Kua Moui e Kupu ha Iehova
Tau Fakamaamaaga Mai he Tohi ke he Tau Korinito
KO E aposetolo ko Paulo ne lahi e manamanatu ke he tuaga fakaagaaga he fakapotopotoaga i Korinito. Ne fitā he logona e ia e fekehekeheaki he tau matakainaga i ai. Kua fakaatā e mahani feuaki. Ne tohi foki e fakapotopotoaga ki a Paulo ke hūhū hagaao ke he falu matakupu. Ti kavi 55 V.N., he nofo i Efeso he fenoga misionare haana ke toluaki, ne tohia e Paulo e tohi fakamua haana ke he tau Korinito.
Ne maaliali ai, kua tohia e tohi ke uaaki he gahoa e mahina he oti e tohi fakamua, ko e tohi ne fakatatau ke he tohi fakamua. Ha kua loga e mena ne tatai e tau tuaga i loto mo e i fafo he fakapotopotoaga he senetenari fakamua i Korinito mo e vahā ha tautolu, ko e fekau he tau tohi ha Paulo ke he tau Korinito kua aoga lahi foki ki a tautolu.—Hepe. 4:12.
‘KIA MATAALA, KIA TUMAU, KIA FAKAMALOLO’
“Kia taha ha mutolu a tau kupu oti kana,” he ole e Paulo. (1 Kori. 1:10) Kua ‘nakai fakatoka ai ha fakaveaga kua kehe mo Iesu Keriso,’ ne fakavē ai e tau mahani faka-Kerisiano. (1 Kori. 3:11-13) Hagaao ke he tagata feuaki i loto he fakapotopotoaga, ne pehē a Paulo: “Kia tuku kehe e mutolu e tagata mahani kelea nā ia mutolu.” (1 Kori. 5:13) Kua “nakai lata e tino ke he feuaki,” he talahau e ia, “ka kua lata ke he Iki.”—1 Kori. 6:13.
He tali ke he “tau mena ne tohi mai ai e [la]utolu,” ne talahau e Paulo e fakatonuaga aoga hagaao ke he fai tokoua mo e nofo tokotaha. (1 Kori. 7:1) He mole e tutala ke he ulu pule faka-Kerisiano, ke he maopoopo he tau feleveiaaga faka-Kerisiano, mo e moolioli he liu tu mai, ne tala age e Paulo e tomatomaaga: ‘Kia mataala, kia tumau, kia fakamalolo.’—1 Kori. 16:13.
Tali he Tau Hūhū Faka-Tohiaga Tapu:
1:21—Fakaaoga mooli kia e Iehova e “goagoa” ke fakamomoui a lautolu kua tua? Nakai, ne nakai taute pihia e ia. Ka kua ‘nakai iloa he lalolagi e Atua ke he iloilo ha lautolu,’ ati tuga e mena goagoa ke he lalolagi e puhala kua fakaaoga e ia ke fakamomoui aki e tau tagata.—Ioane 17:25
5:5—Ko e heigoa e kakano ke “tuku atu a ia kua [mahani kelea] kia Satani kia malaia ai e tino, ka kia hao e agaga”? Ka nakai tokihala e tagata ne taute e agahala kelea lahi ti tuku ki tua he fakapotopotoaga, kua liu a ia eke mo vala he lalolagi mahani kelea ha Satani. (1 Ioa. 5:19) Ati kua talahau pehē kua tuku atu a ia ki a Satani. Ko e tuku kehe he tagata kua kakano ke moumou po ke utakehe, he mahani kelea mai he fakapotopotoaga mo e puipui e agaaga po ke matapatu mahani kua lata.—2 Timo. 4:22.
7:33, 34—Ko e heigoa e kakano he “tau mena he lalolagi” ne fakaatukehe ki ai e tagata kua fai taane po ke fai hoana? Kua hagaao a Paulo ke he tau mena aga mau he moui ne lata e tau taane mo e tau hoana Kerisiano ke manamanatu ki ai. Putoia he tau mena nei e tau mena kai, tau mena ke tapulu ai, mo e fale, ka e nakai putoia e tau mena kelea he lalolagi nei, ne fakaheu he tau Kerisiano.—1 Ioa. 2:15-17.
11:26—Fakamanatu kia he “tau aho oti” e mate ha Iesu, mo e “ato” a fe? Ne nakai tutala a Paulo ke fakamanatu tumau he tau aho oti e mate ha Iesu. Ko e kupu Heleni ne fakaaoga ma e “tau aho oti” kua kakano “he ha magaaho” po ke “tau magaaho oti ia.” Ti kua hagaao e tutala ha Paulo ke he tau magaaho oti ia ne lagataha ni he tau, kua kai mo e inu e tau Kerisiano fakauku ke he tau mena fakatai he Fakamanatuaga he Nisana 14, he “fakailoa atu ai e [la]utolu e matulei he Iki.” Ne taute e lautolu e mena nei “ato haele mai a ia,” ko e kakano, ato fonofono e ia a lautolu ke he lagi he liu tu mai.—1 Tesa. 4:14-17.
13:13—Ke he puhala fe he fakaalofa ne kua mua atu ke he tua mo e amaamanakiaga? Ka fakamooli e “tau mena kua amaamanaki ki ai,” mo e ka tutupu e tau mena ne “falanaki” ki ai, kua fakaoti tuai e tua mo e amaamanaki ke he tau mena ia. (Hepe. 11:1) Kua mua atu e fakaalofa ke he tua mo e amaamanakiaga ha kua tumau tukulagi ai.
15:29—Ko e heigoa e kakano ke “papatiso ha ko lautolu kua mamate”? Kua nakai tutala a Paulo ke papatiso e tau tagata momoui ma lautolu ne mamate ka e nakaila papatiso. Ne tutala a Paulo he mena nei ke he tau Kerisiano ne fakauku he agaaga tapu ke moua e puhala moui ke maeke ia lautolu ke fakamooli tumau ato hoko ke he mate ti liliu tutū mai ko e tau mena momoui fakaagaaga.
Tau Fakaakoaga ma Tautolu:
1:26-31; 3:3-9; 4:7. Ko e hula fakatokolalo ki a Iehova, nakai ki a tautolu ni ka fakatupu e kaufakalataha i loto he fakapotopotoaga.
2:3-5. He fakamatala i Korinito, ko e lotouho he pulotu mo e fakaakoaga Heleni, ne liga tupetupe a Paulo po kua maeke nakai a ia ke fakamalolō ke he tau kupu mitaki e tau tagata fanogonogo haana. Pete ia, ne nakai fakaatā e ia ha lolelole po ke matakutaku ne liga ha ha ia ia ke fakatauhele a ia he taute e fekafekauaga haana ne age he Atua. Pihia foki, kua nakai lata ia tautolu ke fakaatā e tau tuaga matakehe ke taofi mai a tautolu he fakapuloa e tala mitaki he Kautu he Atua. Kua lata ia tautolu ke ono mauokafua ki a Iehova ma e lagomataiaga tuga ne taute e Paulo.
2:16. Ke moua “e finagalo a Keriso” kua kakano ke iloa e puhala manamanatu haana, ke manamanatu tuga a ia, ke maama katoa e aga haana, mo e ke muitua ke he haana fakafifitakiaga. (1 Pete. 2:21; 4:1) Kua aoga ha ia ke fakaako fakamakutu e tautolu e moui ha Iesu mo e fekafekauaga haana!
3:10-15; 4:17. Kua lata ia tautolu ke kumikumi mo e fakaholo ki mua e puhala fakaako mo e taute tutaki ha tautolu. (Mata. 28:19, 20) Kaeke ke nakai fakaako fakamitaki e tautolu e tagata ne fakaako mo tautolu, to liga nakai kautū a ia ka kamatamata e tua, ti liga momoko lahi a tautolu ha kua kaumahala ai ti ko e fakamouiaga ha tautolu kua “tuga he hao mai he afi.”
6:18. Ke “fehola kehe . . . he feuaki” kua kakano ke kalo kehe mai he tau gahua por·neiʹa ti pihia foki he tau fakatino telefua, kelea muitui he mahani, tumoulu, kalahī—ha gahua ke hoko atu ke he feuaki.—Mata. 5:28; Iako. 3:17.
7:29. Kua lata e tau hoa mau ke fakaeneene ke nakai hagaaki hokoia ki a laua ni ti maheu mogoia e tau mena he Kautu ke he tuaga ke uaaki he tau momoui ha laua.
10:8-11. Ne lahi e fakaita he tau Isaraela a Iehova he magaaho ne loma a lautolu hagaao ki a Mose mo Arona. Kua pulotu ma tautolu ke puipui mai neke feaki e aga loma.
16:2. To foaki tumau e tautolu e tau tupe ma e fakalaulahiaga he tau mena he Kautu ka fakatokatoka tuai mo e fakatumau ki ai.
“KIA LILIUINA”
Ne tala age a Paulo ke he tau Korinito kua lata ia lautolu ke ‘fakamagalo atu mo e fakamafana atu’ ke he tagata ne taute mena hehē ne kua fakatonu. Pete kua momoko a lautolu ha ko e tohi fakamua haana, ne fakakite e Paulo e olioli ha kua “momoko [a lautolu] ke he tokihala.”—2 Kori. 2:6, 7; 7:8, 9.
‘Hanai, tuga he tupu lahi ia lautolu e tau mena oti,’ ne fakamafana e Paulo e tau Korinito ke “tupu lahi e [foaki].” He mole e tali a lautolu ne totoko, ne tuku age e ia e fakatonuaga fakahiku ki a lautolu oti: “Kia monuina a mutolu; kia fakakatoatoa a mutolu ke he mitaki; [“kia liliuina,” NW] kia fakamafanatia a mutolu, kia loto fakalataha a mutolu, kia mafola a mutolu.”—2 Kori. 8:7; 13:11.
Tali he Tau Hūhū Faka-Tohiaga Tapu:
2:15, 16—Puhala fe ha tautolu kua “manogi mitaki [ki a] Keriso”? Kua pihia ha kua muitua a tautolu ke he Tohi Tapu mo e fakalataha ke fakamatala e fekau i ai. Pete kua liga fakavihia he tau tagata matahavala e “manogi” pihia, kua manogi mitaki ai ki a Iehova mo lautolu ne loto fakamooli.
5:16—Puhala fe he tau Kerisiano fakauku ne “nakai tuai iloa e [l]autolu taha ke he tino”? Ne nakai onoono fakatino a lautolu ke he tau tagata, kakano kua nakai fakamailoga tagata ha ko e mautū, lanu, po ke motu ne tupu mai ai. Ko e mena ne aoga ki a lautolu ko e fakafetuiaga fakaagaaga ha lautolu mo e tau matakainaga talitonu.
11:1, 16; 12:11—Ne goagoa kia a Paulo he fehagai mo e tau Korinito? Nakai, ai pihia a ia. Ka kua kitia pihia he falu tuga ko e hula mo e goagoa ha ko e tau kupu ne fakaohooho a ia ke talahau he lalago e tuaga fakaaposetolo haana.
12:1-4—Ko hai ne ‘hamu ki parataiso’? Ha kua nakai fai tagata foki ne tutala e Tohi Tapu ki ai ne moua ha fakakiteaga pihia ti ko e vala kupu he mole e lalago e Paulo e tuaga fakaaposetolo haana, kua liga talahau ni a ia he mena ne tupu ki a ia. Ko e fakakiteaga ne kitia he aposetolo ne liga ko e parataiso fakaagaaga ne olioli he fakapotopotoaga Kerisiano he “vaha ke fakahiku ai.”—Tani. 12:4.
Tau Fakaakoaga ma Tautolu:
3:5. He matapatu fakaakoaga, kua talahau he kupu nei kua fakaatā e Iehova e tau Kerisiano ke maeke ke fekafekau ha ko e Kupu, agaaga tapu, mo e vala he fakatokatokaaga haana he lalolagi. (Ioane 16:7; 2 Timo. 3:16, 17) Kua aoga lahi ma tautolu ke fakaako fakamakutu e Tohi Tapu mo e tau tohi ne fakavē ke he Tohi Tapu, fakamakamaka ke he liogi ma e agaaga tapu, mo e o tumau mo e fai vala he tau feleveiaaga Kerisiano.—Sala. 1:1-3; Luka 11:10-13; Hepe. 10:24, 25.
4:16. Ha kua fakafoou e Iehova ‘ha tautolu a tagata i loto ke he taha aho mo e taha aho,’ kua lata ia tautolu ke fakaaoga e tau foakiaga mai ia Iehova, ti nakai toka ha aho ke mole ka e nakai manamanatu ke he tau mena fakaagaaga.
4:17, 18. He manatu ko e “matematekelea . . . kua mama mo e mole vave” ka lagomatai a tautolu ke tumau e tua ki a Iehova he tau magaaho uka.
5:1-5. Ko e mitaki ha ia he fakamaamaaga ha Paulo hagaao ke he tau logonaaga he tau Kerisiano fakauku ke he amaamanakiaga ha lautolu ka momoui ke he lagi!
10:13. Ke he mena fa mahani, to kehe ai ni kaeke kua fakatoka pauaki ke gahua e tautolu e matakavi kua manako lahi ke he lagomatai, kua lata ni ia tautolu ke gahua he matakavi kua fafati ke he fakapotopotoaga ha tautolu.
13:5. Ke ‘kamatamata po kua ha ha i ai a tautolu ke he tua,’ kua lata ia tautolu ke kikite kua felauaki nakai e mahani ha tautolu he fakaaoga e tau mena kua ako e tautolu mai he Tohi Tapu. Ke ‘kumikumi hifo a tautolu kia tautolu,’ kua lata ke kikite e tuaga fakaagaaga ha tautolu, putoia e mafiti he “mahani” mo e laulahi he tau gahua ha tautolu he tua. (Hepe. 5:14; Iako. 1:22-25) He fakagahua e fakatonuaga aoga ha Paulo, kua maeke ia tautolu ke fakatumau ke o he puhala he kupu mooli.
[Fakatino he lau 26, 27]
Ko e heigoa e kakano he tau kupu “ko e tau aho oti kua kai ai e mutolu e areto nai, mo e inu ke he kapiniu nai”?—1 Kori. 11:26