Kua Lata a Koe ke Tapuaki ke he Atua Fe?
KE FAKAMUAAKI, ko hai e Atua taha, kua lata ke tapuaki atu ki ai tokotaha? Kua tali mai he Tohi Tapu ke he puhala kua hako ni. Ne fakailoa mai e tohi ha Fakakiteaga: “Kua lata moli a koe ma Iehova, ko koe ko e ha mautolu a Atua, ke moua e fakahekeaga mo e lilifu lahi mo e malolo, ha kua tufugatia e koe e tau mena oti, mo e ha ko e hau a finagalo ne ha ha i ai a lautolu mo e ne tufugatia ai.” (Fakakiteaga 4:11, NW) E, ko Iehova, ko e Tufuga, hokoia ni ko e Atua kua lata ke moua ha tautolu a tapuakiaga. Ko e ha? To liliu mai a tautolu ke he huhu ia, ka mole fakaku ai. Ka e fakamua, kia tutala a tautolu hagaao ke he falu he tau atua ne tapuaki ki ai e tau tagata.
I Tua he tau Atua Pikopiko Oti
Pete ni kua tokologa e tau atua ne fekafekau e tau tagata ki ai, ko e moli hanai, ko e tau tapuaki oti ne foaki age ke he tau atua oti i loto he tau kautu—ne kehe mai he tapuakiaga ne foaki atu ki a Iehova, ko e Tufuga—kua fekafekau ke he finagalo he taha ni e atua. Ke he puhala fe? Kia totou e tau kupu he aposetolo ko Paulo ke he tau Kerisiano i Korinito. I loto he taone ia, loga e tau atua ne tapuaki ki ai, mai he mahani feuaki ko Aphrodite hoko ki a Aesculapius, ko e ha lautolu a atua fakamaulu. Ne fakakite e Paulo, pehe ni, kua moli ko e ha ha i ai taha e malolo kelea i tua he tau atua oti ia. Ne tohia e ia: “Ka ko e tau mena kua keli mo poa he tau motu kehe, kua keli mo poa ai e lautolu ke he tau temoni, ka e nakai ke he Atua.” (1 Korinito 10:20) E, ne tapuaki ke he tau temoni e tau Korinito pouliuli.
Ko e tau temoni ne toka ai ha lautolu a kamataaga i loto he totokoaga. Ko ia ne fakamua mo e lahi mua atu ia lautolu ko e mena moui fakaagelu ne fakataki a Eva ke he moumouaga he mata fakatufono he Atua i tuai i loto he katene ha Etena. (Kenese 3:1-6; Ioane 8:44) He taute pihia, ne totoko atu e mena moui nei ke he pule katoatoa he Tufuga. He mole ai, kua eke tuai a ia ke ui ko Satani, ko e kakano “ko ia ko e Totoko.” He magaaho fakamui, ne matutaki atu e falu he tau mena moui fakaagaga ki a ia ke he totokoaga. Kua eke foki a lautolu mo tau temoni, mo e ne fakamailoga ai a Satani ko e “iki he tau temoni.” (Mataio 12:24, 26) I loto he tohi ha Fakakiteaga, ne ui e tau temoni nei ko e “tau agelu” ha Satani. (Fakakiteaga 12:7) Ti ko e tapuaki ke he tau temoni kua tatai ni ke tapuaki atu ki a Satani.
Kua ha ha ia Satani e malolo fakahehe lahi mahaki. Ko e aposetolo ko Ioane ne pehe “ko e lalolagi oti” ne ha ha ai i loto he hana malolo, mo e ui e Paulo a ia ko e “atua he lalolagi nai.” (1 Ioane 5:19; 2 Korinito 4:4) Ti ka pihia, ko e tapuaki ke he taha atua ne kehe mai ia Iehova, kua moli ni kua tapuaki atu ki a Satani. Ke hoko atu ke he tau mena fakateaga, kua fekafekau atu ke he finagalo ha Satani ha ko e hana a foli ke fakataki e fanau ha Atamu mo Eva ke totoko atu ki a Iehova. Ha kua pihia a Satani, “kua fakahehe e lalolagi oti,” kua maaliali ai ne kautu a ia ke he laulahi he loga he tau mena ne taute e ia. (Fakakiteaga 12:9) Ka e nakai ke he tau mena oti. Kua ha i ai agaia e tau miliona ne fakamakamaka ke tapuaki atu ki a Iehova. Ko e ha?
Ko e tau Fua he Tapuaki Hepe
He taha e mena, ne iloa e lautolu ko e tapuaki atu ke he tau atua, ka e nakai ko Iehova, kua lahi e tau uka, ne nakai manako a lautolu ke totogi. Ko e kumikumiaga ke he tau mena ne aku hake he kelekele i Carthage tuai, i Afelika Tokelau, ne moua e tukuagamau he tau fanau. Ne toka i loto e tau polo hui motua he tau kau ikiiki, ne fakapoa ke he atua he tau Foinike ko Paala. Ko e fakapoa tama e taui kelea lahi ne totogi atu he tau tagata Carthage, ma e tapuaki ha Paala. Ko e tau fakaakoaga Katolika pouliuli he vaha ia, ne pihia foki e taui ne moua he magaaho ne taute ai e tau mena fakamatematekelea he tau Kautau fakalotu ne fiafia ke fakamaligi toto mo e mahani fakamamahi he Fakatuaga Fakafili he tau Katolika. Ko e tapuaki ke he tau atua Inca he vaha fakamua to hoko atu e tau Amelika Kolumupia ne fakalataha ki ai e keliaga fakatapuaki he tau afe tagata.
He tau vaha kua fou lahi, kehekehe e tau taofiaga he tapuaki ne fakalataha ke he kelipopoaga lahi mahaki i Initia, mo e foaki atu fakalahi foki a lautolu ke he tau mena vihi ne kelea lahi fakapolitika he Middle East (Lotouho he Fahi Uta) mo Ielani Tokelau. Ko e nakai iloa, tau mahani matakutaku aitu, mo e matakutaku noa kua lata foki ke tohi he tohiaga ko e vala he taui ne totogi atu he tagata ma e tapuakiaga ke he hana tau atua loga.
Ko e ha kua Lata a Koe ke Fekafekau ki a Iehova ko e Atua?
He taha fahi, ko e tapuaki ki a Iehova kua moua mai e tau mena mitaki kua lata. He taha e mena, ko ia ni, ne “moui tukulagi tukumuitea, ko ia ne eke e lagi mo e tau mena ha ha i ai, . . . mo e tahi mo e tau mena ha ha i ai.” (Fakakiteaga 10:6) Ti kua lata a tautolu ke tapuaki atu ki a ia ha ko e Tufuga ha tautolu a ia.
Ke lafi ki ai, kua lata a tautolu ke tapuaki atu ki a Iehova ko e Atua, ha ko e uiina mai he hana tau mahani a tautolu ke tapuaki atu ki a ia. Ko e aposetolo ko Ioane ne pehe “ko e Atua ko e Fakaalofa.” (1 Ioane 4:8) Ko e tagata fakamoli ko Iopu ne pehe ko e “kua pulotu e loto he [Atua] mo e malolo hana a pule.” (Iopu 9:4, NW) Ne hagaao e lologo ha Mose ki a ia: “Ko e Maka tumau a ia, kua katoatoa ni e mitaki hana gahua; ha kua tonu hana tau puhala oti ni? ko e Atua kua fakamoli, nakai ha ha ia ia ha mahani kelea, ko e mahani tututonu mo e mahani hakohako ni a ia.” (Teutaronome 32:4) Ko hai ke fakauaua ke fekafekau ke he Atua pihia?
Ke lafi ki ai, ko e pehe mai he Tohi Tapu: “Ko e mahani Atua kua aoga ia ke he tau mena oti kana, he toka ai e mena kua talahaua mai ke he mouiaga nai katoa mo ia kua tatali.” (1 Timoteo 4:8) Ko e moli ha e mena nei! Kua manako a Iehova ke he tau mena kua mitaki ma e tau tagata. Ne foaki mai e ia e lalolagi kaina fulufuluola ma e hana tau mena tufugatia, mo e taute fakaloga e ia e tau mena ke maeke ai e moui ke moua e fiafia. Pete ni, kua totoko e tagata, ne matutaki agaia e Atua ke fagai tumau e moui i luga he lalolagi nei, kua foaki mai oti e tau mena kua lata ma e tagata tuga “kua fakahake ne ia hana la kia lautolu kua mahani kelea katoa mo lautolu kua mahani mitaki, kua fakato hifo foki e ia e uha kia lautolu kua tututonu katoa mo lautolu kua nakai tututonu.”—Mataio 5:45.
Ka e ne “toka ai e mena kua talahaua mai ke he mouiaga nai” ne fakaholo loa atu foki. Ke fekafekau ke he Atua kua mamakona lahi e fiafia, mo e fakamoli ai e tau manako. Ko e tau mena haia ne fakatokatoka fakamua e talagaaga ha tautolu ke taute. Mo e kua lagomatai he Atua a lautolu ne fekafekau fakamoli ki a ia ke taute ke kautu ai ke he moui. Ne fakapuhala mai he Tohi Tapu, kua foaki mai e ia e taki-takiaga ki a lautolu ne nonofo takitokotaha, ko e tokoua ne kua mau, tau fanau—tau tagata he tau fanoaga oti he mouiaga nei. Ne foaki mai e ia e pulotu, kua maeke ke falanaki moli ki ai ke lagomatai ke he tau tutuaga oti ke maeke ai a tautolu ke taute fakamitaki e tau mena vihi ha ko e tau tagata nakai mitaki katoatoa, he lalolagi i lalo he malolo ha Satani. Kaeke kua tapuaki a tautolu ke he Atua he puhala kua fiafia a ia ki ai, kua maeke ia tautolu ke moua e fiafia, “ko e mafola he Atua ne fakamitaki lahi e tau manamanatu oti.”—Filipi 4:7, NW.
Kua mitaki lahi foki ke mailoga, ke “toka ai e mena kua talahau mai ke he mouiaga . . . katoa mo ia kua tatali.” Ne talage e Iesu ke he Farasaio ko Nikotemo: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Ko e moui tukulagi! Ko e heigoa he falu a atua ne kehe mai ia Iehova kua maeke ke mavehe mai e mena pihia mo e ke maeke ke fakamoli hana maveheaga? Ko e fakahikuaga ha lautolu kua moua e mena fakaalofa ia ne fakamaama mai i loto ia Fakakiteaga: “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” (Fakakiteaga 21:4, 5) Kua moli ni, ko e amaamanakiaga he moui ka hoko mai kua lata ke taute a tautolu ke manako ke fekafekau ki a Iehova!
Ko e Atua fe, mogoia, kua lata a tautolu ke tapuaki? Ko Iehova ni hokoia, ko e Tufuga. Mai he tau atua oti, ko e hagaao ni hokoia ki a ia e tau kupu: “Kua lalahi mo e ofoofogia e tau gahua hau, ma Iehova ko e Atua, ko e Malolo Katoatoa. Kua tututonu mo e moli hau a tau puhala, Patuiki he tukulagi tukumuitea. Ko hai ka nakai matakutaku moli ki a koe, ma Iehova, mo e fakaheke hau a higoa, ha ko koe tokotaha kua fakamoli? Ha ko e tau kautu oti ka omai mo e tapuaki ki mua hau, ha ko e hau a tau mata fakatufono tututonu kua fita he taute e fakakiteaga.” (Fakakiteaga 15:3, 4, NW) Fefe e pulotu ha lautolu ne talia e tauteaga ke he tomatomaaga he salamo: “O mai a, kia hufeilo a tautolu, mo e tukutukuhifo; kia fakatokotui a tautolu ki mua a Iehova ko ia ne eke a tautolu”!—Salamo 95:6.
[Fakatino he lau 6]
Ko e falu he tau atua ne fakataki aki e Satani e tau tagata ke tapuaki
[Fakatino he lau 7]
Ko e tau amaamanakiaga he moui ka hoko mai kua lata ke taute aki a tautolu ke manako ke fekafekau ki a Iehova