koe a lautolu kua uta ke mamate ai, mo lautolu ko e kelipopo ha ne fai, kia taofi a e koe.” Ko e tau kupu aoga lahi ha ia! Ko e kaumahala ke taute e matagahua he hataki e tau tagata ke he fifiliaga ne ha ha ia lautolu to hili ai e toto ki luga ha tautolu. Ti matutaki e vala tala taha nei: “Kaeke ke pehe a mutolu, Kitiala, nakai iloa e mautolu e tagata nai; ko ia kua kamatamata e tau loto nakai kia manamanatu ai a ia? Ko ia kua leveki hāu a agaga nakai kia iloa e ia? Nakai kia taui atu e ia ke he tagata ke lata mo e hana gahua?” Maaliali ai, nakai lata e tau fekafekau a Iehova ke pehē kua ‘nakai iloa’ e lautolu e hagahaga kelea hane hagaao ki ai e tau tagata.—Fakatai 24:11, 12.
2 Kua uho e moui ki a Iehova. Kua tomatoma a ia ke he tau fekafekau haana ke taute e tau laliaga oti ke lagomatai ke fakahao e tau momoui he tokologa ka maeke ia lautolu. Igatia e fekafekau he Atua mo e fakailoa e ogo fakamoui ne moua he Kupu he Atua. Ko e gahua ha tautolu kua tatai ke he tagata toko ne fakailoa e hatakiaga ka kitia e ia e fakamatakutaku hane hau. Nakai manako a tautolu ke he toto ha lautolu kua fakahagahaga kelea he mamate ke hili ki luga he tau ulu ha tautolu. (Eseki. 33:1-7) Ko e mena ia, kua aoga ha ia ke fakatumau a tautolu ke he tau laliaga ke ‘fakamatala atu e kupu’!—Totou 2 Timoteo 4:1, 2, 5.
3. Ko e heigoa e tau matakupu ka fakatutala e vala tala nei mo e tau vala tala ua ne mumui mai ki ai?
3 To fakatutala e vala tala nei ke he puhala kua maeke ia koe ke kautū mai he tau fakatauhele ke he fekafekauaga fakahao moui haau mo e puhala kua liga maeke ia koe ke lagomatai e tokologa he tau tagata. Ko e vala tala ne mui mai ka kumikumi e puhala kua maeke ia koe ke feaki e puhala fakaako ke he tau kupu mooli aoga. Ko e vala tala fakaako ke tolu aki ka hokotaki falu he tau fua atihake kua moua he tau tagata fakapuloa he Kautu he lalolagi katoa. Ka e fakamua to fakatutala a tautolu ke he tau matakupu nei, to mitaki ke liu fakatutala ke he kakano kua aoga lahi e vahā ha tautolu.
Kakano kua Tokologa ne Nakai Fai Amaamanakiaga
4, 5. Ko e heigoa kua moua he tau tagata, ti tali atu fēfē e tau tagata tokologa?
4 Kua fakakite he tau mena tutupu he lalolagi kua nonofo a tautolu ke he “fakaotiaga he lalolagi” ti kua tata lahi mai e moumouaga. Kua lauia e tau tagata he tau mena tutupu mo e tau tutūaga ne talahau e Iesu mo e tau tutaki haana ka fakamailoga aki e “tau aho fakamui.” Kua putoia he “tau mena matematekelea” e tau felakutaki, hogeia e tau mena kai, tau mafuike, mo e falu mena fakatupetupe ne fakamamahi aki e tau tagata. Kua tupu lahi e tau aga matahavala, lotokai, mo e nakai mahani Atua. Pihia foki ke he tau tagata ne lali ke momoui ke he tau puhala he Tohi Tapu, kua “hohoko mai ai e tau aho uka” ainei.—Mata. 24:3, 6-8, 12; 2 Timo. 3:1-5.
5 Ka e laulahi he tau tagata kua nakai mailoga e aoga mooli he tau mena tutupu he lalolagi. Ti ko e fua, tokologa kua fakaatukehe hagaao ke he haohao mitaki ha lautolu mo e tau magafaoa ha lautolu. Ko e galo e tau fakahele ke he mate po ke falu matematekelea fakatagata kua fakamamahi aki e tokologa. He nakai fai iloilo tonu ke he kakano ne tutupu e tau mena mo e mouaaga he tali, kua nakai fai amaamanakiaga e tau tagata nei.—Efeso 2:12.
6. Ko e ha ne nakai maeke ia ‘Papelonia Lahi’ ke lagomatai e tau tagata haana?
6 Ko ‘Papelonia Lahi,’ ko e kautu he tau lotu fakavai he lalolagi, ne tote maka e fakamafanaaga ke he tokologa. He taha faahi, ha ko e “uaina he feuaki hana” ne fakagoagoa aki e ia e tuaga fakaagaaga he tokologa. Lafi ki ai, he eke ke tuga e fifine fakataka, ne fakahehē mo e pule he lotu fakavai e “tau patuiki he lalolagi,” he fakaaoga e tau fakaakoaga pikopiko mo e tau gahua fakataulatua ke fakatumau aki e tokologa ke talia e tau takitaki fakapolitika ha lautolu. Ne moua mooli he lotu fakavai e malolō mo e pule, ka e he magaaho taha, ne tiaki katoatoa e ia e kupu mooli he lotu.—Fakakite. 17:1, 2, 5; 18:23.
7. Ko e heigoa e amaamanakiaga kua ha ha he laulahi he tau tagata, ka e liga lagomatai fēfē ke he falu?
7 Ne fakaako e Iesu ko e laulahi he tau tagata hane ō ai ke he hala laulahi ne pū atu ke he malaia. (Mata. 7:13, 14) Falu tagata ne ha ha he hala laulahi ia ha kua taute e lautolu e fifiliaga pauaki ke tiaki e mena ne fakaako he Tohi Tapu, ka e tokologa e falu i ai ha kua fakahehē, po ke haia agaia ke he pouli, ne kehe mai he mena ne manako mooli a Iehova ke taute e lautolu. Liga to hiki he falu e puhala moui ha lautolu kaeke ke foaki ki a lautolu e tau kakano maaliali he Tohi Tapu ke taute pihia. Ka ko lautolu ne tumau ki Papelonia Lahi mo e fakatumau ke tiaki e tau tutūaga he Tohi Tapu to nakai hao mai he “matematekelea lahi.”—Fakakite. 7:14.
Fakatumau ke Fakamatala ka e “Nakai Oki”
8, 9. Tali atu fēfē e tau Kerisiano he senetenari fakamua he fehagai mo e totokoaga, ti ko e ha?
8 Ne pehē a Iesu to fakamatala he tau tutaki haana e tala mitaki he Kautu mo e taute tutaki. (Mata. 28:19, 20) Ko e mena ia, ko e tau Kerisiano mooli, kua manamanatu tumau ke fakalataha ke he gahua fakamatala ko e puhala fakamooli ke he Atua mo e matapatu kakano he tua ha lautolu. Ti, fakauka e tau tutaki fakamua ha Iesu ki ai pete he fehagai mo e totokoaga. Ne falanaki a lautolu ki a Iehova ma e malolō, he liogi to foaki e ia ki a lautolu e fakatumau ke “talahau atu e [haana] a kupu mo e fakamalolo ni.” He tali atu, ne fakapuke e Iehova a lautolu aki e agaaga tapu, ti talahau atu e lautolu mo e fakamalolō e kupu he Atua.—Gahua 4:18, 29, 31.
9 He magaaho ne vale e totokoaga, maueue nakai e fifiliaga he tau tutaki a Iesu ke fakamatala e tala mitaki? Nakai pihia. He hogohogomanava ha ko e fakamatala he tau aposetolo, ne tapaki he tau takitaki lotu faka-Iutaia e tau aposetolo, fakamatakutaku a lautolu mo e fahi ai. Ka e, “nakai oki foki e tau aho oti he fakaako atu e [tau aposetolo], mo e fakamatala atu . . . e tala mitaki kia Iesu Keriso.” Ne kitia mitaki e lautolu kua lata ia lautolu ke “omaoma ke he Atua ko e pule ka e nakai ke he tau tagata.”—Gahua 5:28, 29, 40-42.
10. Ko e heigoa e tau paleko ne fehagai ki ai e tau Kerisiano he vahā nei, ka ko e heigoa kua liga fua mai he tau mahani mitaki ha lautolu?
10 Laulahi he tau fekafekau he Atua he vahā nei ne nakai fakauka ke he tau fahi po ke tuku he fale puipui ha ko e tau gahua fakamatala ha lautolu. Pete ia, kua fehagai e tau Kerisiano mooli oti ke he tau kamatamata mo e tau paleko ke he falu puhala. Ma e fakatai, liga kua fakaohooho he haau a loto manamanatu ne fakamahani he Tohi Tapu ke talia e puhala nakai talahaua he mahani po ke aga ne taute a koe ke kehe. Ko e tau tagata gahua, tau kapitiga aoga, po ke tau katofia kua liga manamanatu kua kehe a koe ha kua fakavē e tau fifiliaga ke he tau matapatu fakaakoaga Tohi Tapu. Pete ia, ko e tali kelea ha lautolu kua nakai lata ke fakalolelole a koe. Kua heheina e lalolagi ke he pouli fakaagaaga, ka kua lata e tau Kerisiano ke “[kikila] tuga ne tau mena kua fakamaama.” (Filipi 2:15) Liga ko e falu he tau tagata kitekite fakamooli to kitia mo e loto fakaaue ke he tau gahua mitaki haau ati fakahiku ai ke fakaheke ki a Iehova.—Totou Mataio 5:16.
11. (a) Liga tali atu fēfē e falu ke he gahua fakamatala? (e) Ko e vahega totokoaga fe ne fehagai mo e aposetolo ko Paulo, ti tali atu fēfē a ia ki ai?
11 Ko e fakamalolō ne lata ke fakatumau a tautolu ke he fakamatala e fekau he Kautu. Liga ha ha i ai falu tagata, tuga e tau magafaoa, kua vaiga a koe po ke falu puhala foki kua lali ke fakalolelole a koe. (Mata. 10:36) Kua lagaloga e keli he aposetolo ko Paulo ha kua mahani fakamooli a ia he taute e fekafekauaga haana. Mailoga e puhala ne tali atu a ia ke he totokoaga: “Pete ni he fakamamahi fakamua a mautolu, mo e fakakeleaina,” ne tohi e ia, “ka e fakamalolo a mautolu ha ko e Atua ha tautolu ke vagavagahau atu kia mutolu e vagahau mitaki he Atua mo e tau lahi.” (1 Tesa. 2:2) Mooli ko e paleko ma Paulo ke fakatumau ke vagahau e tala mitaki he mole e tapaki, hēhē e tau tapulu, fahi aki e tau akau, mo e tuku he fale puipui. (Gahua 16:19-24) Ko e heigoa ne foaki ki a ia e fakamalolō ke fakatumau? Ko e manako malolō haana ke taute e poakiaga he Atua ke fakamatala.—1 Kori. 9:16.
12, 13. Ko e heigoa e tau paleko kua fehagai e falu ki ai, ti kua lali fēfē a lautolu ke kautū mai i ai?
12 Ko e paleko foki ke fakatumau e fakamakutu ha tautolu ke he tau matakavi ne lavea e tau tagata i kaina po ke nakai tokologa ne talia ke he fekau he Kautu. Ko e heigoa ha tautolu ka taute he tau tuaga pihia? Kua liga moua e tautolu kua lata ke fakamalolō fakalahi foki ke vagahau ke he tau tagata he tau magaaho noa. Kua liga maeke foki ia tautolu ke hiki e fakaholoaga po ke hagaaki ke he tau laliaga ha tautolu ke fakamatala he tau matakavi ne maeke ia tautolu ke matuuta mo e tau tagata tokologa.—Fakatatai Ioane 4:7-15; Gahua 16:13; 17:17.
13 Ko e falu mena uka ne taufetului ki ai e tokologa ko e fuakau mo e nakai malolō e tino, ne liga fakakaupā e mena kua maeke ia lautolu ke taute he gahua fakamatala. Kaeke kua pihia a koe, ua fakalolelole. Kua iloa lahi e Iehova e tau kūkū haau ti loto fakaaue ke he mena kua maeke ia koe ke taute. (Totou 2 Korinito 8:12.) Ko e tau matematekelea ne liga fehagai mo koe—totokoaga, favale, po ke nakai malolō e tino—kia taute e tau mena oti kana kua maeke he tau tuaga haau ke fakamatala e tala mitaki ke he falu.—Fakatai 3:27; fakatatai Mareko 12:41-44.
‘Kia Mataala ke he Gahua Haau’
14. Ko e heigoa e fakafifitakiaga ne fakatoka he aposetolo ko Paulo ma e tau matakainaga Kerisiano, ti ko e heigoa e fakatonuaga ne foaki e ia?
14 Ne uta fakahokulo he aposetolo ko Paulo e fekafekauaga haana, ti fakamalolō e ia e tau matakainaga talitonu ke taute pihia. (Gahua 20:20, 21; 1 Kori. 11:1) Ko e tagata ne fifili e Paulo ke fakamalolō pauaki ko e Kerisiano he senetenari fakamua ne higoa ko Arekipa. He tohi haana ke he tau Kolose, ne tohia e Paulo: “[“Kia mataala,” NW] a koe ke he gahua ne tuku atu kia koe ha he Iki, kia fakamau ai.” (Kolo. 4:17) Nakai iloa e tautolu ko hai a Arekipa po ke tau tuaga haana, ka e kitia maali ai kua talia e ia e fekafekauaga. Kaeke ko e Kerisiano tukulele a koe, kua talia foki e koe fekafekauaga. Matutaki nakai a koe ke mataala ke he fekafekauaga ke maeke ke fakamooli ai?
15. Ko e heigoa ne putoia he tukuleleaga faka-Kerisiano, ti ko e heigoa e tau hūhū ne takitaki ki ai?
15 Ato hoko e papatisoaga ha tautolu, kua tukulele e tautolu e tau momoui ha tautolu ki a Iehova he liogi mai he loto. Ko e kakano anei kua fifili a tautolu ke taute e finagalo haana. Ti kua lata ke hūhū ki a tautolu ni mogonei, ‘Ko e taute kia he finagalo he Atua ko e mena aoga lahi mooli he moui haaku?’ Liga ha ha ia tautolu e tau matagahua kehekehe ne amanaki a Iehova ke taute e tautolu—tuga e leveki he tau magafaoa ha tautolu. (1 Timo. 5:8) Ka e fakaaoga fēfē e tautolu e tau magaaho ne toe mo e tau malolō ha tautolu? Ko e heigoa e mena ne mua he tau momoui ha tautolu?—Totou 2 Korinito 5:14, 15.
16, 17. Ko e heigoa ka liga manamanatu ki ai e tau fanau Kerisiano po ko lautolu ne nakai loga e tau matafekau?
16 Ko koe kia ko e tama Kerisiano kua tukulele ne oti laia po ke tata ke oti e tau tau fakaako he aoga? Liga nakaila fai matagahua mamafa a koe fakamagafaoa. Ti, ko e heigoa e pulega haau ka taute he moui haau? Ko e heigoa e tau fifiliaga ka fakamalolō lahi ki a koe ke fakamooli e maveheaga haau ke taute e finagalo a Iehova? Tokologa ne fakatokatoka e tau matagahua ha lautolu ke maeke ke paionia, ti fakahiku kua moua e lautolu e olioli mo e makona lahi.—Sala. 110:3; Fakama. 12:1.
17 Liga ko e tama fuata a koe. Kua gahua mau a koe ke he gahua tupe ti nakai loga e tau matafekau ka ko e leveki ni ki a koe. Nakai fakauaua kua fiafia a koe ke gahua fakalahi ke he tau matagahua he fakapotopotoaga ka maeke ai. Liga maeke foki nakai ke fakalahi atu e olioli haau? Kua manamanatu nakai a koe ke fakalaulahi e gahua haau ke he fekafekauaga? (Sala. 34:8; Fakatai 10:22) He falu matakavi, lahi agaia e gahua kua lata ke taute ke hokotia e ogo foaki moui he kupu mooli ke he tau tagata oti. Maeke nakai ia koe ke taute e tau hikihikiaga he moui haau, liga ke fekafekau he fonua ne manako lahi ma e tau tagata fakapuloa he Kautu?—Totou 1 Timoteo 6:6-8.
18. Ko e heigoa e tau hikiaga ne taute he taha hoa mau, ti ko e heigoa e tau fua?
18 Manamanatu ke he fakafifitakiaga ha Kevin mo Elena, mai he Tau Faahi Kaufakalataha.a Ke tuga e aga he tau hoa fuata ne mau laia he matakavi ha laua, ne logona hifo e laua kua lata ke fakatau e fale. Ne gahua mau tokoua a laua ma e tupe mo e ke fakatumau e puhala moui hagahaga mitaki. Ka e, ko e fakaholoaga gahua ha laua mo e tau gahua fakakaina ne tote e magaaho ha laua ne toe ma e gahua he fonua. Ne mailoga e laua kua teitei oti e tau magaaho mo e tau malolō ha laua he foaki ke he tau koloa. Ka e, he kitia e laua e puhala moui mukamuka he taha hoa mau fiafia ne paionia, kua fifili a Kevin mo Elena ke hiki e tau mena ne mua he tau momoui ha laua. Mole atu e kumi ke he takitakiaga a Iehova he liogi, ne sela e laua e fale mo e hiki atu ke he fale totetote hifo. Ne fakatote hifo e tau tulā ha Elena he gahua tupe ti eke mo paionia. He atihake ha ko e fiafia ne moua he hoana haana, ne toka e Kevin e gahua tumau ke he gahua tupe haana ti kamata ke paionia. Fai magaaho he mole, ne hiki atu a laua ke he motu ha Amerika Toga ke gahua he matakavi kua manako lahi ma e tau tagata fakamatala he Kautu. “Na fiafia tumau e fakamauaga ha maua,” he talahau e Kevin, “ka ko e magaaho ne fakalaulahi atu e gahua ha maua ke he tau foliaga fakaagaaga, kua mua atu e hokulo he fiafia ha maua.”—Totou Mataio 6:19-22.
19, 20. Ko e ha e fakamatala he tala mitaki ko e gahua aoga lahi he vahā nei?
19 Ko e fakamatala e tala mitaki ko e gahua aoga lahi mahaki ne taute ke he lalolagi he vahā nei. (Fakakite. 14:6, 7) Kua lagomatai ke he fakatokoluga he higoa a Iehova. (Mata. 6:9) Kua fakaholo ki mua he fekau he Tohi Tapu e tau momoui he tokoafe ne talia ki ai he tau tau takitaha, ti maeke he mena nei ke takitaki ke he fakamouiaga ha lautolu. Ka e, “fanogonogo atu fefe a lautolu, ka nakai fai tagata ke fakamatala atu?” he hūhū he aposetolo ko Paulo. (Roma 10:14, 15) Mooli, to maeke fēfē? Ko e ha he nakai fifili ke taute e tau mena oti ka maeke ia koe ke fakamooli e fekafekauaga haau?
20 Ko e taha puhala kua maeke ke lagomatai e koe e tau tagata ke maama e aoga he tau aho uka nei mo e tau fua he tau fifiliaga ne taute e lautolu, ko e fakaholo ki mua he lotomatala haau he fakaako atu. Ko e puhala ke taute e koe e mena nei ka fakatutala he vala tala ka mui mai.
[Matahui Tala]
a Hiki tuai e tau higoa.
To Tali Fēfē e Koe?
• Ko e heigoa e matagahua he tau Kerisiano ke he tau tagata?
• Kua lata ke fahia fēfē a tautolu mo e tau fakatauhele ke he gahua fakamatala ha tautolu?
• Fakamooli fēfē e tautolu e fekafekauaga ne talia e tautolu?
[Fakatino he lau 5]
Ne lata e fakamalolō ke fakamatala ka fehagai mo e totokoaga
[Fakatino he lau 7]
Ko e heigoa haau ka taute ka fakamatala he tau matakavi ne lavea e tau tagata i kaina?