Kua Moui e Kupu ha Iehova
Tau Fakamaamaaga Mai he Tau Tohi a Ioane mo e ha Iuta
LIGA ne tohia he 98 V.N. mai i Efeso, ko e tau tohi tolu he aposetolo ko Ioane kua haia he tau tohi fakahiku i loto he tau Tohiaga Tapu ne omoomoi. Ko e tau tohi ua fakamua ne fakamalolō e tau Kerisiano ke fakatumau ke mahani ke he maama mo e eketaha ke totoko e holofa he tiaki taofiaga. He tohi ke toluaki, ne tutala a Ioane nakai ni ke he mahani ke he maama ka e fakamalolō foki ke kaufakalataha faka-Kerisiano.
He tohi haana ne tohia mai i Palesitaina, liga he 65 V.N., ne hataki he matakainaga ha Iesu ko Iuta e tau matakainaga Kerisiano hagaao ke he tau tagata mahani kelea ne huhū mai fufū ki loto he fakapotopotoaga, ti foaki e ia e fakatonuaga ke he puhala ke totoko ke he tau fakaohoohoaga kelea. He mataala ke he fekau he tau tohi tolu ha Ioane mo e tohi a Iuta ka lagomatai a tautolu ke tumau e malolō ke he tua pete ko e tau fakatauhele.—Hepe. 4:12.
KIA MAHANI KE HE MAAMA MO E FAKAALOFA MO E KE HE TUA
Ne tohia ke lata mo e fakalatahaaga katoa ha lautolu ne ha ha mo e Keriso, ne foaki he tohi fakamua ha Ioane e fakatonuaga aoga ne taute ke lagomatai e tau Kerisiano ke totoko e tiaki taofiaga mo e fakatumau ke tu mauokafua ma e kupu mooli mo e mahani tututonu. Ne peehi e ia e lata ke mahani ke he maama mo e fakaalofa mo e ke he tua.
“Kaeke kua eke e tautolu e tau mahani he maama, tuga he nofo [e Atua] ke he maama,” he tohia e Ioane, “ati fakafetui ai fakalataha a tautolu, ko e taha ke he taha.” Ha ko e Atua foki ko e Punaaga he fakaalofa, ne talahau he aposetolo: “Kia feofanaki a tautolu.” Ha kua omoomoi he “fakaalofa ke he Atua” a tautolu ke ‘omaoma ke he tau poaki hana,’ kua kautū a tautolu ke he lalolagi puhala he “tua ha tautolu” ki a Iehova ko e Atua, haana Kupu, mo e haana Tama.—1 Ioa. 1:7; 4:7; 5:3, 4.
Tali he Tau Hūhū Faka-Tohiaga Tapu:
2:2; 4:10—Fakagahua fēfē e ‘poa lukutoto’ ha Iesu? Ko e ‘poa lukutoto’ ha Iesu ko e poa fakafeilo ko e kakano he taute pihia, he palepale, po ke fakamakona e ia e lata pauaki he fakafili tonu mitaki katoatoa. He fakavē ke he poa ia, kua maeke e Atua ke fakalaulahi mai e fakaalofa noa, ti maeke ia ia ke fakamagalo e tau agahala ha lautolu ne fakagahua e tua ki a Iesu.—Ioane 3:16; Roma 6:23.
2:7, 8—Ko e heigoa e poakiaga ne tutala a Ioane ki ai kua “tigahau” mo e “fou”? Kua tutala a Ioane ke he poakiaga hagaao ke he fakaalofa foaki noa fakamatakainaga. (Ioane 13:34) Ne talahau e ia kua “tigahau” ha kua foaki mai ai e Iesu he molea e 60 e tau ato tohia e Ioane he tohi omoomoi fakamua haana. Ko e mena ia, kua moua tuai e lautolu ne talitonu “tali mai he kamataaga” he tau momoui ha lautolu ko e tau Kerisiano. Kua “fou” foki e poakiaga ha kua nakai ni ke ‘fakaalofa a ia ke he tagata kua katofia mo ia kia tuga na ia kia ia’ ka kua lata ma e fakaalofa foaki noa.—Levi. 19:18; Ioane 15:12, 13.
3:2—Ko e heigoa kua “nakala fakakite” ke he tau Kerisiano ne fakauku, mo e ko hai ‘a ia ka kitia tonuhia’ e lautolu? Ko e mena ne nakala fakakite ki a lautolu ko e liga tino fēfē a lautolu ka liliu tu mai fakaagaaga ke he lagi. (Filipi 3:20, 21) Ka ko e mena kua iloa e lautolu “ka fakakite mai [e Atua] ti tuga a ia a [l]autolu, ha ko e mena to kitia tonuhia ai a ia e [l]autolu,” kakano, “ko e Agaga.”—2 Kori. 3:17, 18.
5:5-8—Maeke fēfē e vai, toto, mo e agaaga ke talahau fakatonu mai ko “Iesu ko e Tama he Atua”? Ne talahau fakatonu mai e vai ha ko e magaaho ne papatiso a Iesu i loto he vai, ne fakakite e Iehova e fiafia Haana ki a ia ko e Tama Haana. (Mata. 3:17) Ko e toto ha Iesu, po ke moui, ne foaki “ke eke mo lukutoto ma e tau tagata oti kana,” ne fakakite foki ko Iesu ko e Tama he Atua. (1 Timo. 2:5, 6) Ti fakamooli he agaaga tapu ko Iesu ko e Tama he Atua he magaaho ne hifo mai ai ki luga ha Iesu he papatisoaga haana, ati maeke ia ia ke “haele fano mo e totonu mo e fakamalolo a lautolu oti ni ne matematekelea he [T]iapolo.”—Ioane 1:29-34; Gahua 10:38.
Tau Fakaakoaga ma Tautolu:
2:9-11; 3:15. Kaeke ke fakaatā he Kerisiano ha mena po ke ha tagata ke moumou e fakaalofa fakamatakainaga haana, kua fano a ia ke he pouli fakaagaaga, nakai kitia e mena kua fano a ia ki ai.
KIA “EKE E MAHANI HE KUPU MOLI”
Ne hafagi e Ioane e tohi haana ke uaaki he talahau: “Ko au ko e patu, ko e haku a tohi hanai ke he Iki fifine ne fifili mo e fanau hana.” Ne fakakite e ia e fiafia lahi haana he iloa e “falu a fanau [he fifine] kua eke e mahani he kupu moli.”—2 Ioa. 1, 4.
He mole e fakamalolō age ke feaki e fakaalofa, ne tohia e Ioane: “Ko e fakaalofa foki hanai, kia mahani a tautolu ke lata mo e tau poaki hana.” Ne hataki foki e Ioane hagaao ‘ki a ia ko e fakahehe mo e anetikeriso.’—2 Ioa. 5-7.
Tali he Tau Hūhū Faka-Tohiaga Tapu:
1, 13—Ko hai e “Iki fifine ne fifili”? Ne liga hagaao a Ioane ke he taha fifine ne higoa ko Kyria, ko e faka-Heleni ma e “fifine.” Po ke liga fakaaoga e ia e kupu fakatai ke hagaao ke he taha fakapotopotoaga ke fakagogoa aki e tau tagata favale. Kaeke ko e fakamaamaaga ke uaaki, liga ko e fanau haana ko e tau tagata he fakapotopotoaga ia mo e “fanau he [haana] a matakainaga” liga kua hagaao ke he tau tagata he taha fakapotopotoaga foki.
7—Ko e heigoa e “haele mai” ha Iesu ne tutala ki ai a Ioane he mena nei, mo e puhala fe he tau tagata fakahehē kua “nakai talahau” ai? Ko e “haele mai” ia ha Iesu nakai ko e haele mai nakai kitia haana he vahā i mua. Ka ko e haele mai haana ke he tino mo e fakauku a ia ko e Keriso. (1 Ioa. 4:2) Ne nakai talahau he tau tagata fakahehē e haele mai nei ke he tino. Liga fakatikai e lautolu na moui a Iesu po ke nakai talia e lautolu nukua fakauku a ia ke he agaaga tapu.
Tau Fakaakoaga ma Tautolu:
2, 4. Ko e iloa e tautolu e “kupu moli”—ko e matapatu katoa he tau fakaakoaga Kerisiano ne kua eke mo vala he Tohi Tapu—mo e ka pipiki mau ki ai kua aoga lahi ma e fakamouiaga ha tautolu.—3 Ioa. 3, 4.
8-11. Ka nakai manako a tautolu ke galo e “fakaalofa noa, mo e fakaalofa, mo e monuina mai he Atua e Matua, katoa mo e Iki ko Iesu Keriso,” pihia foki mo e lafiaga fakaalofa mo e tau matakainaga talitonu, kua lata ia tautolu ke mataala fakaagaaga ki a tautolu ni mo e fakaheu a lautolu ne “nakai tumau ke he kupu kia Keriso.”—2 Ioa. 3.
KIA EKE MO “TAU LAGOMATAI KE HE KUPU MOLI”
Ko e tohi ke toluaki ha Ioane kua hagaao ke he kapitiga fakatagata haana ko Kaio. “Nakai fai fiafia au ke mua ke he mena nai,” he tohi e ia, “ka fanogonogo au, kua mahani e fanau haku kua lata mo e kupu moli.”—3 Ioa. 4.
Ne nava a Ioane ki a Kaio he ‘gahua fakamoli’ he lagomatai e tau matakainaga ne ahiahi. “Lata he talia e tautolu e tau tagata pihia,” he talahau he aposetolo, “kia eke a tautolu mo tau lagomatai ke he kupu moli.”—3 Ioa. 5-8.
Tali he Tau Hūhū Faka-Tohiaga Tapu:
11—Ko e ha e falu ne taute e mahani kelea? Ha kua nakai malolō fakaagaaga, ne nakai kitia he falu e Atua mo e tau mata he maamaaga ha lautolu. Ha kua nakai kitia e lautolu e Atua ke he tau mata mooli ha lautolu, ne taute e lautolu e tau mahani tuga na nakai fioia he Atua a lautolu.—Eseki. 9:9.
14—Ko hai ne hagaao ki ai ko e “tau kapitiga”? Ko e kupu “tau kapitiga” he vala nei kua putoia e falu foki, nakai ni ki a lautolu ne olioli e tau fakafetuiaga tata ko e taha mo e taha. Kua fakaaoga e Ioane ke hagaao fakalaulahi ke he tau matakainaga talitonu.
Tau Fakaakoaga ma Tautolu:
4. Kua fiafia lahi a lautolu ne motua fakaagaaga i loto he fakapotopotoaga ka kitia e lautolu e tau fuata ne ha ha i ai ‘kua mahani ke lata mo e kupu moli.’ Ko e fiafia lahi mahaki ha ia he tau matua he magaaho ka kautū a lautolu he lagomatai e tau fanau ha lautolu ke eke mo tau fanau kua fiafia ke he tau mena fakaagaaga!
5-8. Ia lautolu ne gahua fakamalolō ma e tau matakainaga ha lautolu ha ko e fakaalofa ma lautolu mo e ma Iehova, ko e tau leveki faifano, tau misionare, lautolu kua fekafekau he tau kaina Peteli po ke tau lā ofisa, mo lautolu he fekafekauaga paionia. Kua latatonu e tua ha lautolu ke fifitaki ki ai, ti lata foki a tautolu ke lalago fakaalofa ki a lautolu.
9-12. Kua lata ia tautolu ke muitua ke he fakafifitakiaga ha Temetiu ne tua fakamooli ka e nakai ha Tioterefe ne fa vagavagahau, ko ia ko e pikopiko.
“KIA FAKATUMAU E MUTOLU A MUTOLU KE HE FAKAALOFA HE ATUA”
Ne fakamaama e Iuta a lautolu ne huhū mai ke he fakapotopotoaga ko e “tau tagata loma a lautolu na, mo e fegui, kua omaoma a lautolu ke he ha lautolu a tau manako lahi.” Ne “vagahau mai foki e tau gutu ha lautolu e tau kupu fakatokoluga, kua nava foki a lautolu ke he tau tagata.”—Iuta 4, 16.
Maeke fēfē e tau Kerisiano ke totoko e tau fakaohoohoaga kelea? “Ko mutolu ko e tau fakahelehele na e,” he tohia e Iuta, “kia manatu a mutolu ke he tau kupu ne talahau mai i tuai he tau aposetolo he Iki ha tautolu ko Iesu Keriso.” Ne lafi e ia: “Kia fakatumau e mutolu a mutolu ke he fakaalofa he Atua.”—Iuta 17-21.
Tali he Tau Hūhū Faka-Tohiaga Tapu:
3, 4—Ko e ha ne fakamalolō e Iuta e tau Kerisiano ke “tau fakalahi ha ko e tua”? Ha kua ‘huhū mai fufu e tau tagata matahavala ke he fakapotopotoaga.’ Ko e tau tagata nei ‘kua liliu e lautolu e fakaalofa noa he Atua ke he mata kakana.’
20, 21—Puhala fe ka ‘fakatumau e tautolu a tautolu ke he fakaalofa he Atua’? Maeke ia tautolu ke taute e mena nei ke he tolu e puhala:(1) he atihake a tautolu ke he “tua kua tapu ue atu” ha tautolu he fakaako fakailoilo e Kupu he Atua mo e fakalataha fakamakutu ke he gahua fakamatala; (2) he liogi fakalataha mo e “[a]gaga [t]apu,” po ke fakalautatai mo e fakaohoohoaga ia; mo e (3) fakagahuahua e tua ke he mena kua maeke ai ke moua e moui tukulagi—ko e poa lukutoto ha Iesu Keriso.—Ioane 3:16, 36.
Tau Fakaakoaga ma Tautolu:
5-7. Maeke nakai e tau tagata mahani kelea ke hao mai he fakafiliaga ha Iehova? Hagaao ke he tolu e fakafifitakiaga hataki ne tohi e Iuta, kua nakai maeke ke pihia.
8-10. Kua lata ia tautolu ke muitua e fakafifitakiaga he agelu ne mua ko Mekaeli mo e fakakite e fakalilifu ma e pule ne foaki faka-Atua.
12. Ko e tau tagata tiaki taofiaga ne fakaalofa fakatupua kua fakahagahaga kelea e tua ha tautolu tuga ne tau ie, po ke tau maka, ne galo he tahi ke he tau toga po ke tau tagata kakau. Kua liga hihiga e tau faiaoga fakavai ke fakamokoi, ka kua tuga e tau aolagi nakai ha i ai ha vai a lautolu ha kua gatigati fakaagaaga a lautolu. Kua nakai fua a lautolu ia tuga e tau akau kua mamate he matahiku he vahā mateafu. Kua fehagai a lautolu mo e moumouaga, tuga ni e tau akau kua huo tuai. Kua pulotu mogoia ma tautolu ke kalo kehe he tau tiaki taofiaga.
22, 23. Kua fakavihia he tau Kerisiano mooli e tau mena kelea. He lali ke fakahao e “falu [“ne fakauaua,” NW]” mai he moumouaga tukulagi ke he afi, ko lautolu ne motua fakaagaaga he fakapotopotoaga—mua atu ke he tau leveki ne kotofa—kia foaki ki a lautolu e lagomatai fakaagaaga.
[Tau Fakatino he lau 28]
Talahau fakatonu mai he vai, agaaga, mo e toto ko “Iesu ko e Tama he Atua”