Nakai Iloa e Koe po ke Mena Fe ka Kautū ai!
“Kia gana e koe hāu a tau fua saito ke he magaaho pogipogi, ti aua neke okioki ai hāu a lima ke he afiafi; he nakai iloa po ke mena fe ke [kautū ai].”—FAKAMA. 11:6.
1. Ko e ha kua ofoofogia mo e loto fakatokolalo ke kitia e puhala ne tupu hake e tega akau?
KUA lata he tagata gahua fonua ke fakauka. (Iako. 5:7) He mole e gana he tau tega akau, kua lata a ia ke fakatali ke gotogoto mo e tuputupu hake ai. He tutupu fakahaga ai ke he tau tutūaga mitaki, ne kamata mogoia ke kitia kua gotogoto hake he kelekele. Ti moui ai ke eke mo akau ne tupu mai e tau fua. Fakahiku, ne mautali e tagata gahua fonua ke helehele e fonua haana. Ko e ofoofogia ha ia ke kitia e puhala ne tupu hake e tega akau! Ti, kua loto fakatokolalo foki ke mailoga ko hai e Punaaga he tupuaga nei. Kua maeke ia tautolu ke feaki e tega. Maeke foki ia tautolu ke lagomatai ke fakamalū ai. Ka ko e Atua ni kua maeke ke fakatutupu ai.—Fakatatai 1 Korinito 3:6.
2. Ko e heigoa e tau manatu ne fakaako e Iesu hagaao ke he tupuaga fakaagaaga i loto he tau fakataiaga he vala tala fakamua?
2 Tuga ne totoku he vala tala fakamua, ne fakatai e Iesu e gahua fakamatala he Kautu ke he tagata gahua fonua ne gana e tau tega saito. He fakataiaga ke he tau kelekele kehekehe, ne peehi e Iesu pete he gana he tagata gahua fonua e tau tega saito mitaki, ko e tuaga ni he loto he tagata ka fifili ko e motua e tega po ke nakai. (Mare. 4:3-9) He fakataiaga ke he tagata gana saito ne mohe, ne fakakite e Iesu kua nakai maama katoatoa he tagata gahua fonua e puhala ne tupu ai. Kua tupu ai ha ko e malolō he Atua, nakai ko e tau laliaga he tagata. (Mare. 4:26-29) Kia fakatutala foki a tautolu mogonei ke he tolu e fakataiaga ha Iesu—ko e fua sinapi, ko e mena fakaea, mo e kupega.a
Ko e Fakataiaga ke he Fua Sinapi
3, 4. Ko e heigoa ne fakamaama he fakataiaga ke he fua sinapi hagaao ke he fekau he Kautu?
3 Ua e mena ne fakamaama mai he fakataiaga ke he fua sinapi, ne fakamau foki ia Mareko veveheaga 4:fakamua, ko e tupu ofoofogia he fekau he Kautu; uaaki, ko e puipuiaga ne foaki ki a lautolu ne talia e fekau. Ne pehē a Iesu: “Ko e heigoa e mena ke fakalata ki ai e kautu he Atua, ko e heigoa foki e fakatai ke fakatai e tautolu ki ai? Tuga ne taha fua sinapi a ia, ka to ke he kelekele, kua mua he tote ke he tau fua oti ne tupu mai he kelekele. Ka to e fua, ti tupu hake ai, kua eke foki mo akau lahi, kua mua ke he tau akau mateafu oti, kua fai la lalahi foki ia, kua maeke ai e tau manu lele ke momohe ai ki lalo hana a malu.”—Mare. 4:30-32.
4 Kitia mogoia e tautolu e fakatino ke he tupu he “kautu he Atua” tuga ne fakakite he fakamatala e fekau he Kautu mo e tupuaga he fakapotopotoaga Kerisiano tali mai he Penetekoso 33 V.N. Ko e tega sinapi ko e tega akau tote ne fakatino e mena tote lahi mahaki. (Fakatatai Luka 17:6.) Ka e fakahiku ke tupu hake e sinapi ia ke liga 3-5 e mita he loa ti maō e tau lālā, ati teitei ke eke mo akau lahi.—Mata. 13:31, 32.
5. Ko e heigoa e tupuaga ne hokotia ke he fakapotopotoaga Kerisiano he senetenari fakamua?
5 Ne kamata e fakapotopotoaga Kerisiano ke tupu hake ke he taha puhala tote he 33 V.N. magaaho ne kavi ke 120 e tutaki ne fakauku he agaaga tapu. He magaaho kū, ne lafi mai tokoafe e tagata talitonu ke he fakapotopotoaga tote lahi mahaki nei he tau tutaki. (Totou Gahua 2:41; 4:4; 5:28; 6:7; 12:24; 19:20.) Ko e magahala he tolu e hogofulu tau, ne tupu tolomaki hake e numera he tau tagata gahua helehele, ati tala age e aposetolo ko Paulo ke he fakapotopotoaga i Kolose kua fitā e tala mitaki he “fakamatala atu ke he tau tagata oti ke he lalolagi.” (Kolo. 1:23) Ko e tupuaga ofoofogia lahi ha anei!
6, 7. (a) Ko e heigoa e tupuaga tali mai he 1914? (e) Ko e heigoa foki taha tupuaga ka hoko mai?
6 Tali mai he fakatū e Kautu he Atua he lagi he 1914, nukua tutupu mamahaki e tau lā he “akau” ko e sinapi. Ne kitia mata he tau tagata he Atua kua fakamooli tuai e perofetaaga ne fakamau e Isaia: “Ko e tokogahoa to eke ia mo tokoafe, mo e maga fakateaga to eke ia mo motu malolo.” (Isaia 60:22) Ko e matakau tote he tau tagata fakauku ne kaufakalataha ke he gahua fakamatala he Kautu he vahā fakamua he senetenari ke 20 aki ne nakai fai iloaaga a lautolu to kavi ke fitu e miliona he Tau Fakamoli ka fakalataha ke he gahua nei he tau 2008 ke he molea e 203 e motu. Ko e tupuaga ofoofogia mooli, he fakatai atu ke he fua sinapi he fakataiaga a Iesu!
7 Ka e oti kia he naia e tupu? Nakai. Ko e lalolagi katoa to fakahiku ke nonofo ai e tau tagata ne omaoma ke he Kautu he Atua. To utakehe e tau tagata totoko oti kana. To nakai tupu e mena nei ha ko e tau laliaga he tau tagata ka e ha kua lalago mai a Iehova ko e Iki Pule Katoatoa ke he tau mena he lalolagi. (Totou Tanielu 2:34, 35.) To kitia mogoia e tautolu e fakamooliaga fakahiku he taha perofetaaga ne fakamau e Isaia: “To puke e lalolagi ke he maama kia Iehova, tuga ne toka kua ūfia ke he puke tahi.”—Isaia 11:9.
8. (a) Ko hai ne fakatino he tau manu lele he fakataiaga a Iesu? (e) Ko e heigoa kua puipui mai foki a tautolu i ai he mogonei?
8 Ne pehē a Iesu kua maeke e tau manu lele he lagi ke nonofo i lalo he malu he Kautu nei. Kua nakai fakatino he tau manu lele nei e tau fī he Kautu ne lali ke kai e tau tega akau mitaki, tuga e tau manu lele he fakataiaga ke he tagata ne gana e tau tega akau ke he tau kelekele kehekehe. (Mare. 4:4) Ka e he fakataiaga nei kua fakatino he tau manu lele a lautolu ne loto hakohako ne kumi e puipuiaga i loto hokoia he fakapotopotoaga Kerisiano. He mogonei foki, kua puipui mai a lautolu ia he tau mahani fakalialia fakaagaaga mo e tau mahani nakai meā he lalolagi kelea nei. (Fakatatai Isaia 32:1, 2.) Ne fakatai pihia foki e Iehova e Kautu faka-Mesia ke he akau lahi ti talahau fakaperofeta: “Ti to ai e au ke he mouga tokoluga a Isaraela; to tutupu ai e tau la mo e fua mai ai, to eke foki mo arasi lahi, to ha i ai i lalo hana e tau manu lele oti ne kakano kehekehe, to nonofo ai a lautolu ke he malu he hana tau la.”—Eseki. 17:23.
Ko e Fakataiaga he Mena Fakaea
9, 10. (a) Ko e heigoa e manatu ne peehi e Iesu he fakataiaga ke he mena fakaea? (e) I loto he Tohi Tapu, ko e heigoa ne fa fakatino he mena fakaea, ti ko e heigoa e hūhū ke he talahauaga ha Iesu ke he mena fakaea ka fakatutala a tautolu ki ai?
9 Kua nakai kitia tumau he tau tagata e puhala he tupuaga. He fakataiaga foki haana, ne peehi e Iesu e manatu nei. Ne pehē a ia: “Kua lata e kautu he lagi mo e mena fakaea kua uta he taha fifine, mo e tuku i loto he falaoa lagatolu e fafati, ati oti ka e ea oti ai.” (Mata. 13:33) Ko e heigoa ne fakatino he mena fakaea nei, ti hagaao fēfē ke he tupuaga he Kautu?
10 I loto he Tohi Tapu, ne fa fakaaoga e mena fakaea ke fakatino e agahala. Ne hagaao e aposetolo ko Paulo ke he mena fakaea ke he puhala pehēnei he magaaho ne vagahau a ia hagaao ke he fakaohoohoaga kelea he tagata agahala i loto he fakapotopotoaga ha Korinito i tuai. (1 Kori. 5:6-8) Kua fakaaoga kia e Iesu he mogonei e mena fakaea ke fakatino e tupuaga he taha mena kelea?
11. Ne fakaaoga fēfē e mena fakaea i Isaraela i tuai?
11 Fakamua to tali e hūhū ia, lata ia tautolu ke mailoga tolu e matapatu manatu. Fakamua, pete he nakai fakaatā e Iehova ke fai mena fakaea he galue he Paseka, ne fai magaaho ne talia e ia e tau poa ne toka ai e mena fakaea. Kua fakaaoga e mena fakaea hagaao ke he tau poa fakaaue, ne taute he tagata foaki fakamakai e poa haana ke fakaaue ke he tau monuina loga ha Iehova. Kua tamai he kaiaga nei e fiafia lahi.—Levi. 7:11-15.
12. Ko e heigoa ka ako e tautolu mai he puhala ne fakaaoga he Tohi Tapu e tau fakataiaga?
12 Uaaki, pete kua fakaaoga he taha talahauaga i loto he Tohi Tapu he taha magaaho e talahauaga ne kakano ke he mena kelea, ka e he taha magaaho kua fakaaoga e talahauaga taha ia ni ke fakakite aki e mena mitaki. Ke fakatai ki ai, he 1 Peteru 5:8 ne fakatino e Satani e leona, he fakatino e aga hagahaga kelea mo e vale haana. Ka e he Fakakiteaga 5:5, ne fakatino e Iesu e leona—ko e “Leona he magafaoa a Iuta.” He vala fakamui, ne fakaaoga e leona ke fakamailoga e fakafili tonu malolō.
13. Ko e heigoa ne fakakite he fakataiaga a Iesu ke he mena fakaea hagaao ke he tupu fakaagaaga?
13 Toluaki, he fakataiaga a Iesu, ne nakai pehē a ia kua fakakelea he mena fakaea e falaoa mata ai pihia, ati nakai maeke ke fakaaoga. Ne hagaao tonu ni a ia ke he puhala tao falaoa. Ne lafi pauaki he fifine e mena fakaea, ti mitaki e mena ne fua mai ai. Ko e mena fakaea kua galo i loto he falaoa mata. Pihia foki kua galo ke he fifine e puhala ne ea hake e mena fakaea. Kua fakamanatu ai ki a tautolu e tagata ne gana fua saito ti mohe he po. Ne pehē a Iesu “kua gotogoto hake e tau fua saito, mo e tuputupu, ka e nakai kitia [he tagata] po ke eke fefe.” (Mare. 4:27) Ko e puhala mukamuka ha ia ke fakamaama e fakaholoaga galo he mena ne tupu fakaagaaga! Liga nakai kitia fakamua e tautolu e puhala ne tupu ai, ka e fakahiku ne kitia ai e tau fua.
14. Ko e heigoa ne fakatai he gahua fakamatala hagaao ke he puhala ne fakafua he mena fakaea e falaoa mata ai pihia?
14 Kua nakai ni kitia e tupuaga nei ke he tau mata tagata ka kua tupu foki ke he lalolagi katoa. Ko e taha puhala anei ne peehi he fakataiaga hagaao ke he mena fakaea. Ne fakafua he mena fakaea e falaoa mata ai pihia, ko e “falaoa [ne] lagatolu e fafati.” (Luka 13:21) Ke tuga e mena fakaea, nukua omoomoi he gahua fakamatala he Kautu e tupuaga fakaagaaga nei ati fakamatala hagaao ke he Kautu ke hokotia “ke he fakaotiaga he lalolagi.” (Gahua 1:8; Mata. 24:14) Ko e lilifu homo ue atu ha ia ke fakalataha ke he gahua nei he Kautu ne tupu ofoofogia!
Ko e Kupega
15, 16. (a) Fakamaama e fakataiaga ke he kupega. (e) Ko e heigoa ne fakatino he kupega, ti ko e heigoa ne hagaao ki ai e fakataiaga nei ke he tupuaga he Kautu?
15 Ko e mena ne mua atu e aoga ke he numera ha lautolu ne talahau ko e tau tutaki ha Iesu Keriso ko e mahani mitaki he tau tutaki ia. Ne hagaao a Iesu ke he tupu hake nei he Kautu he magaaho ne foaki foki e ia e taha fakataiaga ne hagaao ke he kupega. Ne pehē a ia: “Kua lata foki e kautu he lagi mo e kupega kua liti ke he tahi, kua moua ai e tau ika kehekehe oti.”—Mata. 13:47.
16 Ko e kupega, ne fakatino e gahua fakamatala he Kautu, nukua moua mai e tau ika kehekehe. Ne holo atu a Iesu ke talahau: “Kua puke [e kupega] ti toho hake ai e lautolu ke he mataafaga, kua nonofo ai mo e fafao e tau ika mitaki ke he tau oa; ka ko e tau ika kelea kua tiaki. To pihia foki ke he fakaotiaga he lalolagi; to o atu e tau agelu ke vevehe kehe e tau tagata mahani kelea mo e tau tagata tututonu, ti liti e lautolu a lautolu ke he gutuumu kaka; ha ha i ai e tagi aue mo e konoi he tau nifo.”—Mata. 13:48-50.
17. Ko e vahā fe ne hagaao ki ai e veheveheaga ne totoku he fakataiaga ke he kupega?
17 Kua hagaao kia e veheveheaga nei ke he fakafiliaga fakahiku he tau mamoe mo e tau koti ne talahau e Iesu ka hoko he magaaho ka haele mai a ia he lilifu haana? (Mata. 25:31-33) Nakai. Ko e fakafiliaga fakahiku ia to mailoga la he magaaho ka hau a Iesu he matematekelea lahi. Kehe mai, ko e veheveheaga ne hagaao ki ai he fakataiaga ke he kupega kua mailoga ke he “fakaotiaga he lalolagi.”b Ko e magaaho anei ne momoui ai a tautolu—ko e tau aho ne takitaki atu ke he matematekelea lahi. Ti kua taute fēfē e gahua vehevehe he mogonei?
18, 19. (a) Kua taute fēfē e gahua vehevehe he mogonei? (e) Ko e heigoa e tau lakaaga ne kua lata ia lautolu ne loto fakamooli ke taute? (Kikite foki e matahui tala he lau 21.)
18 Kua totou miliona e tau ika fakatai ne o mai he tahi he tau tagata ne kua fiafia ke he fakapotopotoaga a Iehova he tau vahā foou nei. Kua o mai falu ke he Fakamanatuaga, ka e o mai falu ke he tau feleveiaaga ha tautolu, ti ha ha agaia falu ne fiafia ke fakaako e Tohi Tapu. Ka kua eke kia a lautolu oti nei ko e tau Kerisiano mooli? Liga kua “toho hake ai [a] lautolu ke he mataafaga,” ka e pehē a Iesu ki a tautolu ko e “tau ika mitaki” ni ka fafao he tau oa, ne fakatino e tau fakapotopotoaga Kerisiano. Kua tiaki ai e tau ika kelea, ti fakahiku tolo ke he gutuumu kakā, ne fakakite e moumouaga he vahā anoiha.
19 Ke tuga e tau ika kelea, kua tokologa ne fakaako fakamua e Tohi Tapu mo e tau tagata ha Iehova ne fakaoti e fakaakoaga ha lautolu. Ko e falu ne fanau ke he tau matua Kerisiano kua nakai manako mooli ke eke mo tau tutaki ha Iesu. Ne nakai manako a lautolu ke fifili ke fekafekau ki a Iehova po ke he fai magaaho he mole e fekafekau ki a ia ne nakai liliu taute pihia.c (Eseki. 33:32, 33) Kua aoga katoatoa mogoia ia lautolu ne loto fakamooli ke fakaatā ne lautolu a lautolu ke auloa ki loto he tau fakapotopotoaga ne tuga e tau oa ato hoko e aho fakahiku he fakafiliaga mo e ke nonofo tumau he matakavi haohao mitaki.
20, 21. (a) Ko e heigoa kua ako mai e tautolu he liu onoono atu ke he tau fakataiaga a Iesu hagaao ke he tupuaga fakaagaaga? (e) Ko e heigoa haau ka fifili ke taute?
20 Ti, ko e heigoa kua ako e tautolu he liliu kitekite ke he tau fakataiaga a Iesu hagaao ke he tupuaga? Fakamua, ke tuga e fua sinapi ne tuputupu hake, kua lahi ue atu e tupuaga he tau mena he Kautu he lalolagi nei. Kua nakai fakaai ha mena ke fakaoti e fakamatalaaga he gahua a Iehova! (Isaia 54:17) Lafi ki ai, kua foaki he akau e puipui fakaagaaga ki a lautolu ne manako “ke momohe [po ke nonofo] ki lalo hana a malu.” Uaaki, ko e Atua ni ne fakatutupu ai. Ke tuga ni he nakai kitia e mena fakaea ne ea ai e falaoa mata ai pihia, kua nakai kitia maali po ke maama tumau foki e puhala he tupuaga fakaagaaga nei, pete ia kua tupu mooli ai! Toluaki, ko lautolu ne talia e kupu kua nakai fakamooli oti a lautolu ke tuga e tau ika mitaki. Ko e falu kua tuga e tau ika kelea he fakataiaga a Iesu.
21 Ko e mafanatia ha ia mogoia ke kitia e loga he tau ika mitaki hane futia mai e Iehova! (Ioane 6:44) Ati ofoofogia lahi e tupu tolomaki ke he taha motu mo e taha motu. Kua tuku atu ki a Iehova ko e Atua e tau fakahekeaga ma e tupuaga nei. He kitia mooli e mena nei, kua lata ia tautolu takitokotaha ke omoomoi ke omaoma ke he tomatomaaga ne tohia he tau senetenari kua leva tigahau: “Kia gana e koe hāu a tau fua saito ke he magaaho pogipogi, . . . he nakai iloa po ke mena fe ke [kautū ai], po ke mena nai, po ke mena na, po ke fakatau mitaki ai e na mena ua ia.”—Fakama. 11:6.
[Tau Matahui Tala]
a Ko e tau fakamaamaaga ne mui mai ko e tau hikiaga ke he mena ne fakamaama fakamua he fufuta he Ko e Kolo Toko ia Iulai 1, 1992, lau 10-15, mo e fufuta he The Watchtower ia Oketopa 1, 1975, lau 589-608.
b Pete kua hagaao e Mataio 13:39-43 ke he taha puhala kehe he gahua fakamatala he Kautu, ko e magaaho ne fakamooli ai na tatai mo e magaaho ne fakamooli e fakataiaga he kupega, ke he “fakaotiaga he lalolagi.” Ko e veheveheaga he tau ika fakatai ko e gahua taute mau, tuga ne gahua gana mo e helehele saito ne taute tumau he vahā nei.—The Watchtower, Oketopa 15, 2000, lau 25-26; Tapuaki ke he Atua Moli Tokotaha, lau 178-181, paratafa 8-11.
c Kakano kia e mena nei ko lautolu oti ne fakaoti e fakaakoaga po ke fakalatahaaga mo e tau tagata ha Iehova kua tiaki he tau agelu ha kua kelea? Nakai! Kaeke ke manako mooli taha tagata ke liu ki a Iehova, to kitia e ia kua mahafagi agaia e hala.—Mala. 3:7.
To Tali Fēfē e Koe?
• Ko e heigoa ne fakaako ki a tautolu he fakataiaga a Iesu ke he fua sinapi hagaao ke he tupuaga mo e puipuiaga fakaagaaga he Kautu?
• Ko e heigoa ne fakatino he fakataiaga a Iesu ke he mena fakaea, mo e ko e heigoa e kupu mooli hagaao ke he tupuaga he Kautu ne fakamaama e Iesu?
• Ko e heigoa ne fakakite he fakataiaga ke he kupega hagaao ke he tupuaga he Kautu?
• Maeke fēfē ia tautolu ke fakalataha tumau mo lautolu ne kua ‘fafao ki loto he tau oa’?
[Tau Fakatino he lau 18]
Ko e heigoa ne fakaako he fakataiaga ke he fua sinapi ki a tautolu hagaao ke he tupu tolomaki he Kautu?
[Fakatino he lau 19]
Ko e heigoa kua ako e tautolu mai he fakataiaga ke he mena fakaea?
[Fakatino he lau 21]
Ko e heigoa ne fakatino he vehevehe e tau ika mitaki mai he tau ika kelea?