Fehagai mo e Tau Paleko he Gahua he Taha Fale mo e Taha Fale
“Ka e fakamalolo a mautolu ha ko e Atua ha tautolu ke vagavagahau atu kia mutolu e vagahau mitaki he Atua mo e tau lahi.”—1 TESA. 2:2.
1. Ko e heigoa e tau paleko ne fehagai mo Ieremia, ti maeke fēfē a ia ke fakafelau mo e tau paleko ia?
KO IEREMIA ko e tagata fai logonaaga tuga ni ha tautolu. He magaaho ne fakailoa e Iehova e poakiaga ki a Ieremia ke eke mo “perofeta ke he tau motu,” ne tagi atu a ia: “Oi te fakaalofa, ko e Iki na e Iehova, kitiala, nakai iloa e au ke vagahau, ha ko e tama tote au.” Pete ia, he falanaki ki a Iehova, ne talia e ia e matagahua. (Iere. 1:4-10) Molea e 40 e tau ne fakafelau a Ieremia mo e favale, fakaheu, vā, mo e fahi fakakelea. (Iere. 20:1, 2) He falu magaaho, ne logona hifo e ia e manako ke tiaki. Ka e fakatumau a ia ke fakapuloa e fekau nakai mahuiga ke he tau tagata ne nakai talia. He malolō he Atua, ne fakamooli e Ieremia e mena ne liga nakai maeke a ia ke taute tokotaha.—Totou Ieremia 20:7-9.
2, 3. Fehagai fēfē e tau fekafekau he Atua he vahā nei mo e tau paleko ke tuga ha Ieremia?
2 Tokologa e tau fekafekau he Atua he vahā nei kua logona hifo pihia tuga a Ieremia. He manamanatu ke he monuina he fakamatala mai he taha fale mo e taha fale, ne manatu e falu ia tautolu, ‘Ko e taha mena ia ne nakai maeke au ke taute.’ Ka ko e magaaho ne mailoga e tautolu ko e finagalo a Iehova ke fakapuloa e tautolu e tala mitaki, ne kautū a tautolu mai he hopoate mo e gahua nakai noa ke fakamatala. Pihia foki, tokologa a tautolu ne fehagai mo e tau tuaga he tau momoui ha tautolu ati uka lahi ai he taha magaaho ke fakatumau ke fakamatala. Ko e paleko mooli ke kamata e fakamatala mai he taha fale mo e taha fale mo e ke matutaki e fakamatala ke hoko ke he fakaotiaga.—Mata. 24:13.
3 Ka e kua ka fai magaaho tuai he fakaako Tohi Tapu a koe mo e Tau Fakamoli a Iehova mo e fakalataha ke he tau feleveiaaga he fakapotopotoaga ka e tehatehaua ke kamata e fakamatala mai he taha fale mo e taha fale? Ka e kua kaeke ko e Fakamoli papatiso a koe ne uka ke fakalataha ke he gahua he taha fale mo e taha fale, pete he maeke ia koe ke taute? Kia mailoga kua fehagai e tau tagata oti ke he tau tuaga kehekehe he gahua ke he taha fale mo e taha fale. He lagomatai e Iehova, kua maeke foki ia koe ke taute.
Kia Fakamalolō
4. Ko e heigoa ne fakamalolō e aposetolo ko Paulo ke vagahau e tala mitaki mo e fakamalolō?
4 Kua mailoga mooli e koe ne nakai taute e gahua fakamatala ke he lalolagi katoa ha ko e malolō po ke pulotu he tagata, ka ko e agaaga he Atua. (Saka. 4:6) Mooli foki e mena ia ke he fekafekauaga he tau Kerisiano takitaha. (2 Kori. 4:7) Manamanatu ke he aposetolo ko Paulo. He manatu e magaaho ne ekefakakelea he tau tagata totoko a ia mo e hoa misionare haana, ne tohi e ia: “Pete ni he fakamamahi fakamua a mau[a], mo e fakakeleaina i Filipi, . . . ka e fakamalolo a mau[a] ha ko e Atua ha tautolu ke vagavagahau atu kia mutolu e vagahau mitaki he Atua mo e tau lahi.” (1 Tesa. 2:2; Gahua 16:22-24) Kua nakai manatu a tautolu ko e tagata fakamatala makutu tuga a Paulo ne paleko foki ki a ia falu magaaho ke fakamatala. Ka ko tautolu oti, ne falanaki a Paulo ki a Iehova ke talahau e vagahau mitaki mo e fakamalolō. (Totou Efeso 6:18-20.) Muitua fēfē e tautolu e fakafifitakiaga a Paulo?
5. Ko e heigoa taha puhala kua maeke ke fakamalolō aki a tautolu ke fakamatala?
5 Taha puhala ka fakamalolō aki a tautolu ke fakamatala ko e liogi. Ne pehē e paionia: “Ne liogi au ke maeke ia au ke vagahau mo e mauokafua, ti liogi au ke maeke ke hokotia ke he tau loto he tau tagata, mo e liogi au ke moua e au e olioli he gahua. Ka e mua ue atu, ko e gahua a Iehova anei, nakai ko e ha tautolu, ti nakai maeke ia tautolu ke taute ha mena ka noa mo e haana a lagomatai.” (1 Tesa. 5:17) Kua lata ia tautolu oti ke liogi nakai noa ma e lagomatai he agaaga tapu he Atua ke fakamatala fakamalolō.—Luka 11:9-13.
6, 7. (a) Ko e heigoa e fakakiteaga ne moua e Esekielu, ti ko e heigoa e kakano? (e) Ko e heigoa e hatakiaga ne foaki he fakakiteaga a Esekielu ke he tau fekafekau he Atua he vahā nei?
6 Ne fakakite he tohi a Esekielu e taha mena foki ka maeke ke lagomatai a tautolu ke vagahau mo e fakamalolō. He fakakiteaga, ne age e Iehova ki a Esekielu e tohi vakai ne tohi faahi ua ke he “tagi aue, mo e tagi, mo e tagi fekapai” ti tala age ki a ia ke kai ai, he pehē: “Ko e tama he tagata na e, kia talia a e koe ke he manava hau, kia makona ai hau a manava he tohi vakai na kua ta atu e au kia koe.” Ko e heigoa e kakano he fakakiteaga nei? Kua lata ia Esekielu ke manamanatu katoatoa ke he fekau ne amanaki a ia ke fakailoa. Kua eke mo vala haana, ha kua lauia haana tau logonaaga he fatuakiloto. Ne matutaki e perofeta ke talahau: “Ti kai ai e au, kua tuga ne meli ke he haku gutu he humelie.” He fakailoa e fekau he Atua ke he tau tagata ko e mena fiafia lahi—kua tuga e kamata he meli—ki a Esekielu. Ne logona hifo e ia e lilifu pauaki ke hukui a Iehova mo e ke fakamooli e kotofaaga nei ne foaki he Atua, pete ni ko e fakailoa a ia he fekau malolō ke he tau tagata nakai talia.—Totou Esekielu 2:8–3:4, 7-9.
7 Kua ha ha he fakakiteaga e hatakiaga aoga ma e tau fekafekau he Atua he vahā nei. Ha ha foki ia tautolu e fekau malolō ke fakailoa ke he tau tagata ne nakai loto fakaaue tumau ke he gahua ha tautolu. Ma tautolu ke matutaki ke kitia e fekafekauaga faka-Kerisiano ha tautolu ko e kotofaaga foaki he Atua, kua lata ia tautolu ke puke fakaagaaga. Ko e tau aga fakaako fakateaga mo e nakai taute tumau ka nakai lahi ma tautolu ke manamanatu katoatoa ke he Kupu he Atua. Maeke nakai ia koe ke holo ki mua e tuaga mitaki po ke tumau ke he totouaga fakatagata he Tohi Tapu mo e fakaako ke he Tohi Tapu haau? Maeke nakai ia koe ke manamanatu hokulo tumau ke he mena ne totou e koe?—Sala. 1:2, 3.
Kamata e Tau Fakatutalaaga Faka-Tohi Tapu
8. Ko e heigoa e puhala kua lagomatai e falu tagata fakailoa he Kautu ke kamata e tau fakatutalaaga Tohi Tapu he gahua he taha fale mo e taha fale?
8 Ko e vala uka lahi he gahua he taha fale mo e taha fale ke he tokologa he tau tagata fakailoa ko e fakafeleveia fakamua mo e tagata he kaina. Mooli, he falu matakavi kua paleko ke kamata e tau fakatutalaaga. Ne logona he falu tagata fakailoa e hagahaga mitaki lahi ke vagahau ke he tau tagata he gutuhala ka kamata e fakataitaiaga ha lautolu aki e tau kupu gahoa nukua fifili fakamitaki ti age mogoia e tuleke ke he tagata he kaina, tuga ne tohi he puha he vala tala nei. Ko e mataulu he tuleke po ke fakatino fulufuluola kua liga futiaki e tagata he kaina ke fanogonogo, ti fakaatā a tautolu ke totoku fakakū e kakano he aahi atu ha tautolu mo e fakalagā aki e hūhū. Ko e hikihiki he tau puhala nei ko e fakakite ke he tagata he kaina tolu po ke fā e tuleke kehekehe ti uiina a ia ke fifili e tuleke ne fiafia a ia ki ai. Mooli, ko e foliaga ha tautolu ne nakai ni ke foaki he tau tuleke po ke fakaaoga ai he tau gutuhala oti ka ko e kamata he tau fakatutalaaga he Tohi Tapu kua takitaki ke he tau fakaakoaga Tohi Tapu.
9. Ko e ha ne aoga e mautauteute mitaki?
9 Ko e heigoa ni e puhala haau ka fakaaoga, to lagomatai he mautauteute mitaki a koe ke fakamanou mo e hakahakau ke he gahua he taha fale mo e taha fale. Ne talahau he taha paionia:“Lahi atu e olioli haaku ka mautauteute mitaki. Ne taute au ke manako ke talahau e fakataitaiaga haaku.” Ne pehē taha paionia, “Ka fakamahani au mo e tau tohi kua amanaki au ke foaki, ne fakahiku au ke hakahakau ke fakaaoga ai.” He fai aoga foki e liu fakamanatu nakai lea e tau mena kua amanaki a koe ke vagahau, ne lagomatai lahi ke he tokologa ke fakamahani fakaleo lahi e fakataitaiaga ha lautolu. Ko e taute pihia kua lagomatai a lautolu ke foaki katoatoa ki a Iehova.—Kolo. 3:23; 2 Timo. 2:15.
10. Ko e heigoa ka taute e tau feleveiaaga ma e gahua he fonua ke aoga mo e latatonu?
10 Ko e tau feleveiaaga aoga ke he gahua he fonua kua lafi ke he lauia mitaki mo e olioli ha tautolu he gahua ke he taha fale mo e taha fale. Ka hagaao tonu e kupu ma e lauga he aho ke he matagahua fakamatala, maeke ke totou mo e fakatutala fakakū ki ai. Ka kua lata e matakainaga taane ne taute e feleveiaaga ke he gahua he fonua ke lahi e magaaho ke fakatutala po ke fakatātā e fakataitaiaga mukamuka ne latatonu ke he matakavi po ke fakaaoga falu vala tala aoga ke he fekafekauaga he aho ia. To lagomatai foki he mena nei a lautolu ne fakalataha mai ke foaki e fakamatala lauia mitaki. He mautauteute mitaki tuai, ko e tau motua mo e falu ne taute e tau feleveiaaga ka taute e mena nei mo e fakaoti agaia e feleveiaaga ke he magaaho fafati.—Roma 12:8.
Ko e Malolō he Fanogonogo
11, 12. Maeke fēfē he fanogonogoaga fakaalofa hofihofi noa ke lagomatai a tautolu ke hokotia e tala mitaki ke he tau tagata? Talahau e tau fakataiaga.
11 Nakai ni ko e mautauteute mitaki hokoia ka e pihia mo e hokulo he fiafia fakatagata ke he falu kua lagomatai a tautolu ke kamata e tau fakaakoaga he Tohi Tapu mo e hokotia ke he tau tagata he fekafekauaga. Taha puhala ke fakatātā e tautolu e fiafia ia he ha tautolu a puhala fanogonogo. Ne talahau he leveki faifano: “Ko e fakauka mo e fakakite e makai ke fanogonogo ke he tau tagata ne ha ha ai e malolō ofoofogia ke futiaki mai mo e ko e fakakiteaga homo ue atu a ia he fiafia mafanatia fakatagata.” Ko e fanogonogo fakaalofa hofihofi noa kua eke mo kei ke hafagi aki e loto he tagata he kaina, tuga ne fakakite he mena tupu nā ne mui mai.
12 He tohi ne tū he nusipepa Le Progrès, ha Saint-Étienne, i Falani, ne fakamaama he fifine e aahi age he tau tagata tokoua ne nokonoko e gutuhala haana he nakaila leva e mole he matematekelea haana he mate e tama fifine tolu mahina haana. “Ne mailoga mafiti e au a laua ko e Tau Fakamoli a Iehova,” he tohia e ia. “Ne amanaki au ke tala age fakamitaki ki a laua ke ō, ka e mailoga e au e porosua ne foaki e laua. Hagaao ai ke he kakano ne fakaatā he Atua e matematekelea. Ti fifili au ke uiina a laua ki fale mo e foliaga ke moumou e fakatutalaaga ha laua. . . . Ne molea fakatote e taha e tulā he nonofo e Tau Fakamoli. Ne fanogonogo a laua ki a au mo e fakaalofa hofihofi noa, ti ko e magaaho ne taute a laua ke ō, ne laukauka e logonaaga haaku ti talia e au ke aahi mai foki.” (Roma 12:15) Nakai leva, ne talia he fifine nei e fakaakoaga Tohi Tapu. Ne kitia mai he mena ne manatu he fifine ke he aahi atu fakamua ia, nakai ko e mena ne talahau he tau Fakamoli, ka ko e puhala fanogonogo ha laua.
13. Maeke fēfē ia tautolu ke hikihiki e fakataitaiaga ha tautolu he tala mitaki ke he tau tagata ne feleveia mo tautolu?
13 Ka fanogonogo fakaalofa hofihofi noa a tautolu, kua fakaatā mooli e tautolu e tau tagata ke talahau mai e tau kakano ne manako a lautolu ke he Kautu. Kua tuku he mena nei a tautolu ke he tuaga mitaki ke talahau e tala mitaki ki a lautolu. Ne liga mailoga e koe, ko e tau tagata fakamatala lauia mitaki ko e tau tagata makutu ke fanogonogo. (Fakatai 20:5) Kua fakakite e lautolu e fiafia mooli ke he tau tagata ne feleveia mo lautolu he fekafekauaga. Ne nakai ni iloa e lautolu e tau higoa mo e tau matakavi kaina he tau tagata ka e pihia foki mo e tau mena ne fiafia mo e tau manako ha lautolu. Ka fakakite he tagata e tupetupe pauaki, ne taute e lautolu e kumikumiaga mo e liliu mafiti atu ke talahau e mena ne moua e lautolu. Tuga e aposetolo ko Paulo, ne hikihiki e lautolu ha lautolu a fakataitaiaga ke he fekau he Kautu he feleveia a lautolu mo e tau tagata. (Totou 1 Korinito 9:19-23.) Kua futiaki he fiafia mooli e tau tagata ke he tala mitaki mo e fakaata homo ue atu e “fakaalofa hofihofi noa he Atua ha tautolu.”—Luka 1:78.
Fakatumau e Aga Atihake
14. He taute e tautolu e fekafekauga ha tautolu, fakaata fēfē e tautolu e tau mahani a Iehova?
14 Ne fakalilifu e Iehova a tautolu he foaki ki a tautolu e atāina ke fifili. Pete ko ia e Atua Malolō Ue Atu, ne nakai fakaohooho e ia ha tagata ke fekafekau ki a ia ka e futiaki e tau tagata he fakavē ke he fakaalofa, he fakamonuina a lautolu ne talia fiafia e tau foakiaga mua ue atu haana. (Roma 2:4) Ha ko e tau fekafekau ha Iehova, kua lata ia tautolu ke mautali ke talahau e tala mitaki ke he puhala kua latatonu mo e Atua fakaalofa noa ha tautolu he tau magaaho takitaha ka fakamatala a tautolu. (2 Kori. 5:20, 21; 6:3-6) Ko e mena ia, kua lata ia tautolu ke fakatumau e aga atihake ke he tau tagata he fonua ha tautolu. Ko e heigoa ka lagomatai a tautolu ke fehagai mo e paleko nei?
15. (a) Ko e heigoa e mena ne tala age e Iesu ke he tau aposetolo haana ke taute ka fakaheu he tau tagata e fekau? (e) Ko e heigoa ka lagomatai a tautolu ke hagaaki ke kumi a lautolu kua lata?
15 Ne tala age a Iesu ke he tau tutaki haana ke nakai molea e tupetupe ka fakaheu he falu e fekau ka kua latatonu ke hagaaki ke kumi a lautolu ne kua lata. (Totou Mataio 10:11-15.) He fakatoka e tau foliaga ikiiki ti kautū ki ai ka lagomatai a lautolu ke taute e mena nei. Ne fakatai he taha matakainaga taane a ia ke he tagata kumikumi auro. Ko e foliaga haana, “Kua amanaki lahi au ke moua e auro he taha magaaho he aho nei.” Ko e foliaga he taha matakainaga taane “ke feleveia mo e taha tagata ne fiafia he tau faahi tapu takitaha mo e liu atu he tau aho gahoa ke feaki e fiafia ia. Ne lali eketaha e falu tagata fakailoa ke totou taha e kupu tohi ke he tagata he kaina ka maeke. Ko e heigoa e foliaga mooli ka fakatoka e koe ma haau?
16. Ko e heigoa e tau kakano kua ha ha ia tautolu ke fakatumau e fakamatala?
16 Ko e kautūaga he gahua he taha fale mo e taha fale kua nakai fakavē katoatoa ke he taliaaga he tau tagata he fonua. Mooli, kua lahi e mena ne taute e gahua fakamatala ke he fakamouiaga ha lautolu ne loto fakamooli, ka kua aoga foki ke he falu kakano. Kua foaki mai he fekafekauaga faka-Kerisiano e magaaho ki a tautolu ke fakatātā e fakaalofa ha tautolu ki a Iehova. (1 Ioa. 5:3) Kua fakamalolō ki a tautolu ke kalo mai he fakamaligi toto. (Gahua 20:26, 27) Kua hataki ki a lautolu ne nakai mahani Atua kua ‘hoko mai e magaaho he fakafiliaga he Atua.’ (Fakakite. 14:6, 7) Mua ue atu ai, he puhala he fakamatala e tala mitaki kua fakaheke e higoa a Iehova ke he lalolagi katoa. (Sala. 113:3) Ti ko e fanogonogo po ke nakai fanogonogo e tau tagata, kua lata ia tautolu ke tukuogo atu e fekau he Kautu. Mooli, ko e tau laliaga oti ha tautolu ke fakailoa e tala mitaki kua fulufuluola ke he fofoga a Iehova.—Roma 10:13-15.
17. Ko e heigoa ka nakai leva ti fakaohooho e tau tagata ke mailoga?
17 Pete ne tokologa he vahā nei kua fakaheu e gahua fakamatala ha tautolu, to nakai leva ti kitia ai e lautolu e maamaaga kua kehe. (Mata. 24:37-39) Ne fakamafana e Iehova ki a Esekielu, ka fakamooli e tau fakafiliaga ne fakailoa e ia, ko e magafaoa fakafualoto ha Isaraela to “iloa ai e lautolu ha ha ia lautolu e perofeta.” (Eseki. 2:5) Pihia foki, ka fakahoko he Atua e tau fakafiliaga haana ke he fakatokaaga nei, to fakaohooho e tau tagata ke mailoga e fekau ne fakamatala he Tau Fakamoli a Iehova he tau toloaga mo e mai he taha fale mo e taha fale ko e mena puna mai he Atua mooli tokotaha, ko Iehova, ti ko e Tau Fakamoli ko e tau hukui haana haia. Ko e kotofaaga lilifu mooli ne moua e tautolu ke fua e higoa haana mo e fakapuloa e fekau he tau magaaho uho lahi nei! He lagomatai Haana, kia fakatumau a tautolu ke fehagai mo e tau paleko he gahua he taha fale mo e taha fale.
To Tali Fēfē e Koe?
• Maeke fēfē a tautolu ke fakamalolō ke fakamatala?
• Ko e heigoa ka lagomatai a tautolu ke kamata e tau fakatutalaaga Tohi Tapu he gahua he taha fale mo e taha fale?
• Fakakite fēfē e tautolu e fiafia mooli ke he falu?
• Ko e heigoa ka lagomatai a tautolu ke fakatumau e aga atihake ke he tau tagata ha tautolu he fonua?
[Puha/Fakatino he lau 9]
Taha Puhala ke Kamata e Tau Fakatutalaaga Faka-Tohi Tapu
Ke kamata:
◼ Ka oti e fakafeleveia e koe e tagata he kaina, maeke ia koe ke age e tuleke ki a ia mo e pehē, “Ko e kakano he aahi mai haaku he aho nei ke talahau e manatu atihake ke he tala nei.”
◼ Po ke maeke ia koe ke age e tuleke ti pehē, “Aahi fakakū mai au he aho nei ha kua fiafia au ke iloa e manatu haau ke he tala nei.”
Ka talia e tuleke:
◼ He fakamanou fakakū, talahau e hūhū fakalagalaga mukamuka ne fakavē ke he mataulu he tuleke.
◼ Fanogonogo fakamitaki, he lali ke maama e tau manatu he tagata he kaina. Fakaaue fakamitaki ke he tau talahauaga haana.
Ke matutaki e fakatutalaaga:
◼ Totou mo e fakatutala taha po ke loga e tau kupu tohi, hikihiki e fakataitaiaga haau ke he fiafia mo e tau manako he tagata.
◼ Ka kitia e fiafia, foaki e tohi mo e fakatātā e fakaakoaga Tohi Tapu ka maeke. Fakatoka ke liu atu.