Fakatumau ke Vagahau Fakamalolo e Kupu he Atua
1 Ko e tau fekafekau Kerisiano, kua iloa e tautolu to nakai talia oti e fakamatala atu ha tautolu. (Mata. 10:14) Pete ia, nakai fakaata e tautolu e tali kelea he falu ke fakatupu a tautolu ke tautaofi e fakailoa he tala mitaki. (Fakatai 29:25) Ko e heigoa ne lagomatai a tautolu ke fakatumau e vagahau e kupu he Atua mo e fakamalolo?
2 Ne loto fakaaue e aposetolo ko Paulo ke he “mitaki mua ue atu he iloa a Keriso Iesu.” Ne omoi he mena nei a ia ke vagahau “katoa mo e maliali ni.” (Filipi 3:8; 1 Tesa. 1:5) Pete kua onoono falu ke he fekau ne fakamatala e ia kua lolelole mo e goagoa, ne iloa e ia ko e “mana he Atua ia ke momoui ai a lautolu oti kana kua tua.” (Roma 1:16) Ko e mena ia, he fehagai foki ke he tau totokoaga, ne fakatumau a ia ke ‘vagahau fakamalolo atu ke he kupu ha Iehova.’—Gahua 14:1-7; 20:18-21, 24.
3 Ha Tautolu a Punaaga he Malolo: Nakai ke he malolo hana hokoia ne maeke ia Paulo ke foaki e fakamatala fakamalolo. He vagahau hana ni mo e ki a Sila, ne tohi e Paulo: “Pete ni he fakamamahi fakamua a mautolu, mo e fakakeleaina i Filipi, . . . ka e fakamalolo a mautolu ha ko e Atua ha tautolu ke vagavagahau atu kia mutolu e vagahau mitaki he Atua mo e tau lahi.” (1 Tesa. 2:2; Gahua 16:12, 37) Lafi ki ai, he nofo he fale pouli i Roma, ne ole a Paulo ke liogi e falu ke lata mo ia ke maeke ia ia ke liga fakatumau e fakailoa e tala mitaki he ‘fakamalolo ke fakamatala atu, tuga e mena kua lata ia ia.’ (Efeso 6:18-20) He falanaki ki a Iehova ka e nakai ki a ia ni, ne maeke ia Paulo ke fakatumau ke vagahau e kupu he Atua mo e fakamalolo.—2 Kori. 4:7; Filipi 4:13.
4 Ko e mena taha ia foki he vaha nei. Ko e matakainaga tane ne uka lahi ke fakakite a ia ko e taha he Tau Fakamoli a Iehova he gahuaaga hana mo e ke fakamatala nakai mautali ne liogi hagaao ke he mena ia ti kamata agataha ke fakamatala. Ne fakaheu he kapitiga gahua he magaaho fakamua e tau laliaga hana, ka e he talahau e amaamanakiaga he liu tu mai ne takitaki ke he fakaakoaga Tohi Tapu. Tali mai ai, ne fakaaoga he matakainaga e tau magaaho oti ke fakamatala atu. He matakavi ne gahua a ia mogonei, kua lagomatai e ia 34 e tagata ke papatiso ke he magahala he 14 e tau. Maeke ia tautolu ke mauokafua to fakamalolo pihia e Iehova a tautolu he ‘fakatumau ke talahau atu e kupu hana mo e fakamalolo ni.’—Gahua 4:29.