Fakaalofa he Atua ne Kitia ke he Fakaalofa he Matua Fifine
“To nimo kia he fifine hana tama kai huhu, ke nakai fakaalofa a ia ke he tama ne fanau ai e ia? Mena nimo foki ia lautolu na, ka e nakai ni nimo ia au a koe.”—ISAIA 49:15.
KUA fakapukupuku fakamitaki e tama mukemuke he tau lima he matua fifine haana he leveki e ia. Ko e fakatino he fakaalofa hofihofi mo e ofania. “He totō fakamua e au e tama mukemuke haaku,” he talahau he matua fifine ko Pam, “ne lahi e fakaalofa haaku mo e matagahua ke he tama mukemuke nei.”
He tuga na mooli, ka e peehi he tau kumikumiaga kua fakaohooho lahi mahaki e fakaalofa he matua fifine ke he tupuaga he mukemuke haana. Ko e vala tala ne tohi fakailoa he World Health Organization Programme on Mental Health ne pehē: “Kua fakakite mai he tau kumikumiaga ko e tau mukemuke ne tiaki mo e vevehe kehe mai he tau matua fifine ha lautolu ne nakai fiafia mo e fakaagitau, falu magaaho ne hokotia ke hopoate.” Ne talahau foki he tala nei e taha kumikumiaga ne fakakite ko e tau tama ne moua e fakaalofa mo e mamata ki ai he vahā ikiiki ne hihiga ke lotomatala lahi ka fakatatai mo e tau tama ne fakaheu noa.
Ko Alan Schore, ko e porofesa he manamanatuaga he UCLA School of Medicine he Tau Faahi Kaufakalataha, ne talahau pehē hagaao ke he uho he fakaalofa he matua fifine: “Ko e fakafetuiaga fakamua he tama, ko e fakafetuiaga mo e matua fifine haana, kua tuga ko e fakavēaga, ha kua feaki katoatoa e lotomatala he tama ke lata mo e magaaho ka taute e tau fakafetuiaga oti ne lauia e loto manamanatu ka lahi hake.”
Momoko ai, kua liga fakatupu he gagao fakaagitau, tatalu, po ke falu peehiaga e matua fifine ke fakaheu noa e tama haana po ke “nimo . . . he fifine hana tama kai huhu.” (Isaia 49:15) Ka e lavea ai, nakai pihia oti. Ka e tuga na tufuga pauaki e matua fifine ke fakaalofa ke he tau tama ha lautolu. Ne moua he tau tagata kumikumi ko e magaaho ka fanau e tama, ne malagaki hake e lahi he hormone ne fakahigoa ko e oxytocin ne ha ha i loto he matua fifine, ati laga ai e manava ke fanau mo e lagomatai he magaaho fakamui ke huhua e huhu. Ko e hormone taha nei ne tupu mai he tau tagata taane mo e tau fifine, ne talitonu ai foki ke fakalagalaga ke fakakite e mahani fakaalofa ne nakai fai fakakaupāaga.
Ko e Heigoa e Kamataaga he Fakaalofa?
Ko lautolu ne omoi e taofiaga ke he tupumainoa ne fakaako ko e fakaalofa nakai lotokai, tuga he vahāloto he matua fifine mo e tama haana, ne tupu noa ti kua puipui he fifiliaga pauaki ha kua aoga ai ke he tau tagata. Ma e fakatai, ko e senolo he komopiuta Mothering Magazine ne pehē: “Ko e vala fakamua he uho ulu ha tautolu ne tupu ke lafi ke he vala he uho ulu he manu totolo (reptile) he fakatokaaga ne puna mai e tau logonaaga (limbic system). Ko e vala nei he uho ulu ne fakaatā e tau matua fifine mo e tau mukemuke ha lautolu ke fakafetui fakalataha.”
Mooli ai, ne kua fakakite he tau kumikumiaga kua aoga e matagahua he fakatokaaga ne puna mai e tau logonaaga ha tautolu. Ka kua hako nakai ki a koe ke pehē ko e fakaalofa he matua fifine ma e tama haana ko e fua he vala ne tupu noa he uho ulu he manu totolo?
Manamanatu la ke he taha fakamaamaaga foki. Ne pehē e Tohi Tapu ne tufuga e tau tagata ke he fakatai he Atua, ko e kakano ia, ati maeke e tagata ke fakaata e tau aga he Atua. (Kenese 1:27) Ko e matapatu mahani he Atua ko e fakaalofa. “Ko e tagata kua nakai fakaalofa, kua nakai iloa e ia e Atua,” he tohia he aposetolo ko Ioane. Ko e ha? “Ha ko e Atua ko e fakaalofa a ia.” (1 Ioane 4:8) Fakamolemole mailoga kua nakai pehē e kupu nei he Tohi Tapu kua ha ha he Atua e fakaalofa. Ka e pehē ko e Atua ko e fakaalofa. Ko ia e Punaaga he fakaalofa.
Kua fakamaama pehē he Tohi Tapu e fakaalofa: “Kua fakauka e fakaalofa, to totonu, nakai mahekeheke e fakaalofa, nakai hula e fakaalofa, ti nakai fakatokoluga. Nakai mahani fuafuakelea, nakai kumi e ia hana tau mena, nakai ita vave, nakai talahaua e kelea ke he taha. Nakai fiafia ke he tau mahani kelea, ka e fiafia ni mo e kupu moli; Kua fakauka ke he tau mena oti, kua talia e tau mena oti, kua amaamanaki ke he tau mena oti, kua fakamanavalahi ke he tau mena oti. Nakai tuai oti e fakaalofa.” (1 Korinito 13:4-8) Kua liga hako kia ke talitonu ko e aga mua ue atu nei ko e mena tupu noa mai?
Lauia Fēfē a Koe?
He totou e koe e fakamaamaaga ke he fakaalofa he paratafa i luga, kua manako nakai a koe ke fakakite atu he taha tagata e fakaalofa pihia ki a koe? Kua lata pauaki ni ke pihia e logona haau. Ko e ha? Kakano “ko e fanau he Atua a tautolu.” (Gahua 17:29) Kua talaga a tautolu ke moua mo e fakakite e fakaalofa ia. Ti maeke ia tautolu ke iloa moolioli na hokulo e fakaalofa he Atua ki a tautolu. (Ioane 3:16; 1 Peteru 5:6, 7) Ko e kupu tohi ne fatiaki he kamataaga he vala tala nei ne talahau kua mua ue atu e malolō he fakaalofa he Atua ki a tautolu, mua atu e hokulo ka fakatatai ke he fakaalofa he matua fifine ma e tama haana!
Liga manamanatu a koe: ‘Kaeke ko e Atua pulotu, malolō, mo e fakaalofa, ko e ha ne nakaila fakaoti e ia e matematekelea? Ko e ha ne fakaatā e ia e tau tama ikiiki ke mamate, ke matematekelea hololoa, mo e malona e fua lalolagi he nakai fakaaoga fakamitaki mo e he lotokai?’ Ko e tau hūhū mitaki anei kua lata ke moua e tali fai kakano.
Pete ne tau mena ne talahau he tau tagata nakai talitonu na fai Atua, na maeke ke moua e tau tali mitaki ke he tau hūhū ia. Kua totou miliona e tau tagata he loga e tau motu ne kua moua e tau tali pihia he fakaako e Tohi Tapu mo e Tau Fakamoli a Iehova. Kua uiina e lautolu ne tohi fakailoa e senolo nei a koe ke taute pihia foki. He tupu ki mua e iloilo haau ke he Atua he fakaako haana Kupu mo e tufugatiaaga, to iloa e koe kua nakai mamao mo e nakai uka ke iloa a ia. Ka e liga talitonu a koe to “nakai ni mamao [e Atua] mo tautolu takitokotaha.”—Gahua 17:27.
[Blurb he lau 8]
Kua mua atu e hokulo he fakaalofa he Atua ki a tautolu ke he fakaalofa he matua fifine ma e tama haana