Ne Nakai Fakalolelole a Mareko

KO MAREKO ne tohia e taha he tau tohi fā i loto he Tohi Tapu hagaao ke he moui a Iesu. Ko e tohi kū lahi mo e mukamuka lahi ke totou. Ko hai a Mareko? Iloa nakai e ia a Iesu he manatu e koe?—a Kitekite la a tautolu ke he tau kamatamata vihi lahi ne feleveia mo Mareko mo e ako e kakano ati nakai fakalolelole a Mareko he eke mo Kerisiano.

Ne totoku fakamua e higoa ha Mareko i loto he Tohi Tapu he mole e tuku he Patuiki ko Herota Akeripa e aposetolo ko Peteru he fale puipui. He taha pō ne laveaki po ke fakatoka mai he agelu a Peteru, ti fina atu agataha a ia ke he kaina he matua fifine ha Mareko, ko Maria, ne nofo i Ierusalema. Ne fakatoka mai a Peteru he fale puipui he kavi hogofulu e tau he mole e tamate a Iesu he Paseka 33 V.N.—Gahua 12:1-5, 11-17.

Iloa nakai e koe ko e ha ne fina atu a Peteru ke he kaina ha Maria?— Liga ha kua iloa e ia e tau tagata he magafaoa ha Maria ti mailoga ne taute he tau tutaki ha Iesu e tau feleveiaaga he kaina haana. Ko e kasini ha Mareko ko Panapa kua leva e eke mo tutaki, liga tali mai he Galue he Paseka 33 V.N. Ko e fakamokoi haana he magahala ia ke he tau tutaki foou ne totoku i loto he Tohi Tapu. Ti liga fitā e iloa e Iesu a Panapa, mo e anitī haana ko Maria mo e tama taane haana ko Mareko.—Gahua 4:36, 37; Kolose 4:10.

He Evagelia haana, ne tohia e Mareko hagaao ke he pō ne tapaki a Iesu, ne ha ha i ai foki e fuata ne tapulu hokoia “hana tino” ke he ie lino. He tapaki he tau fī a Iesu, ne tohia e Mareko ne hola atu e fuata. Ko hai e fuata ia he manatu e koe?— E, liga ni ko Mareko! Ti, magaaho ne o a Iesu mo e tau aposetolo he taha vala he pō ia, ne maaliali ai kua tui fakaave e tapulu ha Mareko ti mui atu ai.—Mareko 14:51, 52.

Ne hokulo mooli e feakiaga fakaagaaga ha Mareko. Ne liga ko ia i ai he magaaho ne liligi hifo e agaaga tapu he Penetekoso 33 V.N., ti lafi tata a ia mo e tau fekafekau tua fakamooli he Atua, tuga a Peteru. Ne fakatauō foki a ia mo e kasini haana ko Panapa, ne lagomatai a Saulo ke feleveia mo Peteru liga tolu e tau he mole e tu atu a Iesu ki a Saulo he fakakiteaga. Loga e tau he mole, ne fano a Panapa ki Taso ke kumi ia Saulo i ai.—Gahua 9:1-15, 27; 11:22-26; 12:25; Kalatia 1:18, 19.

He 47 V.N., ne kua fifili a Panapa mo Saulo ke taute e gahua misionare. Ne uta e laua a Mareko, ka e he nakai iloa e kakano, ne toka e Mareko a laua ti liu ki kaina i Ierusalema. Ne ita a Saulo, ko ia ne iloa fakamui ke he higoa Roma haana, ko Paulo. Ti nakai utakehe e ia e manatu haana kua kaumahala lahi a Mareko.—Gahua 13:1-3, 9, 13.

He liliu mai he fenoga misionare ha laua, ne talahau e Paulo mo Panapa e tau kautūaga mitaki. (Gahua 14:24-28) Ke he tau mahina fakamui, ne pulega a laua ke liliu mo e ahiahi a lautolu ne liliuina foou he tau matakavi ne fakamatala a laua i ai. Ne manako a Panapa ke uta a Mareko, ka e iloa nakai e koe e manatu ha Paulo?— Ne ‘manatu a Paulo kua nakai lata’ ha kua toka e Mareko a laua he magaaho fakamua ti liu ki kaina. Ko e mena foki ne tupu mogonei ne fakamomoko mooli ki a Mareko!

Ne tupu e ita, ti he mole e “hukia lahi ai e tau loto,” ne mavehe kehekehe a Paulo mo Panapa. Ne uta e Panapa a Mareko he fano ke fakamatala i Kuperu, mo e fifili e Paulo a Sila ti liliu ahiahi e tau tutaki foou, tuga ni ne pulega tuai. Liga kua momoko mooli a Mareko he fakatupu lekua ke he vahāloto ha Paulo mo Panapa!—Gahua 15:36-41.

Ne nakai iloa e tautolu e kakano ne liu a Mareko he magaaho fakamua ki kaina. Ne liga iloa ni e ia e kakano mitaki. Ka kua mauokafua mooli a Panapa to nakai liu foki e mena ia ke tupu. Ti kua hako a ia. Ne nakai fakalolelole a Mareko! He magaaho fakamui ne gahua misionare a ia mo Peteru he matakavi mamao i Papelonia. Mai i ai, ne fakafano age e Peteru e tau manatu fakafeleveia, ti lafi: “Katoa mo e haku a tama ko Mareko.”—1 Peteru 5:13.

Ko e tata ha ia he fakafetuiaga fakaagaaga ha Peteru mo Mareko! Kua mooli foki e mena nei ka totou e tautolu e Evagelia ha Mareko. I ai ne fakakite e Mareko e maamaaga hokulo he tau mena ne kitia e Peteru. Ma e fakatai, fakatatai la e tau tala ke he afā he Tahi i Kalilaia. Ne lafi e Mareko e tau tala matafeiga ke he matakavi i loto he foulua ne mohe ai a Iesu mo e mena ne mohe ai a ia, ko e tau mena ne liga mailoga he tagata takafaga ika tuga a Peteru. He ha he totou auloa a tautolu ki ai mo e fakatatai e tau tala nei he Tohi Tapu ia Mataio 8:24; Mareko 4:37, 38; mo e Luka 8:23?

Fakamui, he tuku a Paulo he fale puipui i Roma, ne nava a ia ki a Mareko ma e lalagoaga fakamooli haana. (Kolose 4:10, 11) Mo e magaaho ne liu tuku a Paulo he fale puipui i ai, ne tohi a ia ki a Timoteo mo e ole ke tamai a Mareko, he fakamaama: “Kua aoga a ia kia au ke he gahua.” (2 Timoteo 4:11) Mooli, ne mitaki ha ia he tau gahua he fekafekauaga ne olioli e Mareko ha kua nakai fakalolelole a ia!