Fifitaki a Iesu—Tuku Atu e Tapuakiaga kua Talia ke he Atua
Kua uiina fakaalofa he Atua e tau tagata “mai he tau motu oti, mo e tau faoa, mo e tau tagata kehekehe, mo e tau vagahau kehekehe” ke tapuaki ki a ia. (Fakakite. 7:9, 10; 15:3, 4) Ko lautolu ne talia e uiina nei ka ‘kitia e fulufuluola a Iehova.’ (Sala. 27:4; 90:17) Ke tuga e salamo, ne fakaheke fakaleo lahi a lautolu ke he Atua, he pehē: “Kia hufeilo a tautolu, mo e tukutuku hifo; kia fakatokotui a tautolu ki mua a Iehova ko ia ne eke a tautolu.”—Sala. 95:6.
Tapuakiaga ne Uho Lahi
Ne lahi e magaaho ha Iesu, ko e Tama fuataha, he Atua he fakaako e tau puhala manamanatu, tau matapatu fakaakoaga, mo e tau tuaga he Matua haana. Ati maeke ia Iesu ke talahau mauokafua e puhala ke he tapuakiaga mooli. Ne pehē a ia: “Ko au nai ko e puhala, mo e kupu moli, mo e moui; nakai hau taha ke he Matua, ka noa mo au.”—Ioane 1:14; 14:6.
Ne fakatoka e Iesu e fakafifitakiaga mitaki katoatoa he muitua fakatokolalo ke he Matua haana. Ne pehē a ia: “Nakai eke noa foki e au ha mena, ha ko e mena tuga ne fakaako mai he haku a Matua kia au, ko e tau mena ia ne tala atu ai e au.” Ti lafi e ia: “Ko e mena eke mau e au e tau mena kua mitaki [po ke, fakafiafia] kia ia.” (Ioane 8:28, 29) Fēfē e tau puhala ne fakafiafia aki e Iesu haana Matua?
Taha puhala, ne fakamooli katoatoa a Iesu ke he Matua haana, ti ko e matapatu kakano haia ke tapuaki e Atua. Ne fakakite e Iesu e matutakiaga fakatagata ke he Matua haana he omaoma ki a Ia, he taute e finagalo Haana, ti putoia e magaaho ne foaki e ia e poa fakatagata haana. (Filipi 2:7, 8) Ko e vala aoga lahi he tapuakiaga ha Iesu ko e fakalataha tumau a ia ke he gahua taute tutaki, ati fakahigoa e lautolu ne talitonu mo e nakai talitonu a ia ko e Akoako. (Mata. 22:23, 24; Ioane 3:2) Mua atu, ne lahi e lagomatai ha Iesu ma e tau tagata. He aga foaki noa haana, ne nakai lahi e magaaho ma haana ni, ka kua fiafia a ia ke fekafekau ke he falu. (Mata. 14:13, 14; 20:28) Pete he lavelave, ne kumi magaaho tumau a Iesu ke tutala ke he Matua haana he lagi ke he liogi. (Luka 6:12) Kua uho lahi mooli e tapuakiaga ha Iesu ke he Atua!
Ko e Taufetului ke Fakafiafia Fakalahi e Atua
Ne mailoga e Iehova e mahani he Tama haana ti talia ai e Ia. (Mata. 17:5) Ka kua mailoga foki e Satani ko e Tiapolo e moui tua fakamooli ha Iesu. Ti eke a Iesu mo matafī pauaki ha Satani. Ko e ha? Ha kua nakaila fai tagata ia kua tumau e omaoma katoatoa ke he Atua, mo e tapuaki katoatoa ki a ia. Ti manako e Tiapolo ke taofi a Iesu he tuku atu e tapuakiaga kua tonuhia mooli ki a Iehova.—Fakakite. 4:11.
He lali ke moumou a Iesu, ne fina atu a Satani mo e kamatamata a ia. Ne uta e ia a Iesu ke he “taha mouga ne tokoluga ue atu, kua fakakite atu foki kia ia e tau kautu oti he lalolagi, mo e lilifu ha lautolu.” Ti tala age a ia: “To ta atu e au e tau mena oti nai kia koe, kaeke ke fakaveli mo e hufeilo mai a koe kia au.” Tali atu fēfē a Iesu? Ne pehē a ia: “Ati fano kehe a a koe ma Satani; ha ko e mena kua tohi, kia hufeilo atu a koe ke he Iki hau a Atua, ko ia ni hokoia ke fekafekau atu a koe ki ai.” (Mata. 4:8-10) E, ne mailoga e Iesu ko e tapuaki tupua ke tukutuku hifo ki a Satani pete ne tau monuina ka moua. Ne nakai manako a ia ke taute e tapuakiaga ke he ha tagata ka ki a Iehova ni.
Ki a tautolu, liga nakai foaki e Satani e tau kautu oti mo e lilifu he lalolagi ke tautui aki e tapuakiaga ha tautolu. Ka e lali agaia a ia ke tauhele e tapuakiaga ne tuku atu he tau Kerisiano mooli ke he Atua. Kua manako e Tiapolo ke tapuaki a tautolu ke he taha tagata po ke taha mena.—2 Kori. 4:4.
Ne fakakite e Keriso Iesu e tua fakamooli haana ke hoko ke he mate. He fakatumau e fakamooli haana ke he Atua, ne fakaheke e Iesu a Iehova ke he puhala ne nakaila taute pihia he ha tagata. Ma e tau Kerisiano mooli he vahā nei, kua eketaha a tautolu ke muitua ke he puhala tua fakamooli he moui a Iesu he tuku fakamua e tapuakiaga ha tautolu ke he Tufuga. Mooli, ko e fakafetuiaga mitaki mo e Atua ko e koloa uho lahi ha tautolu.
Tau Monuina he Taute e Tapuakiaga kua Talia
He fakatupu “e oma [po ke tapuaki] ke he Atua kua mitaki mo e fakamoli” nukua fua mai e tau monuina loga. (Iako. 1:27) Ma e fakatai, kua nonofo a tautolu he magaaho ne tokologa lahi e tagata ne kua ‘ofaofa a lautolu ni, velevele koloa, hula noa,’ mo e “nakai loto ke he mitaki.” (2 Timo. 3:1-5) I loto he fakatokatokaaga he Atua, kua moua e tautolu e monuina he lafi mo e tau tagata mitaki mo e atihake, ne eketaha ke tuku fakatokoluga e tau tuaga he Atua he tapuaki ki a ia. Nakai kia ko e punaaga fakahauhau a ia?
He fakatumau ke nakai ilaila he lalolagi nei, kua fakamonuina foki a tautolu aki e manamanatuaga meā. Kua manako a tautolu ke fakatumau e manamanatuaga meā he muitua ke he tau matapatu fakaakoaga tututonu he Atua mo e he omaoma foki ke he tau fakatufono ha Kaisara ne lagotatai mo e tau fakatufono he Atua.—Mare. 12:17; Gahua 5:27-29.
Kua tamai he tapuakiaga loto katoa e taha monuina foki. Ka hagaaki a tautolu ke taute e finagalo he Atua ka e nakai ha tautolu ni, to fai kakano mo e fiafia e moui ha tautolu. He nakai pehē: “Kia kai mena a tautolu mo e inu, ha ko e mena mamate a tautolu a pogipogi,” kua moua e tautolu e amaamanakiaga mauokafua he moui tukulagi ke he parataiso he lalolagi.—1 Kori. 15:32.
Ne fakakite he tohi a Fakakiteaga e magaaho ka “o mai mai he matematekelea lahi” a lautolu ne tumau e tuaga meā ki mua a Iehova. Ne pehē e fakamauaga “ko [I]a foki kua nofo ke he nofoaiki to nofo a ia mo lautolu.” (Fakakite. 7:13-15) Ko ia ne nofo he nofoaiki ko Iehova ko e Atua, ko e Peresona lilifu ue atu he lagi mo e lalolagi katoatoa. Lali ke manamanatu ko e olioli ha ia he magaaho ka fakafeleveia e Ia a koe ke fakalataha mo ia he foaki ki a koe e levekiaga puipui ke nakai fai mena hagahaga kelea ka tupu ki a koe! Ti maeke foki ke olioli e tautolu e puipuiaga mo e levekiaga haana he mogonei.
Mua atu, ko lautolu oti ne tuku atu e tapuakiaga kua talia ke he Atua ne fakakite kua takitaki atu ke he “tau vaipuna he moui.” Ko e tau vaipuna fakahauhau nei kua fakakite e tau foakiaga oti ne taute e Iehova ke moua e tautolu e moui tukulagi. E, ha ko e poa lukutoto he Keriso, “to holoholo kehe foki he Atua e tau hihinamata oti mai he tau mata ha lautolu.” (Fakakite. 7:17) To fakamalagaki e tau tagata ke he mitaki katoatoa, ti foaki e olioli mua ue atu ki a lautolu ne amaamanaki ke moui tukulagi ke he lalolagi. Pihia foki he mogonei, ko e tau tagata tapuaki fiafia he Atua hane lologo olioli he fakakite e loto fakaaue mai he tau loto ha lautolu ki a Iehova mo e tapuaki ki a ia fakalataha mo lautolu he lagi ne uhu: “Ko e Iki na e, ko e Atua mana, kua lalahi hau a tau gahua ke ofomate ai; kua tonu mo e fakamoli hau a tau puhala, ko e Patuiki [tukulagi]. Ko hai kia taha, ma Iki na e, kua nakai matakutaku kia koe, mo e nakai fakaheke atu ke he hau a higoa? ha ko koe hoko koe ni kua mitaki; ha ko e mena to o mai e tau motu oti, mo e hufeilo ki ho mua; ha kua fakakite mai tuai hau a tau fakafiliaga tonu.”—Fakakite. 15:3, 4.
[Fakatino he lau 27]
Ko e heigoa ha Satani kua foaki ki a tautolu ke tautui aki e tapuakiaga ha tautolu?