Ko e Mena ne Ako e Tautolu Mai ia Iesu

Hagaao ke he Atua Mooli

Na fai higoa nakai e Atua?

Ne fakaako e Iesu na fai higoa e Atua. Ne pehē a Iesu: “Hanai, kia liogi pehe a mutolu, Ha mautolu a Matua na e, ha ha he lagi, kia tapu hau a higoa.” (Mataio 6:9) Ne fakakite he Tohi Tapu ko e higoa he Atua ko Iehova. (Salamo 83:18) He tala hagaao ke he tau tutaki haana, ne pehē a Iesu he liogi ke he Matua haana: “Ne fakailoa atu foki e au hau a higoa kia lautolu.”—Ioane 17:26.

Ko hai a Iehova?

Ne ui e Iesu a Iehova “ko e Atua moli tokotaha ni” ha ko Iehova ko e Tufuga. (Ioane 17:3) Ne pehē a Iesu: “Nakai kia totou e mutolu, ko ia ne eke e tagata ke he kamataaga, ne eke e ia a laua ko e tane mo e fifine.” (Mataio 19:4) Ne pehē foki a Iesu: “Ko e Atua ko e [A]gaga ni a ia.” (Ioane 4:24) Ti nakai maeke a tautolu ke kitia e Atua.—Esoto 33:17-20.

Ko e heigoa e manako he Atua ma tautolu?

He hūhū taha tagata ki a Iesu ko e heigoa e poakiaga ne mua, ne tali a Iesu: “Mua hanai ke he tau poaki oti, Kia fanogonogo a koe ma Isaraela na e; ko [Iehova] ha tautolu a Atua, ko e Iki tokotaha a ia. Kia fakaalofa atu foki a koe ke he Iki hāu a Atua mo e hāu a loto katoa, mo e hāu a agaga katoa, mo e hāu a manatu katoa, mo e hāu a malolo katoa [k]o e poaki haia kua mua. Ti pihia foki a ia ne ua aki, hanai, Kia fakaalofa atu a koe ke he tagata ne katofia a mua, kia tuga a koe kia koe ni.”—Mareko 12:28-31.

Fakakite fēfē e tautolu kua fakaalofa a tautolu ke he Atua?

Ne pehē a Iesu: “Kua fakaalofa au ke he Matua.” Fakakite fēfē e ia e fakaalofa haana? “Tuga e poaki mai foki he Matua kia au,” he talahau e ia ti “pihia he eke e au.” (Ioane 14:31) Ne talahau foki e ia: “Ko e mena eke mau e au e tau mena kua mitaki kia ia.” (Ioane 8:29) Maeke ia tautolu ke fakafiafia e Atua he ako hagaao ki a ia. He liogi ma e tau tutaki haana, ne pehē a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni.”—Ioane 17:3; 1 Timoteo 2:4.

Fakaako fēfē a tautolu hagaao ke he Atua?

Taha puhala ke iloa e Atua he kitekite ke he tau mena ne eke e ia. Ke fakatai ki ai, ne pehē a Iesu: “Kia kitekite a mutolu ke he tau manu lele; nakai gana saito e lautolu po ke helehele saito, po ke tanaki ke he tau fale saito, ka e fagai ni a lautolu he Matua ha mutolu ha ha he lagi. Ka e nakai kia ko e mena mua ha mutolu a mitaki kia lautolu.” Ko e kakano ha Iesu? Kua nakai lata ia tautolu ke fakaatā e fakaatukehe ke he tau manako fakatino ke fakaoti e fekafekauaga ha tautolu ke he Atua.—Mataio 6:26-33.

Ko e puhala mitaki ue atu ke iloa a Iehova ko e fakaako haana Kupu, ko e Tohi Tapu. Ne ui e Iesu e tau Tohiaga Tapu ko e “kupu he Atua.” (Luka 8:21) Ne pehē a Iesu ke he Atua: “Ko e hau a kupu ko e kupu moli haia.”—Ioane 17:17; 2 Peteru 1:20, 21.

Ne lagomatai e Iesu e tau tagata ke ako e kupu mooli hagaao ki a Iehova. Hagaao ki a Iesu, ne pehē taha he tau tutaki haana: “Nakai kia velagia ha taua a tau loto ki loto ia taua he vagavagahau a ia mo taua ke he puhala, he fakamatala mai foki e ia e tau Tohi kia taua?” (Luka 24:32) Ke ako hagaao ke he Atua, kua lata ia tautolu ke fakatokolalo, mo e fakamakai ke fakaako. Ne pehē a Iesu: “Ka nakai mafoki a mutolu ti eke ni mo tau tama ikiiki, ti nakai ni huhu atu a mutolu ke he kautu he lagi.”—Mataio 18:3.

Ko e ha ne tamai he iloilo ke he Atua e fiafia?

Ne fakamakona he Atua e tau manako ha tautolu ke maama e kakano he moui. Ne pehē a Iesu: “Fiafia a lautolu ne manamanatu ke he tau mena fakaagaaga kua lata ma lautolu.” (Mataio 5:3, NW) Ne fakaako e Iehova ki a tautolu e puhala mitaki ue atu he moui. “Ka e mua e monuina [po ke, fiafia] he tau tagata ka fanogonogo ke he kupu he Atua mo e omaoma ki ai,” he talahau e Iesu.—Luka 11:28; Isaia 11:9.

Ma e falu vala tala foki, kikite veveheaga 1 he tohi Ko e Heigoa ne Fakaako Moli he Tohi Tapu?a

[Matahui Tala]

[Fakatino he lau 26]

“Ne fakailoa atu foki e au hau a higoa kia lautolu.”—Ioane 17:26

[Tau Fakatino he lau 26, 27]

Maeke ia tautolu ke ako ki a Iehova mai he tufugatia mo e he Tohi Tapu