Ko e Ha kua Fakatumau e Mahani Fakamooli Haau?

“Iehova na e, kia fakafili mai e koe au ke lata . . . mo e haku a mahani [“fakamooli,” NW].”—SALA. 7:8.

1, 2. Ko e heigoa falu tutūaga fa mahani ne foaki e tau paleko ke he mahani fakamooli he Kerisiano?

MANAMANATU ke he tolu e tuaga: Ko e tama taane ne fehagai mo e falu kapitiga haana he aoga. Kua lali a lautolu ke fakalagalaga a ia ke ita, liga ke amuamu po ke latau. To taui atu nakai a ia, po ke to fakauka a ia mo e fano kehe? Ko e taane hane nofo tokotaha i kaina ne taute falu kumikumiaga ke he Internet. Ne hake mai he komopiuta haana e puha, ne fakatātā e faahi Web fakalialia. To kamatamata nakai a ia ke hafagi e faahi ia, po ke to eketaha mooli a ia ke kalo kehe mai i ai? Ko e fifine Kerisiano ne fetutalaaki mo e falu ne fakahiku e fakatutalaaga ke he kelea, ati loma fakahukia hagaao ke he taha matakainaga fifine he fakapotopotoaga. To fakalataha nakai a ia ke he tutalaaga kelea pihia, po ke to lali a ia ke hiki e matakupu?

² Pete kua kehekehe e tau tutūaga pihia, kua fai mena ne tatai e tau mena ia. Kua putoia oti ai e eketaha ke fakatumau e mahani fakamooli he Kerisiano. Kua manamanatu nakai a koe ke he mahani fakamooli haau ni he fehagai a koe mo e tau tupetupe, tau manako, mo e tau foliaga he moui? He tau aho takitaha, ne manamanatu e tau tagata ke he tau foliga ha lautolu, malolō tino ha lautolu, mo e tau paleko he moui, ko e tau lekua he vahāloto he tau kapitiga, liga pihia foki e fakafetui loto fakavihi. Liga to hagaaki lahi a tautolu ke tupetupe ke he tau mena ia. Ka ko e heigoa ne kua aoga lahi ki a Iehova he kumikumi e ia e tau loto ha tautolu? (Sala. 139:23, 24) Ko e mahani fakamooli ha tautolu.

3. Ko e heigoa e fifiliaga ne tuku mai e Iehova ki a tautolu, mo e ko e heigoa ka fakatutala a tautolu ki ai he vala tala nei?

³ Ko Iehova, ko e Foaki he “tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki,” kua tuku mai ki a tautolu takitokotaha e tau mena fakaalofa loga. (Iako. 1:17) Fakaaue ki a ia, kua ha ha ia tautolu e tau mena fakaalofa tuga e tino, loto manamanatu, malolō tino kua lata, mo e tau lotomatala loga. (1 Kori. 4:7) Pete ia, ne nakai fakaohooho e Iehova a tautolu ke fakakite e mahani fakamooli. Ne toka e ia a tautolu ke fifili ne tautolu to feaki nakai e tautolu e mahani nei. (Teu. 30:19) Kua lata a tautolu mogoia ke kumikumi ko e heigoa e mahani fakamooli. To fakatutala foki a tautolu ke he tolu e kakano ne aoga lahi mahaki e mahani nei.

Ko e Heigoa e Mahani Fakamooli?

4. Ko e heigoa ne putoia ke he mahani fakamooli, mo e heigoa ka ako e tautolu mai he fakatufono ha Iehova hagaao ke he poa manu?

⁴ Tokologa e tagata ne liga nakai iloa mitaki e kakano he mahani fakamooli. Ma e fakatai, he magaaho ka hula e tau tagata politika ha ko e mahani fakamooli ha lautolu, ne fa hihiga a lautolu ke hagaao ke he aga fakamooli. Kua aoga e aga ia, ka ko e vala ni he mahani fakamooli. Tuga ne fakaaoga i loto he Tohi Tapu, kua putoia e mahani fakamooli ke he mahani mitaki kua katoatoa. Ko e tau kupu Heperu ne matutaki ke he “mahani fakamooli” kua mai he matapatu kakano katoatoa e mitaki, mau katoatoa, po ke nakai fai kelea. Taha he tau kupu nei kua fakaaoga ke hagaao ke he tau poa ka foaki ki a Iehova. Kua ofania ni e ia e poa manu kaeke kua mitaki, po ke katoatoa. (Totou Levitika 22:19, 20.) Ne fakahala malolō e Iehova a lautolu ne fakaheu pauaki e takitakiaga haana he poa e tau manu ne kulikuli, gagao, po ke matapouli.—Mala. 1:6-8.

5, 6. (a) Ko e heigoa e tau fakataiaga ne fakakite kua fa tuku fakatokoluga e tautolu e tau mena kua mau katoatoa? (e) Ha ko e tau tagata nakai mitaki katoatoa, kua kakano kia ko e mahani fakamooli kua mitaki katoatoa? Fakamaama.

⁵ Ko e manatu ke kumi mo e tuku fakatokoluga e mena ia ne mau katoatoa, kua nakai matakehe. Ke tuga anei, kia manamanatu la ke he tagata oko tohi ne moua e pepa uho lahi ne kua leva tuai e kumi, ka e mailoga e ia kua fai lau aoga lahi kua mokulu kehe. He hogohogo manava ai, ne liga liu a ia tuku he fata tohi. Po ke fakatino e fifine ne fano he mataafaga, ti hane oko falu fua pule ne pē mai he tau peau ki uta. Kua ofoofogia ke he loga mo e fulufuluola he tau tufugatia nei, ne fa pepelu hifo a ia ke kitekite ki ai. Ko e kau fe la ka uta e ia? Ko e kau ne mau katoatoa. Pihia foki, kua kumi he Atua e tau tagata ne ha ha i ai e mahani nei kua mau katoatoa.—2 Nofo. 16:9.

⁶ Ka e liga tuahā a koe po kua lata e mahani fakamooli ke mitaki katoatoa. Ha kua ilaila a tautolu he agahala mo e nakai mitaki katoatoa, liga hihiga a tautolu ke manamanatu hifo kua tatai a tautolu mo e pepa ne nakai katoatoa e tau lau po ke fua pule malona. Kua logona hifo pihia nakai a koe he falu magaaho? Mailoga mooli na nakai amanaki a Iehova ki a tautolu ke he puhala mitaki katoatoa. Ne nakai amanaki a ia ke taute e tautolu e tau mena ne nakai fahia a tautolu ki ai.a (Sala. 103:14; Iako. 3:2) Pete ia, kua amanaki agaia a ia ki a tautolu ke fakatumau e mahani fakamooli. Kua fai kehekehe kia mogoia he vahāloto he mitaki katoatoa mo e mahani fakamooli? E. Ke fakatai: Ne ofania he fuata taane e fuata fifine ka mau e ia. To goagoa a ia ke amanaki ke mitaki katoatoa e fuata fifine. Ka kua pulotu a ia ke amanaki ke he fuata fifine ke ofania katoatoa a ia, kakano, ke fakakite ni ki a ia tokotaha e fakaalofa loto fakavihi. Ke he puhala pihia foki, ko Iehova ko ia ko e “Atua ita tafua.” (Esoto 20:5) Kua nakai amanaki a ia ke mitaki katoatoa a tautolu, ka ke fakaalofa loto katoatoa ki a ia, he foaki ki a ia tokotaha e tapuakiaga.

7, 8. (a) Ko e heigoa e fakafifitakiaga ne fakatoka e Iesu hagaao ke he mahani fakamooli? (e) Ko e heigoa e kakano he mahani fakamooli ke he puhala faka-Tohiaga Tapu?

⁷ Liga kua fakamanatu ki a tautolu e tali ha Iesu he magaaho ne hūhū ki a ia ko e fakatufono fe ne mua e aoga ke he tau fakatufono oti. (Totou Mareko 12:28-30.) Ne nakai ni foaki e Iesu e tali; ne moui fakalautatai a ia ki ai. Ne fakatoka e ia e fakafifitakiaga tokoluga mua ue atu he fakaalofa ki a Iehova mo e manamanatuaga, loto, agaaga, mo e malolō katoa haana. Ne fakakite e ia kua mailoga e mahani fakamooli, nakai ni ke he tau kupu, ka ke he tau gahua mitaki ne puna mai he tau manatu meā. He tumau a tautolu ke mahani fakamooli kua lata ke mumui ke he tau tuagahui ha Iesu.—1 Pete. 2:21.

⁸ Hanei mogoia e alito he mahani fakamooli ha tautolu ke he puhala faka-Tohiaga Tapu:ko e fakamooli loto katoatoa ke he Peresona tokotaha he lagi, ko Iehova ko e Atua, mo e ke he tau finagalo ne fakakite e ia. Ko e kakano he fakatumau ke mahani fakamooli he tau momoui ha tautolu he tau aho takitaha, to kumi fakamua a tautolu ke fakafiafia a Iehova ko e Atua ke he tau mena oti. To fakaata he tau mena aoga lahi he moui ha tautolu e tau mena ne aoga lahi ki a ia. Kia fakatutala a tautolu ke he tolu e kakano ne aoga lahi ai e mena nei.

1. Ko e Mahani Fakamooli ha Tautolu mo e Matakupu he Pule Katoatoa

9. Matutaki fēfē e mahani fakamooli fakatagata ha tautolu ke he matakupu he pule katoatoa ke he lagi mo e lalolagi?

⁹ Ko e pule katoatoa ha Iehova kua nakai falanaki ke he mahani fakamooli ha tautolu. Ko e pule katoatoa haana kua fakafili tonu, tukulagi, mo e viko takai ai ke he lagi mo e lalolagi katoa. To pihia tumau ai pete ne tau mena ka talahau po ke taute he tau mena momoui. Ka kua ekefakakelea lahi e pule katoatoa he Atua i luga he lagi mo e he lalolagi. Ati lata ai e pule haana ke fakatokoluga—fakamooli ke tonuhia, fakafili tonu, mo e fakaalofa—ki mua he tau mena momoui iloilo oti kana. Kua fiafia lahi a tautolu ko e Tau Fakamoli a Iehova ke tutala hagaao ke he pule katoatoa he Atua ke he lagi mo e lalolagi fakalataha mo e ha tagata ka fanogonogo. Ka e maeke fēfē ia tautolu takitokotaha ke tutū mauokafua ke he matakupu ia? Fakakite fēfē kua fifili e tautolu a Iehova mo Pule Katoatoa ha tautolu ni? He fakatumau ke mahani fakamooli.

10. Ko e heigoa e tukupau ne taute e Satani hagaao ke he mahani fakamooli he tau tagata, mo e to manako a koe ke tali atu fēfē?

¹⁰ Manamanatu ke he puhala ne putoia ai e mahani fakamooli haau. Ne talahau e Satani to nakai fai tagata ka lalago e pule katoatoa he Atua, to nakai fai tagata ka fekafekau ki a Iehova mai he fakaalofa mooli. I mua he fakapotopotoaga lahi he tau mena momoui fakaagaaga, ne pehē e Tiapolo ki a Iehova: “Ko e kili ke totogi aki e kili; ko e tau mena oti foki ha ha he tagata, to ta age e ia ke totogi aki hana moui.” (Iopu 2:4) Mailoga ne nakai fakakaupā e Satani e ekefakakelea ia ke he tagata tututonu ko Iopu ka e talahau ke putoia e tau tagata oti. Ati ui he Tohi Tapu a Satani ko “ia ne hokotaki e tau matakainaga ha tautolu.” (Fakakite. 12:10) Ne fakafiufiu e ia a Iehova he talahau ko e tau Kerisiano—putoia foki a koe—to nakai tumau ke tua fakamooli. Ne talahau e Satani to afo e koe a Iehova ke totogi aki e moui haau. Fēfē e logonaaga haau ke he tau tukupau pihia ne taute ki a koe? To nakai kia fiafia a koe ke moua e magaaho ke fakakite kua pikopiko a Satani? He fakatumau e mahani fakamooli haau, to taute pihia ni e koe.

11, 12. (a) Ko e heigoa e tau fakafifitakiaga ne fakakite ko e tau fifiliaga ha tautolu he tau aho takitaha kua hagaao ke he matakupu he mahani fakamooli fakatagata ha tautolu? (e) Ko e ha ko e kotofaaga lilifu ke fakatumau e mahani fakamooli?

¹¹ Ko e matakupu hagaao ke he mahani fakamooli haau ati aoga lahi e mahani mo e tau fifiliaga he tau aho takitaha. Liu manamanatu la ke he tolu e tuaga ne totoku fakamua e tautolu. Ko e heigoa mogoia e puhala he mahani fakamooli? Ko e tama taane ne fakafiufiu he tau kapitiga aoga haana kua kamatamata lahi ke taui atu ki a lautolu, ka e manatu e ia e tomatomaaga nei: “Ko e tau fakahelehele na e, aua neke taui atu e mutolu, ka kia fakatokatoka atu ke he ita; ha kua tohi mai, Kua pehe mai e Iki, Ha ha ia au ke taui atu, to taui atu e au ni.” (Roma 12:19) Ne fano kehe a ia. Ko e taane ne fakaaoga e Internet kua maeke ke onoono atu ke he tau fakatino fakalagalaga mahani fakataane mo e fifine, ka e manatu e ia e matapatu fakaakoaga ne fakakite he tau kupu ha Iopu: “Ne eke e au e maveheaga mo e tau mata haku, ko e heigoa foki e mena ke manatu ai au ke he tamafine tote?” (Iopu 31:1) Pihia foki, ne fakaheu e tagata taane ia ke onoono atu ke he tau fakatino kelea, he kalo kehe he tau fakatino pihia ke tuga ko e mena kona. Ko e fifine ne fetutalaaki mo e falu matakainaga fifine ne liga logona e ia e tau loma fakahukia ti kalo mai ai, he manatu e takitakiaga: “Ka kia takitokotaha a tautolu mo e fakafiafia a ia ne katofia mo ia, kia mitaki ai a ia, to fakamafanatia ai.” (Roma 15:2) Ko e loma ka liga liu fatiaki e ia kua nakai fakamafanatia. To nakai lauia mitaki e haana matakainaga fifine Kerisiano; to nakai fiafia foki e Matua haana. Ti tautaofi ai e ia e alelo haana mo e hiki e matakupu.

¹² Ke he tau tuaga takitaha ia, ne taute he Kerisiano e fifiliaga ne tuga kua pehē: ‘Ko Iehova e Pule haaku. To lali au ke taute e mena ka fakafiafia a ia ke he mena nei.’ Onoono pihia nakai a koe ke he tau fifiliaga fakatagata haau? Kaeke ke taute pihia e koe, kua omaoma mooli a koe ke he tau kupu mafanatia ne tohi he Tau Fakatai 27:11: “Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.” Ko e kotofaaga lilifu ha ia kua moua e tautolu he fakafiafia e loto he Atua! Kua nakai kia aoga e tau laliaga oti ha tautolu ke fakatumau ke mahani fakamooli?

2. Ko e Fakavēaga ma e Fakafiliaga Faka-Atua

13. Fakakite fēfē he tau kupu ha Iopu mo Tavita kua fakafili e Iehova a tautolu he fakavē ke he mahani fakamooli?

¹³ Kitia ai e tautolu kua taute he mahani fakamooli a tautolu ke tutū mauokafua ma e pule katoatoa ha Iehova. Ti ko e fakavēaga a ia ka fakafili he Atua a tautolu. Ne maama mitaki e Iopu e kupu mooli nei. (Totou Iopu 31:6.) Iloa e Iopu na fafati he Atua e tau tagata oti ke he “fua tautau tonu,” he fakaaoga e tuaga mitaki katoatoa Haana he fakafili tonu ke fuafua aki e mahani fakamooli ha tautolu. Ne talahau pihia foki e Tavita: “To fakafili e Iehova e tau motu; Iehova na e, kia fakafili mai e koe au ke lata mo e haku a tututonu, mo e haku a mahani [fakamooli] ha ia au. . . . ha kua kumi loto mo e kumi manatu he Atua tututonu.” (Sala. 7:8, 9) Iloa e tautolu kua maeke he Atua ke ono matua ke he fatuakiloto he tagata, he ‘tau loto mo e tau manatu.’ Ka kua lata ia tautolu ke manatu e mena ne kumi a ia ki ai. Tuga ne talahau e Tavita, kua fakafili e Iehova a tautolu hagaao ke he mahani fakamooli ha tautolu.

14. Ko e ha kua nakai lata ia tautolu ke manatu kua taofi he nakai mitaki katoatoa mo e tuaga agahala a tautolu mai he fakatumau ke he mahani fakamooli ha tautolu?

¹⁴ Manamanatu la hane kumi e Iehova ko e Atua e tau loto he tau tagata ne totou piliona he vahā nei. (1 Nofo. 28:9) Kua lagafiha e moua e ia e tagata kua fakatumau e mahani fakamooli faka-Kerisiano? Kua fa lavea ni! Pete ia, kua nakai lata ia tautolu ke manatu kua agahala lahi a tautolu ke fakatumau ke mahani fakamooli. Ke he taha faahi, kua ha ha ia tautolu e kakano mitaki ke falanaki, tuga ne taute e Tavita mo Iopu, to moua e Iehova a tautolu hane fakatumau ke mahani fakamooli, pete kua nakai mitaki katoatoa a tautolu. Manatu, kua nakai maeke e mitaki katoatoa ke fakatumau e mahani fakamooli ha tautolu. Ko e tolu ne tagata mitaki katoatoa ne o fano he lalolagi nei, ti tokoua, ko Atamu mo Eva, ne kaumahala ke fakatumau ke mahani fakamooli. Ka kua totou miliona agaia e tau tagata nakai mitaki katoatoa ne kautū he taute pihia. Maeke foki ia koe.

3. Aoga Lahi ke he Amaamanakiaga ha Tautolu

15. Fakakite fēfē e Tavita kua aoga lahi e mahani fakamooli ke he amaamanakiaga ha tautolu ma e vahā anoiha?

¹⁵ Ha ko e mahani fakamooli ne fakavē ki ai e fakafiliaga ha Iehova ki a tautolu, kua aoga lahi ai ke he amaamanakiaga ha tautolu ma e vahā anoiha. Ne iloa e Tavita kua mooli e mena nei. (Totou Salamo 41:12.) Ne tokiofa e ia e amaamanakiaga he moua e fiafia tukulagi he Atua. Tuga e tau Kerisiano mooli he vahā nei, ne amaamanaki a Tavita ke moui tukulagi, ti matutaki ke fakatata fakalahi atu ki a Iehova ko e Atua he fekafekau ki a ia. Ne mailoga e Tavita kua lata a ia ke fakatumau e mahani fakamooli haana kaeke kua manako a ia ke kitia e amaamanakiaga ia ka fakakatoatoa. Pihia foki, ne fakatokoluga e Iehova a tautolu, fakaako a tautolu, takitaki a tautolu, mo e fakamonuina a tautolu he fakatumau a tautolu ke mahani fakamooli.

16, 17. (a) Ko e ha kua fifili tumau a koe ke taofi mau e mahani fakamooli haau? (e) Ko e heigoa e tau hūhū ka fakatutala ki ai he vala tala ka mui mai?

¹⁶ Kua aoga lahi e amaamanakiaga ke he fiafia ha tautolu mogonei. Maeke ke foaki ki a tautolu e fiafia ne kua lata mo tautolu ke fahia ke he tau magaaho uka. Maeke foki he amaamanakiaga ke puipui e manamanatuaga ha tautolu. Manatu, na fakatai he Tohi Tapu e amaamanakiaga ke he potiki tau. (1 Tesa. 5:8) Tuga he puipui he potiki tau e ulu he kautau he malē tau, maeke he amaamanakiaga ke puipui e loto manamanatu ha tautolu mai he tau manatu kelea mo e fakateaga ne fakaohooho e Satani he lalolagi tuai nei hane galo fakahaga. Kua fakateaga mooli e moui, ka nakai fai amaamanakiaga a tautolu. Lata ia tautolu ke kumikumi fakamooli hifo ki a tautolu ni, he manamanatu fakamitaki ke he tuaga he mahani fakamooli ha tautolu mo e ke he amaamanakiaga ne matutaki ki ai. Aua neke nimo he fakatumau ke mahani fakamooli, kua fakatokoluga e koe e pule katoatoa ha Iehova mo e leveki foki e amaamanakiaga uho haau ma e vahā anoiha. Kia fakatumau a koe ke taofi mau e mahani fakamooli haau!

¹⁷ Ha kua aoga lahi e mahani fakamooli, kua lata ia tautolu ke manamanatu ke he falu hūhū foki. Feaki fēfē e tautolu e mahani fakamooli? Maeke fēfē ia tautolu ke taofi mau ki ai? Mo e ko e heigoa ka taute kaeke kua fai magaaho ne nakai taofi mau ai he taha tagata? To tali he vala tala ka mui mai e tau hūhū nei.

[Matahui Tala]

To Tali Fēfē e Koe?

• Ko e heigoa e mahani fakamooli?

• Matutaki fēfē e mahani fakamooli ke he matakupu he pule katoatoa ke he lagi mo e lalolagi?

• Foaki fēfē he mahani fakamooli e fakavēaga ma e amaamanakiaga ha tautolu?

[Tau Fakatino he lau 5]

Foaki he moui he tau aho takitaha e tau paleko loga ke he mahani fakamooli ha tautolu