“Vagahau e Kupu he Atua mo e Fakamalolo”
‘Kua puke a lautolu oti ke he agaga tapu, kua vagahau e kupu he Atua mo e fakamalolo.’—GAHUA 4:31.
1, 2. Ko e ha kua lata ke eketaha a tautolu ke lauia mitaki ke he gahua he fonua?
TOLU e aho to mate a Iesu, ne tala age a ia ke he tau tutaki haana: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” Ato hake a ia ke he lagi, ne poaki a Iesu ne liu tu mai ke he tau tutaki haana ke ‘eke e tau motu oti kana mo tutaki, ti fakaako atu kia lautolu ke omaoma ke he tau mena oti ne tala age e ia kia lautolu.’ Ne mavehe a ia ki a lautolu to fakalataha a ia mo lautolu “ke he tau aho oti, ato hoko ni ke he fakaotiaga he lalolagi.”—Mata. 24:14; 26:1, 2; 28:19, 20.
2 Ha ko e Tau Fakamoli a Iehova, kua malolō lahi a tautolu he gahua ne kamata he senetenari fakamua. Nakai fai gahua ne tatai e aoga mo e gahua fakamomoui he fakamatala e Kautu mo e taute tutaki. Kua aoga mooli mogoia ke lauia mitaki a tautolu ke he gahua he fonua ha tautolu! He vala tala nei, to kitia e tautolu e puhala ne takitaki he agaaga tapu ke lagomatai a tautolu ke vagahau fakamalolo ka fakalataha ke he gahua he fonua. To fakakite he tau vala tala ua ka mumui mai e puhala ka takitaki he agaaga a Iehova a tautolu ke fakaako mo e fakailoilo mo e fakamatala tumau.
Lata ia Tautolu ke Moua e Fakamalolo
3. Ko e ha e fai vala ke he gahua fakamatala he Kautu kua lata mo e fakamalolo?
3 Ko e gahua fakapuloa he Kautu ne foaki mai he Atua ki a tautolu ko e kotofaaga lilifu ue atu. Pete ia, kua nakai noa mo e tau paleko. He talia fiafia he falu e tala mitaki he Kautu he Atua, tokologa ne talitonu ke tuga a lautolu ne momoui he vahā ha Noa. “Ne nakai [“omaoma,” NW] e lautolu ato hoko mai e fakapuke, mo e uta kehe a lautolu oti,” he talahau e Iesu. (Mata. 24:38, 39) Ti ha ha ai e tau tagata va po ke totoko ki a tautolu. (2 Pete. 3:3) Liga totoko mai ia lautolu ne pule, mai he tau kapitiga aoga po ke gahuaaga, po ke tau tagata tata foki he magafaoa. Lafi ke he mena nei ko e tau lolelole fakatagata ha tautolu, tuga e mahani mā mo e matakutaku neke fakavihia. Ko e tau mena kehekehe ka taute ai ke uka a tautolu ke fakagahua e ‘malolo, [po ke, atāina] he vagahau’ e kupu he Atua mo e “fakamalolo.” (Efeso 6:19, 20) Ko e fakamanavalahi ke vagahau e kupu he Atua ka lata mo e fakamalolo. Ko e heigoa ka lagomatai a tautolu ke moua ai?
4. (a) Ko e heigoa e fakamalolo? (e) Maeke fēfē e aposetolo ko Paulo ke fakamalolo ke vagahau ke he tau Tesalonia?
4 Ko e kupu Heleni ne fakaliliu “fakamalolo” kua kakano “vagahau fakahako, fakatonu, fakamahino.” Kua fakamaama he manatu ia e “loto toa, mauokafua, . . . nakai matakutaku.” Nakai kakano e fakamalolo ko e pao ke he mata po ke hemu. (Kolo. 4:6) He fakamalolo, kua manako foki a tautolu ke nonofo mafola mo e tau tagata oti kana. (Roma 12:18) Lafi ki ai, he fakamatala e tautolu e tala mitaki he Kautu he Atua, kua lata ia tautolu ke fakatumau e lagotatai he fakamalolo mo e fakailoilo ke nakai fakaita pauaki e tautolu e falu. Mooli, kua latatonu ke fakamalolo ke he tau mahani ne uka ke feaki. Ko e vahega fakamalolo pehēnei kua nakai hau i loto po ke falanaki ni ke he tagata. He mole e “fakakeleaina i Filipi” e aposetolo ko Paulo mo e tau hoa haana, ne “fakamalolo” fēfē a lautolu ke vagahau ki a lautolu i Tesalonia? “Ha ko e Atua ha tautolu,” he tohi e Paulo. (Totou 1 Tesalonia 2:2.) Maeke ia Iehova ko e Atua ke utakehe e tau matakutaku ha tautolu mo e foaki ki a tautolu e fakamalolo pihia.
5. Foaki fēfē e Iehova e fakamalolo ki a Peteru, Ioane, mo e falu tutaki haana?
5 He magaaho ne paleko he “tau iki [he tau tagata], mo e tau patu, mo e tau tohikupu,” ne pehē e aposetolo ko Peteru mo Ioane: “Po ke tonu nakai ki mua he Atua, ke fanogonogo a maua kia mutolu ka e nakai fanogonogo a maua ke he Atua, ati fifili a a mutolu. Ha kua nakai maeke ke fakamamate a maua ke he tau mena ne kitia e maua, mo e fanogonogo a maua ki ai.” He nakai liogi ke he Atua ke fakaoti e favale, ne olelalo a laua mo e tau matakainaga, he pehē: “Kia kitekite a [Iehova] ke he fakamatakutaku mai ha lautolu; mo e foaki mai e koe ke he hau a tau fekafekau, kia talahau atu e lautolu hau a kupu mo e fakamalolo ni.” (Gahua 4:5, 19, 20, 29) Tali atu fēfē a Iehova ke he tau ole ha laua? (Totou Gahua 4:31.) Ne lagomatai e Iehova a laua ke fakamalolo ha ko e puhala he agaaga haana. Maeke e agaaga he Atua ke taute pihia foki ma tautolu. Maeke fēfē mogoia ia tautolu ke moua e agaaga he Atua mo e takitaki ai ke he gahua he fonua ha tautolu?
Moua e Fakamalolo
6, 7. Ko e heigoa e puhala tonu lahi ke moua e agaaga tapu he Atua? Foaki e tau fakataiaga.
6 Ko e puhala tonu lahi ke moua e agaaga tapu he Atua ko e ole ke moua ai. Ne tala age a Iesu ke he tau tagata fanogonogo haana: “Ko mutolu ne mahani kelea, kaeke kua iloa e mutolu ke uta e tau mena mitaki mo e tau fanau ha mutolu; ka e nakai kia mua e Matua ha mutolu ha ha he lagi ke foaki mai e [a]gaga [t]apu kia lautolu ka ole atu ai kia ia?” (Luka 11:13) Mooli, kua lata ke liogi tumau a tautolu ma e agaaga tapu. He falu vala pauaki he gahua he fonua—ko e fakamatala he puhalatū, fakamatala he tau magaaho noa, po ke fakamatala he tau matakavi pisinisi—kua fakahopoate a tautolu, maeke ia tautolu ke liogi ki a Iehova ma e agaaga haana mo e ole ki a ia ke lagomatai a tautolu ke moua e fakamalolo kua lata.—1 Tesa. 5:17.
7 Kua taute pihia he fifine Kerisiano ne higoa ko Rosa.a He taha aho he gahuaaga ha Rosa, ko e faiaoga ne gahua mo ia ne totou e hokotaki mai he taha aoga hagaao ke he taute fakakelea he tau tama. Ne tupetupe lahi e faiaoga ke he mena ne totou e ia ti pehē a ia, “Ko e heigoa e mena kua hoko e lalolagi nei ki ai?” Ne nakai fakatō noa e Rosa e magaaho ia ke fakamatala. Ko e heigoa ne taute e ia ke moua e malolō ke vagahau hake? “Ne liogi au ki a Iehova mo e ole ke he agaaga haana ke lagomatai au,” he ui e Rosa. Ati maeke a ia ke fakamatala fakalaulahi ai mo e fakatoka ke liu aahi atu. Manamanatu foki ke he mena ne tupu ke he tama fifine lima tau ne higoa ko Milane, ne nofo i New York City. Pehē a Milane: “To fano au he aoga, ne liogi tumau au mo mami ki a Iehova.” Ko e heigoa ne liogi a laua ke moua? Ko e fakamalolō ma Milane ke mauokafua mo e vagahau hake hagaao ke he Atua haana! “Ne lagomatai he mena nei a Milane ke fakamaama e tuaga haana ke he tau aho fanau mo e tau aho okioki mo e fakamamao mai he fai vala i ai ka fakamanatu e tau magaaho pihia,” he talahau he matua fifine haana. Nakai kia fakakite he tau fakafifitakiaga nei ka hokotia ke he fakamalolo, kua gahuahua e liogi?
8. Ko e heigoa kua maeke ke fakaako e tautolu mai he perofeta ko Ieremia ke moua e fakamalolō?
8 Manamanatu foki ke he lagomataiaga ne moua he perofeta ko Ieremia ke fakamalolō. He kotofa e Iehova a ia ke eke mo perofeta ke he tau motu, ne tali e Ieremia: “Nakai iloa e au ke vagahau, ha ko e tama tote au.” (Iere. 1:4-6) Fai magaaho mogoia, ha ko e fakatumau mo e fakamakamaka he gahua fakamatala haana ne tokologa ne onoono ki a ia ko e tagata vagahau he malaia. (Iere. 38:4) Molea e 65 e tau, ne fakailoa fakamalolō e ia e tau fakafiliaga a Iehova. Ne talahaua lahi a ia i Isaraela he fakamatala nakai matakutaku mo e malolō lahi a ia ti kavi ke he 600 tau he magaaho fakamui he vagahau fakamalolo a Iesu, ne manatu e falu kua liu tuai a Ieremia moui. (Mata. 16:13, 14) Kautū fēfē e perofeta ko Ieremia ne fakauaua fakamua ke he mahani mā haana? Pehē a ia: “Ha i ai ke he haku loto [e kupu he Atua] e afi kaka kua puipui ai ke he haku a tau hui motua, ti oti e manava haku he fakauka.” (Iere. 20:9) E, ne gahua malolō e kupu a Iehova ia Ieremia mo e fakalagalaga a ia ke vagahau.
9. Ko e ha ne maeke e kupu he Atua ke lauia a tautolu tuga ne lauia a Ieremia?
9 He tohi he aposetolo ko Paulo ke he tau Heperu, ne tohia e ia: “Ko e kupu he Atua kua moui ia, mo e gahua malolo, kua mua foki hana matila ke he tau pelu oti kana kua matila fakafahiua, kua tuina foki ato vevehe tuai ai e loto mo e agaga, ko e tau fatia mo e tau uho hui, kua fakafili foki e tau manatu mo e tau fakafiliaga he tau loto.” (Hepe. 4:12) Ko e fekau, po ke kupu he Atua kua maeke ke lauia a tautolu ke he puhala ne lauia a Ieremia. Manatu pete ko e tau tagata taane ne tohia e Tohi Tapu, kua nakai tuku fakalataha he iloilo he tagata, ha kua omoomoi ai he Atua. Ia 2 Peteru 1:21, kua totou e tautolu: “Ko e mena nakai ko e loto he tau tagata ne tuku mai ai e tau perofetaaga i tuai, ka ko e tau tagata tapu he Atua ne vagavagahau mai he omoi a lautolu he [a]gaga [t]apu.” Ka fai magaaho a tautolu ke taute e fakaako kakano lahi ni he tagata ke he Tohi Tapu, kua puke e tau manamanatuaga ha tautolu ke he fekau omoomoi he agaaga tapu. (Totou 1 Korinito 2:10.) Ko e fekau pihia kua eke ke ‘tuga e afi kaka’ i loto ha tautolu, ti nakai maeke ia tautolu ke taofi ni ki a tautolu.
10, 11. (a) Ko e heigoa kua lata mooli ke he tau puhala fakaako ha tautolu ka manako a tautolu ke moua e fakamalolo ke vagahau? (e) Talahau taha e lakaaga kua amanaki a koe ke taute ke fakatupu ki mua e tuaga he fakaako fakatagata haau.
10 Ma e fakaako fakatagata he Tohi Tapu ke gahua malolō ia tautolu, kua lata ke taute ai he puhala ke hokotia e fekau he Tohi Tapu ke he tau fatuakiloto ha tautolu, ke lauia e tau loto ha tautolu. Ma e fakatai, ne age ke he perofeta ko Esekielu e fakakiteaga ne tala age ki a ia ke kai e tohi vakai ne toka ai e fekau malolō ke fakailoa ke he tau tagata loto maō. Ne lata ia Esekielu ke manamanatu fakahokulo katoatoa ke he fekau mo e fakagahua ai. He taute pihia to fiafia e fakailoa atu he fekau—tuga e humelie he meli.—Totou Esekielu 2:8–3:4, 7-9.
11 Ko tautolu he tuaga tuga ha Esekielu. He mogonei, tokologa ne nakai manako ke fanogonogo ke he mena ne talahau he Tohi Tapu. Ke maeke ia tautolu ke fakamanavalahi he vagahau e kupu he Atua, kua aoga lahi ke fakaako e tau Tohiaga Tapu he puhala kua fakaatā a tautolu ke talitonu katoatoa e fekau i ai. He taute tumau—nakai taute taha magaaho, tonoa taha magaaho—kua lata ke kitia ke he tau puhala fakaako ha tautolu. Kua lata e manako ha tautolu ke tuga he salamo ne lologo: “Kia mitaki foki kia koe e tau kupu he haku gutu, mo e tau manamanatu he haku loto, Iehova na e, ko e haku a maka tumau mo e haku a lukutoto.” (Sala. 19:14) Kua aoga lahi mooli ke fakaatā e tautolu e magaaho ke manamanatu fakahokulo ke he mena ne totou e tautolu, ke hokotia hifo muatua e tau kupu mooli he Tohi Tapu ke he tau loto ha tautolu! Mooli, kua lata ia tautolu ke eketaha ke tupu ki mua e tuaga he fakaako fakatagata ha tautolu.b
12. Ko e ha e tau feleveiaaga Kerisiano kua lagomatai a tautolu ke takitaki he agaaga tapu?
12 Taha puhala ke aoga mai he agaaga tapu a Iehova ke ‘manatu e taha ke he taha ke fakalagalaga ai e fakaalofa mo e tau gahua mitaki; aua neke tiaki e fakapotopotoaga ha tautolu.’ (Hepe. 10:24, 25) He eketaha a tautolu ke fakalataha tumau ke he tau feleveiaaga Kerisiano, fanogonogo fakamitaki, mo e fakagahua e tau mena ne fakaako e tautolu ko e tau puhala mitaki ke takitaki he agaaga. Mua atu, nakai kia ko e agaaga a Iehova hane foaki e takitakiaga puhala he fakapotopotoaga?—Totou Fakakiteaga 3:6.
Tau Fua Mitaki he Moua e Fakamalolo
13. Ko e heigoa ka fakaako e tautolu mai he tau Kerisiano he senetenari fakamua ne taute e gahua fakamatala?
13 Ko e agaaga tapu ko e malolō mua ue atu he lagi mo e lalolagi katoatoa, ti maeke ke fakamalolō e tau tagata ke taute e finagalo a Iehova. He omoomoi he agaaga tapu, ne taute he tau Kerisiano he senetenari fakamua e gahua fakamatala lahi mahaki. Ne fakamatala e lautolu e tala mitaki “ke he tau tagata oti ke he lalolagi.” (Kolo. 1:23) Ka manamanatu a tautolu kua laulahi ia lautolu ne ‘nakai ako mo e goagoa,’ ti maaliali ai kua fakalagalaga he malolō ne mua atu a lautolu.—Gahua 4:13.
14. Ko e heigoa ka lagomatai a tautolu ke “puke he agaaga”?
14 He momoui ke he puhala kua fakaatā he agaaga tapu ke takitaki e tau momoui ha tautolu ka fakalagalaga foki a tautolu ke fakamalolo he taute e gahua he fonua ha tautolu. Ko e tau fua mitaki ne moua mai he liogi tumau ma e agaaga, taute fakamakai e fakaako fakatagata ne kakano lahi, manamanatu fakahokulo ke he tau mena ne totou e tautolu ke he liogi, mo e fakalataha tumau ke he tau feleveiaaga Kerisiano ka lagomatai a tautolu ke [“puke he agaaga,” NW]. (Roma 12:11) Ha ha i ai kua “hau foki ki Efeso e taha tagata Iutaia ko Apolo e higoa, ko Alesania ne fanau ai, ko e tagata vagahau pulotu,” pehē e Tohi Tapu: “Kua [“puke he agaaga,” NW], kua vagahau atu ai a ia, mo e fakaako fakamakutu atu a ia ke he tau kupu he Iki [Iesu].” (Gahua 18:24, 25) He “puke he agaaga” maeke ia tautolu ke fakakite e fakamalolo lahi mahaki he gahua ha tautolu ke he taha fale ke he taha fale mo e ka fakamatala he tau magaaho noa.—Roma 12:11, NW.
15. Aoga fēfē ki a tautolu e vagahau mo e tupu ki mua he fakamalolo?
15 He tupu lahi e fakamalolo ke fakamatala kua lauia mitaki a tautolu. Kua holo ki mua e aga ha tautolu ha kua loto fakaaue lahi a tautolu ke he aoga mo e fua mitaki he tau gahua ha tautolu. Kua hakahakau lahi a tautolu ha kua moua e olioli lahi ka lauia mitaki e gahua he fonua ha tautolu. Kua mauokafua e fakamakutu ha tautolu ha kua mataala lahi ke he mafiti he gahua fakamatala.
16. Ko e heigoa kua lata ke taute e tautolu kaeke kua galo e fakamakutu ha tautolu ke he gahua he fonua?
16 Ka e kua ka galo e fakamakutu ha tautolu ke he gahua he fonua po ke nakai hakahakau ai tuga fakamua? Ti lata ke kumikumi fakamooli hifo ke he tagata ni. Ne tohi e Paulo: “Kia kamatamata e mutolu a mutolu, po kua ha ha i ai a mutolu ke he tua; kia kumikumi hifo a mutolu kia mutolu.” (2 Kori. 13:5) Hūhū ki a koe ni: ‘Kua puke agaia nakai au he agaaga? Liogi nakai au ki a Iehova ma e agaaga haana? Fakakite nakai he tau liogi haaku kua falanaki au ki a ia ke taute e finagalo haana? Ha ha i ai nakai ha kupu fakaaue ke lata mo e gahua he fonua ne tuku mai ki a tautolu? Fēfē e tau aga fakaako fakatagata haaku? Lahi fēfē e magaaho ne fakaaoga e au ke manamanatu fakahokulo ke he mena ne totou mo e logona e au? Lahi fēfē e putoia haaku ke he tau feleveiaaga he fakapotopotoaga?’ He manamanatu ke he tau hūhū pehēnei ka lagomatai a koe ke kitia e tau faahi ne lolelole mo e fakahako ai.
Fakaatā e Agaaga he Atua ke Fakamalolo a Koe
17, 18. (a) Lahi atu fēfē e gahua fakamatala he mogonei? (e) Fakakite fēfē e tautolu e ‘fakamalolo lahi ni’ he fakapuloa e tala mitaki he Kautu he Atua?
17 Ne tala age a Iesu ne fakaliu tu mai ke he tau tutaki haana: “To moua e mutolu e malolo, ka haele hifo e [a]gaga [t]apu ki luga ia mutolu; to eke foki a mutolu mo tau talahau haku ki Ierusalema, mo Iutaia oti ni, mo Samaria, ke hoko ni ke he fakaotiaga he lalolagi.” (Gahua 1:8) Ko e gahua ne kamata he magahala ia kua taute fakalaulahi he vahā nei. Molea e fitu e miliona he Tau Fakamoli a Iehova hane fakapuloa e fekau he Kautu ke he molea e 230 e motu, fakaaoga ai teitei 1.5 e piliona tulā he tau ke he gahua he fonua. Ko e fiafia ha ia ke fakamakutu ke he gahua nei ka nakai liu ke taute foki!
18 Tuga he senetenari fakamua, ko e gahua fakamatala he lalolagi katoa he mogonei kua taute i lalo he takitakiaga he agaaga he Atua. Ka talia e tautolu e takitakiaga he agaaga, to fakakite e tautolu e ‘fakamalolo lahi ni’ he gahua he fonua ha tautolu. (Gahua 28:31) Ko e mena ia, kia takitaki he agaaga a tautolu he fakapuloa e tala mitaki he Kautu he Atua!
[Tau Matahui Tala]
a Hiki tuai falu higoa.
b Ke lahi e mena ka moua mai e tautolu he totou e Tohi Tapu mo e fakaako fakatagata, kikite e tohi Benefit From Theocratic Ministry School Education, tau veveheaga ne mataulu “Fakamahani a Koe ke Totou” mo e “Taui Mitaki e Kumikumiaga,” lau 21-32.
Ko e Heigoa ne Ako e Koe?
• Ko e ha kua lata ia tautolu ke fakamalolō he vagahau e kupu he Atua?
• Ko e heigoa ne lagomatai e tau tutaki fakamua atu ke vagahau mo e fakamalolō?
• Liga maeke fēfē a tautolu ke moua e fakamalolō?
• Maeke fēfē he moua e fakamalolō ke aoga ki a tautolu?
[Fakatino he lau 7]
Lagomatai fēfē he tau matua e tau tama ha lautolu ke moua e fakamalolo?
[Tau Fakatino he lau 8]
Maeke e liogi kū ke lagomatai a koe ke fakamalolo he gahua ke he fonua