He Fuata Tote a Koe, Fifili ke Fekafekau ki a Iehova
“Kia tumau a koe ke he tau mena kua ako ai e koe, mo e iloa tonuhia e koe.”—2 TIMO. 3:14.
1. Fēfē e onoonoaga a Iehova ke he fekafekauaga he Tau Fakamoli fuata haana?
KO E fekafekau tapu he tau fuata kua aoga lahi ki a Iehova ati fakaohooho e ia e perofetaaga hagaao ki a lautolu. “To eke poa mo loto hāu a tau tagata ke he aho he hāu a malolo,” he lologo he salamo. “Mo e tau mena fulufuluola tapu mai he manava he matafatafa ata he aho; ha i ai ia koe e hahau he hāu a fuata.” (Sala. 110:3) E, kua uho ki a Iehova e tau fuata ne fakamakai ke fekafekau ki a ia.
2. Ko e heigoa e tau fakaohoohoaga fakalalolagi ne fehagai mo e tau fuata ikiiki he vahā nei hagaao ke he vahā anoiha ha lautolu?
2 Ko mutolu ko e tau fuata ikiiki he fakapotopotoaga Kerisiano, kua taute nakai e mutolu e tukuleleaga ki a Iehova? To liga uka he tokologa ke taute e fifiliaga ke fekafekau ke he Atua mooli. Ko e tau takitaki he tau pisinisi, tau faiaoga, mo e falu magaaho ko e tau tagata he magafaoa mo e tau kapitiga ne fakaohooho e tau fuata ikiiki ke tutuli e tau foliaga fakatino. He tutuli he tau fuata ikiiki e tau foliaga fakaagaaga, ne fa mahani e lalolagi ke tuhituhi fakakelea ki a lautolu. Ka ko e tonu hanei ke fekafekau ke he Atua mooli ko e puhala moui ne mua ue atu e mitaki ka taute e koe. (Sala. 27:4) Hagaao ki ai, kia mailoga tolu e hūhū: Ko e ha kua lata ia koe ke fekafekau ke he Atua? Maeke fēfē ia koe ke kautū he muitua ke he moui ne tukulele ke he Atua pete ko e tau mena ka talahau po ke taute he falu? Ko e heigoa e tau kotofaaga homo ue atu he fekafekau tapu kua hafagi ki a koe?
Fekafekau ki a Iehova, ko e Mena Hako ke Taute
3. Lata ke lauia fēfē a tautolu he tufugatia a Iehova?
3 Ko e ha kua lata ia koe ke fekafekau ke he Atua mooli mo e moui? Kua foaki mai he Fakakiteaga 4:11 e matapatu kakano: “[Iehova] na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti, ha ko e hau a finagalo foki ne ha ha i ai a lautolu; mo e eke ai a lautolu.” Ko Iehova ko e Tufuga homo ue atu he tau mena oti kana ne ha ha ai. Ko e fulufuluola ha ia he fua lalolagi! Ko e tau akau, tau fiti, tau manu, tau moana, tau mouga, mo e tau vaitafe—ne taute oti e Iehova e tau mena ia. ‘Kua puke e lalolagi ke he tau mena he Atua,’ he talahau he Salamo 104:24. Ko e fakaaue ha ia ha tautolu ha kua foaki mai e Iehova e tino mo e manamanatuaga ka taute a tautolu ke olioli ke he lalolagi mo e tau mena mitaki i ai! Ti nakai kia lata he loto fakaaue hokulo ma e tufugatiaaga homo ue atu ke omoi a tautolu ke fekafekau ki a ia?
4, 5. Ko e heigoa e tau gahua faka-Atua ne fakatata atu ai a Iosua ki a Iehova?
4 Ko e taha kakano ke fekafekau ki a Iehova kua moua he tau kupu he takitaki Isaraela ko Iosua. Tata ke he matahiku he moui haana, ne pehē a Iosua ke he tau tagata he Atua: “Kua iloa e mutolu mo e ha mutolu a tau loto katoa, mo e ha mutolu a tau agaaga katoa, nakai to ha kupu taha he tau kupu mitaki oti ne vagahau mai ai e Iehova ha mutolu a Atua kia mutolu; kua hoko oti kia mutolu.” Ko e ha ati maeke ia Iosua ke talahau e mena nei?—Iosua 23:14.
5 He vahā tama ne tupu hake i Aikupito, liga ne iloa e Iosua e maveheaga ha Iehova ke foaki ke he tau Isaraela e motu ma lautolu ni. (Kene. 12:7; 50:24, 25; Esoto 3:8) Ti kitia ai e Iosua he kamata a Iehova ke fakamooli e maveheaga ia he tamai e Tau Malaia Hogofulu ki Aikupito mo e fakamakamaka ki a Farao ulukafilo ke toka e fanau ha Isaraela ke ō. Ko Iosua foki mo lautolu ne laveaki mai he Tahi Kula ati kitia e ia e tahi ne folofua a Farao mo e kau haana. He fenoga loa “ke he tutakale lahi mo e matakutakuina” i Sinai, ne kitia e Iosua e puhala ne foaki e Iehova e tau mena oti ke lata mo e tau Isaraela. Ne nakai taha ia lautolu ne mate he fia inu po ke he hoge. (Teu. 8:3-5, 14-16; Iosua 24:5-7) He hoko mai e magaaho ma e tau Isaraela ke tau ke he tau motu malolō i Kanana mo e eke ma lautolu e Motu he Maveheaga, ne mailoga e Iosua e puhala ne lalago he Atua ne tapuaki e ia mo e falu Isaraela a lautolu ke he gahua nei.—Iosua 10:14, 42.
6. Ko e heigoa ka lagomatai a koe ke feaki e manako ke fekafekau ke he Atua?
6 Ne iloa e Iosua kua fakamooli e Iehova e tau maveheaga Haana. Ko e mena ia, ne fakapuloa e Iosua: “Ko au mo e haku a magafaoa, to fekafekau a mautolu kia Iehova.” (Iosua 24:15) Ka e kua a koe? He magaaho ka manamanatu a koe ke he tau maveheaga kua fitā he fakamooli he Atua mooli mo e falu ne nakaila fakamooli ia, kua manako nakai a koe ke fekafekau ki a ia tuga ne taute e Iosua?
7. Ko e ha ko e lakaaga aoga lahi ke papatiso he vai?
7 He manamanatu ke he tau gahua tufuga ha Iehova mo e fakaata e tau maveheaga homo ue atu mo e mauokafua katoatoa haana kua lata ke omoi a koe ke nakai ni taute e tukuleleaga ki a Iehova ka kia fakakite e tukuleleaga ia he tanumia ke he vai. Ko e papatisoaga ko e lakaaga aoga lahi ma lautolu ne manako ke fekafekau ke he Atua. Kua fakakite fakamahino mai he ha tautolu a Fakafifitaki, ko Iesu. Ato kamata agataha e gahua haana ko e Mesia, ne finatu a ia ki a Ioane ko e Papatiso ke papatiso. Ko e ha ne taute e Iesu e lakaaga ia? “Ko e mena nakai hifo mai au he lagi ke eke ni hoku loto,” he talahau fakamui e ia, “ka ko e finagalo hana ne fakafano mai au.” (Ioane 6:38) Ke fakakite e poa fakatagata haana ke taute e finagalo he haana Matua, ne papatiso a Iesu.—Mata. 3:13-17.
8. Ko e ha ne fifili a Timoteo ke tapuaki ke he Atua, ti ko e heigoa kua liga lata ia koe ke taute?
8 Mailoga foki e mena ne tupu ki a Timoteo, ko e fuata Kerisiano ne fai magaaho he mole ne foaki e Iehova ki ai e tau gahua mo e tau kotofaaga loga. Ko e ha ne fifili a Timoteo ke tapuaki ke he Atua mooli? Ne talamai he Tohi Tapu ki a tautolu ‘kua ako ai a ia ke he tau mena mo e iloa tonuhia ai.’ (2 Timo. 3:14) Kaeke kua fakaako e koe e Kupu he Atua ti kua iloa tonuhia kua mooli e tau fakaakoaga i loto, kua ha ha tuai a koe he tuaga ne tatai mo e ha Timoteo. Mogonei, kua lata ia koe ke taute e fifiliaga. Ko e ha he tala age ke he tau matua haau e mena ne manako a koe ke taute? Fakalataha mo e tau motua he fakapotopotoaga, kua maeke ia lautolu ke lagomatai a koe ke maama e tau poakiaga faka-Tohiaga Tapu ma e papatisoaga.—Totou Gahua 8:12.
9. Liga lauia fēfē e falu he magaaho ka taute e koe e lakaaga ke papatiso?
9 Kaeke ke papatiso a koe, to eke e mena ia mo kamataaga mitaki lahi ke fekafekau ke he Atua mooli. He taute e lakaaga nei, kua hū atu a koe ke he poitufi manava loa ne toka ai e tau palepale he moui tukulagi ti moua foki e fiafia mogonei he taute e finagalo he Atua. (Hepe. 12:2, 3) To tamai foki e koe e fiafia ke he tau tagata he magafaoa haau ne kua fitā ke he poitufi mo e ke he tau kapitiga haau i loto he fakapotopotoaga Kerisiano. Ka e mua atu e aoga, to fakafiafia e koe e loto a Iehova. (Totou Tau Fakatai 23:15.) Mooli, to liga nakai maama he falu ko e ha ne taute e koe e fifiliaga ke tapuaki ki a Iehova, ti liga fakauaua a lautolu ke he fifiliaga haau. Liga totoko foki a lautolu ki a koe. Ka e maeke ia koe ke kautū ke he tau paleko nei.
Magaaho ka Fakauaua po ke Totoko he Falu a Koe
10, 11. (a) Ko e heigoa e tau hūhū ka hūhū atu he tau tagata hagaao ke he fifiliaga haau ke fekafekau ke he Atua? (e) Ko e heigoa ka ako e koe mai he puhala ne tali atu a Iesu ke he tau hūhū hagaao ke he tapuakiaga mooli?
10 Ko e fifiliaga haau ke fekafekau ki a Iehova ka liga fakaofo ke he tau kapitiga he aoga, tau katofia, mo e tau magafaoa haau. Ti liga hūhū atu a lautolu ma e kakano ne fifili a koe ke muitua ke he puhala nei ti fakauaua hagaao ke he tau mena ne talitonu e koe. Ti kua lata ke tali fēfē a koe? Mooli, kua lata ia koe ke filifilia e manamanatuaga mo e tau logonaaga haau ke maeke ke fakamaama e tau kakano ma e haau a fifiliaga. Mo e he tali e tau hūhū hagaao ke he tau taofiaga haau, ko e heigoa foki e tau fakafifitakiaga mitaki lahi ka muitua a koe ki ai mai he fakafifitakiaga ha Iesu?
11 He hūhū toko he tau takitaki lotu Iutaia a Iesu hagaao ke he liu tu mai, ne fakakite e ia ki a lautolu e kupu tohi ne nakai mailoga e lautolu. (Esoto 3:6; Mata. 22:23, 31-33) He hūhū e tohikupu ki a ia ko e heigoa e poakiaga ne mua ue atu, ne totou e Iesu ki a ia e tau kupu Tohi Tapu kua latatonu. Ne loto fakaaue e tagata ia ki a Iesu ma e tali Haana. (Levi. 19:18; Teu. 6:5; Mare. 12:28-34) Ha ko e puhala ne fakaaoga e Iesu e tau Tohiaga Tapu mo e puhala vagahau haana ne “veveheua ai e moto tagata ia ia,” ti nakai maeke he tau tagata totoko ke fakahagahaga kelea a ia. (Ioane 7:32-46) He magaaho ka tali e koe e tau hūhū hagaao ke he tua haau, kia fakaaoga e Tohi Tapu ti tali “mo e mahani molu mo e hokulo e fakalilifu.” (1 Pete. 3:15) Kaeke kua nakai iloa e koe e tali ke he hūhū, talahau kua nakai iloa e koe ka e ole ke kumikumi a koe ki ai. Ti kumikumi ke he matakupu he fakaaoga e Watch Tower Publications Index po ke Watchtower Library he CD-ROM. He tauteute fakamitaki, to ‘iloa e koe ke tali fakatonu atu.’—Kolo. 4:6.
12. Ko e ha kua nakai lata ia koe ke toka e favaleaga ke fakalolelole a koe?
12 Liga to nakai fehagai hokoia a koe mo e tau hūhū hagaao ke he fifiliaga mo e tau taofiaga haau. Ha ko Satani ko e Tiapolo, ko e fī he Atua, hane pule ke he lalolagi. (Totou 1 Ioane 5:19.) Ko e mena nakai hako ke amanaki ke nava po ke talia mai he tau tagata oti, ti liga fakafehagai a koe ke he totokoaga. Liga to “vagahau kelea” ai falu tagata ki a koe ti liga taute pihia tumau. (1 Pete. 4:4) Ka e manatu, kua nakai tokotaha a koe. Ne matematekelea foki a Iesu Keriso ke he favaleaga. Ti pihia foki e aposetolo ko Peteru, ati tohia e ia: “Ko e tau fakahelehele na e, aua neke ofo a mutolu ke he kamatamata[a]ga tuga e afi [fakamamahi], kua hoko kia mutolu ke eke mo kamatamataaga kia mutolu, tuga ne hoko ha mena fou kia mutolu; ka kia fiafia a mutolu ha kua fakafetui a mutolu mo Keriso ke he hana tau mamahi.”—1 Pete. 4:12, 13.
13. Ko e ha ne fiafia e tau Kerisiano he magaaho ka favale ki a lautolu?
13 He fakauka ke he favaleaga po ke totokoaga ha ko e Kerisiano ko e kakano mitaki ke fiafia. Ko e ha? Ha ko e mena ka moua e taliaaga he lalolagi kua fakakite kua moui a koe hagaao ke he tau tutūaga a Satani—nakai he Atua. Ne hataki e Iesu: “Oi fakaalofa kia mutolu ka vagahau fakamitaki e tau tagata oti kia mutolu! ha ko e mena eke pihia ni ha lautolu a tau matua ke he tau perofeta pikopiko.” (Luka 6:26) Kua fakakite he ita ha Satani mo e lalolagi haana e favaleaga ki a koe ha kua fekafekau a koe ki a Iehova. (Totou Mataio 5:11, 12.) Ti, he ‘ekefakakelea ha ko e higoa a Keriso’ ko e taha mena ke fiafia ki ai.—1 Pete. 4:14.
14. Ko e heigoa e tau mena mitaki ka fua mai he tumau a koe ke tua fakamooli ki a Iehova pete ko e favaleaga?
14 He magaaho ka tumau a koe ke tua fakamooli ki a Iehova pete ko e totokoaga, kua ha ha ai fā e mena mitaki ka fua mai ai. Kua foaki e koe e fakamooliaga hagaao ke he Atua mo e Tama haana. Lagomatai e koe haau a tau matakainaga Kerisiano ha ko e haau a fakauka tua fakamooli. Ko e falu ne kitekite mai ne nakai iloa a Iehova to liga omoomoi ke kumi ki a ia. (Totou Filipi 1:12-14.) Ti ko e mailoga e koe e puhala ne foaki mai e Iehova e malolō ke fakauka ke he tau kamatamata, to tupu tolomaki e fakaalofa haau ki a ia.
Kua Hafagi ki a Koe e “Pa Gutuhala kua Lahi”
15. Ko e heigoa e “pa gutuhala kua lahi” ne hafagi ke he aposetolo ko Paulo?
15 Hagaao ke he fekafekauaga haana i Efeso, ne tohia he aposetolo ko Paulo: “Kua hafagi kia au e pa gutuhala kua lahi mo e aoga lahi.” (1 Kori. 16:8, 9) Ko e pa gutuhala kua lahi ne takitaki ke he tau gahua he fakamatala e tala mitaki mo e taute tutaki ke he maaga ia. He huhū ki loto he pa gutuhala ia, ne lagomatai e Paulo e tokologa ke fakaako hagaao ki a Iehova mo e tapuaki ki a Ia.
16. Huhū atu fēfē a lautolu ne fakauku ki loto he “pahala kua hafagi” he 1919?
16 He 1919 ne tuku he lilifu ko Iesu Keriso e “pahala kua hafagi” ki mua ha lautolu ne fakauku. (Fakakite. 3:8) Ne huhū a lautolu ki loto he pa gutuhala ia mo e kamata ke fakamatala e tala mitaki ti fakaako e kupu mooli he Tohi Tapu ne nakai la pihia fakamua. Ko e heigoa e fua he fekafekauaga ha lautolu? Nukua hokotia mogonei e tala mitaki ke he tau kalakala oti he lalolagi, ti kavi ke fitu e miliona tagata ne kua moua e amaamanakiaga ke moui tukulagi he lalolagi foou he Atua.
17. Hū atu fēfē a koe ke he “pa gutuhala kua lahi mo e aoga lahi”?
17 Ko e “pa gutuhala kua lahi” ne hafagi fakalahi agaia ke he tau fekafekau oti kana ha Iehova. Ko lautolu ne huhū ki loto kua moua e fiafia mo e mauokafua he gahua fakalahi ke fakamatala e tala mitaki. Ko mutolu ko e tau fekafekau fuata ikiiki ha Iehova, kua fakatokoluga fēfē e mutolu e aoga he kotofaaga nei ne mua ue atu ke lagomatai falu ke “talia e vagahau mitaki”? (Mare. 1:14, 15) Kua manamanatu nakai a koe ke eke mo paionia tumau po ke paionia fakakū? Ko e tā he Fale he Kautu, fekafekau ke he Peteli, mo e ke he fonua misionare ko e falu kotofaaga kua liga hafagi ke he tokologa ia mutolu. Ha kua mole ne fai e lalolagi kelea a Satani, kua uhouho ai e mafiti he tau aho oti ke lata ke hū ki loto he tau puhala nei he fekafekauaga he Kautu. To hū atu nakai a koe he “pa gutuhala kua lahi” he fai magaaho agaia?
‘Kamata mo e Kitekite kua Mitaki a Iehova’
18, 19. (a) Ko e heigoa ne lagomatai a Tavita ke fakamalolō ke fekafekau ki a Iehova? (e) Ko e heigoa ne fakakite kua nakai tokihala a Tavita he fekafekau ke he Atua?
18 Ne uiina he salamo ne omoomoi e falu ke ‘kamata mo e kitekite kua mitaki a Iehova.’ (Sala. 34:8) He vahā tama ne leveki mamoe ai e Patuiki ko Tavita ha Isaraela i tuai, ne fakahao e Iehova a ia mai he tau manu favale. Ne lalago he Atua a ia he tau a ia mo Koliato ti laveaki mai a ia he falu matematekelea foki. (1 Samu. 17:32-51; Sala. 18, mataulu) Ha ko e fakaalofa-totonu ue atu he Atua, ati omoi a Tavita ke tohia: “Iehova na e, haku Atua, kua loga e tau mena kua eke e koe, ko e hau a tau mana mo e hau a tau manatu kia mautolu, nakai maeke ke talahau atu kia koe.”—Sala. 40:5.
19 Ne tupu hokulo e fakaalofa a Tavita ma Iehova ti manako a Tavita ke fakaheke ki a Ia mai he loto mo e manamanatuaga katoa haana. (Totou Salamo 40:8-10.) He mole e tau tau loga, ne nakai tokihala a Tavita he fakaaoga e moui haana ke tapuaki ke he Atua mooli. He moui mo e mahani Atua fakamooli ko e koloa uho ne mua atu ki a ia—ko e punaaga he fiafia ne nakai fai fakatataiaga. He vahā fuakau, ne pehē a Tavita: “Ko koe kua amaamanaki au ki ai, ma Iki na e, ko Iehova, ne tua ki ai au tali mai he vaha tote. Ko e Atua na e, aua neke tiaki e koe au.” (Sala. 71:5, 18) Ne holo ki mua e malolō he falanaki ha Tavita ki a Iehova mo e kapitiga haana mo Ia, pete he lolelole fakahaga e malolō he tino haana.
20. Ko e ha e fekafekau ke he Atua ko e puhala ne mua ue atu e mitaki ke fakaaoga he moui haau?
20 Ko e moui ha Iosua, Tavita, mo Timoteo ne lafi ke he fakamooliaga ke fekafekau ki a Iehova ko e puhala ne mua atu e mitaki ke fakaaoga aki e moui haau. Ko e tau monuina kūkū ne mai he gahua tupe he lalolagi nei kua nakai teitei ke tatai mo e tau mena aoga tukulagi kua moua e koe he ‘fekafekau kia Iehova mo e haau a loto katoa mo e haau a moui katoa.’ (Iosua 22:5) Kaeke kua nakaila taute e koe e tukuleleaga ki a Iehova he liogi, kia hūhū hifo, ‘Ko e heigoa la ne kua taofi au mai he eke mo taha he Tau Fakamoli a Iehova?’ Kaeke kua fitā a koe he eke mo tagata tapuaki ne papatiso ki a Iehova, kua manako nakai a koe ke fakamalikiti e fiafia he moui haau? Kia fakatolomaki ā e fekafekauaga haau, ti matutaki ke holo ki mua fakaagaaga. To fakakite he vala tala ne mui mai e puhala ka tupu fakaagaaga a koe he muitua ke he fakafifitakiaga he aposetolo ko Paulo.
To Tali Fēfē e Koe?
• Talahau ua e kakano ne kua lata ia tautolu ke fekafekau ke he Atua.
• Ko e heigoa ne lagomatai a Timoteo ke fifili ke fekafekau ke he Atua?
• Ko e ha kua lata a koe ke mauokafua he fehagai mo e favaleaga?
• Ko e heigoa e tau kotofaaga he fekafekauaga kua liga hafagi ki a koe?
[Fakatino he lau 18]
He fekafekau ki a Iehova ko e puhala moui ne mua atu e mitaki
[Fakatino he lau 19]
Maeke nakai a koe ke tali e tau hūhū hagaao ke he tua haau?