Leveki Fakaalofa e Iehova e Tau Fekafekau Momotua Haana
“Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.”—HEPE. 6:10.
1, 2. (a) He kitia e tagata uluhina, ko e heigoa kua liga fakamanatu ki a koe? (e) Onoono fēfē a Iehova ke he tau Kerisiano momotua?
KA KITIA e koe e tau tagata momotua i loto he fakapotopotoaga ne uluhina, nakai kia fakamanatu ki a koe e tala he tohi a Tanielu he Tohi Tapu? He fakakiteaga ne age e Ia ki a Tanielu, ne fakakite e Iehova ko e Atua, kua uluhina foki a ia. Ne tohi e Tanielu: “Ne kitekite au ato tuku mai e tau nofoaiki, ne nofo ai foki [a] ia mai i tuai hana tau aho, kua hina hana tapulu tuga ne kiona, mo e hana tau lauulu kua tuga ne tau fulu mamoe mitaki.”—Tani. 7:9.
2 Ne tea pauaki e tau fulu mamoe. Ti ko e uluhina mo e matahigoa ‘Mai i Tuai Haana Tau Aho’ kua hagaao ke he tau tau motua mo e pulotu ue atu he Atua, ne kua lata mo e ha tautolu a fakalilifu hokulo. Onoono fēfē mogoia a Iehova, ne Mai i Tuai Haana Tau Aho, ke he tau tagata taane mo e tau fifine momotua tua fakamooli? Ne talahau he Kupu he Atua ko e “foufou fulufuluola e ulu hina, kaeke ke moua ai ke he puhala he tututonu.” (Fakatai 16:31) E, kaeke ke hina e ulu he Kerisiano tua fakamooli, kua fulufuluola e foliga motua pihia ki mua he Atua. Kua onoono pihia nakai a koe tuga a Iehova ke he tau matakainaga momotua haau?
Ko e Ha ne Uho Lahi Mahaki?
3. Ko e ha kua uho lahi e tau matakainaga momotua ki a tautolu?
3 Fakalataha mo e tau fekafekau momotua fakahele he Atua ko e tau tagata he Kau Fakatufono he Tau Fakamoli a Iehova, ko e tau leveki faifano he mogonei mo e fakamua, tau paionia makutu, mo e tau tagata momotua ne fakailoa e Kautu—ko e tau matakainaga ne kua fekafekau tua fakamooli he tau fakapotopotoaga ha tautolu. Liga iloa e koe falu ne makutu he fakamatala e tala mitaki ke he loga e tau tau ti ko e tau fakafifitakiaga mitaki ha lautolu kua lagomatai ke omoomoi e tau fuata mo e fakahakohako e tau momoui ha lautolu. Ko e falu matakainaga momotua kua hahamo e tau kavega mamafa he tau matagahua mo e fakauka ke he favaleaga ha ko e tala mitaki. Kua loto fakaaue lahi mahaki a Iehova mo e “fekafekau fakamoli mo e loto matala” ke he ha lautolu a tau lagomatai oti he magaaho fakamua mo e mogonei ke he gahua he Kautu.—Mata. 24:45.
4. Ko e ha kua lata ia tautolu ke fakalilifu e tau Kerisiano momotua mo e liogi ma lautolu?
4 Ko e tau tagata momotua tua fakamooli pihia kua latatonu ke loto fakaaue mo e fakalilifu he falu fekafekau ha Iehova ko e Atua. Ti ko e Fakatufono he Atua ne foaki he puhala ia Mose kua fakamatutaki e manamanatu atu mo e fakalilifu ki a lautolu ne momotua mo e matakutaku ki a Iehova. (Levi. 19:32) Kua lata ia tautolu ke liogi tumau ma lautolu nei ne tua fakamooli mo e fakaaue ke he Atua ma e tau gahua fakaalofa ha lautolu. Ne liogi e aposetolo ko Paulo ma e tau ekegahua fakahele haana ne fuata mo e momotua.—Totou 1 Tesalonia 1:2, 3.
5. Aoga fēfē a tautolu mai he feoaki mo e tau tagata momotua ne tapuaki ki a Iehova?
5 Mua atu, kua aoga e tau tagata oti he fakapotopotoaga he feoaki mo e tau Kerisiano momotua. Puhala he fakaako, kitekite, mo e iloaaga, kua lahi mahaki e iloilo ne moua he tau tagata momotua tua fakamooli ne tapuaki ki a Iehova. Kua ako a lautolu ke fakagahuahua e fakauka mo e fakakite e fakaalofa mo e tala age e tau mena ne ako e lautolu ke he taha atuhau, nukua ta mai ki a lautolu e olioli mo e fiafia lahi. (Sala. 71:18) Tau fuata, kia pulotu mo e fakaaoga e punaaga nei he iloilo, ke tuga he utu hake e koe e vai mai he vai hokulo.—Fakatai 20:5.
6. Fakakite fēfē e koe ke he tau tagata momotua kua aoga lahi mooli a lautolu ki a koe?
6 Kua tala age nakai e koe ke he tau tagata momotua kua ofania e koe a lautolu tuga ne ofania e Iehova a lautolu? Ko e taha puhala ka taute pihia e koe he tala age ki ai kua lahi e fakaalofa haau ki a lautolu ha ko e ha lautolu a tua fakamooli ti aoga lahi e tau manatu ha lautolu ki a koe. Mua atu, he fakaaoga e tau mena ne ako mai ia lautolu, kua fakatātā e koe kua fakalilifu mooli e koe a lautolu. Tokologa e tau Kerisiano momotua ne manatu e fakatonuaga pulotu ne moua e lautolu mai he tau tagata momotua tua fakamooli, ti ko e fakaaoga kua lagomatai ai ke he tau momoui katoa ha lautolu.a
Fakakite e Logonaaga Fakaalofa ke he Tau Puhala Aoga
7. Ko hai ne age mua e Iehova ki ai e matagahua ke leveki a lautolu ne momotua?
7 Ne age mua he Atua e matagahua ke he tau magafaoa ke leveki ha lautolu a tau tagata momotua. (Totou 1 Timoteo 5:4, 8.) Kua fiafia a Iehova ka fakamooli he tau magafaoa e kotofaaga ke lata mo e tau magafaoa momotua ha lautolu, ti fakakite ai kua leveki e lautolu e tau tagata momotua ke tuga ne leveki e Iehova a lautolu. Ne lagomatai he Atua e tau magafaoa nei ti fakamonuina a lautolu ha ko e tau gahua mo e tau mena oti ne foaki noa e lautolu.b
8. Ko e ha kua lata he fakapotopotoaga ke fakakite e manamanatuaga ma e tau Kerisiano momotua?
8 Kua fiafia pihia foki a Iehova ka lalago he fakapotopotoaga he matakavi e tau tagata momotua tua fakamooli, ne kua manako lagomatai, ka kua nakai fai magafaoa po ke nakai makai e tau tagata he magafaoa ke leveki a lautolu. (1 Timo. 5:3, 5, 9, 10) Ko e magaaho a ia ka fakakite he tau tagata he fakapotopotoaga e ‘feofanaki, fakaalofa ke he tau matakainaga, mo e hofihofi noa e fakaalofa’ ma lautolu ne momotua. (1 Pete. 3:8) Ko e kapaletū ha lautolu ma e tau tagata momotua he fakapotopotoaga kua felauaki mitaki mo e fakatai ha Paulo he magaaho ne talahau e ia ka mamahi taha alaga he tino he tagata, “ti mamahi fakalataha ai e tau fahi tino oti.” (1 Kori. 12:26) He taute e tau gahua kua aoga mo e fakaalofa hofihofi noa ke lata mo lautolu ne momotua ka fakatātā e matapatu fakaakoaga he fakatonuaga a Paulo: “Kia fetogiaki a mutolu ke he ha mutolu a tau kavega ke fua, mo e fakamoli pihia e fakatufono a Keriso.”—Kala. 6:2.
9. Ko e heigoa e tau kavega he vahā motua kua lauia ai e tagata?
9 Ko e heigoa e tau kavega ne lauia ai e tau tagata momotua? Tokologa ne lolelole vave. Liga logona hifo e lautolu ko e taute he tau mena fa mahani—he fano ke he toketā, leveki e tau tohi fakatagata, fakameā he fale, taute he tau mena kai—kua uka lahi mahaki ki a lautolu. He nakai fa hoge mo e fia inu ka hoko ke he vahā motua, liga manatu a lautolu kua nakai lata ke kai po ke inu fakalahi ke he mena kua latatonu ia lautolu. Kua maeke ke pihia foki ke he kai fakaagaaga. Liga kua uka e tau mata mo e tau teliga ne motua ke totou mo e fanogonogo ke he tau fakaholoaga fakaagaaga, mo e ko e tauteute ke finatu ke he tau feleveiaaga Kerisiano kua liga mategūgū. Ko e heigoa mogoia kua lata he falu ke taute ma lautolu ia ne momotua?
Puhala Ka Lagomatai e Koe
10. Ko e heigoa ka taute he tau motua ke mailoga kua moua he tau tagata momotua e lagomatai kua lata?
10 He tau fakapotopotoaga loga, kua leveki fakamitaki ai e tau tagata momotua. Ne lagomatai he tau matakainaga fakahele a lautolu ke taute e fakatau, tunu e kai, mo e fakameā. Ne lagomatai e lautolu e tau tagata momotua ke fakaako, tauteute ma e tau feleveiaaga, mo e fakatumau ke he fonua. Ne fakatauō mo e uta he tau fuata Kerisiano a lautolu he tau motokā. Ka nakai maeke a lautolu ne momotua ke toka e tau kaina, ne fanogonogo a lautolu ke he tau feleveiaaga ke he puhala he telefoni, po ke tapaki e tau lauga ma lautolu. Ka maeke, kua lata he tau motua ke mailoga kua taute e tau fakaholoaga ke felauaki mo e tau manako he tau tagata momotua i loto he fakapotopotoaga.c
11. Talahau e puhala ne lagomatai he taha magafaoa e matakainaga motua.
11 Kua maeke foki he tau Kerisiano takitaha ke fakakite e lima foaki mo e fakatātā e loto fakamokoi. He mole e mate e hoana he taha matakainaga taane motua, ne nakai maeke a ia ke totogi tokotaha e fale ha kua nakai moua e tupe fuakau he hoana. Ne fakaako e ia mo e hoana haana e Tohi Tapu mo e magafaoa—ko e matua taane, matua fifine, mo e tokoua e tama fifine fuata mui—ne kua lahi e fale. Ne age e lautolu ki a ia ua e poko ke nofo ai. Ke 15 e tau, ne kai auloa, tau fekī, mo e fefakaalofaaki fakamatakainaga a lautolu. Ne lahi e mena ne ako e laua ne ikiiki mai he tua mo e tau mena loga haana ne iloa, ti aoga a ia he lafiaga fiafia mo lautolu. Ne nofo e matakainaga motua nei mo lautolu ato mate a ia he 89 e tau he moui. Kua fakaaue agaia e magafaoa ke he Atua ma e tau monuina loga ne moua he lafiaga ha lautolu mo ia. Kua ‘nakai moumou e taui’ ha lautolu he lagomatai e tutaki fakahele ha Iesu Keriso.—Mata. 10:42.d
12. Ko e heigoa ka taute e koe ke fakakite e fakaalofa hofihofi haau ma e tau matakainaga momotua?
12 Liga nakai ko koe he tuaga ke lagomatai e matakainaga motua tuga ne taute he magafaoa nei, ka e maeke ia koe ke lagomatai a lautolu ne momotua ke uta ke he tau feleveiaaga mo e gahua he fonua. Maeke foki ia koe ke uiina a lautolu ke he kaina haau mo e putoia a lautolu ke he tau fenoga fakafiafia haau. Maeke ia koe ke aahi atu a lautolu, mua atu ka gagao po ke nonofo fale a lautolu. Lafi ki ai, kua maeke mo e kua lata ia koe ke taute a lautolu tuga e tau tagata lalahi. He maeke agaia a lautolu ke manamanatu, kua lata e tau Kerisiano momotua ke putoia he taute e tau fifiliaga oti ne lauia ai a lautolu. Pihia foki a lautolu kua lahi e manamanatuaga ne galo kua maeke agaia ke mailoga kua fakalilifu he falu a lautolu.
To Nakai Nimo e Iehova e Gahua Haau
13. Ko e ha kua aoga ke fakakite e manamanatuaga ke he tau logonaaga he tau Kerisiano momotua?
13 Kua aoga lahi ke fakakite e manamanatuaga ke he tau logonaaga he tau tagata momotua. Ko e mena aga mau ke fakaagitau lahi e tau tagata momotua he nakai maeke a lautolu ke taute e tau mena fa mahani ne taute he tau vahā fuata taulekaleka mo e malolō lahi e tau tino. Tuga anei, ko e taha matakainaga fifine ne gahua hakahakau ki a Iehova ke kavi ke he 50 e tau mo e ko e paionia tumau ne moua he gagao kelea lahi mahaki ati uka lahi ke finatu ke he tau feleveiaaga. He fakatatai e ia e fekafekauaga fakamua haana mo e tau kūkū haana mogonei, ne kamata a ia ke tagi. He tukutuku hifo e ulu haana, ne tala a ia ka e hihina e tau mata, “Kua nakai fai mena aoga au ne taute mogonei.”
14. Ko e heigoa e fakamalolōaga kua maeke he tau fekafekau momotua ha Iehova ke moua mai he tau salamo?
14 Kaeke ko e tagata motua a koe, kua ha ha nakai ia koe e tau logonaaga mamahi pihia? Po ke fai magaaho nakai ne logona e koe kua liga tiaki e Iehova a koe? Liga pihia foki e tau logonaaga he salamo he tau tau fakahiku he haana moui, ha kua ole a ia ki a Iehova: “Aua neke tiaki e koe au ke he vaha fuakau; aua neke tiaki e koe au ka mole atu haku a malolo. Ko e Atua na e, aua neke tiaki e koe au ka fuakau au mo e uluhina.” (Sala. 71:9, 18) Mooli, to nakai tiaki e Iehova e tagata ne fati e salamo ia, mo e to nakai tiaki foki e Ia a koe. He taha salamo foki, ne fakakite e Tavita e mauokafua haana ke he lalagoaga he Atua. (Totou Salamo 68:19.) Kia mauokafua kaeke ko e Kerisiano ne motua a koe ne tua fakamooli, kua fakalataha a Iehova mo koe mo e to fakatumau ai ke leveki a koe ke he tau aho takitaha.
15. Ko e heigoa ka lagomatai a lautolu ne momotua ke fakatumau e onoonoaga atihake?
15 Ko e tau mena oti ne taute mo e hane taute he tau tagata momotua he Tau Fakamoli ha Iehova ke fakaheke e Atua kua tokaloto ke he manamanatuaga haana. “Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa,” he talahau he Tohi Tapu. (Hepe. 6:10) Ko e mena ia, kia fakamamao he feaki e onoonoaga kelea, he manamanatu hehē kua nakai aoga a koe ki a Iehova, ha kua motua tuai. Eketaha ke hukui e tau manatu fakaatukehe mo e fakateaga aki e tau manatu atihake. Olioli e tau monuina mo e tau amaamanakiaga haau ma e vahā anoiha! Kua moua e tautolu e “fakahikuaga ne ha i ai e amaamanaki”—ne mua ue atu—ti kua fakamooli he Tufuga ha tautolu e tau mena nei. (Iere. 29:11, 12; Gahua 17:31; 1 Timo. 6:19) Manamanatu ke he amaamanakiaga haau, ti gahua tumau ke fuata e loto mo e manamanatuaga, mo e nakai fakateaga e uho haau he fakalataha ke he fakapotopotoaga!e
16. Ko e ha ne manatu taha matakainaga taane ne motua kua lata a ia ke oti e motua, ka e fakamalolō fēfē he kau he tau motua a ia?
16 Manamanatu ki a Johan, ne 80 e tau he moui, hane leveki tumau ke he haana hoana tua fakamooli ne kulikuli mogonei, ko Sannie.f Ne fakafetokaki e tau matakainaga fifine ke nonofo mo Sannie ke maeke ia Johan ke fano ke he tau feleveiaaga mo e fonua. Ka e nakai la leva ia, ne lolelole lahi mahaki e manamanatuaga ha Johan ti kamata a ia ke manamanatu kua nakai lata a ia ke eke mo motua he fakapotopotoaga. “Ko e heigoa e aoga he eke au mo motua?” he hūhū e ia ka e tagitagi e tau mata. “Kua nakai maeke ia au ke taute ha gahua kua aoga i loto he fakapotopotoaga.” Ne fakamafana he tau matakainaga motua haana a ia kua uho lahi e tau mena ne iloa mo e tau fifiliaga haana. Ne fakamalolō e lautolu a ia ke fakatumau he eke mo motua, pete kua nakai lahi e vala haana ka taute. Ha kua fakamalolō lahi, ne fakatumau a Johan ke eke mo motua, ko e fakamonuinaaga ke he fakapotopotoaga.
Leveki Mooli e Iehova
17. Ko e heigoa e tau fakamafanaaga ne foaki he Tohi Tapu ma e tau Kerisiano momotua?
17 Ne fakamahino mai he tau Tohiaga Tapu kua matutaki a lautolu ne momotua ke tupu olaola fakaagaaga pete kua moua e lautolu e tau lekua he tau vahā fuakau. Ne fakapuloa he salamo: “Ko lautolu kua to ke he fale a Iehova, . . . ti fua agaia a lautolu; to lalahi mo e lauola a lautolu.” (Sala. 92:13, 14) Ne liga fehagai foki e aposetolo ko Paulo mo e matematekelea he tino ka e ‘nakai fakalolelole ai, pete ni kua moumou e tagata i fafo.’—Totou 2 Korinito 4:16-18.
18. Ko e ha kua lata e tau matakainaga momotua mo e tau tagata leveki ha lautolu ke moua e lagomatai he falu?
18 Kua fakakite he tau fakafifitakiaga loga he vahā nei kua maeke e tau tagata momotua ke “fua agaia.” Ka ko e tau paleko he gagao mo e vahā fuakau kua maeke ke fakalolelole, pihia foki e tau fuakau ne ha ha i ai e tau tagata he magafaoa ne leveki mo e eketaha ke lagomatai ki a lautolu. Maeke foki e tau tagata leveki ke mategūgū. Ha ha he fakapotopotoaga e kotofaaga mo e matafekau ke fakagahua e fakaalofa ha lautolu ke he tau tagata momotua mo e tau tagata leveki. (Kala. 6:10) Kua fakakite he fakaalofa pihia kua nakai tala age a tautolu ki a lautolu kia ō atu ā, “kia mafanatia, mo e makona” ka e nakai lagomatai atu ki a lautolu.—Iako. 2:15-17.
19. Ko e ha kua onoono atu e tau Kerisiano momotua tua fakamooli ke he vahā anoiha mo e mauokafua?
19 Liga hiki he vahā motua e tau matagahua he Kerisiano, ka e nakai hiki e fakaalofa a Iehova ma e tau fekafekau momotua fakamooli haana. Ke he taha faahi, ko e tau Kerisiano oti nei ne tua fakamooli kua uho lahi ke he fofoga Haana, mo e to nakai tiaki e ia a lautolu. (Sala. 37:28; Isaia 46:4) To leveki mo e takitaki e Iehova a lautolu he vahā fuakau.—Sala. 48:14.
[Tau Matahui Tala]
a Kikite e vala tala “Tau Momotua—Ko e Monuina ki a Lautolu ne Ikiiki,” he fufuta he Ko e Kolo Toko ia Iuni 1, 2007.
b Kikite e lau 3-10 he fufuta he Awake! ia Fepuari 8, 1994.
c He falu motu, kua liga putoia he mena nei e lagomatai ke he tau tagata momotua ke moua e tau lalagoaga fakatufono. Kikite e vala tala “Leveki he Atua a Lautolu ne Momotua,” he fufuta he Ko e Kolo Toko ia Iuni 1, 2006.
d Kikite e vala tala “Leveki Tumau e Iehova a Tautolu,” he fufuta he The Watchtower ia Sepetema 1, 2003.
e Kikite e vala tala “Ko e Fulufuluola he Uluhina,” he The Watchtower ia Mati 15, 1993.
f Hiki tuai e tau higoa.
To Tali Fēfē e Koe?
• Ko e ha kua uho lahi ki a koe e tau Kerisiano momotua tua fakamooli?
• Fakakite fēfē e tautolu e logonaaga fakaalofa ma e tau matakainaga momotua?
• Ko e heigoa ka lagomatai e tau fekafekau momotua ha Iehova ke moua e onoonoaga atihake?
[Tau Fakatino he lau 18]
Fakalilifu e lautolu he fakapotopotoaga e tau tagata momotua