Iesu Keriso—Ko e Misionare Mua Ue Atu
“Ko e mena hau au ia ia ni; ko ia foki ne fakafano mai au.”—IOANE 7:29.
1, 2. Ko e heigoa e misionare, ti ko hai kua latatonu ke ui ko e Misionare mua ue atu?
KO E heigoa ne manatu e koe he magaaho ka logona e kupu “misionare”? Ne manamanatu falu ke he tau misionare ha Kerisitenitome, ne tokologa ne putoia ke he tau fakafetuiaga politika mo e tau puhala fakatupe he tau motu ne fekafekau ai a lautolu. He taha he Tau Fakamoli a Iehova kua liga manamanatu a koe ke he tau misionare ne fakafano atu he Kau Fakatufono ke fakamatala e tala mitaki ke he tau motu kehekehe he lalolagi. (Mata. 24:14) Ko e tau misionare nei ne foaki fakamakai e tau magaaho mo e tau malolō ha lautolu ke he gahua lilifu nei he lagomatai e tau tagata ke fakatata atu ki a Iehova ko e Atua mo e olioli e fakafetuiaga uho mo ia.—Iako. 4:8.
2 Ko e tau kupu “misionare” mo e “tau misionare” kua nakai kitia i loto he tohi katoa he Tohi Tapu Niue. Ka e, he tohi ha Efeso 4:11, ko e tau kupu Heleni ne fakaliliu ko e ‘tau tagata fakamatala he vagahau mitaki’ kua fakaliliu foki ko e “tau misionare.” Ko Iehova ko ia ko e Fakamatala mua ue atu, ka e nakai lata ke ui ko e Misionare mua ue atu, ha kua nakai fai tagata ne fakafano mai a ia. Ka e, he hagaao atu ke he haana Matua he lagi, ne pehē a Iesu Keriso: “Ko e mena hau au ia ia ni; ko ia foki ne fakafano mai au.” (Ioane 7:29) He fakatātā e fakaalofa ue atu ma e tau tagata, ne fakafano mai e Iehova e Tama fuataha haana ke he lalolagi. (Ioane 3:16) Kua lata mogoia a Iesu ke ui ko e Misionare mua ue atu, ko e Misionare mitaki lahi mahaki, ha ko e taha kakano anei ne fakafano mai a ia ke he lalolagi ‘kia talahau e kupu moli.’ (Ioane 18:37) Ne kautū katoatoa a ia he fakapuloa e tala mitaki he Kautu, ti ko e tau aoga he fekafekauaga haana kua aoga agaia ki a tautolu. Ke fakatai ki ai, maeke ia tautolu ke fakagahuahua e tau puhala fakaako haana ke he fekafekauaga ha tautolu, pete kua kotofa a tautolu mo tau misionare po ke nakai.
3. Ko e heigoa e tau hūhū ka fakatutala a tautolu ki ai?
3 Ko e matagahua ha Iesu ko e tagata fakapuloa he Kautu ne fakalagā mai ai e tau hūhū tuga anei: Ko e heigoa ne tupu ki a Iesu he lalolagi? Ko e ha ne lauia mitaki e fakaakoaga haana? Mo e ko e heigoa ati kautū ai e fekafekauaga haana?
Ko e Agaaga Fakamakai he Tau Takatakaiaga Foou
4-6. Ko e heigoa falu hikihikiaga ne fehagai mo Iesu he magaaho ne fakafano mai ke he lalolagi?
4 Ko e tau misionare mo e falu Kerisiano he vahā nei ne hiki ke he tau matakavi ne manako lahi ma e tau tagata fakamatala he Kautu kua liga fai magaaho ke fakamahani ke he tau tutūaga ne nakai tatai mo e tau tutūaga hagahaga mitaki ha lautolu fakamua. Ka e nakai maeke a tautolu ke iloa e kehekehe he tau tutūaga ha Iesu he lalolagi mo e he lagi, ne nofo ai a ia mo e haana Matua fakalataha mo e tau mena momoui fakaagelu ne fekafekau ki a Iehova ha kua manako mooli. (Iopu 38:7) Ko e kehe ha ia ke nonofo auloa mo e tau tagata agahala he lalolagi mahani keukeu! (Mare. 7:20-23) Ne fakauka foki a Iesu ke he tau taufetoko he tau tutaki tata lahi haana. (Luka 20:46; 22:24) Mooli, ne fakafehagai mitaki katoatoa a ia ke he tau mena oti ne feleveia mo ia he lalolagi.
5 Ne nakai amanaki noa a Iesu ti vagahau ke he vagahau he tagata; ne ako mai e ia he vahā mukemuke. Ko e hikiaga lahi ha a ia mai he takitaki e tau agelu i luga he lagi! He lalolagi, ne fakaaoga e Iesu taha e vagahau he “tau vagahau he tau tagata.” Ne kehe katoatoa mai he ‘tau vagahau he tau agelu.’ (1 Kori. 13:1) Ka e, he magaaho ka vagahau ke he tau kupu fakaalofa ne nakai fai tagata ne vagahau ke tuga a Iesu.—Luka 4:22.
6 Manamanatu ke he falu puhala foki ne hiki lahi e tau mena ma e Tama he Atua he magaaho ne hifo mai a ia ke he lalolagi. Pete kua nakai moua e Iesu e agahala mai ia Atamu, ne eke a Ia mo tagata mooli, tuga a lautolu ne eke fakamui mo “tau matakainaga,” po ke tau tutaki fakauku haana. (Totou Heperu 2:17, 18.) He po fakahiku he moui haana he lalolagi, ne nakai ole a Iesu ke he haana Matua he lagi ke fakafano mai “e tau agelu mua ue atu he tokologa ke he tau lekeona ne hogofulu ma ua.” Ka e manamanatu la ke he tau mena momoui fakaagelu he lagi ne pule ki ai a ia ko Mekaeli ko e Agelu ne Mua! (Mata. 26:53; Iuta 9) E, ne taute mooli e Iesu e tau mana; ka ko e tau mena ne taute e ia he lalolagi kua fakakaupā lahi ka fakatatai ke he tau mena ka taute e ia he lagi.
7. Fēfē e tali atu he tau Iutaia hagaao ke he Fakatufono?
7 He magaaho ato moui fakatagata a ia ko e “Loko,” liga ko Iesu e Gutu Vagahau he Atua ne takitaki e tau Isaraela he tutakale. (Ioane 1:1; Esoto 23:20-23) Pete ia, “ne moua [e lautolu] e fakatufono ne fekafekau ki ai e tau agelu, ka e nakai oma a [la]utolu ki ai.” (Gahua 7:53; Hepe. 2:2, 3) Ko e mooli, ne kaumahala e tau takitaki lotu Iutaia he senetenari fakamua ke maama e kakano mooli he Fakatufono. Ke fakatai ki ai, onoono ke he fakatufono he Sapati. (Totou Mareko 3:4-6.) Ko e tau tohikupu mo e tau Farasaio ne “tiaki e [lau]tolu e tau mena he fakatufono mua ue atu, ko e mahani tututonu, mo e fakaalofa, mo e fakamoli.” (Mata. 23:23) Pete ia, ne nakai fakalolelole a Iesu ke tiaki e fakamatala he kupu mooli.
8. Ko e ha kua maeke a Iesu ke lagomatai a tautolu?
8 Ne ha ha ia Iesu e agaaga fakamakai. Ko ia kua omoi he fakaalofa ma e tau tagata ti manako lahi ke lagomatai a lautolu. Ne nakai galo e ia e aga fakamatala. Ti, ko e tua fakamooli haana ki a Iehova he magaaho ne nofo he lalolagi, ati “eke ai a ia [Iesu] mo tupuaga he moui tukulagi kia lautolu oti kana kua omaoma kia ia.” Mua atu, “kua kamatamata a ia ke he tau mena ne mamahi ai, ti maeke ai ia ia ke lagomatai mai kia lautolu [tuga a tautolu] kua kamatamata.”—Hepe. 2:18; 5:8, 9.
Kua Fakamahani Fakamitaki mo Faiaoga
9, 10. Ko e heigoa e fakamahani ne moua e Iesu ato fakafano mai ke he lalolagi?
9 Ato fakafano atu e tau Kerisiano he vahā nei mo tau misionare, ne fakatokatoka he Kau Fakatufono ma lautolu ke moua e fakamahani. Ne moua kia e Iesu e fakamahaniaga? E, ka e nakai fano a ia ke he tau aoga rapai ato fakauku a ia ko e Mesia; mo e nakai fakaako foki he tau takitaki lotu talahaua a ia. (Ioane 7:15; fakatatai Gahua 22:3.) Ko e ha mogoia ne lotomatala lahi a Iesu ke fakaako atu?
10 Pete ko e tau mena ne liga ako e Iesu mai he matua fifine haana, ko Maria, mo e he matua taane hiki haana, ko Iosefa, ne moua e ia e fakamahani aoga lahi haana ma e fekafekauaga mai he Punaaga tokoluga ue atu. Hagaao ke he mena nei, ne pehē a Iesu: “Ko e mena nakai vagahau noa au, hoko au; ka ko e Matua ne fakafano mai au, ko ia ni ne tuku mai kia au e poaki ke he tau mena ke tala atu ai e au , mo e tau mena ke vagahau ai e au.” (Ioane 12:49) Kia mailoga ne foaki ke he Tama e hatakiaga pauaki hagaao ke he tau mena ka fakaako. Ato hau ke he lalolagi, ne lahi mahaki mooli e magaaho ne fakaaoga e Iesu he fanogonogo ke he tau hatakiaga he Matua haana. Ko e heigoa foki e fakamahani mitaki lahi ke moua e ia?
11. Fakaata fakalahi fēfē e Iesu e aga he Matua haana ke he tau tagata?
11 Mai he magaaho ne tufuga a ia, ne moua he Tama e fakafetuiaga tata lahi mo e Matua haana. He magahala ne nakaila ko e tagata a ia, ne mailoga e Iesu e aga he Atua ke he tau tagata he kitekite atu ke he tau fakafehagai ha Iehova mo lautolu. Ko e fakaalofa he Atua ma e tau tagata kua fakaata lahi he Tama ati ko e fakafifitakiaga he pulotu, ne maeke a ia ke talahau: “Ko e haku a fiafia foki, ha ha i ai ke he fanau he tau tagata haia.”—Fakatai 8:22, 31.
12, 13. (a) Fakaako fēfē a Iesu he kitekite atu ke he tau fehagaiaga he Matua haana mo e tau Isaraela? (e) Fakaaoga fēfē e Iesu e fakamahani haana ne moua?
12 Ko e fakamahani ne moua foki he Tama kua putoia e kitekite atu ke he puhala ne fakafehagai e Matua haana mo e tau tutūaga uka lahi. Ke fakatai ki ai, manamanatu ke he tau fehagaiaga ha Iehova mo e tau Isaraela nakai omaoma. Ne tohi he Nehemia 9:28: “Ne moua e lautolu e okiokiaga ti liliu eke ai e lautolu e mahani kelea ki mua hau [Iehova]; ti tiaki ai a lautolu ke he tau lima ha lautolu ne fai fī kia lautolu, ti fakatokolalo ai e lautolu a lautolu; ka e liliu foki a lautolu mo e ui atu kia koe, ti fanogonogo mai ai a koe mai he lagi, ti laveaki mai laga loga e koe a lautolu ke lata mo e hau a fakaalofa hofihofi noa mai.” He gahua fakalataha mo e kitekite atu ki a Iehova, ne feaki e Iesu e fakaalofa hofihofi noa pihia ma e tau tagata he fonua haana.—Ioane 5:19.
13 Ne fakagahuahua e Iesu e fakamahani nei he fehagai fakaalofa hofihofi noa a ia mo e tau tutaki haana. He po ato mate a ia, ko e tau aposetolo oti ne fakaalofa lahi mahaki a ia ki ai ‘ne tiaki a ia mo e fehola.’ (Mata. 26:56; Ioane 13:1) Ne fakatikai lagatolu foki he aposetolo ko Peteru e Keriso! Pete ia, ne tokanoa e Iesu e puhala ke mahafagi ke liliu mai e tau aposetolo haana ki a ia. Ne pehē a ia ki a Peteru: “Kua ole au māu, kia nakai mate hau a tua; ka ko koe, ka mafoki mai a koe, ti fakamalolo e koe hau a tau matakainaga.” (Luka 22:32) Ko Isaraela fakaagaaga kua ati hake mooli mai he “tau aposetolo mo e tau perofeta,” ti ko e tau maka ne fakavē aki e kaupā ha Ierusalema Foou kua toka ai e tau higoa he tau aposetolo toko 12 tua fakamooli he Punua Mamoe, ko Iesu Keriso. Ke he vahā nei, ko e tau Kerisiano fakauku fakalataha mo e tau hoa kua tukulele ha lautolu, ko e ‘tau mamoe kehe,’ nukua tupu olaola ai ko e fakatokatokaaga ne fakamatala e Kautu i lalo he lima malolō he Atua mo e he takitakiaga he Tama fakahele haana.—Efeso 2:20; Ioane 10:16; Fakakite. 21:14.
Puhala Fakaako ha Iesu
14, 15. Ko e tau puhala fe ne kehe e fakaakoaga ha Iesu ke he tau fakaakoaga he tau tohikupu mo e tau Farasaio?
14 Fakagahuahua fēfē e Iesu e fakamahani nei he fakaako e tau tutaki haana? Ka fakatatai e tautolu e hatakiaga ha Iesu ke he puhala he tau takitaki lotu Iutaia, kua kitia mooli e tautolu e tokoluga he puhala fakaako ha Iesu. Ko e tau tohikupu mo e tau Farasaio ne ‘fakahui e poaki he Atua ke he tau kupu toka tuai ha lautolu.’ Ke he taha faahi, ko e tau mena ne talahau e Iesu ne nakai ko e tau kupu haana; ne pipiki mau a ia ke he kupu, po ke fekau, he Atua. (Mata. 15:6; Ioane 14:10) Kua lata foki a tautolu ke taute pihia.
15 Fai mena foki ne eke a Iesu ke kehe katoatoa mai he tau takitaki lotu. Hagaao ke he tau tohikupu mo e tau Farasaio, ne pehē a ia: “Ko e tau mena oti ke tala atu ai a lautolu kia mutolu ke omaoma ki ai, kia omaoma a mutolu ki ai mo e eke ai e mutolu; ka e aua neke fifitaki a mutolu ke he ha lautolu a tau mahani; ha kua talahau e lautolu, ka e nakai ni eke e lautolu.” (Mata. 23:3) Ne taute e Iesu e tau mena ne fakaako e ia. O mai ā a tautolu ke fakatutala ke he fakafifitakiaga ne fakamooli e mena nei.
16. Ko e ha kua talahau e koe ne moui fakatatai a Iesu ke he tau kupu haana ne fakamau he Mataio 6:19-21?
16 Ne fakamafana e Iesu e tau tutaki haana ke ‘tanaki e tau koloa ke he lagi.’ (Totou Mataio 6:19-21.) Ti moui fakatatai nakai a Iesu ke he tomatomaaga ia? E, ha kua talahau fakamooli e ia hagaao ki a ia ni: “Na fai ofaga e tau alope, ti fai mena foki ke momohe ai e tau manu lele; ka ko e Tama he tagata nakai fai mena a ia ke mohe ai.” (Luka 9:58) Ne moui mukamuka a Iesu. Ne lavelave lahi a ia he fakapuloa e tala mitaki he Kautu, mo e fakakite e ia e kakano ke atāina mai he tau tupetupe ne moua ka tanaki e tau koloa ke he lalolagi. Ne fakakite e Iesu kua mitaki lahi ha ia ke tanaki e tau koloa ke he lagi, ne “nakai ha ha i ai e moko mo e pala ke fakaoti ai, nakai ha ha i ai foki e tau tagata kaiha ke keli atu mo e kaiha ai.” Kua muitua nakai a koe ke he tomatomaaga a Iesu ke tanaki e tau koloa ke he lagi?
Tau Mahani Ati Ofania he Tau Tagata a Iesu
17. Ko e heigoa e tau mahani ne eke a Iesu ko e tagata fakamatala ne matakehe lahi?
17 Ko e heigoa e tau mahani ne eke a Iesu ko e tagata fakamatala ne matakehe lahi? Taha ko e aga haana ke he tau tagata ne lagomatai e ia. He tau mahani mitaki ha Iehova ne fakaata e Iesu ko e mahani fakatokolalo, fakaalofa, mo e fakaalofa hofihofi noa. Mailoga e puhala ne futiaki he tau mahani nei e tokologa ki a Iesu.
18. Ko e ha ne pehē ai kua fakatokolalo a Iesu?
18 He talia e kotofaaga ke hau ke he lalolagi, ne “fakatokolalo [e Iesu] a ia, ne mahani a ia fakalataha mo e tupa, nukua eke a ia tuga ne tagata.” (Filipi 2:7) Ko e fakatātāaga haia he mahani fakatokolalo. Mua atu, ne nakai onoono hifo a Iesu ke he tau tagata. Ne nakai pehēnei e aga haana, ‘Ne mamao e lagi ne hifo mai au, ti kua lata ke fanogonogo a mutolu ki a au.’ Nakai tuga e tau tagata pikopiko ne ui ne lautolu a lautolu ko e tau mesia, ne nakai uulo ni e Iesu e feua haana ko ia e Mesia mooli. Falu magaaho ne pehē a ia ke he tau tagata ke nakai tala age ke he falu ko hai a ia po ke tau mena ne taute e ia. (Mata. 12:15-21) Ne manako a Iesu ke taute ni he tau tagata e tau fifiliaga ha lautolu ke muitua ki a ia he fakavē ke he tau mena ne kitia e lautolu. Kua monuina ha e tau tutaki haana ha kua nakai amaamanaki e Iki ha lautolu ke tuga e tau agelu mitaki katoatoa ne fakalataha mo ia i luga he lagi!
19, 20. Omoi fēfē he fakaalofa mo e fakaalofa hofihofi noa a Iesu ke lagomatai e tau tagata?
19 Ne fakakite foki e Iesu Keriso e fakaalofa—ko e matapatu mahani he haana Matua he lagi. (1 Ioa. 4:8) Ne fakaako e Iesu e toloaga haana mai he fakaalofa. Ke tuga anei, mailoga e logonaaga haana ma e taha fuata ne pule. (Totou Mareko 10:17-22.) Ne ‘fakaalofa a Iesu ki a ia’ ti manako ke lagomatai a ia, ka e nakai makai e fuata ne pule ke fakafua e tau koloa loga haana ke eke mo tutaki he Keriso.
20 He tau mahani ofania ha Iesu ko e fakaalofa hofihofi noa haana. He tuga e tau tagata nakai mitaki katoatoa oti, ko lautolu ne talia e fakaakoaga haana kua pehia foki he tau mena vihi. He iloa e mena nei, ne fakaako e Iesu a lautolu mo e fakaalofa hofihofi noa. Ke fakatai: He taha magaaho, ko Iesu mo e tau aposetolo haana kua lavelave lahi ti nakai fai magaaho foki a lautolu ke kai. Pete ia, liga fēfē la e aga ha Iesu he kitia e moto tagata hane fakapotopoto mai? “Ti hohofi hana fakaalofa kia lautolu, ha ko e mena tuga ne tau mamoe nakai fai leveki a lautolu; ti kamata ai a ia ke fakaako a lautolu ke he tau mena loga.” (Mare. 6:34) Ne mailoga e Iesu e tuaga fakaalofa he tau tagata he fonua haana ti lahi e magaaho ne fakaaoga e ia ke fakaako atu mo e ke taute e tau mana ke lagomatai a lautolu. Ko e falu kua futiaki he tau mahani mitaki haana, kua omoomoi he haana tau kupu, ti eke mo tau tutaki haana.
21. Ko e heigoa ka fakatutala a tautolu ki ai he vala tala ka mui mai?
21 Kua loga atu foki e tau mena ka ako e tautolu hagaao ke he fekafekauaga ha Iesu he lalolagi, tuga ka fakakite he vala tala ka mui mai. Ko e heigoa foki e tau puhala ka fifitaki e tautolu a Iesu Keriso, ko e Misionare mua ue atu?
To Tali Fēfē a Koe?
• Ko e heigoa e fakamahani ne moua e Iesu ato hau ke he lalolagi?
• Tokoluga fēfē e puhala fakaako ha Iesu ke he puhala he tau tohikupu mo e tau Farasaio?
• Ko e heigoa e tau mahani ati ofania he tau tagata a Iesu?
[Fakatino he lau 15]
Fakaako fēfē e Iesu e moto tagata?