Hūhū he Tau Tagata Totou ha Tautolu
Talitonu Kia e Tau Fakamoli a Iehova ko Lautolu Ni ka Fakamoui?
Ne manatu e Tau Fakamoli a Iehova kua moua tuai e lautolu e lotu mooli. Ane mai nakai manatu pihia a lautolu, to hiki e lautolu e tau taofiaga ha lautolu. Tuga e tau tagata talitonu he tau lotu loga, ne amaamanaki e Tau Fakamoli a Iehova ke fakamoui. Pete ia, ne talitonu foki a lautolu nakai ko e gahua ha lautolu ke fakafili ko hai ka fakamoui. Mua ue atu, ko e Atua e Fakafili. Ko ia ka fifili.—Isaia 33:22.
Ne fakakite he Kupu he Atua ko lautolu ka fakamoui kua nakai ni manako ke he fakamouiaga ka e lata foki ke kaufakalataha mo e Fakahao. Ke fakatai: Liga kua galo e tagata fano hui he tutakale. Ne manako lahi a ia ke moua e puhala haana. To mate a ia, po ke to hao a ia? Ko e fakahikuaga kua falanaki ke he puhala ne talia e ia e lagomatai. Ha ko e fakaikaluga, to liga fakaheu e ia e lagomatai he tagata fakahao, po ke fakamoui. Ke he taha faahi, liga talia fakatokolalo e ia e lagomatai mo e moua e haohao mitaki.
He puhala pihia, kua fakamomoui a lautolu ne kaufakalataha mo Iehova ko e Atua, ko e Fakahao he tau tagata. Ko e mena fakaalofa mai he Atua e fakamouiaga, ka e nakai moua he tau tagata oti kana. Ko e Tama he Atua, ko Iesu, ne pehē: “Nakai hohoko ke he kautu he lagi a lautolu oti kua pehe mai kia au, Ko e Iki na e, ko e Iki na e; ka ko ia ni kua eke e finagalo he haku a Matua ha ha he lagi.”—Mataio 7:21.
Ne talitonu e Tau Fakamoli a Iehova to fakamoui ni he Atua a lautolu ne fakagahua e tua ke he poa lukutoto ha Iesu mo e muitua fakatata ke he tau fakaakoaga ha Iesu. (Gahua 4:10-12) Manamanatu ke he tolu e poakiaga aoga ma e fakamouiaga ne fakakite he Kupu he Atua.
(1) “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu,” he tala age e Iesu ke he tau kapitiga haana. (Ioane 13:35) Ko e fakafifitakiaga ha Iesu he foaki e moui haana ma e falu kua peehi e aoga lahi he fakaalofa. Ko lautolu ne fakaalofa ke he falu kua fakatātā e mahani kua latatonu ma e fakamouiaga.
(2) “Ne fakailoa atu foki e au hau a higoa kia lautolu,” he talahau e Iesu he liogi ke he Matua haana. (Ioane 17:26) Ne iloa e Iesu e aoga lahi he higoa fakaperesona he Atua, ko Iehova, ke he Matua haana. Ne liogi a Iesu ma e higoa he Matua haana ‘kia fakatapu.’ (Mataio 6:9) He fakatapu e higoa he Atua kua putoia e iloa e higoa ia mo e taute ai ke aoga mo e tapu. Tuga a Iesu, ko lautolu ne kumi e fakamouiaga kua lata ke fakaaoga e higoa he Atua. Kua lata foki ia lautolu ke fakaako e falu hagaao ke he higoa mo e tau mahani he Atua. (Mataio 28:19, 20) Ti ko lautolu hokoia ne ui ke he higoa he Atua ka fakamoui.—Roma 10:13.
(3) “Nakai ko e kautu he lalolagi nai haku a kautu,” he talahau e Iesu ki a Ponotio Pilato. (Ioane 18:36) Tokogahoa he vahā nei ne fakatātā e tua ke he Kautu, po ke fakatufono he Atua, nukua Patuiki ai a Iesu. Ka kua falanaki a lautolu ke he tau fakatokatokaaga he tagata. Ke he taha faahi, ko lautolu ka fakahao kua lalago fakamooli e Kautu he Atua mo e fakaako e falu hagaao ke he puhala ka fakatokanoa ai e tau tagata tua fakamooli.—Mataio 4:17.
He mole e fakaako ke he falu poakiaga ma e fakamouiaga, ne pehē e tau tutaki a Iesu: “To maeke ke fakamoui a hai?” Ne tali e Iesu: “Ko e tau mena nakai maeke ke he tau tagata, kua maeke ni ke he Atua.” (Luka 18:18-30) Kua lali fakamakutu e Tau Fakamoli a Iehova ke hokotia ke he tau poakiaga nei ke moua e fakamouiaga. Kua gahua malolō foki a lautolu ke lagomatai falu ke moua e moui.