Fakaholoaga he Kautūaga i Kiliata ke 123 Aki
Fakamafana e Tau Tagata ne Kautū i Kiliata ke “Kamata Gahua”
HE Aho Faiumu, Sepetema 8, 2007, ne toko 6,352 mai he 41 e motu ne fakalataha ke he kautūaga he vahega ke 123 aki he Aoga Tohi Tapu a Kiliata he Kolo Toko. He matahola 10 he magaaho pogipogi ko e tagata nofoa he fakaholoaga, ko Anthony Morris he Kau Fakatufono, ne fakafeleveia atu ke he toloaga. He oti e falu kupu hafagi, ne talahau e ia e tagata lauga fakamua, ko Gary Breaux he La Komiti he Tau Faahi Kaufakalataha.
Ne fakamafana e Matakainaga Breaux ke he tau tagata fakaako, pete ne tau foliga fakatino ha lautolu, ko lautolu kua taute e finagalo ha Iehova kua lilifu ke he tau mata Haana. (Iere. 13:11) Ne fakamalolō e ia e tau tagata kua kautū ke moua e lilifu pihia. Holo atu, ne fakamalolō e Gerrit Lösch he Kau Fakatufono na latatonu ke amaamanaki ke he palepale ka fekafekau a tautolu ki a Iehova. (Hepe. 11:6) Pete ia, kua lata e fatuakiloto ha tautolu ke omoomoi he fakaalofa katoatoa.
Ko e leveki he Faahi Gahua he Tau Aoga Fakateokarasi, ko William Samuelson, ne fakamalolō mogoia e tau tagata kua kautū ke pipiki mau ke he kotofaaga lilifu ke fakapuloa e Patuiki kua pule mo e fakatātā e lilifu ha lautolu ha ko e tau mahani mitaki ha lautolu.a Ko Sam Roberson, ko e hagai leveki he Faahi Gahua he Tau Aoga Fakateokarasi, ne fakamafana ke he tau tagata kua kautū ke onoono tumau ke he tau mena mitaki he falu. To maeke mogoia he tau tagata kua kautū ke “fakaalofa ke he tau matakainaga.”—1 Pete. 2:17.
He mole e tau lauga fakaohooho ia, ne hūhū tala e faiaoga Kiliata ko Mark Noumair ke he falu kua kautū ke he tau mena tutupu he gahua ke he fonua he magaaho ne aoga i Kiliata. Ne maaliali ai ke he tau tagata fanogonogo e manako ha lautolu ma e fekafekauaga mo e manako ha lautolu ke lagomatai e falu. Ko Kent Fischer he Ofisa Peteli i Patterson ne hūhū tala mogoia ke he tau matakainaga he La Komiti mai he tolu e motu ne kua o atu e tau misionare ki ai. Ko e tau kupu he tau matakainaga nei kua mafanatia ke he toloaga, ne putoia e tokologa ko e tau matua ha lautolu kua kautū, ke iloa kua leveki fakamitaki e tau misionare foou he tau kotofaaga ha lautolu. Ko Izak Marais he Faahi Gahua Fakaliliu ne holo atu ke hūhū tala ke he falu misionare kua leva, ne foaki he tau mena iloa ha lautolu e kamataaga he olioli ne fakatoka i mua ma e tau tagata kua kautū.
Ne taute e Geoffrey Jackson he Kau Fakatufono e matapatu lauga he fakaholoaga, “Mai he Tau Mena Oti ne Logona e Mutolu—Ko e Heigoa Mogonei?” Ko e Matakainaga Jackson, ne gahua misionare ke teitei 25 e tau ke he Pasifika Toga, ne fakatutala ke he matahiku he Lauga he Mouga. He lauga ia, ne tutala a Iesu ke he ua e tagata taane ne ta e tau fale, taha ne lotomatala mo e taha ne goagoa. Ne talahau he tagata lauga ko e tau fale ua nei ne liga ta he taha e matakavi. Pete ia, ko e tagata goagoa ne fakatū e fale haana i luga he oneone, ka ko e tagata lotomatala ne keli hifo ato moua e ia e mena patu ti kamata talaga. He magaaho ne agi mai e matagi malolō, ko e fale ne fakatū he mena patu ne mau ai ka ko e fale ne fakatū he oneone ne veli ai.—Mata. 7:24-27; Luka 6:48.
Ne fakamaama e Iesu ko e tagata goagoa kua tatai mo lautolu ne fanogonogo hokoia ke he tau fakaakoaga ha Iesu. Kua tatai e tagata lotomatala mo lautolu ne fanogonogo ti fakagahua e tau kupu ha Iesu. Ne tala age e Matakainaga Jackson ke he tau tagata kua kautū, “Ka fakagahua e mutolu e tau mena ne ako e mutolu mai he fakaako ke he Tohi Tapu, to tatai a mutolu mo e tagata lotomatala.” Ke fakahiku aki, ne fakamalolō e ia a lautolu ne kua kautū ke “kamata gahua” ke he tau kotofaaga misionare ha lautolu.
Fakahiku ai, ne moua e lautolu kua kautū e tau tipiloma mo e tau kotofaaga ha lautolu, ti talahau e Matakainaga Morris e falu tomatomaaga fakahiku. Ne fakamafana e ia e tau tagata kua kautū ke mumuitua tumau ki a Iesu mo e falanaki katoatoa ke he malolō ha Iehova. Ti fakaoti mogoia e fakaholoaga he kautūaga.
[Tau Matahui Tala]
a Ko e Faahi Gahua he Tau Aoga Fakateokarasi i lalo he levekiaga he Komiti Fakaako, ne leveki e aoga Kiliata, ko e aoga ma e tau matakainaga he La Komiti, mo e aoga ma e tau leveki faifano.
[Puha he lau 31]
TAU NUMERA HE VAHEGA
Numera he tau motu ne fakalataha: 10
Numera he tau motu ne kotofa ki ai: 24
Katoa he numera he tau tagata fakaako: 56
Evalesi he tau tau moui: 33.5
Evalesi he tau tau i loto he kupu mooli: 17.9
Evalesi he tau tau he fekafekauaga mau: 13.8
[Fakatino he lau 32]
Vahega ke 123 Aki kua Kautū he Aoga Tohi Tapu a Kiliata he Kolo Toko
Ko e tau higoa i lalo, kua mai he laini i mua ki tua, mo e mai he faahi hema ke he faahi matau he tau laini takitaha.
(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.