Tau Mahani kua Lata ia Tautolu ke Tutuli

“Kia tutuli e tututonu, mo e mahani Atua, mo e tua, mo e fakaalofa, mo e fakauka, mo e mahani molu.”—1 TIMO. 6:11.

1. Fakatai e kakano he kupu “tutuli.”

KO E heigoa e manatu haau ka logona e koe e kupu “tutuli”? Liga manatu e koe e vahā a Mose ne “tutuli” he tau kautau Aikupito a Isaraela, ti fakahiku ni ke mamate he Tahi Kula. (Esoto 14:23) Po ke liga manatu e koe e hagahaga kelea ne fehagai mo e tagata ne fakapakia totamaki ti mate taha tagata i Isaraela i tuai. Ne lata a ia ke hola fakamafiti atu ke he taha he tau maaga he huaga nukua kotofa ne ono. Neke “tutuli e ia kua eke ke lukutoto a ia ne keli e tagata, ka kua mamahi hana loto, mo e [liga] moua atu a ia . . . ti keli e ia a ia.”—Teu. 19:6.

2. (a) Ko e heigoa e palepale ne uiina he Atua e falu Kerisiano ke tutuli? (e) Ko e heigoa e amaamanakiaga ne foaki e Iehova ke he laulahi he tau Kerisiano he vahā nei?

² He fakatatai mo e tau fakataiaga he Tohi Tapu i luga, manamanatu ke he aga atihake ne ha ha he aposetolo ko Paulo: “Kua poi mau atu au ke he fakamailoga ke moua ai e palepale ne ui mai ai e Atua mai luga kia au ha ia Keriso Iesu.” (Filipi 3:14) Ne fakakite he Tohi Tapu ko e katoatoa he tau Kerisiano fakauku ne 144,000, nukua putoia a Paulo nukua moua e palepale ia he moui he lagi. To pule fakalataha a lautolu mo Iesu Keriso he Pule Meleniamu ke he lalolagi. Ko e foliaga homo ue atu mooli ki a lautolu ia ne uiina he Atua ke tutuli ki ai! Ko e laulahi he tau Kerisiano mooli he vahā nei mogoia ne kehe e amaamanakiaga, po ke foliaga. Ne foaki fakaalofa e Iehova ki a lautolu e mena ne fakagalo e Atamu mo Eva, ko e amaamanakiaga he moui tukulagi ke he malolō mitaki katoatoa he lalolagi parataiso.—Fakakite. 7:4, 9; 21:1-4.

3. Fakakite fēfē e tautolu e loto fakaaue ma e totonu noa he Atua?

³ Nakai moua he tau tagata agahala e moui tukulagi mai he tau laliaga nakai mitaki katoatoa ke taute e mena hako. (Isaia 64:6) Maeke ke moua e moui tukulagi kaeke ke tua ke he foakiaga fakaalofa he Atua he fakamouiaga ne puhala ia Iesu Keriso. Ko e heigoa ha tautolu ka taute ke fakakite e loto fakaaue ma e totonu noa he Atua? Taha e mena, ko e omaoma ha tautolu ke he poakiaga nei: “Kia tutuli e tututonu, mo e mahani Atua, mo e tua, mo e fakaalofa, mo e fakauka, mo e mahani molu.” (1 Timo. 6:11) He manamanatu ke he tau mahani nei ka liga lagomatai a tautolu ke fifili fakalahi ke tumau e tutuli ‘fakamalolo’ ki ai.—1 Tesa. 4:1.

“Kia Tutuli e Tututonu”

4. Ko e ha kua iloa mooli e tautolu ko e tutuli he “tututonu” kua aoga lahi, ti ko e heigoa e tau lakaaga fakamua kua lata ke taute he tagata?

⁴ He tau tohi ua haana ki a Timoteo, ne tohi he aposetolo ko Paulo e tau mahani kua lata ke tutuli, ti kua totoku fakamua tumau e ia e “tututonu” he tau magaaho takitaha. (1 Timo. 6:11; 2 Timo. 2:22) Lafi ki ai, he falu kupu he Tohi Tapu ne fatiaki tumau ke fakamalolō a tautolu ke tutuli e tututonu. (Fakatai 15:9; 21:21; Isaia 51:1) Ko e puhala ke kamata ke taute pihia he “iloa . . . e Atua moli tokotaha ni, katoa mo ia ne fakafano mai e [ia], ko Iesu Keriso haia.” (Ioane 17:3) He tutuli e tututonu ka fakalagalaga e tagata—ke tokihala he tau agahala kua mole mo e “mafokifoki” ke maeke ke taute e finagalo he Atua.—Gahua 3:19.

5. Ko e heigoa kua lata ia tautolu ke taute ke moua mo e fakatumau e tuaga tututonu mo e Atua?

⁵ Totou miliona ne tutuli mooli e tututonu ne tukulele e tau momoui ha lautolu ki a Iehova mo e fakamailoga e tukuleleaga ia he papatiso ke he vai. Kaeke ko e Kerisiano papatiso a koe mogonei, kua manamanatu nakai a koe ke he puhala kua lata mo e moui haau, ti liga fakakite ai kua tutuli tumau e koe e tututonu? Ko e taha vala he mena ia ko e iloa haau mai he Tohi Tapu ke he “tau mena mitaki mo e tau mena kelea” ka fehagai mo e tau fifiliaga he moui. (Totou Heperu 5:14.) Ma e fakatai, kaeke ko e Kerisiano nofo tokotaha a koe kua motua tuai ke mau, kua fifili katoatoa nakai a koe ke kalo kehe he fakatupu e matutakiaga loto fakavihi mo e tagata ne nakai ko e Kerisiano papatiso? Kua pihia a koe kaeke kua tutuli e koe e tututonu.—1 Kori. 7:39.

6. Ko e heigoa ne putoia he tutuli mooli e tututonu?

⁶ Ko e tututonu kua kehe mai he fia tututonu po ke ‘tututonu ke lahi ue atu.’ (Fakama. 7:16) Ne hataki e Iesu ke ua fakakite ha puhala tututonu pihia ke tuga kua mua atu ke he falu. (Mata. 6:1) Ko e tutuli mooli he tututonu kua putoia e loto—ko e fakahako he tau manatu, aga, logonaaga, mo e tau manako hepe. Kaeke ke fakatumau a tautolu ke taute e mena nei, to liga nakai taute e tautolu e tau agahala hagahaga kelea. (Totou Tau Fakatai 4:23; fakatatai Iakopo 1:14, 15.) Mua atu, to fakamonuina e Iehova a tautolu mo e lagomatai a tautolu ke he tutuliaga ha tautolu he falu mahani aoga faka-Kerisiano.

“Kia Tutuli . . . e Mahani Atua”

7. Ko e heigoa e “mahani Atua”?

⁷ Kua putoia he mahani Atua e tukulele mo e fakamooli mauokafua. Ne talahau he taha tohi fakamaama he Tohi Tapu ko e kupu Heleni ne fakaliliu “mahani Atua” ne fakamaama “ko e ofania malolō mo e mitaki he matakutaku Atua.” Ne fa kaumahala e tau Isaraela ke fakakite e mahani Atua pihia, tuga he kitia he tau gahua liuliu ha lautolu ti pihia foki he mole e fakatokanoa he Atua a lautolu mai i Aikupito.

8. (a) Ko e heigoa e hūhū ne lagā mai he agahala ha Atamu? (e) Fakakite fēfē e tali ke he “mena galo” nei?

⁸ He afe e tau tau he mole e agahala he tagata mitaki katoatoa ko Atamu, ne lagā mai e hūhū, “Maeke nakai ha tagata ke fakatātā e mahani Atua ne mitaki katoatoa?” He loga e senetenari kua mole, nakai fai tagata agahala ne maeke ke moui ke he mahani Atua mitaki katoatoa. Ka ko e magaaho tonu ni ha Iehova, ne fakakite e ia e tali ke he “mena galo” nei. Ne hiki e ia e moui he Tama fuataha haana he lagi ke he nofoaga tama a Maria ke fanau ko e tagata mitaki katoatoa. Tali mai he moui haana he lalolagi mo e putoia e mate fakamā haana, ne fakakite e Iesu e kakano he tukulele malolō mo e fakamooli mauokafua ke he Atua mooli. Ne fakakite he tau liogi haana e fakalilifu ma e haana Matua fakahele he lagi. (Mata. 11:25; Ioane 12:27, 28) Ti, omoomoi fakaagaaga e Iehova a Paulo ke vagahau hagaao ke he “mahani Atua” he fakamaama e puhala moui mitaki ha Iesu.—Totou 1 Timoteo 3:16.

9. Tutuli fēfē e tautolu e mahani Atua?

⁹ He tuaga agahala ha tautolu, kua nakai fakakite e tautolu e mitaki katoatoa he mahani Atua. Ka e maeke ia tautolu ke tutuli ai. Kua lata mogoia ia tautolu ke muitua fakatata ke he fakafifitakiaga he Keriso. (1 Pete. 2:21) To nakai tuga e tau tagata fakatupua a tautolu ne ‘ha i ai e gati he mahani Atua, ka kua tiaki e malolo ne toka ai.’ (2 Timo. 3:5) Nakai kakano e mena nei kua nakai fai matutakiaga e mahani Atua mooli ke he foliga he tino. Fai kakano lahi. Tuga anei, he fifili e tautolu e tapulu mau po ke fifili e mena ke tui he fano ke fakatau, kua lata e foliga ha tautolu ke lagotatai tumau mo e talahauaga ha tautolu “ke mahani Atua.” (1 Timo. 2:9, 10) E, ko e tutuli he mahani Atua kua lata ke manamanatu ke he tau tuaga tututonu he Atua he tau momoui ha tautolu he tau aho takitaha.

“Kia Tutuli . . . e Tua”

10. Ko e heigoa kua lata ia tautolu ke taute ke fakatumau e tua ha tautolu ke malolō?

¹⁰ Totou Roma 10:17. Ke feaki mo e fakatumau e tua malolō, kua lata e Kerisiano ke manamanatu fakahokulo tumau ke he tau kupu mooli uho he Kupu he Atua. Kua foaki he “fekafekau fakamoli mo e loto matala” e tau tohi mitaki loga. Tolu e tohi kehe lahi Ko e Tagata Mua Ue Atu ne Moui, Learn From the Great Teacher, mo e “Come Be My Follower,” ko e tau tohi ne talaga ke lagomatai a tautolu ke iloa mitaki a Keriso ti maeke mogoia ke muitua ki a ia. (Mata. 24:45-47) Kua fakatoka foki he vahega fekafekau e tau feleveiaaga, tau toloaga, mo e tau fonoaga, ti loga ai ne fakamaama e “kupu he [Keriso].” Kitia nakai e koe ha puhala ka maeke ia koe ke fakaaoga fakalahi e tau mena nei ke “au atu ai he manamanatu” ke he mena ne foaki mai he Atua?—Hepe. 2:1.

11. Ko e heigoa e aoga he liogi mo e omaoma ne taute ma e tua ha tautolu?

¹¹ Ko e liogi taha lagomataiaga ne fakatupu e tua malolō. Ne lagataha e ole e tau tutaki ha Iesu ki a ia: “Kia fakalahi e koe ha mautolu a tua.” Maeke ia tautolu ke ole ke he Atua ke taute pihia foki. (Luka 17:5) Ke moua ai, kua lata ia tautolu ke liogi ma e lagomatai he agaaga tapu he Atua; ko e tua ko e taha vala he “fua he [a]gaga.” (Kala. 5:22) Lafi ki ai, ko e omaoma ke he tau poakiaga he Atua kua fakamalolō e tua ha tautolu. Tuga anei, kua liga omoi ai a tautolu ke fakalahi e gahua fakamatala ha tautolu. To liga fakatupu ia tautolu e fiafia lahi. Ti ko e fakaata e tautolu e tau monuina ne mai he “kumikumi fakamua . . . ke he kautu he Atua mo e hana tututonu,” to tupu e tua ha tautolu.—Mata. 6:33.

“Kia Tutuli . . . e Fakaalofa”

12, 13. (a) Ko e heigoa e poakiaga foou a Iesu? (e) Ko e heigoa e tau puhala aoga kua lata ia tautolu ke tutuli e fakaalofa tuga he Keriso?

¹² Totou 1 Timoteo 5:1, 2. Ne foaki e Paulo e fakatonuaga aoga ke he puhala kua maeke he tau Kerisiano ke fakafeofanaki. Kua lata e mahani Atua ha tautolu ke putoia e omaoma ha tautolu ke he poakiaga foou a Iesu ke “feofanaki” tuga he fakaalofa a ia ki a tautolu. (Ioane 13:34) Ne talahau he aposetolo ko Ioane: “Ko e tagata kua toka ki ai e koloa he lalolagi, kua kitekite foki e ia ke he matakainaga hana kua nofogati ka e pa atu hana loto kia ia, kua nofo fefe e fakaalofa ke he Atua ke he loto hana?” (1 Ioa. 3:17) Manatu nakai e koe e tau magaaho ne fakatātā e koe e fakaalofa he puhala aoga?

¹³ Ko e taha puhala ke tutuli e fakaalofa ko e fakamagalo, nakai tanaki e tau fakafualoto ke he tau matakainaga ha tautolu. (Totou 1 Ioane 4:20.) Ka kua manako a tautolu ke muitua ke he fakatonuaga omoomoi nei: “Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a [Iehova] kia mutolu, kia pihia foki a mutolu.” (Kolo. 3:13) Fai tagata nakai he fakapotopotoaga nukua lata ia koe ke fakagahua e fakatonuaga nei ki ai? To fakamagalo nakai e koe a ia?

“Kia Tutuli . . . e Fakauka”

14. Ko e heigoa ha tautolu ne ako mai he fakapotopotoaga i Filatelefaia?

¹⁴ Ko e taha mena ke eketaha a tautolu ke he foliaga kū ka ko e taha mena foki kaeke ke uka e foliaga ke moua po ke mamao ligo ke he mena ne amanaki a tautolu ki ai. Maama ai, ko e tutuli e foliaga he moui tukulagi kua lata mo e fakauka. “Kua taofi e koe e kupu he haku a fakauka, ko e mena ia ke taofi ai foki e au a koe ke he magaaho kamatamata” he tala age he Iki ko Iesu ke he fakapotopotoaga i Filatelefaia. (Fakakite. 3:10) Mooli, ne fakaako e Iesu e lata ke fakauka—ko e mahani kua lagomatai a tautolu ke nakai mahala ka fehagai mo e tau mena uka mo e tau kamatamata. Ko e tau matakainaga he fakapotopotoaga he senetenari fakamua i Filatelefaia kua liga fakakite e fakauka kua kehe lahi mahaki he tau kamatamata loga he tua. Ti, fakamafana e Iesu a lautolu ke he falu lagomatai foki ma e tau kamatamata lalahi atu i mua.—Luka 16:10.

15. Ko e heigoa ne fakaako e Iesu hagaao ke he fakauka?

¹⁵ Ne iloa e Iesu to fehagai e tau tutaki haana mo e fakavihia mai he tau magafaoa nakai tua mo e he lalolagi, ti maeke ia ia ke fakamalolō a lautolu ke he ua e magaaho ke he puhala nei: “Ko ia ka tumau ato hoko ke he fakahikuaga, to fakamoui na ia.” (Mata. 10:22; 24:13) Ne fakakite foki e Iesu he magaaho ia ke he tau tutaki haana na maeke ke moua e malolō kua lata ke fakauka. He taha fakataiaga, ne fakatai e ia e kelekele patu ki a lautolu ne “fanogonogo ke he kupu [he Atua], ti talia ai mo e fiafia” ka e ō kehe ai ka fehagai mo e tau kamatamata he tua. Pete ia, ne fakatai e ia e tau tutaki fakamooli haana ke he kelekele mitaki ha kua “[“taofi mau,” NW]” ke he kupu he Atua mo e “fua mai e tau fua ke he fakauka.”—Luka 8:13, 15.

16. Ko e heigoa e foakiaga fakaalofa ne lagomatai e tau miliona ke fakauka?

¹⁶ Mailoga nakai e koe e mena galo ke he fakauka? Kua lata ia tautolu ke “taofi mau” ke he kupu he Atua, he fakatumau ai ke moui he tau loto mo e tau manamanatuaga ha tautolu. He moua e New World Translation of the Holy Scriptures—ko e Tohi Tapu ne hakotika e fakaliliuaga mo e mukamuka ke totou—ne loga fakahaga e tau vagahau ne moua ai ti kua latatonu ai mo e maeke ke totou. Ko e manamanatu fakahokulo ke he vala he Kupu he Atua he tau aho oti ka lagomatai a tautolu ke moua e malolō kua lata ke fakatumau e fua mai “ke he fakauka.”—Sala. 1:1, 2.

“Kia Tutuli . . . e Mahani Molu” mo e Mafola

17. (a) Ko e ha ne aoga lahi e “mahani molu”? (e) Fakakite fēfē e Iesu kua mahani molu a ia?

¹⁷ Nakai fai tagata ne olioli ka tukupau ke he taha mena ne nakai talahau po ke taute e ia. Ko e aga pauaki he tau tagata ke tali ita atu ke he tuhituhi nakai hako. Ko e mitaki ha ia ke fakakite e “mahani molu”! (Totou Tau Fakatai 15:1.) Kua lata ke lahi e malolō ke mahani molu ka fehagai mo e tuhituhi nakai hako. Ne fakatoka e Iesu Keriso e fakafifitakiaga mitaki katoatoa ke he mena nei. “Ko ia ne amuamu ki ai, ka e nakai amuamu atu ke taui atu ne fakamamahi a ia ka e nakai fakamatakutaku atu, ka e tuku atu a lautolu kia ia kua fakafili fakatonu.” (1 Pete. 2:23) Kua nakai amanaki a tautolu ke taute fakamitaki e mena nei tuga ne taute e Iesu, ka e maeke nakai ia tautolu ke fakaholo fakalahi ki mua ke hokotia ke fakakite e mahani molu?

18. (a) Ko e heigoa e mitaki kua moua mai he mahani molu? (e) Ko e heigoa falu mahani kua tomatoma ki a tautolu ke tutuli?

¹⁸ He fifitaki ki a Iesu, “kia mautali . . . ke tali atu” ke he tau taofiaga ha tautolu “mo e mahani molu.” (1 Pete. 3:15) E, kua puipui he mahani molu ha tautolu e tau fekehekeheaki he tau manatu mai he mafiti ke taufetoko ita, mo e tau tagata ne feleveia mo tautolu he fonua mo e tau matakainaga talitonu. (2 Timo. 2:24, 25) Kua lagomatai lahi e mahani molu ke he fiafia ha tautolu he mafola. Liga ko e kakano haia he tohi ke uaaki ha Paulo ki a Timoteo, ne tohi fakalataha e “mafola” mo e tau mahani ke tutuli ki ai. (2 Timo. 2:22; fakatatai 1 Timoteo 6:11.) E, ko e “mafola” ko e taha he tau fua nukua fakamalolō he tau Tohiaga Tapu ki a tautolu ke tutuli.—Sala. 34:14; Hepe. 12:14.

19. He mole atu e fakatutala ke he fitu e mahani faka-Kerisiano, ko e heigoa haau kua fifili ke tutuli, mo e ko e ha?

¹⁹ Kua fakatutala a tautolu ke he fitu e mahani faka-Kerisiano nukua fakamalolō ke tutuli—ko e tututonu, mahani Atua, tua, fakaalofa, fakauka, mahani molu, mo e mafola. Ko e monuina mooli ke he tau fakapotopotoaga ka eketaha e tau matakainaga ke fakatātā katoatoa e tau mahani uho nei! To fakalilifu he mena nei a Iehova mo e fakaatā a ia ke fakahakohako a tautolu takitokotaha ke he haana a fakahekeaga.

Tau Manatu ke Manamanatu Fakahokulo

• Ko e heigoa ne putoia ke he tutuli e tututonu mo e mahani Atua?

• Ko e heigoa ka lagomatai a tautolu ke tutuli e tua mo e fakauka?

• Kua lata ke lauia fēfē e fakaalofa ka fakafehagai a tautolu mo e falu?

• Ko e ha kua lata a tautolu ke tutuli e mahani molu mo e mafola?

[Fakatino he lau 12]

Ne hataki e Iesu neke fakakite e tututonu ke nava he tau tagata

[Fakatino he lau 13]

Tutuli e tautolu e tua he manamanatu hokulo ke he tau kupu mooli he Kupu he Atua

[Fakatino he lau 15]

Tutuli e tautolu e fakaalofa mo e mahani molu