Fakatumau e “Toua Kave Tolu” he Fakamauaga
“Ko e toua kave tolu nakai m[a]mutu vave ia.”—FAKAMA. 4:12.
1. Ko hai ne fakalataha e hoa tagata fakamua ke he fakamauaga?
HE MOLE e tufugatia he tau akau mo e tau manu momoui, ne eke e Iehova ko e Atua e tagata fakamua, ko Atamu. Fakamui, ne fakapulumohea he Atua a Atamu, ti uta e Ia e taha hui kahokaho a Atamu ke eke mo lagomatai mitaki katoatoa ma haana. He kitia e fifine, ne pehē a Atamu: “Ko e hui ni hanai he haku hui, mo e kakano he haku kakano.” (Kene. 1:27; 2:18, 21-23) Ne fakakite e Iehova e fiafia haana ha ko e tufugaaga nei, ti fakalataha e hoa tagata fakamua ke he fakamauaga mo e fakamonuina a laua.—Kene. 1:28; 2:24.
2. Fakatupu fēfē e Satani e faitaua ki a Atamu mo Eva?
2 Momoko ai, nakai leva ti totoko ke he fakamauaga ne fakatū he Atua. Puhala fe? Ko e agaaga kelea, ne fakahigoa ko Satani, ne fakahēhē a Eva ke kai mai he akau ne fakatapu ke he hoa. He mole agataha e mena ia, ne fakalataha a Atamu mo e hoana haana ke totoko ke he pule tonuhia mo e takitakiaga mitaki he Atua. (Kene. 3:1-7) He hūhū a Iehova ke he hoa hagaao ke he mena ne taute e laua, ne maaliali ai kua fitā e fakafetuiaga ha laua he fai lekua. Ne tukupau e Atamu e hoana haana, he pehē: “Ko e fifine ne ta mai e koe ke fakalataha mo au, ne ta mai e ia e fua akau kia au, ti kai ai e au.”—Kene. 3:11-13.
3. Ko e heigoa e onoonoaga hehē ne feaki he falu Iutaia?
3 Ke he tau senetenari loga, ne fakaaoga e Satani e tau lagatau kelea kehekehe ke fakaholofa e nakai fetataiaki ke he fakamauaga. Tuga anei, ke he falu magaaho, ne fakaaoga e ia e tau takitaki lotu ke fakaohooho e onoonoaga ne nakai mai he Tohi Tapu hagaao ke he fakamauaga. Ne taute fakateaga he falu takitaki Iutaia e tau tutūaga he Atua, he fakaatā e tau taane ke tiaki e tau hoana ha lautolu ha ko e tau mena noa tuga e fakamasima lahi e mena kai. Ka e talahau a Iesu: “Ko ia kua tiaki hana hoana, ka e nakai [feuaki] a ia, ti hoana ke he taha, kua faivao a ia.”—Mata. 19:9.
4. Kua totoko fēfē e fakaholoaga he fakamauaga he vahā nei?
4 Kua lavelave agaia a Satani he lali ke fakamamutu e pipi he fakamauaga. Ko e nonofo fakalataha he tau tagata fakasotoma, tau hoa nonofo ka e nakai mau, mo e mukamuka ke tau vevehe kua fakakite mooli e kautūaga haana ke he mena nei. (Totou Heperu 13:4.) Ko e heigoa kua lata ia tautolu, ko e tau Kerisiano, ke taute ke kalo mai neke fakaohooho he tau onoonoaga hehē hane holofa he fakamauaga? Kia fakatutala a tautolu ke he falu aga he fakamauaga ne fiafia mo e kautū.
Tokamau a Iehova ke he Fakamauaga
5. Ko e heigoa e kakano he talahauaga “toua kave tolu” ka hagaao ke he fakamauaga?
5 Ke monuina e fakamauaga, kua lata ke putoia foki a Iehova i loto he fakafetuiaga. Ne pehē e Kupu haana: “Ko e toua kave tolu nakai m[a]mutu vave ai.” (Fakama. 4:12) Ko e talahauaga fakatai e “toua kave tolu.” Ka hagaao e fakatai nei ke he fakamauaga, kua putoia ai e tau kave fakamua ne ua ko e taane mo e hoana, ne pipi fakalataha mo e matapatu kave, ko Iehova ko e Atua. He kaufakalataha mo e Atua ka foaki ke he hoa e malolō fakaagaaga ke fahia ke he tau lekua, ti ko e kei ke moua e fiafia lahi mahaki i loto he fakamauaga.
6, 7. (a) Ko e heigoa ka taute he tau Kerisiano ke iloa mooli kua ha ha ai a Iehova he fakamauaga ha lautolu? (e) Ko e heigoa kua aoga lahi ke he taha matakainaga fifine hagaao ke he taane haana?
6 Ka ko e heigoa kua lata he hoa mau ke taute ke iloa mooli ko e fakamauaga ha laua kua tuga e toua kave tolu ia? Ne lologo e salamo ko Tavita: “Haku Atua na e, kua fiafia au ke eke hāu a finagalo; ha i loto ia au hau a fakatufono.” (Sala. 40:8) Kua omoomoi foki a tautolu ha ko e fakaalofa ha tautolu ma e Atua ke fekafekau ki a ia mo e loto katoatoa. Ti, kua lata e tau hoa tokoua ke feaki fakatagata e fakafetuiaga mafanatia mo Iehova mo e fiafia he taute e finagalo haana. Kua lata foki he tau hoa mau ke eketaha ke fakamalolō e fakaalofa he hoa ha lautolu ma e Atua.—Fakatai 27:17.
7 Kaeke kua toka e fakatufono he Atua he tau loto ha tautolu, to kitia mooli e tau mahani tuga e tua, amaamanaki, mo e fakaalofa mo e to lagomatai ke atihake e pipiaga he fakamauaga. (1 Kori. 13:13) Kua talahau he Kerisiano ne higoa ko Sandra, ne 50 e tau he mau: “Ko e mena ne aoga lahi he taane haaku ki a au ko e takitakiaga mo e tomatomaaga fakaagaaga haana mo e fakaalofa haana ma Iehova, ne kua mua e malolō ke he fakaalofa haana ki a au.” Tau taane, kua maeke nakai ke pihia e talahauaga hagaao ki a koe?
8. Ko e heigoa kua lata ke moua aki “e taui mitaki” he fakamauaga?
8 Ko e hoa, kua tuku fakamua nakai he tau moui ha mua e tau mena fakaagaaga mo e tau mena he Kautu? Mua atu, mailoga mooli nakai e koe e tokoua haau ko e hoa he fekafekauaga ki a Iehova? (Kene. 2:24) Ne tohi he patuiki pulotu ko Solomona: “Kua mua he mitaki e tokoua ke he tokotaha; he ha ha ia laua e taui mitaki he tau gahua ha laua.” (Fakama. 4:9) Mooli, kua latatonu e taane mo e hoana ke gahua fakamalolō ke moua “e taui mitaki” ke he puhala fakaalofa mo e līlīaga tukulagi ne ha ha ai e monuina he Atua.
9. (a) Ko e heigoa e tau matagahua he tau taane? (e) Hagaao ke he Kolose 3:19, kua lata ke taute fēfē he taane e hoana haana?
9 Ko e kitiaaga kua ha ha ai e Atua ke he fakamauaga ha kua lali e taane mo e hoana ke fakatatau mo e tau poakiaga Haana. Ti moua he tau taane e kotofaaga pauaki ke leveki fakatino mo e fakaagaaga e magafaoa. (1 Timo. 5:8) Kua fakamafana foki ki a lautolu ke mailoga e tau manako he manamanatuaga he tau hoana ha lautolu. Ia Kolose 3:19, ne totou e tautolu: “Ko mutolu e tau tane, kia fakaalofa ke he tau hoana ha mutolu, ti ua fakahogohogo [po ke, ita lahi mahaki] kia lautolu.” Ne fakamaama he taha tagata pulotu Tohi Tapu, ko e kupu “fakahogohogo” kua putoia e “talahau ki a lautolu e tau kupu hukia, po ke vale, mo e fakatikai e fakaalofa hofihofi, leveki, foaki, puipui, mo e lagomatai ki a lautolu.” Maaliali ai, to nakai lata e mahani pihia i loto he magafaoa Kerisiano. Ko e taane ne fakagahuahua e tuaga pule haana ke he puhala fakaalofa kua omoomoi e hoana haana ke mautali ke omaoma ki a ia.
10. Ko e heigoa e aga kua lata he tau hoana Kerisiano ke fakakite?
10 Ko e tau hoana Kerisiano ne lali ke tokamau a Iehova ke he fakamauaga ha lautolu kua lata foki ke fakatatau ke he tau poakiaga he Atua. Ne tohi he aposetolo ko Paulo: “Ko mutolu na, ko e tau fifine kia takitokotaha mo e omaoma ke he tau tane ha mutolu tuga e omaoma ke he Iki. Ha ko e tane, ko e ulu he hoana haia, tuga a Keriso, ko e ulu he ekalesia haia.” (Efeso 5:22, 23) Ne fakahehē e Satani a Eva, he fakatupu ki mua e pikopiko, ko e tutokotaha mai he Atua ka moua e fiafia tukulagi. Maaliali ai, kua kitia mogonei e agaaga tutokotaha ke he tau fakamauaga loga. Ma e tau fifine mahani Atua mogoia, kua nakai kelea e omaoma ke he tau ulu fakahele ha lautolu. Na manatu e lautolu kua kotofa e Iehova a Eva ke eke mo “lagomatai” he taane haana, ti mailoga mooli he Atua ko e tuaga lilifu a ia. (Kene. 2:18) Ko e hoana Kerisiano ne makai ke kaufakalataha mo e fakaholoaga ia “ko e foufou” mooli ke he taane haana.—Fakatai 12:4.
11. Ko e heigoa ne talahau he taha matakainaga taane ne lagomatai e fakamauaga haana?
11 Ko e taha lagomatai ke tokamau e Atua ke he fakamauaga ma e hoa ke fakaako tokoua e Tohi Tapu. Ko Gerald, ne mau fiafia ai ke 55 e tau, ne pehē, “Ko e vala aoga lahi he fakamauaga kua kautū ko e totou mo e fakaako tokoua e Tohi Tapu.” Ne lafi e ia, “He taute mena tokoua, mua atu ke he tau mena fakaagaaga, kua fakatata lahi aki e tau hoa mo e ki a Iehova.” He fakaako tokoua e Tohi Tapu kua lagomatai e magafaoa ke tokaloto e tau poakiaga a Iehova, fakahokulo e tuaga fakaagaaga, mo e matutaki ke holo ki mua.
12, 13. (a) Ko e ha kua aoga lahi ma e tau hoa ke liogi tokoua? (e) Ko e heigoa falu matagahua fakaagaaga kua fakamalolō e fakamauaga?
12 Kua liogi tokoua foki e tau hoa mau ne fiafia. Ka ‘fakatokanoa e loto’ he taane ke he tau ole pauaki ne felauaki mo e tau tutūaga ha laua, to fakamalolō mooli e pipiaga he fakamauaga. (Sala. 62:8) Ke fakatai, ko e mukamuka lahi ha ia ke tuku kehe e tau fekehekeheaki mo e hoa haau he mole e liogi tokoua ke he Malolō Ue Atu ma e takitakiaga mo e fakatonuaga! (Mata. 6:14, 15) Ke felauaki mo e liogi, kua latatonu ke igatia a laua mo e fifili ke felagomataiaki mo e ke ‘fefakaukaaki mo e fefakamagaloaki.’ (Kolo. 3:13) Kia tokaloto kua fakakite he liogi e falanaki ke he Atua. Ne pehē e Patuiki ko Tavita: “Kua hagao atu [“mo e amaamanaki,” NW] kia koe e tau mata he tau mena oti kana.” (Sala. 145:15) Ka hagaao atu mo e amaamanaki a tautolu ke he Atua he liogi, kua gahoa lahi e tau fakaatukehe ha tautolu, he iloa “kua manatu e ia a [t]autolu.”—1 Pete. 5:7.
13 Taha puhala foki ke tokaloto a Iehova ke he fakamauaga ko e ō ke he tau feleveiaaga he fakapotopotoaga mo e gahua tokoua ke he fonua. He tau feleveiaaga ha tautolu, kua fakaako e tau hoa ke totoko ke he “tau lagatau” hane fakaaoga e Satani ke vehe aki e tau magafaoa. (Efeso 6:11) Ti ko e taane mo e hoana ne gahua tumau ke he fonua kua ako ke ‘fakatumau mo e nakai fagahuatia.’—1 Kori. 15:58.
Ka Tutupu e Tau Mena Uka
14. Ko e heigoa e tau vala ne lafi ke he tupetupe he fakamauaga?
14 Mooli, ko e tau manatu i luga ne nakai ko e tau mena foou, ti ko e ha he nakai tutala fakamooli ai mo e hoa haau? Kitia kua fai vala pauaki nakai ne kua lata ke hagaaki ki ai he fakamauaga haau. Kua talahau mooli mogoia he Tohi Tapu, ko lautolu foki ne ha ha ai e Atua he fakamauaga to “moua a lautolu kua pihia he matematekelea ke he tino.” (1 Kori. 7:28) Ha ko e tau tagata nakai mitaki katoatoa, ko e fakaohoohoaga kelea he lalolagi matahavala nei, mo e tau matahele he Tiapolo, kua lauia foki e tau fakamauaga he tau fekafekau he Atua ke he tau tupetupe lahi mahaki. (2 Kori. 2:11) Ka kua fakamalolō e Iehova a tautolu ke fahia ke he tau tupetupe pihia. E, kua maeke. Ne mamate e tau manu, tau fekafekau, mo e tau tama he tagata tua fakamooli ko Iopu. Ka e pehē e Tohi Tapu: “Nakai hala a Iopu he tau mena oti na, ti nakai pehe foki a ia kua goagoa e Atua.”—Iopu 1:13-22.
15. Fakatupu fēfē he tupetupe e tau tagata ke tali atu, mo e kua lata ke tali atu fēfē e tau hoa ki ai?
15 Ke he taha faahi, ne tala age e hoana a Iopu ki a ia: “Kua taofi agaia kia e koe hau a mahani hakohako? kia vagahau kelea a a koe ke he Atua, mo e mate ai a koe.” (Iopu 2:9) Mooli, ka tutupu e tau tutūaga matematekelea po ke falu mena uka, kua fakalagalaga he tau logonaaga fakaatukehe e tagata ati nakai manamanatu fakamitaki ai. “Ko e favale ke moua ai e tau mena kua fakagoagoa ai ni e tagata iloilo,” he talahau he tagata pulotu. (Fakama. 7:7) Kaeke ke vagahau he hoa haau e tau kupu hukia ha ko e tau mena uka po ke “favale,” lali ke fakatotoka. He tali pihia ka liga fakatupu a koe po ko mua tokoua ke talahau taha mena ka fakaauatu e lekua. (Totou Salamo 37:8.) Ti tiaki e ‘kupu fakahanoa’ ne liga fakatupu e hogohogomanava po ke fakalolelole.—Iopu 6:3.
16. (a) Fakagahua fēfē ke he fakamauaga e tau kupu a Iesu ne moua ia Mataio 7:1-5? (e) Ko e ha e lagotatai kua aoga lahi he fakamauaga?
16 Kua lata he tau hoa mau ke mooli e tau amaamanakiaga. Liga mailoga he taha e tau aga fakatagata pauaki he taha ti manamanatu, ‘Maeke au ke hiki a ia.’ He fakaalofa mo e fakauka, liga maeke ia koe ke lagomatai e hoa haau ke holo fakahaga ki mua. Ka e ua nimo, ne fakatai e Iesu e tagata ne mailoga e tau kūkū ikiiki ke he tagata ne kitia e “mala akau” he mata he matakainaga haana ka e nakai kitia e ia e “akau fakalava” he mata ni haana. Ne fakamafana e Iesu a tautolu: “Aua neke fakafili atu e mutolu, neke fakafili a mutolu.” (Totou Mataio 7:1-5.) Kua nakai pehē e mena nei kua lata ke tiaki e tau matalekua hagahagakelea. Ne teitei 40 e tau he mau a Robert, ne pehē: “He vagahau fakamooli mo e makai ke talia e tau onoonoaga aoga kua liga lata ke taute he tau hoa mau e tau hikiaga he tau momoui ha laua.” Kia lagotatai. He nakai hogohogomanava ke he tau aga ne manako a koe ke kitia he hoa haau, fakaako ke loto fakaaue mo e olioli e tau mahani mitaki haana mogonei.—Fakama. 9:9.
17, 18. Ka loga lahi e tau lekua, to fuluhi a tautolu ki fe ma e lagomatai?
17 Kua liga tutupu e tau kamatamata ka hiki e tau tutūaga he moui. Liga fehagai e hoa mo e tau paleko ka fanafanau a laua. Liga gagao lahi e hoa po ke tama. Ti liga lata e tau matua momotua mo e levekiaga pauaki. Kua liga mamao e matakavi ne hiki ki ai e fanau kua lalahi. Ko e falu hikiaga kua liga fua mai he leveki e tau kotofaaga mo e tau matagahua fakateokarasi. Ko e tau hikiaga oti nei kua fakatupu falu tupetupe mo e fakaatukehe ke he fakafetuiaga.
18 Ka logona e koe kua nakai fahia ha ko e uka he fakamauaga haau, ko e heigoa haau ka taute? (Fakatai 24:10) Kia nakai fakalolelole! Kua manako lahi a Satani ke he taha fekafekau he Atua ke tiaki e tapuakiaga meā. To fiafia lahi mahaki a ia ka taute pihia he hoa. Ko e mena ia, kia eketaha a koe ke fakamau e toua kave tolu ke he fakamauaga haau. Ne tohi he Tohi Tapu e tau tala loga ki a lautolu ne tumau ke tua fakamooli pete ne tau kamatamata vevela. Ke fakatai, he taha magaaho, ne liligi e Tavita e loto haana ki a Iehova, he pehē: ‘Ko e Atua na e, fakaalofa mai kia au; ha ko e tau tagata kua favale mai kia au.’ (Sala. 56:1) Kua logona nakai e koe e favale mai he “tau tagata”? He logona e koe e tupetupe ne tupu mai he tagata mamao po kua tata ki a koe, kia manatu: Ne moua e Tavita e malolō ke fakauka, ti maeke foki ia koe. “Ne kumikumi au kia Iehova, ti tali mai ai a ia kia au,” he talahau e Tavita. “Mo e laveaki e ia au mai he tau mena oti ne matakutaku ai au.”—Sala. 34:4.
Falu Monuina Foki
19. Maeke fēfē ia tautolu ke totoko e tau lagatau a Satani?
19 He vahā nei he fakaotiaga, kua lata e tau hoa mau ‘kia fetomaaki mo e fefakamafanaaki.’ (1 Tesa. 5:11) Ua nimo, ne fakatumau a Satani, ko e fakamooli ha tautolu ki a Iehova kua fakavē ni ke he lotokai. To fakaaoga e ia e tau puhala kehekehe, putoia e fakalekua he fakamauaga, ke moumou e mahani fakamooli ha tautolu ke he Atua. Ke totoko e tau lagatau a Satani, kua lata ia tautolu ke falanaki katoatoa ki a Iehova. (Fakatai 3:5, 6) Ne tohi e Paulo: “Kua maeke ia au e tau mena oti kana ke he fakamalolo mai a [Iehova] kia au.”—Filipi 4:13.
20. Ko e heigoa e tau monuina he tokamau e Atua ke he fakamauaga haau?
20 Kua loga lahi e tau monuina ne fua mai he ha ha ai e Atua ke he fakamauaga. Kua pihia mooli e mena nei ki a Joel mo e hoana haana ne mau ke 51 e tau. Ne pehē a ia: “Ne fakaaue tumau au ki a Iehova ma e hoana haaku mo e fakafetuiaga fiafia ha maua. Ko e hoa mitaki lahi a ia.” Ko e heigoa e kei ha laua? “Ne lali tumau a maua ke fefakakiteaki e mahani totonu, fakauka, mo e fakaalofa.” Nakai fai ia tautolu ke taute katoatoa e mena ia he fakatokaaga nei. Pete ia, kia lali fakalahi a tautolu ke fakagahua e tau matapatu fakaakoaga he Tohi Tapu mo e tokamau a Iehova ke he fakamauaga ha tautolu. Kaeke ke taute pihia e tautolu to eke e fakamauaga ha tautolu ke tuga e “toua kave tolu nakai m[a]mutu vave ia.”—Fakama. 4:12.
Manatu Nakai e Koe?
• Ko e heigoa e kakano ke tokamau a Iehova ke he fakamauaga?
• Ko e heigoa kua lata he tau hoa mau ke taute ka tutupu e tau mena uka?
• Iloa fēfē e tautolu kua ha ha ai e Atua he fakamauaga?
[Tau Fakatino he lau 18]
He liogi tokoua kua lagomatai e tau hoa mau ke fehagai mo e tau tutūaga paleko