Fakatatau mo e Liogi Mafanatia ha Iesu

1, 2. Ko e heigoa ne taute e Iesu he mole e fakamanatu e ia e Paseka mo e tau aposetolo haana he tau 33?

KO E magaaho afiafi pouli ia Nisana 14 he tau 33. Ko Iesu mo e tau kapitiga tata lahi haana ne fakamanatu laia e Paseka. Ko e fakamanatuaga nei kua fakamanatu ki a lautolu e puhala ne fakahao he Atua e tau Isaraela mai i Aikupito. Ka ko e tau tutaki fakamooli ha Iesu to fakahao ai ke he puhala lahi mahaki. He aho hake, to tamate he tau fī ha Iesu a ia. Ko e poa he moui mitaki katoatoa haana to taute ai ke maeke he tau tagata oti ke tokanoa mai he agahala mo e mate.​​—Hepe. 9:12-14.

² Ke kitia tonu kua nakai nimo e tautolu e mena fakaalofa lahi nei mai he Atua, ne kamata e Iesu e fakamanatuaga foou kua hukui e Paseka he tau tau takitaha. Ne uta e ia e areto nakai fakaea mo e tofitofi ai ti age ke he tau aposetolo tua fakamooli oti haana ne toko 11. Tala age a ia ki a lautolu: “Ko e haku a tino a enei, kua foaki atu ma mutolu; kia eke e mutolu e mena nai mo fakamanatuaga kia au.” Ne age foki e ia e kapiniu he uaina kula ki a lautolu ti pehē: “Ko e kapiniu nai, ko e maveheaga fou ia ke he haku a toto, kua fakamaligi ma mutolu.”​​—Luka 22:19, 20.

3. (a) Ko e heigoa e hikiaga lahi ne tupu he mole e mate ha Iesu? (e) Ko e heigoa e tau hūhū kua lata ke manamanatu a tautolu ki ai he kumikumi e tautolu e liogi ha Iesu?

³ Ko e maveheaga he Fakatufono he Atua mo e motu ha Isaraela to nakai leva ti fakaoti. To ha ha i ai e maveheaga foou ha Iehova mo e tau tutaki fakauku ha Iesu. Nakai manako a Iesu ke he tau tutaki haana ke tuga e motu ha Isaraela. Nakai kaufakalataha e tau Isaraela ke he ha lautolu a tapuakiaga ke he Atua, ti nakai fakalilifu he mena nei e higoa he Atua. (Ioane 7:45-49; Gahua 23:6-9) Manako a Iesu ke he tau tutaki haana ke gahua fakalataha ke maeke a lautolu ke fakalilifu e higoa he Atua. Ti ko e heigoa ne taute e Iesu? Ne ole a ia ke he lagomatai he haana Matua he liogi fulufuluola ne nakaila totou ia he ha tagata he mogo fakamua. (Kikite fakatino hafagi.) Ne fakamau e liogi nei ia Ioane 17:1-26. He kumikumi a tautolu ke he liogi nei, kia manamanatu a tautolu ke he tau hūhū nei: “Tali nakai he Atua e liogi ha Iesu? Gahua fakatatau nakai au ki ai?”

MENA NE MUA ATU E AOGA KI A IESU

4, 5. (a) Ko e heigoa kua fakaako e tautolu mai he vala fakamua he liogi ha Iesu? (e) Tali fēfē e Iehova e ole ne taute e Iesu ma haana ni?

⁴ Ne fakaako e Iesu e tau tutaki haana ke he loga e tau mena homo ue atu ato hoko ke he tulotopō. Ti ono hake a ia ke he lagi mo e liogi: “Ma Matua na e, kua hoko mai e aho. Tuku mai a e fakahekeaga ke he hau a Tama, kia tuku atu foki he hau a Tama e fakahekeaga kia koe. Ha ko e mena kua foaki mai e koe kia ia e pule ke he tau tagata oti kana, kia age e ia e moui tukulagi kia lautolu oti kana ne foaki mai e koe kia ia.” Lafi e ia: “Kua tuku atu e au e fakahekeaga kia koe ke he lalolagi, kua fakaoti e au e gahua ne tuku mai e koe kia au, ke eke e au. Hanai foki, ma Matua na e, kia tuku mai a e koe kia au e fakahekeaga fakalataha mo koe, ko e fakahekeaga ne toka ia taua mo koe, ka e nakala eke e lalolagi.”​​—Ioane 17:1-5.

⁵ Ne kamata e Iesu e liogi haana he talahau e tau mena ne mua atu e aoga ki a ia. Fakamua, ne liogi a ia ke fakaheke e Matua haana. Ne kamata e Iesu e liogi fakatai haana he ole ke he mena taha. (Luka 11:2) Uaaki, ne liogi a ia ma e tau manako he tau tutaki haana. Ne ole a ia “kia age e ia e moui tukulagi kia lautolu.” Fakahiku ai, ne ole a Iesu ma e taha mena ma haana ni. Ne ole a ia: “Ma Matua na e, kia tuku mai a e koe kia au e fakahekeaga fakalataha mo koe, ko e fakahekeaga ne toka ia taua mo koe, ka e nakala eke e lalolagi.” Logona e Iehova e liogi he Tama haana ti lahi atu foki e mena ne tukuage ki ai ke he mena haana ne ole. Ne “mua e higoa” ne age he Atua ki a ia ke he tau agelu.​​—Hepe. 1:4.

“KIA ILOA” E ATUA MOOLI TOKOTAHA NI

6. Ko e heigoa he tau aposetolo kua lata ke taute ke moua e moui tukulagi? Iloa fēfē e tautolu na taute he tau aposetolo e mena nei?

⁶ He liogi ha Iesu, ne talahau foki e ia e mena kua lata ke taute e tautolu ke moua e mena fakaalofa he moui tukulagi. (Totou Ioane 17:3.) Pehē a ia kua lata ia tautolu ke tumau ke “iloa” po ke, uta e iloilo he Atua mo e Keriso. Maeke fēfē a tautolu ke taute e mena nei? Fakamua, kua lata ia tautolu ke taute e tau mena oti kua maeke ke iloa lahi hagaao ki a Iehova mo e haana Tama. Uaaki, kua lata ia tautolu ke fakaaoga e mena kua fakaako e tautolu ke he tau momoui ha tautolu. Ne fitā he taute he tau aposetolo e tau mena ua nei, tuga he talahau e Iesu he liogi haana: “Ko e tau kupu ne tuku mai e koe kia au, kua tuku atu e au kia lautolu; kua talia mai foki e lautolu.” (Ioane 17:8) Ka ke moua e moui tukulagi, lata ia lautolu ke manamanatu fakahokulo tumau ke he Kupu he Atua mo e ke fakaaoga e mena ne fakaako e lautolu he tau momoui ha lautolu ke he tau aho takitaha. Taute tumau kia he tau aposetolo e mena nei ke he tau momoui katoa ha lautolu he lalolagi? Ē, taute e lautolu. Iloa e tautolu e mena nei ha kua tohia tukulagi e tau higoa takitaha ha lautolu ke he 12 e maka ne fakaveaki a Ierusalema Foou.​​—Fakakite. 21:14.

7. Ko e heigoa e kakano he “iloa” e Atua? Ko e aoga lahi he ha e iloa e Atua?

⁷ Ka manako a tautolu ke moui tukulagi, kua lata a tautolu ke fakatumau ke “iloa” e Atua. Ko e heigoa e kakano he mena nei? Ke tumau a tautolu ke fakaako fakalaulahi atu hagaao ki a ia. Ka ko e kakano he mena nei ke nakai ni iloa e tau mahani mo e finagalo haana. Lata ia tautolu ke fakaalofa hokulo ki a ia mo e kapitiga tata mo ia. Ti lata ia tautolu ke fakakite e fakaalofa ma e tau matakainaga ha tautolu. Fakamaama he Tohi Tapu: “Ko e tagata kua nakai fakaalofa, kua nakai iloa e ia e Atua.” (1 Ioa. 4:8) He iloa e Atua kua putoia foki e omaoma ki a ia. (Totou 1 Ioane 2:3-5.) Ko e lilifu lahi ke fakalataha mo lautolu ne iloa a Iehova! Ka e lata ia tautolu ke fakaeneene ke nakai galo e kapitiga uho ha tautolu mo ia, tuga ne taute e Iuta Isakariota. Ti eketaha ke fakamalolō e kapitiga ha tautolu mo Iehova. Ka taute e tautolu, to foaki mai e Iehova e mena fakaalofa homo ue atu he moui tukulagi.​​—Mata. 24:13.

“KE HE HAU A HIGOA”

8, 9. Ko e heigoa e mena ne mua e aoga ki a Iesu he nofo a ia he lalolagi? Ko e heigoa e fakaakoaga kua liga vihiatia e Iesu?

⁸ He totou e tautolu e liogi ha Iesu ia Ioane veveheaga 17, maeke ia tautolu ke kitia e fakaalofa hokulo ha Iesu ke he tau aposetolo haana ti pihia foki ki a tautolu. (Ioane 17:20) Ka ko e mena aoga lahi ki a Iesu ne nakai ko e fakamouiaga ha tautolu. He magaaho katoa ne nofo a ia he lalolagi, ko e mena aoga lahi ki a ia ko e fakaheke e higoa he Matua haana. Ma e fakatai, he fakamaama fakamua e Iesu e kakano ne hau a ia ke he lalolagi, ne totou a ia mai he tohi vakai ha Isaia: “Ha ha i luga ia au e Agaga he Iki [Iehova], ha kua fakauku e ia a au ke fakamatala e vagahau mitaki kia lautolu kua nonofogati.” Maeke a tautolu ke iloa tonu he mogo ne totou e Iesu e mena nei, ne fakaleo fakamaaliali e ia e higoa he Atua.​​—Luka 4:16-21.

⁹ Leva ato hau a Iesu ke he lalolagi, ne fakaako he tau takitaki lotu Iutaia e tau tagata ke nakai fakaaoga e higoa he Atua. Manamanatu la e lahi he vihiatia e Iesu e aga fakamotu ia. Pehē a ia ke he tau takitaki lotu ia: “Ko e higoa he haku a Matua ne hau ai au, ka e nakai talia e mutolu au; ka hau taha ke he hana higoa ni, ati talia ai e mutolu a ia.” (Ioane 5:43) Ti, fai aho ato mate a Iesu, ne liu a ia talahau e mena ne mua e aoga ki a ia he liogi e ia: “Ma Matua na e, fakaheke a ke he hau a higoa.” (Ioane 12:28) He liogi kua fakatutala e tautolu, kua maaliali foki ko e mena ne mua e aoga he moui ha Iesu ke fakaheke e higoa he haana Matua.

10, 11. (a) Fakailoa fēfē e Iesu e higoa he Matua haana? (e) Ko e ha e tau tutaki ha Iesu ne fakailoa e higoa ha Iehova?

¹⁰ Liogi e Iesu: “Kua fakakite atu e au hau a higoa ke he tau tagata ne foaki mai e koe kia au mai he lalolagi; hāu ni a lautolu, ka kua foaki mai e koe a lautolu kia au; kua oma foki e lautolu hau a kupu. Nakai nofo mau au ke he lalolagi, ka ko lautolu, ha he lalolagi ni a lautolu; ti ko e fina atu ne fai au kia koe. Ko e Matua tapu na e, kia leveki e koe a lautolu ke he hau a higoa, ko lautolu ne foaki mai e koe kia au; kia taha a lautolu tuga na taua.”​​—Ioane 17:6, 11.

¹¹ He “fakakite,” po ke fakailoa e Iesu ke he tau tutaki haana e higoa he Matua haana, ne lahi atu foki e mena ne taute e ia he nakai ni ko e fakaaoga he higoa a Iehova. Lagomatai e Iesu a lautolu ke maama ko hai a Iehova. Ne fakaako e ia a lautolu hagaao ke he tau mahani homo ue atu he Atua mo e puhala fakaalofa ne taute e ia ki a tautolu. (Esoto 34:5-7) Ko Iesu e Patuiki mogonei he lagi, ti matutaki a ia ke lagomatai e tau tutaki haana ke fakailoa e higoa ha Iehova ke he lalolagi oti. Ko e ha ne taute e gahua nei? Ke lagomatai e tokologa he tau tagata ke iloa a Iehova ato moumou e fakatokaaga kelea nei. Ti ka hoko mai e magaaho ia, to fakahao e ia e tau fekafekau fakamooli haana ti to iloa he tau tagata oti e higoa ne mua ha Iehova!​​—Eseki. 36:23.

“KIA TALIA AI HE LALOLAGI”

12. Ko e heigoa e tau mena tolu kua lata ia tautolu ke taute ke fakaoti e gahua ne kamata e Iesu?

¹² Ne poaki e Iesu ke he tau tutaki haana ke fakaoti e gahua ne kamata e ia. Ne liogi a ia: “Tuga ne fakafano mai e koe au ke he lalolagi, kua pihia foki au, he fakafano atu e au a lautolu ke he lalolagi.” Ka e iloa e Iesu kua lata a lautolu mo e lagomatai ke taute e gahua nei. He fakalataha a Iesu mo lautolu, ne gahua lahi a ia ke lagomatai e tau tutaki haana ke kautū mai he tau lolelole ha lautolu. He liogi haana, ne ole a ia ki a Iehova ke lagomatai e tau tutaki haana ke taute tolu e mena aoga. Fakamua, ne liogi a ia to nakai fai vala e tau tutaki haana he lalolagi ha Satani. Uaaki, ne liogi a ia to omaoma e tau tutaki haana ke he Kupu he Atua mo e fakatapu ai. Toluaki, ne olelalo a Iesu to kaufakalataha e tau tutaki haana, tuga he kaufakalataha a ia mo e haana a Matua. Igatia a tautolu mo e lata ke hūhū, ‘Taute nakai e au e tau mena tolu ne talahau e Iesu he liogi haana?’ Ne mauokafua a Iesu kaeke ke taute he tau tutaki haana e tau mena ia, to tokologa e tagata ka talia e fekau ha lautolu.​​—Totou Ioane 17:15-21.

13. Tali fēfē e Iehova e liogi ha Iesu he senetenari fakamua?

¹³ Ka fakaako e tautolu e tohi ha Gahua, maeke a tautolu ke kitia kua tali e Iehova e liogi ha Iesu. Ko e tau Kerisiano he senetenari fakamua ne moua mai he tau Iutaia mo e tau Tagata Motu Kehe, monuina mo e nofogati, tau tupa mo e tau iki he tau tupa. Manamanatu ke he tau feveheveheaki ka lauia a lautolu! Ka kua kaufakalataha oti a lautolu ti fakatatai he aposetolo ko Paulo a lautolu ke he tau vala kehekehe he tino he tagata mo e ko Iesu e ulu ha lautolu. (Efeso 4:15, 16) He lalolagi mavehevehe ha Satani, ko e kaufakalataha nei ne maeke ni ha ko e agaaga tapu malolō ha Iehova.​​—1 Kori. 3:5-7.

14. Tali fēfē e liogi ha Iesu he vahā ha tautolu?

¹⁴ Momoko ai, ne hiki e tau mena he mole e mamate he tau aposetolo. Ne lahi mahaki e tiaki taofiaga. Ti hufia e fakapotopotoaga he tau fakaakoaga fakavai, mo e fua mai ai e nakai kaufakalataha. (Gahua 20:29, 30) Ka e he tau 1919, ne fakatoka mai e Iesu e tau Kerisiano fakauku he pule he lotu fakavai ti fakapotopoto a lautolu he “pipi haia ke fakamaopoopo ai.” (Kolo. 3:14) Ko e heigoa e fua he ha lautolu a kaufakalataha ke he gahua fakamatala? Molea fitu e miliona tagata mai he “tau motu oti, mo e tau faoa, mo e tau tagata kehekehe, mo e tau vagahau kehekehe” kua tapuaki fakalataha mogonei ki a Iehova mo lautolu ne fakauku. (Fakakite. 7:9; Ioane 10:16) Ko e tali ofoofogia anei ke he liogi ha Iesu ki a Iehova, “kia iloa ai foki he lalolagi, ne fakafano mai e koe [Iehova] au, mo e fakaalofa mai a koe kia lautolu, tuga hau a fakaalofa mai kia au.”​​—Ioane 17:23.

KO E FAKAHIKUAGA OFOOFOGIA

15. Ko e heigoa e ole pauaki ne taute e Iesu ma e tau tutaki fakauku haana?

¹⁵ He magaaho afiafi he Nisana 14, ne age e Iesu e monuina, po ke lilifu ke he tau aposetolo haana he taute e maveheaga mo lautolu ke pule mo ia ke he haana Kautu. (Ioane 17:22; Luka 22:28-30) Ti liogi a Iesu mogonei ma lautolu ka eke mo tau tutaki fakauku haana: “Ma Matua na e, ko e haku a loto hanei kia lautolu ne foaki mai e koe kia au, kia fakalataha a lautolu mo au ke he mena ha i ai au, kia kitia e lautolu haku a monuina, ne foaki mai e koe kia au; ha ko e mena fakaalofa mai a koe kia au, ka e nakala fakave e lalolagi.” (Ioane 17:24) Kua fiafia e tau mamoe kehe ke he palepale ka moua e lautolu ne fakauku, ka e nakai mahekeheke. Fakamooli foki he mena nei ko e tau Kerisiano mooli he vahā nei kua kaufakalataha.

16, 17. (a) He fakaotiaga he liogi ha Iesu, ko e heigoa ne talahau e ia to matutaki a ia ke taute? (e) Ko e heigoa kua lata ia tautolu ke matutaki ke taute?

¹⁶ Laulahi he lalolagi ne fifili ke fakaheu kua ha ha ia Iehova e tau tagata kua kaufakalataha mo e iloa mooli a ia. Fa tupu e mena nei ha ko e tau pikopiko ne fakaako he tau takitaki lotu. Tupu foki e mena nei he vahā ha Iesu. Ti fakahiku e ia e liogi haana he tau kupu nei: “Ko e Matua tututonu na e, nakai iloa he lalolagi a koe, ka ko au ni, kua iloa e au a koe, kua iloa foki e lautolu nei, ne fakafano mai e koe au. Ne fakailoa atu foki e au hau a higoa kia lautolu, to fakailoa atu ai foki e au; kia nofo i loto kia lautolu e fakaalofa ne fakaalofa mai ai a koe kia au, ko au foki ha i loto ia lautolu.”​​—Ioane 17:25, 26.

¹⁷ Ne fakailoa mooli e Iesu e higoa he Matua haana. Ti ko e mogonei, ko e Ulu he fakapotopotoaga, ne matutaki a ia ke lagomatai a tautolu ke fakailoa e higoa mo e finagalo he Matua haana ke he falu. Kia omaoma a tautolu ke he takitakiaga ha Iesu mo e fakamatala fakamakutu mo e taute tutaki. (Mata. 28:19, 20; Gahua 10:42) Kia gahua malolō foki a tautolu ke kaufakalataha tumau ko e tau tagata he Atua. To gahua fakatatau mogoia a tautolu mo e liogi ha Iesu. To fua mai he mena nei e lilifu ke he higoa ha Iehova mo e fiafia tukulagi ha tautolu.