To Fakatumau Nakai a Koe ke he Mahani Fakamooli Haau?

“Ato hoko ke he aho ke mate ai au nakai toka e au haku a mahani hakohako.”—IOPU 27:5.

1, 2. Ko e heigoa e matagahua talaga kua lata ia tautolu ke taute, mo e ko e heigoa e tau hūhū ka fakatutala a tautolu ki ai?

MANAMANATU hane kitekite a koe ke he tau palana ke tā aki e fale. Kua nava a koe ke he aoga lahi he talagaaga. Ne fiafia a koe he manamanatu ke he tau puhala ka aoga e fale ki a koe mo e magafaoa haau. Ka e talia nakai a koe, to nakai aoga lahi e tau palana ia mo e tau manamanatu ne taute e koe, ato tā mooli e koe e fale, hiki atu ki loto, ti leveki ai?

² Pihia foki, liga nava a tautolu ke he aoga lahi he mahani fakamooli ka tamai ki a tautolu mo lautolu ne ofania e tautolu e mitaki lahi mahaki. Ka e he manamanatu fakamitaki hagaao ke he mahani fakamooli to nakai aoga lahi ki a tautolu ato atihake mo e fakatumau ke he mahani fakamooli Kerisiano ha tautolu. He lalolagi he vahā nei, ko e tau matagahua tā fale kua fa tauuka lahi mahaki. (Luka 14:28, 29) Tuga ia, he atihake e mahani fakamooli kua lahi foki e magaaho mo e gahua, ka kua aoga lahi mahaki. Kia fakatutala la a tautolu ke he tolu e hūhū: Maeke fēfē a tautolu ke eke mo tau tagata mahani fakamooli? Maeke fēfē ia tautolu ke fakatumau e mahani fakamooli Kerisiano ha tautolu? Ko e heigoa ka taute kaeke kua fai magaaho ne nakai tumau taha tagata ke he mahani fakamooli haana?

Eke Fēfē a Tautolu mo Tau Tagata Mahani Fakamooli?

3, 4. (a) Ko e tau puhala fe ne lagomatai e Iehova a tautolu ke atihake e mahani fakamooli? (e) Maeke fēfē ia tautolu ke atihake e mahani fakamooli, tuga ne fakafifitaki e Iesu?

³ Ne mailoga e tautolu he vala tala fakamua kua fakalilifu e Iehova a tautolu he foaki mai e kotofaaga ke fifili to eke a tautolu mo tau tagata mahani fakamooli po ke nakai. Ka e fiafia ai, kua nakai toka e ia a tautolu ki a tautolu ni ke he mena nei. Ne fakaako e ia a tautolu ke he puhala ke atihake e mahani uho nei, mo e foaki fakamokoi mai e ia ki a tautolu e agaaga tapu haana, ka lagomatai a tautolu ke fakagahua e tau fakaakoaga haana. (Luka 11:13) Kua foaki foki e ia e puipui fakaagaaga ma lautolu ne lali ke ō fano ke he mahani fakamooli.—Fakatai 2:7.

⁴ Fakaako fēfē e Iehova a tautolu ke eke mo tau tagata fakatumau ke he mahani fakamooli? Ki luga he tau mena oti ia, ha kua fakafano mai e haana Tama, ko Iesu, ke he lalolagi. Ne moui a Iesu ke he puhala omaoma katoatoa. “Ne oma e ia kua hoko ke he mate.” (Filipi 2:8) Ke he tau mena oti ne taute e Iesu, ne omaoma a ia ke he Matua haana he lagi, ke he magaaho uka lahi mahaki foki. “Ka e aua neke eke hoku loto, ka ko e hau a finagalo,” he talahau e ia ki a Iehova. (Luka 22:42) Kia igatia a tautolu mo e hūhū hifo ki a ia ni, ‘Ha ha nakai ia au e aga omaoma pihia?’ He tutuli e puhala omaoma mo e tau logonaaga hako, to eke a tautolu mo tau tagata fakatumau ke he mahani fakamooli. Manamanatu ke he falu faahi he moui ne aoga pauaki e omaoma.

5, 6. (a) Peehi fēfē e Tavita e aoga lahi he fakatumau ke mahani fakamooli pihia foki ka nakai kitia he falu tagata a tautolu? (e) Ko e heigoa e paleko ke he mahani fakamooli ne fehagai mo e tau Kerisiano he vahā nei he magaaho ko lautolu ni takitokotaha?

⁵ Kua lata ia tautolu ke omaoma ki a Iehova ka liga ko tautolu ni takitokotaha. Ne mailoga he salamo ko Tavita e aoga lahi he mahani fakamooli he tau magaaho ne liga ko ia ni tokotaha. (Totou Salamo 101:2.a) Ha ko e patuiki, ne fakalataha tumau a Tavita mo e tau tagata. Nakai fakauaua ai ne loga e magaaho ne tokoteau, ti tokoafe foki e tau tagata kitekite haana. (Fakatatai Salamo 26:12.) Ko e fakatumau ke mahani fakamooli he tau magaaho pihia kua aoga lahi, ha kua latatonu he patuiki ke fakatoka e fakafifitakiaga mitaki ma e tau tagata haana. (Teu. 17:18, 19) Pete ia, ne ako e Tavita ka liga ko ia ni tokotaha—he ‘haana a fale’—kua latatonu agaia a ia ke faifano ke he mahani fakamooli. Ka e kua a tautolu?

⁶ Ia Salamo 101:3, ne moua e tautolu e tau kupu ha Tavita: “Nakai tuku e au ki mua haku ha mena kelea.” Loga e tau magaaho he vahā nei kua tuku ki mua ha tautolu e tau mena kelea, mua atu ka eke ko tautolu ni takitokotaha. He fakaaoga e Internet kua foaki ke he tokologa e paleko ke he mena nei. Kua mukamuka ke fakataki atu ke kitekite e tau fakatino kiva, mo e telefua foki. Ka e he taute pihia ko e omaoma kia ke he Atua ne omoomoi a Tavita ke tohi e tau kupu ia? Kua hagahaga kelea e tau fakatino telefua, ha kua fakalagalaga e tau manako hehē mo e lotokai, moumou e loto manamanatu, uulu ki lalo e tau fakamauaga, mo e ekefakakelea e tau tagata oti ne putoia ai.—Fakatai 4:23; 2 Kori. 7:1; 1 Tesa. 4:3-5.

7. Ko e heigoa e matapatu fakaakoaga ka lagomatai a tautolu ke fakatumau ke he mahani fakamooli he magaaho ko tautolu ni takitokotaha?

⁷ Mooli, nakai fai fekafekau a Iehova ne ko ia ni tokotaha. Kua kitekite mai ha tautolu a Matua fakaalofa ki a tautolu. (Totou Salamo 11:4.) Kua fiafia mooli a Iehova he kitia a koe hane totoko e kamatamata! He taute pihia e koe, kua omaoma a koe ke he hatakiaga maama he tau kupu ha Iesu ne moua ia Mataio 5:28. Ke he tau mena oti, kia eketaha ke nakai onoono ke he tau fakatino ka kamatamata a koe ke taute e mena hehē. Kia nakai fakafua atu e mahani fakamooli uho haau aki e gahua fakalialia he totou po ke kitekite ke he tau fakatino telefua!

8, 9. (a) Ko e heigoa e paleko ne fehagai ke he mahani fakamooli ha Tanielu mo e tau hoa haana? (e) Fakafiafia fēfē he tau Kerisiano fuata ikiiki he vahā nei a Iehova mo e tau matakainaga Kerisiano ha lautolu?

⁸ Maeke foki a tautolu ke eke mo tau tagata fakatumau ke he mahani fakamooli he omaoma ki a Iehova ka ha ha ai mo lautolu ne nakai talitonu. Manamanatu ki a Tanielu mo e tau hoa tokotolu haana. Ko e tau fuata, ne uta fakapaea a lautolu ki Papelonia. Ne agaagai a lautolu i ai he tau tagata nakai talitonu ne iloa tote po ke nakai iloa a Iehova, ne peehi ke he tau Heperu tokofā ke taumafa ke he tau mena kai ne fakatapu he Fakatufono he Atua. Liga kua mukamuka he tau tama taane ia ke pulega e puhala ke fakahui. Ha kua nakai ha ha i ai ha lautolu a tau matua, tau patu, mo e tau ekepoa ke kitia e tau mena ha lautolu tokofā ne taute. To iloa e hai? To iloa ni e Iehova. Ti tutū mauokafua a lautolu mo e omaoma ki a ia pete e peehiaga mo e hagahaga kelea.—Tani. 1:3-9.

⁹ He lalolagi katoa, hane muitua e tau fuata ikiiki he Tau Fakamoli a Iehova ke he puhala pihia, he taofi mau ke he tau tutūaga he Atua ma e tau Kerisiano mo e nakai talia ke mahala ke he peehiaga hagahaga kelea he tau atu taha. He nakai talia a mutolu ma tau fuata ke putoia ke he tau tulaki, favale, amuamu, mahani feuaki, mo e falu gahua hehē foki, hane omaoma a mutolu ki a Iehova. He taute pihia e mutolu, hane fakatumau a mutolu ke he mahani fakamooli ha mutolu. Kua aoga ni ki a mutolu, mo e fakafiafia e mutolu a Iehova mo e tau matakainaga Kerisiano ha mutolu!—Sala. 110:3.

10. (a) Ko e heigoa e kitekiteaga hehē ke he mahani feuaki ne takitaki e falu fuata ke fakahui e mahani fakamooli ha lautolu? (e) Takitaki fēfē he mahani fakamooli a tautolu ke nakai mokulu ke he hagahaga kelea he feuaki?

¹⁰ Kua lata foki ia tautolu ke omaoma ka fakafehagai e tagata taane mo e fifine. Iloa e tautolu nakai fakaatā he Kupu he Atua e mahani feuaki. Pete ia, kua mukamuka ke fakaatā e aga omaoma ke mahala ke he aga fakahanoa. Tuga anei, ko e falu fuata kua taute e mahani fakataane mo e fifine ke he puhala halagutu po ke fakasotoma po ke mulumō e taha tagata, he manamanatu ko e tau gahua nei kua nakai kelea lahi ha kua nakai hokotia pauaki “ke taute e mahani fakataane mo e fifine.” Kua nimo he tau fuata pihia—po ke liga fifili ke fakaheu—ko e kupu Tohi Tapu ma e mahani feuaki kua putoia e tau matagahua oti ia, ko e mahani hehē ka tuku e tagata ki tua.b Kua au atu e kelea mogoia he fakaheu e lautolu e latatonu ma e mahani fakamooli. Ha kua eketaha a tautolu ke fakatumau ke he mahani fakamooli ha tautolu, kua nakai kumi e tautolu e tau piuaga. Kua nakai lali a tautolu ke teitei ke agahala ka e nakai fakahala. Nakai hagaaki katoatoa a tautolu ke he tau fakafiliaga ka liga moua mai he tau gahua hehē. Ka kua hagaaki a tautolu ke taute e mena ka fiafia a Iehova, he kalo mai he mena ka fakamamahi e tau logonaaga haana. He nakai kitia e tata lahi mahaki ha tautolu ke he agahala, kua fakamamao a tautolu i ai mo e ‘fehola kehe he feuaki.’ (1 Kori. 6:18) Ati fakakite e tautolu ko tautolu ko e tau tagata kua katoatoa e mahani fakamooli.

Fakatumau Fēfē e Mahani Fakamooli ha Tautolu?

11. Ko e ha e tau mahani omaoma takitaha kua aoga lahi? Fakatai.

¹¹ Kua atihake a tautolu ke he mahani fakamooli he omaoma, ti fakatumau e tautolu e mahani fakamooli he fakauka ke he puhala omaoma. Ko e lagataha e mahani omaoma kua liga nakai aoga lahi—ko e mena tote. Ka kua lafi fakahaga e mahani omaoma pihia ka fai magaaho he mole. Ke fakatai: Ko e taha e piliki kua liga nakai fai aoga, ka e kaeke ke fata fakamitaki e tautolu e tau piliki loga, kua maeke ia tautolu ke talaga e fale mitaki. Ti ko e matutaki ke lafi ke he mahani omaoma ha tautolu kua fakatumau a tautolu ke he mahani fakamooli ha tautolu.—Luka 16:10.

12. Fakatoka fēfē e Tavita e fakafifitakiaga he fakatumau e mahani fakamooli he fakafehagai ke he ekefakakelea mo e nakai fakafili tonu?

¹² Kua kitia pauaki ha tautolu a mahani fakamooli ka fakauka a tautolu he fakafehagai mo e tau mena uka, ekefakakelea, po ke nakai fakafili tonu. Manamanatu ke he fakafifitakiaga ha Tavita he Tohi Tapu. Ko e fuata taane, ne fakauka a ia ke he favaleaga mai he patuiki ne lata ke fakakite e pule ha Iehova. Ka kua galo he Patuiki ko Saulo e fiafia a Iehova mo e kua mahekeheke kelea ki a Tavita, ne kua talia he Atua. Ka e fakatumau a Saulo ke fai magaaho he pule ti fakaaoga e kau Isaraela ke tatao a Tavita. Ne toka e Iehova e nakai fakafili tonu nei ke fakatumau ke he falu tau. Kua ita lahi mahaki kia a Tavita ke he Atua? Ti fifili kia a ia kua nakai fai kakano ke fakauka? Mamao ligo. Ne fakatumau e ia e fakalilifu mua ue atu ke he tuaga ha Saulo ko e tagata ne fakauku he Atua, he nakai fakahoko haana lima ki a Saulo he magaaho ne kua maeke ia ia.—1 Samu. 24:2-7.

13. Fakatumau fēfē ha tautolu a mahani fakamooli kaeke kua fakahukia po ke fakaita he falu a tautolu?

¹³ Kua malolō mooli e fakafifitakiaga ha Tavita ma tautolu he vahā nei! Ko tautolu ko e vala he tau tagata nakai mitaki katoatoa he fakapotopotoaga he lalolagi oti, ti to fai ka taute fakakelea ki a tautolu po ke fakahiku ke nakai tua fakamooli. Mooli, uhoaki a tautolu ha kua momoui he vahā kua nakai maeke e matakau tagata ha Iehova ke fakakelea. (Isaia 54:17) To tali atu agaia fēfē a tautolu kaeke ke fakaita po ke fakahukia he taha e tau logonaaga ha tautolu? Ka fakafualoto a tautolu he ita lahi ke he matakainaga tapuaki, liga to fakahui e mahani fakamooli ha tautolu ke he Atua. Kia nakai feaki he mahani he falu e piuaga ke maeke ia tautolu ke ita lahi mahaki ke he Atua po ke tiaki e puhala tua fakamooli. (Sala. 119:165) He fakauka foki he fehagai mo e tau kamatamata ka lagomatai a tautolu ke fakatumau ke he mahani fakamooli ha tautolu.

14. Ko e heigoa e puhala ne tali atu e tau tagata ne fakatumau ke he mahani fakamooli ke he tau hikiaga mo e tau hakahakaaga he tau fakaakoaga he fakatokatokaaga?

¹⁴ Maeke foki ia tautolu ke fakatumau ke he mahani fakamooli he kalo kehe he aga kumi kelea mo e tuhituhi. Ko e kakano he mena ia ke tua fakamooli ki a Iehova. Kua mua ue atu e fakamonuina e ia e tau tagata haana mogonei. Nakaila fakatokoluga pihia ke he lalolagi e tapuakiaga meā tali mai he tau fakamauaga tuai oti. (Isaia 2:2-4) Ka taute e tau hikihikiaga he fakamaama e tau kupu he Tohi Tapu po ke puhala taute mena, kua manako a tautolu ke talia e tau mena ia. Kua fiafia a tautolu ke kitia mooli kua tupu tolomaki agaia e maama fakaagaaga. (Fakatai 4:18) Ka uka ia tautolu ke maama e hikiaga, ole ki a Iehova ke lagomatai a tautolu ke maama e manatu. Ka ko e magaaho nei, fakauka a tautolu ke he puhala omaoma, he fakatumau ke he mahani fakamooli ha tautolu.

Ka e kua ka Nakai Tumau Taha Tagata ke Mahani Fakamooli?

15. Ko hai hokoia ka utakehe e mahani fakamooli haau?

¹⁵ Ko e hūhū manamanatu a ia, pihia nakai? He iloa e tautolu he vala tala fakamua, kua latatonu katoatoa e mahani fakamooli. Ka nakai fai, kua nakai ha ha ia tautolu e fakafetuiaga mo Iehova mo e nakai fai amaamanakiaga mooli. Kia tokaloto e mena nei: Taha maka ni e tagata he lagi mo e lalolagi katoatoa ka utakehe e mahani fakamooli haau. Ko koe ni e tagata ia. Ne maama mitaki e Iopu e kupu mooli ia. Ne pehē a ia: “Ato hoko ke he aho ke mate ai au nakai toka e au haku a mahani hakohako.” (Iopu 27:5) Kaeke ke eketaha pihia foki a koe mo e ka pipiki fakatata atu a koe ki a Iehova, to nakai galo e mahani fakamooli haau.—Iako. 4:8.

16, 17. (a) Kaeke kua taute he tagata e agahala kelea muitui, ko e heigoa e puhala hehē ka taute? (e) Ko e heigoa e puhala hako ka taute?

¹⁶ Kua kaumahala agaia falu ke fakatumau ke he mahani fakamooli ha lautolu. Ne tupu foki he magaaho ne momoui agaia e tau aposetolo, ne mokulu falu ke he agahala kelea muitui. Ka tupu e mena ia ki a koe, kua nakai kia fai amaamanakiaga? Nakai pihia. Ko e heigoa ka taute? Kia manamanatu fakamua a tautolu ke he mena ka nakai taute. Ko e hihiga he tagata ke ufiufi e hehē mai he tau matua, tau matakainaga Kerisiano, po ke tau motua. Ka e fakamanatu mai he Tohi Tapu ki a tautolu: “Ko ia kua ufiufi hana tau holifono, nakai monuina a ia; ka ko ia kua fakakite mo e tiaki ai, kua ofania a ia.” (Fakatai 28:13) Ko lautolu ne lali ke ufiufi e tau agahala kua taute e hehē makimaki, ha kua nakai fai mena ne galo ke he Atua. (Totou Heperu 4:13.) Kua lali falu ke ua e puhala moui, he fakatupua ke fekafekau ki a Iehova ka e taute agaia e puhala agahala. Ko e moui pihia kua gatigati ke he mahani fakamooli—kua kehe mamao mai he mahani fakamooli. Nakai fiafia a Iehova ke he tau gahua he tapuakiaga ne taute he tau tagata takitokotaha ne ufiufi e tau agahala kelea muitui. Ke he taha faahi, ko e fakatupua pihia kua fakaita aki a ia.—Fakatai 21:27; Isaia 1:11-16.

¹⁷ Ka putoia e Kerisiano ke he mahani kelea muitui, kua maaliali e puhala hako. Ko e magaaho anei ke kumi lagomatai ke he tau motua Kerisiano. Fai fakatokaaga a Iehova ne taute ke fehagai mo e gagao hagahaga kelea fakaagaaga. (Totou Iakopo 5:14.) Kia nakai toka e matakutaku neke akonaki po ke fakahako ke taofi mai a koe he tutuli e malolō fakaagaaga haau. Ha ko e mena to tiaki kia he tagata pulotu e mamahi kū he huki po ke iihi foki ke taofi a ia he fakakia e matalekua hagahaga kelea he malolō tino?—Hepe. 12:11.

18, 19. (a) Fakakite fēfē he fakafifitakiaga ha Tavita kua maeke e mahani fakamooli ke liu moua? (e) Ko e heigoa e fifiliaga haau hagaao ke he mahani fakamooli haau?

¹⁸ Fai amaamanakiaga nakai ke liu malolō katoatoa? Maeke nakai e mahani fakamooli ke liu moua kaeke kua galo? Liu manamanatu ke he fakafifitakiaga ha Tavita. Ne taute e ia e agahala kelea muitui. Ne onoono lotokai a ia ke he hoana he taha tagata, he taute e mahani faivao, mo e pulega ke tamate e hoa ne nakai agahala. Kua uka ke manamanatu ki a Tavita he magaaho ia ko e tagata mahani fakamooli, pihia nakai? Ka e fai amaamanakiaga nakai e tuaga haana? Ne latatonu a Tavita ke akonaki malolō ti moua ai e ia. Ti ko e fakatokihala mooli haana ati maeke a Iehova ke fakakite e fakaalofa noa. Ne ako mai a Tavita he akonaki ti liu moua e mahani fakamooli haana he omaoma ke he Atua mo e matutaki ke he puhala ia. Ne fakatātā he moui ha Tavita e mena ne totou e tautolu he Tau Fakatai 24:16: “Ko e lagafitu he veli e tagata tututonu, ka e liu tu a ia.” Ko e fua? Manamanatu ke he mena ne talahau e Iehova ki a Solomona hagaao ki a Tavita he mole e mate haana. (Totou 1 Tau Patuiki 9:4.) Ne manatu he Atua a Tavita ko e tagata mahani fakamooli. Kua maeke mooli ia Iehova ke fakameā e tau tagata agahala ne fakatokihala mai he ilaila he tau agahala kelea muitui foki.—Isaia 1:18.

¹⁹ E, to eke a koe mo tagata mahani fakamooli he fakakite e omaoma ha ko e fakaalofa. Fakatumau e fakauka tua fakamooli, ti ka tupu e agahala kelea muitui, fakakite e tokihala moolioli. Ko e makauho mooli e mahani fakamooli! Kia igatia a tautolu mo e fakalataha ke he fifiliaga ha Tavita: “Ka ko au nai, to fano au mo e haku a mahani hakohako.”—Sala. 26:11.

[Tau Matahui Tala]

To Tali Fēfē e Koe?

• Eke fēfē a koe mo tagata mahani fakamooli?

• Ke he tau puhala fe kua maeke ia koe ke fakatumau ke he mahani fakamooli haau?

• Maeke fēfē ke liu moua e mahani fakamooli?

[Puha he lau 8]

“KO E MENA FULUFULUOLA”

Ko e fifine kua lima e mahina he fatu ne talahau e tau kupu ia hagaao ke he mahani totonu mo e mahani fakamooli he tagata kehe. He hau kehe a ia he fale inu kofe, ti fai tulā he mole, ne mailoga e ia kua toka hifo e pesi haana i ai. Ne haia i loto he pesi e $2,000, ne nakai fa mahani a ia ke uta mo ia e tupe lahi mahaki pihia. “Ne tupetupe lahi mahaki au,” he talahau e ia he magaaho fakamui ke he nusipepa he matakavi. Ka kua moua he tama fifine fuata e pesi mo e kumi fakamafiti atu ke he tagata haana pesi. He nakai kautū, ne uta e ia e pesi ke he fale leoleo, ti moua ai he leoleo e fifine fatu. “Ko e mena fulufuluola mooli lahi ke taute,” he talahau he fifine haana pesi, ne loto fakaaue. Ko e ha ne eketaha e tama fifine fuata ke liuaki e tupe? Ne talahau he nusipepa, ko ia ko e taha he Tau Fakamoli a Iehova, ne “fakakite e ia e mahani fakamooli haana ha ko e lotu ne feaki hake ai a ia.”

[Fakatino he lau 9]

Maeke e tau fuata ke mahani fakamooli ka kamatamata

[Fakatino he lau 10]

Fai magaaho ne kaumahala a Tavita ke fakatumau ke he mahani fakamooli, ka e liu a ia malolō