Kautūaga i Kiliata ke 125 Aki
Ne Fakamalolō ke he Tau Misionare ke Tuga a Ieremia
“KO E vahega nei a Kiliata kua eke mo taha lakaaga,” he fakapuloa e Geoffrey Jackson he Kau Fakatufono. Ne tutala a ia ke he 6,156 e tagata ne o atu ke he kautūaga he vahega ke 125 aki he Aoga Tohi Tapu a Kiliata he Kolo Toko ia Sepetema 13, 2008. Putoia ke he toko 56 ne kautū mai he vahega nei, kua fakafano atu he Aoga Kiliata molea e 8,000 misionare “ke hoko ni ke he fakaotiaga [tau faahi mamao] he lalolagi”!—Gahua 1:8.
Ko Matakainaga Jackson e tagata nofoa ma e fakaholoaga he kautūaga, ne hūhū, “To fakaholo ki mua nakai he tuaga mitaki e fekafekauaga haau?” Ti talahau e ia fā e mena kua atihake e tuaga mitaki: moua e aga hako, fakatoka e fakafifitakiaga mitaki, fakavē mauokafua e fakaako atu he tagata ke he Kupu he Atua, mo e hagaaki ke fakailoa e higoa ha Iehova.
Ko David Schafer, ne gahua he Komiti Fakaako, ne fakatutala ke he mataulu “To Iloa Nakai e Koe e Tau Mena Oti?” Ne fakamafana e ia ke he tau tagata fakaako a Kiliata kua maeke ia lautolu ke “iloa e tau mena oti” kua lata ke fekafekau ko e tau misionare kaeke ke matutaki a lautolu ke kumi a Iehova mo e mailoga fakatokolalo e “fekafekau fakamoli mo e loto matala.”—Fakatai 28:5; Mata. 24:45.
Holo atu mogoia, ko John E. Barr he Kau Fakatufono, ne tutala ke he matapatu “Nakai Fakaatā ha Mena ke Fakamavehe a Koe Mai he Fakaalofa he Atua.” Ko e fakatonuaga fakamatua ha Matakainaga Barr ne fakatotoka a lautolu ne kautū mo e tau matua ha lautolu ke he tau mena ne liga tupetupe e tau misionare foou ka liga fehagai he tau kotofaaga ha lautolu. “Ko e ha ha ke he fakaalofa he Atua ko e mena kua mua e haohao mitaki, hagahaga mitaki ke ha ha e tau momoui ha tautolu i ai,” he fakamaama e ia. Nakai fai mena ka fakamavehe e tau misionare mai he fakaalofa he Atua ato fakamavehe kehe ne lautolu a lautolu mai he Atua.
Ko Sam Roberson mogoia he Faahi Gahua he Tau Aoga Fakateokarasi ne fakamalolō e toloaga ke tui e “tapulu kua mua he fulufuluola.” He fakaako e tau mena ne taute e Iesu mo e fakagahua ai ki a lautolu, kua maeke he tau tagata ne kautū ke “fakatapulu a [la]utolu ke he Iki, ko Iesu Keriso.” (Roma 13:14) Matutaki atu e William Samuelson, ko e fekafekau leveki he Faahi Gahua he Tau Aoga Fakateokarasi, ne fakamaama e tau mena ka taute e tagata ke lilifu. Nakai ko e onoonoaga he tagata ka ko e onoonoaga he Atua kua lilifu ai e tagata.
Ko Michael Burnett, ko e taha he tau faiaoga ne hūhū tala ke he tau tagata fakaako hagaao ke he tau iloaaga ha lautolu ke he gahua he fonua. Pete kua laulahi he tau tagata fakaako ne kotofa ke he tau matakavi kua lagaloga e gahua he ha ha i ai he Aoga Kiliata i Patterson, New York, ne moua agaia e lautolu e tau tagata ne fiafia. Ko Gerald Grizzle he Ofisa Fonoaga ne hūhū tala ke he tolu e matakainaga taane hane o atu he Aoga ma e Tau Matakainaga he La Komiti. Ne lagomatai he tau talahauaga ha lautolu e tau tagata ne kautū mai Kiliata ke tauteute ma e tau mena ne tatali ki a lautolu ke he tau kotofaaga ha lautolu he tau motu kehe.
Ko e lauga “Kia Tuga a Ieremia” ne taute e David Splane he Kau Fakatufono, ko ia ne kautū he vahega ke 42 aki. Pete kua matauka a Ieremia ke he kotofaaga haana, ne fakamalolō e Iehova a ia. (Iere. 1:7, 8) To taute pihia foki he Atua ma e tau misionare foou. “Ka fai lekua a koe mo e taha tagata,” he talahau e Matakainaga Splane, “nofo hifo ti tohi hogofulu e aga mitaki ne ofania ai e koe e tagata ia. Ka nakai katoa e hogofulu haau, kakano kua nakai iloa mitaki e koe e tagata ia.”
Ne aga foaki noa a Ieremia. He manako a ia ke tiaki e fekafekauaga, ne liogi a ia ti fakalataha a Iehova mo ia. (Iere. 20:11) “Ka lolelole e logonaaga haau,” ne talahau e Matakainaga Splane, “tutala mo Iehova hagaao ki ai. To ofo a koe he puhala ka lagomatai e Iehova a koe.”
He matahiku he fakaholoaga he kautūaga, ne fakamanatu he tagata nofoa e toloaga kua fitā e ako he tau matakainaga kua kautū e tau puhala loga ke atihake e tuaga mitaki ha lautolu. He taute e lautolu e kotofaaga ha lautolu, ko e tuaga mitaki ha lautolu ka fakaholo ki mua e fakamatala ha lautolu.—Isaia 43:8-12.
[Puha he lau 22]
TAU NUMERA HE VAHEGA
Numera he tau motu ne fakalataha: 6
Numera he tau motu ne kotofa ki ai: 21
Katoa he numera he tau tagata fakaako: 56
Evalesi he tau tau moui: 32.9
Evalesi he tau tau i loto he kupu mooli: 17.4
Evalesi he tau tau he fekafekauaga mau: 13
[Fakatino he lau 23]
Vahega ke 125 Aki kua Kautu he Aoga Tohi Tapu a Kiliata he Kolo Toko
Ko e tau higoa i lalo, kua mai he laini i mua ki tua, mo e mai he faahi hema ke he faahi matau he tau laini takitaha.
(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.