Fakamauaga mo e Tuaga Matua he Vahā Nei he Fakahikuaga

“Kua gahoa e tau aho kua toe.”—1 KORI. 7:29.

1. (a) Ko e heigoa e tau hikihikiaga foou ne ha ha he “tau aho uka”? (e) Ko e ha kua tupetupe a tautolu he hikihiki e tau mena kua aoga ke he magafaoa?

KUA talahau tuai he Kupu he Atua “ko e vahā he fakahikuaga” to fakamailoga he tau felakutaki, tau mafuike, tau hoge, mo e tau tatalu. (Tani. 8:17, 19; Luka 21:10, 11) Ne hataki foki he Tohi Tapu kua uho e magahala nei he fakamauaga tuai he tagata ko e magahala he tau hikihikiaga lalahi he kaufakalatahaaga. Ko e tau kapaletū he moui fakamagafaoa ko e falu mena he “tau aho uka” he “tau aho fakamui” nei. (2 Timo. 3:1-4) Ko e ha kua tupetupe a tautolu he tau hikihikiaga pihia? Ha kua holofa lahi mo e mua atu e malolō, ne maeke he tau hikihikiaga pihia ke fakaohooho e onoonoaga he tau Kerisiano hagaao ke he fakamauaga mo e tuaga matua. Ke he puhala fe?

2. Fēfē e onoonoaga he lalolagi lahi ke he fakamauaga mo e tau vevehe?

² He vahā nei, kua mukamuka mo e holofa lahi e tau vevehe, ti kua malikiti hake fakahaga e numera he tau vevehe ke he tau motu loga. Pete ia, kua lata ia tautolu ke manatu tumau kua kehe katoatoa e onoonoaga a Iehova ko e Atua ke he fakamauaga mo e tau vevehe ke he mena ne fa talia he lalolagi ne agaagai ia tautolu. Ko e heigoa mogoia e onoonoaga a Iehova?

3. Fēfē e onoonoaga a Iehova mo Iesu Keriso ke he fakamauaga?

³ Ne amanaki a Iehova ko e Atua ki a lautolu kua mau ke tumau ke fakamooli ke he ha lautolu a omonuo he fakamauaga. He magaaho ne fakalataha e ia e tagata taane mo e fifine fakamua ke he fakamauaga, ne talahau e Iehova kua lata e “tane . . . ke pipiki ke he hana hoana; ti eke ai a laua mo tino taha.” Ne liu fatiaki e Iesu Keriso e talahauaga ia ti lafi ki ai: “Hanai, ko ia kua fakalataha he Atua, aua neke vevehe he taha tagata.” Ne talahau foki e Iesu: “Ko ia kua tiaki hana hoana, ka e nakai faivao a ia, ti hoana ke he taha, kua faivao a ia; ko ia foki ka fai hoana kia ia kua tiaki kua faivao a ia.” (Kene. 2:24; Mata. 19:3-6, 9) Ti, ko e onoonoaga a Iehova mo Iesu ke he fakamauaga kua lata ke eke mo līlīaga tukulagi ti fakaoti ni ka mate e taha hoa. (1 Kori. 7:39) Ha ko e fakatokatokaaga tapu e fakamauaga, kua nakai lata ke fakamāmā e onoonoaga ke he tau vevehe. Ka e talahau he Kupu he Atua kua vihiatia e Iehova e tau vevehe, ko e tiaki hoana mo e tiaki taane, ne nakai fai fakavēaga faka-Tohiaga Tapu.a—Totou Malaki 2:13-16; 3:6.

Fakamauaga ne Fakamooli

4. Ko e ha ne tokihala falu fuata Kerisiano ha kua fakatepetepe a lautolu ke mau?

⁴ Ko e lalolagi nakai mahani Atua ne nonofo ai a tautolu kua hufia lahi ke he mahani fakataane mo e fifine. He tau aho oti, kua fakatātā ki mua ha tautolu e tau fakatino he mahani fakataane mo e fifine. Ti nakai maeke ke fakaheu noa e lauiaaga he tau mena ia ki a tautolu, mahomo atu ke he tau fakahelehele ikiiki ha tautolu he fakapotopotoaga. Kua lata ke tali atu fēfē e tau fuata Kerisiano ke he fakaohoohoaga fakalolelole nei, ka fakalagā e fia loto ke he mahani fakataane mo e fifine pete kua nakai manako a lautolu? Falu kua lali ke fehagai ki ai he mau tuai he ikiiki agaia e tau tau moui. He puhala ia, ne amanaki a lautolu ke kalo mai neke putoia ke he mahani feuaki. Ka e nakai leva, kua tokologa ne tokihala ke he fifiliaga ia. Ko e ha? Ha kua mole vave e magaaho foou ia he fakamauaga, ti mailoga e lautolu ko lautolu mo e tau hoa ha lautolu kua nakai fetataiaki e tau mena ne fiafia ki ai ke he tau matagahua he tau aho takitaha. Maama ai, kua fehagai e tau hoa pihia mo e paleko lahi mahaki.

5. Ko e heigoa ka lagomatai e tau hoa ke tumau ke fakamooli ke he omonuo he fakamauaga ha lautolu? (Kikite foki e matahui tala.)

⁵ Ka mau ke he taha tagata—pete ko e matakainaga Kerisiano—kua nakai tatai a ia he magaaho fakamui ke he mena ne amanaki a koe ki ai, to uka lahi mooli. (1 Kori. 7:28) Ti, pete he lahi e paleko he tuaga, na iloa he tau Kerisiano mooli kua nakai maeke he tau vevehe ne nakai fakavē ke he kupu tohi ke fakamafola e tau lekua i loto he fakamauaga ne nakai fiafia. Ko e mena ia, ko lautolu ne lali fakamakamaka ke puipui e fakamauaga ha kua manako ke tumau ke fakamooli ke he omonuo he fakamauaga ha lautolu, kua latatonu ke moua e lilifu mo e lagomatai fakaalofa he fakapotopotoaga Kerisiano.b

6. Kua lata ke fēfē e onoonoaga he tau fuata Kerisiano ke he magaaho ka mau?

⁶ Ko koe kia e fuata ne nakai la mau? Kaeke ke pihia, kua lata ke fēfē e onoonoaga haau ke he magaaho ka liga mau a koe? Maeke a koe ke kalo mai he loto mamahi kaeke ke fakatali ato fai hoana a koe ti kua mauokafua ke he puhala fakatino, ke he manamanatuaga, mo e fakaagaaga ato kamata haau a fakafetuiaga lotofakavihi mo e matakainaga Kerisiano fifine. Mooli, kua nakai tohi ke he tau Tohiaga Tapu e tau tau moui ka lata ke mau.c Pete ia, ne fakakite he Tohi Tapu kua lata a koe ke fakatali ato mole e magaaho he moui ne malolō lahi e tau logonaaga he mahani fakataane mo e fifine. (1 Kori. 7:36) Ko e ha? Ha kua maeke he fakaohoohoaga he mahani fakataane mo e fifine ke fakahehēina e fifiliaga mitaki ti omoomoi a koe ke taute e tau fifiliaga nakai pulotu ka fakahiku ke fua mai e loto mamahi. Kia manatu, ko e fakatonuaga pulotu a Iehova i loto he Tohi Tapu ke he fakamauaga kua lata ma e aoga mo e fiafia haau.—Totou Isaia 48:17, 18.

Fakamooliaga he Tuaga Matua

7. Ko e heigoa ne fehagai mo e falu hoa fuata, ti ko e ha ne fakauka he mena nei e fakamauaga?

⁷ Falu hoa ne mau tuai ne mailoga kua amanaki ke fai tama ka e ikiiki agaia a laua. Kua nakai la fai magaaho a laua ke feiloaaki fakamitaki ato fanau e tama, ne lata ke leveki ke 24 e matahola he aho. He magaaho ka lahi pauaki e lavelave he matua fifine ke he tama fanau foou, liga logona he taane fuata e mahekeheke. Mua atu, maeke he mohe alafia he pō ke fakatupu e hogohogo manava mo e kapaletū ti fakauka e fakafetuiaga he hoa. Ati mailoga ai e laua kua nakai lahi e atāina ha laua. Mogonei kua nakai maeke a laua ke oatu ke he tau mena fa mahani mo e taute e tau mena ne atāina ke taute fakamua. Lata mogoia ke fēfē e onoonoaga ha laua ke he tuaga kua hikihiki?

8. Kua lata ke fēfē onoonoaga ke he tuaga matua, ti ko e ha?

⁸ Tuga ni he lata ke fehagai fakamooli ke he fakamauaga, kua lata foki ke mailoga e tuaga matua ko e matagahua mo e kotofaaga mai he Atua. Ko e heigoa ni e tau hikihikiaga ne tupu ke he tau momoui he hoa Kerisiano ha kua fanau e tama mukemuke, kua lata ia laua ke eketaha ke fehagai fakamooli ke he tau hikihikiaga nei. Ha ko e foakiaga ha Iehova ati maeke ai he tau tagata ke fanau e tau tama, kua lata mogoia he tau matua ke onoono ke he mukemuke fanau foou ko e “mena moua ia mai ia Iehova.” (Sala. 127:3) To eketaha e matua fifine mo e matua taane Kerisiano ke fakamooli e tau matagahua ha laua ko e ‘tau matua ke he Iki.’—Efeso 6:1.

9. (a) Ko e heigoa ne putoia ke he feakiaga he tama? (e) Ko e heigoa kua lata ke taute he taane ke lagomatai e hoana ke tumau e malolō fakaagaaga?

⁹ Ke feaki hake e tama kua putoia e tau tau loga he foaki noa. Ko e tanakiaga lahi he tau magaaho mo e tau malolō. Kua lata mogoia he taane Kerisiano ke maama kua fai tau he mole he fanau e tama, ti liga kua lavelave e hoana he magaaho he tau feleveiaaga mo e liga gahoa lahi e magaaho haana ke taute e fakaakoaga Tohi Tapu fakatagata mo e manamanatu fakahokulo. Liga to fakalolelole he mena nei e malolō fakaagaaga haana. Ko e fakamooliaga he tuaga matua kua lata ke taute he taane e tau mena kua fahia ki ai ke lagomatai ke leveki e tama. Liga maeke ia ia ke lagomatai ke he tau mena ne nakai logona he hoana he tau feleveiaaga he fakatutala ke he tau manatu he feleveiaaga mo ia i kaina. Liga lagomatai foki e ia ke leveki e tama ke fai magaaho e hoana ke fakalataha he fakamatala ke he Kautu.—Totou Filipi 2:3, 4.

10, 11. (a) Kua feaki hake fēfē e fanau ke he “tau kupu fakamafana [a Iehova]”? (e) Ko e ha kua lata he tau matua Kerisiano ke moua e nava?

¹⁰ Ko e tuaga matua ne fakamooli kua nakai ni putoia e fagai, fakatui, fale ke nofo, mo e levekiaga he malolō tino. Mua atu ke he magaaho fakahiku nei ne hagahaga kelea lahi, kua lata he tau tama ke ako mai he vahā tote e tau matapatu fakaakoaga ke momoui ai. Kua lata ke feaki e fanau “ke he tau kupu akonaki mo e tau kupu fakamafana [a Iehova].” (Efeso 6:4) Ko e “tau kupu fakamafana” nei kua putoia ke tō e tau manatu a Iehova he manamanatuaga he tama tali mai he vahā tote ke hoko ke he tau tau uka he fuata mui haana.—2 Timo. 3:14, 15.

¹¹ He magaaho ne pehē a Iesu ke he tau tutaki haana kua lata a lautolu ke “eke e tau motu oti kana mo tutaki,” ko e kakano mooli haana ma e tau matua ke lata ke lagomatai e fanau ha lautolu ke eke mo tau tutaki. (Mata. 28:19, 20) Kua paleko e mena ia ha ko e tau peehiaga ne tuku he lalolagi nei ke he tau fuata. Ko e mena ia, ko e tau matua ne kautū he feaki hake e fanau ha lautolu ke eke mo tau Kerisiano tukulele kua latatonu ke moua e nava mafanatia mai ia lautolu oti i loto he fakapotopotoaga. Kua “kautu” ai a lautolu ke he tau fakaohoohoaga he lalolagi ha ko e tua ha lautolu ko e tau matua fakamooli.—1 Ioa. 5:4.

Nofo Tokotaha po ke Nakai Fanau ma e Kakano Lilifu Ue Atu

12. Ko e ha ne fifili falu Kerisiano ke fai magaaho ka nofo tokotaha?

¹² Ha kua “gahoa e tau aho kua toe” ti kua “mole atu e mahani he lalolagi nai,” ne fakamafana mai e Kupu he Atua ki a tautolu ke manamanatu ke he tau mena mitaki he nofo tokotaha. (1 Kori. 7:29-31) Ko e mena ia, ne fifili falu Kerisiano ke nofo tokotaha tumau po ke fifili a lautolu ke fai tau ka nofo tokotaha ato mau. Nava ai, he nakai fakaaoga fakahanoa e lautolu e atāina ne moua he nofo tokotaha ke tutuli e tau mena fakatagata. Kua tokologa ne nofo tokotaha ke maeke ke fekafekau ki a Iehova mo e “nakai fakalavelave.” (Totou 1 Korinito 7:32-35.) Falu Kerisiano nofo tokotaha ne fekafekau ko e tau paionia po ke tau tagata he Peteli. Kua tokologa ne kumi ke fakatolomaki ki mua e lagomatai ha lautolu ke he fakatokatokaaga a Iehova he fakamalolō fakaagaaga ke oatu ke he Aoga Fakaako Fekafekau. Ko e mooli, ko lautolu ne fai magaaho he eke mo tau fekafekau gahua tumau, ti fifili ke mau he magaaho fakamui, ne fa logona hifo kua aoga e fakamauaga ha lautolu ha ko e tau fakaakoaga uho ne ako mai he tau tau fakamua atu.

13. Ko e ha ne nakai manako pauaki e falu hoa Kerisiano ke fai tama?

¹³ He falu faahi he lalolagi, kua ha ha ai e hikiaga he moui fakamagafaoa—kua loga e hoa ne fifili ke nakai fanau. Ne taute he falu ha ko e tau kakano fakatupe; taute he falu ha kua manako a lautolu ke atāina ke tutuli e feua totogi lahi. Kua ha ha ai foki ke he tau Kerisiano e tau hoa ne nakai manako pauaki ke fai tama. Ka kua fa taute pihia e lautolu ke lahi e atāina ke fekafekau ki a Iehova. Ne nakai kakano e mena nei kua ai olioli he tau hoa ne taute pihia e moui pauaki he fakamauaga. Kua olioli agaia e lautolu. Pete ia, kua fakamakai a lautolu ke tuku mua e Kautu ke he falu matagahua ne tamai he fakamauaga. (1 Kori. 7:3-5) Ko e falu he tau hoa nei kua fekafekau ki a Iehova mo e tau matakainaga ha lautolu ke he gahua takaiaga mo e faahimotu po ke he Peteli. Falu kua fekafekau ko e tau paionia po ke tau misionare. To nakai nimo e Iehova e gahua mo e fakaalofa ne fakakite e lautolu ma e higoa haana.—Hepe. 6:10.

“Matematekelea ke he Tino”

14, 15. Ko e heigoa e “matematekelea ke he tino” ka tupu ke he tau matua Kerisiano?

¹⁴ Ne pehē e aposetolo ko Paulo ke he tau Kerisiano kua mau, to moua e lautolu e “matematekelea ke he tino.” (1 Kori. 7:28) Liga putoia e mena nei ke he tau lekua he malolō tino ma e hoa, ha laua fanau, po ke tau matua fuakau ha laua. Liga putoia foki e tau mena uka mo e tau loto mamahi ne matutaki mo e feakiaga he fanau ha laua. Tuga ne totoku he kamataaga he vala tala nei, ne talahau tuai he Tohi Tapu to tamai he “tau aho fakamui” e “tau aho uka.” Ha ha he tau mena uka ko e fanau ne “faliuliu ke he tau matua.”—2 Timo. 3:1-3.

¹⁵ Ko e feakiaga he fanau ko e paleko lahi ma e tau matua Kerisiano. Kua nakai puipui mai a tautolu he tau lauiaaga kelea he “tau aho uka.” Ko e mena ia, ati fakatumau e tau matua Kerisiano ke totoko e fakaohoohoaga kelea muitui he “lalolagi nai” neke lauia e fanau ha lautolu. (Efeso 2:2, 3) Ti kua nakai kautū tumau e totokoaga ia! Ka nakai liu e tama taane po ke tama fifine he magafaoa Kerisiano ke fekafekau ki a Iehova, kua eke mooli mo “matematekelea” ke he tau matua ne lali ke feaki hake a ia he kupu mooli he Atua.—Fakatai 17:25.

‘Ko e Vahā ke Lahi e Matematekelea’

16. Ko e heigoa e “matematekelea” ne perofeta mai e Iesu?

¹⁶ Ka ko e ha “matematekelea” ne moua i loto he fakamauaga mo e he fanafanau to nakai lahi mahaki ke tuga e taha matematekelea foki kua mua atu e kelea. He perofetaaga ha Iesu hagaao ke he haana haele mai, po ke ha ha hinei, mo e ke he matahiku he fakaotiaga he lalolagi nei, ne pehē a ia: “Ko e vaha ia ke lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki.” (Mata. 24:3, 21) Ne fakakite fakamui e Iesu to hao mai e moto tagata tokologa he ‘matematekelea lahi’ nei. Pete ni ia, to matutaki e fakatokaaga ha Satani ke tau he tauaga fakahiku ke he Tau Fakamoli loto mafola ha Iehova. Nakai fakauaua, to eke ai mo vahā uka ma tautolu oti—tau tagata lalahi katoa mo e fanau ikiiki.

17. (a) Ko e ha kua maeke ia tautolu ke fehagai ke he vahā anoiha mo e mauokafua? (e) Ko e heigoa kua lata ke fakaohooho e onoonoaga ha tautolu ke he fakamauaga mo e tuaga matua?

¹⁷ Mohā ia, kua nakai lata a tautolu ke matakutaku lahi hagaao ke he vahā anoiha. Ko e tau matua ne tua fakamooli ki a Iehova kua lata ke amaamanaki ke moua e puipui fakalataha mo e fanau ikiiki ha lautolu. (Totou Isaia 26:20, 21; Sefa. 2:2, 3; 1 Kori. 7:14) Ka e mogonei, kua fakaohooho he mataala ke he tau aho uka ne nonofo ai a tautolu e puhala manamanatu ha tautolu hagaao ke he fakamauaga mo e tuaga matua he vahā he fakahikuaga nei. (2 Pete. 3:10-13) He puhala ia, ko e tau momoui ha tautolu—pete he nofo tokotaha po kua mau a tautolu, fai tama po ke nakai fai tama—to tamai he moui ha tautolu e lilifu mo e fakaheke ki a Iehova mo e ke he fakapotopotoaga Kerisiano.

[Tau Matahui Tala]

Ko e Puhala he Fakamanatu

• Ko e ha kua nakai lata e tau fuata Kerisiano ke fakatepetepe ke mau?

• Ko e heigoa kua putoia ke he feakiaga he tama?

• Ko e ha ne tokologa e Kerisiano ne nofo tokotaha po ke kaeke kua mau, ti nakai fanafanau?

• Ko e heigoa e “matematekelea” ka liga tupu ke he tau matua Kerisiano?

[Fakatino he lau 17]

Ko e ha kua pulotu ma e tau fuata Kerisiano ke fakatali ato mau?

[Fakatino he lau 18]

Kua lahi e mena ka taute he taane ke lagomatai e hoana ke fai magaaho ke fakalataha ke he tau gahua fakaagaaga

[Fakatino he lau 19]

Ko e ha ne fifili falu hoa Kerisiano ke nakai fai tama?