Moua e Olioli he Gahua Taute Tutaki
‘Hanei, kia o atu a mo e taute tutaki.’—MATA. 28:19.
1-3. (a) Fēfē e logonaaga he tokologa hagaao ke he matagahua ke taute e tau fakaako Tohi Tapu? (e) Ko e heigoa e tau hūhū ka fakatutala a tautolu ki ai?
“HANE fakaako au mo e magafaoa ne o mai i Pakisitani ke 11 e faahi tapu kua mole,” he tohi he matakainaga fifine ne fekafekau he matakau vagahau Hinitī he Tau Faahi Kaufakalataha. “Nakai ofo ai,” he matutaki e ia, “ne eke a mautolu mo tau kapitiga. Ne puke e tau mata haaku he tau hihina mata he manamanatu au hagaao ke he magafaoa nei ka nakai leva ti liliu ki Pakisitani. Kua tafe pulenoa e tau hihina mata haaku he nakai ni ko e momoko ne logona hifo e au ha ko e galo fai e fakafetuiaga ha lautolu ka e pihia foki mo e olioli ne moua e au he fakaako a lautolu hagaao ki a Iehova.”
2 Kua logona hifo pihia nakai a koe, tuga e matakainaga fifine nei ne moua e olioli he fakaako e Tohi Tapu mo e taha tagata? Ko Iesu mo e tau tutaki haana he senetenari fakamua ne moua e olioli lahi he gahua taute tutaki. He magaaho ne liliu mai e tau tutaki 70 ne fakamahani e Iesu mo e hokotaki mitaki, ati “fiafia lahi ai e finagalo” ha Iesu. (Luka 10:17-21) Pihia foki, tokologa he vahā nei ne moua e olioli lahi he taute tutaki. Ko e mena ia, he 2007, ne taute he tau tagata fakailoa gahua malolō mo e fiafia e tau fakaako Tohi Tapu ne evalesi ke he ono mo e hafa e miliona he tau mahina takitaha!
3 Ka e fai tagata fakailoa ne nakaila moua e fiafia he taute e fakaako Tohi Tapu. Liga ha ha i ai falu ne nakaila fai ne taute he tau tau e kua mole. Ko e heigoa e tau paleko ne liga fehagai mo tautolu he lali a tautolu ke taute e fakaako Tohi Tapu? Liga kautū fēfē a tautolu he tau paleko ia? Ti ko e heigoa e tau palepale kua moua e tautolu ka taute e tau mena oti kua maeke ia tautolu ke omaoma e poakiaga a Iesu: ‘Hanei, kia o atu a mo e taute tutaki’?—Mata. 28:19.
Tau Paleko Ka Fofō e Olioli ha Tautolu
4, 5. (a) Tali atu fēfē e tau tagata tokologa he falu vala he lalolagi? (e) Ko e heigoa e tau paleko ne fehagai mo e tau tagata fakailoa he falu matakavi?
4 He falu vala he lalolagi, ne talia fiafia he tau tagata e tau tohi ha tautolu mo e makai ke fakaako e Tohi Tapu mo tautolu. Taha e hoa mai i Ausetalia ne fekafekau fakakū i Samipia ne tohi: “Kua hako tonu e tau tala. Kua fua mitaki e gahua fakamatala i Samipia. Kua ofoofogia e gahua fakamatala he puhalatū! Ne o mai e tau tagata ki a maua, ne ole e falu ma e tau fufuta pauaki he tau mekasini.” He taha tau e kua mole, ne taute he tau matakainaga i Samipia molea e 200,000 he tau fakaako Tohi Tapu—ko e evalesi a ia ke molea e taha e fakaako Tohi Tapu he taha e tagata fakailoa.
5 Ka e he falu matakavi ne liga uka e tau tagata fakailoa ke foaki e tau tohi mo e taute e tau fakaako Tohi Tapu. Ko e ha? Fa mahani, ne nakai moua ha tagata i kaina ka nokonoko he tagata fakailoa e tau gutuhala ha lautolu, ka ko lautolu ne moua i kaina kua liga fakateaga ke he lotu. Ne liga feaki a lautolu he tau kaina nakai ō tapu po ke vihiatia lahi ke he fakatupua ne kitia he lotu fakavai. Tokologa e tagata ne fakamamahi—fakakelea mo e tiaki fakaagaaga he tau leveki mamoe fakavai. (Mata. 9:36) Maama ai, kua liga mataala a lautolu he putoia ke he tau fakatutalaaga hagaao ke he Tohi Tapu.
6. Ko e heigoa e tau kaupāaga ne liga ha ha he falu?
6 Kua fai tagata fakailoa tua fakamooli ne fehagai mo e paleko kehe ne maeke ke fofō e olioli ha lautolu. Pete ne gahuahua malolō a lautolu he taha vahā ke he gahua taute tutaki, kua pehia a lautolu mogonei ke he gagao e tino po ke tau kaupāaga he fuakau. Manamanatu foki, ko e falu kaupāaga kua liga fakatupu ni e tautolu. Ma e fakatai, kua logona hifo nakai e koe e nakai lotomatala ke taute e fakaako Tohi Tapu? Kua liga logona hifo a koe tuga a Mose he magaaho ne poaki e Iehova a ia ke tutala ki a Farao. Ne pehē a Mose: “Ma Iki na e, ko au ko e tagata nakai iloa ke fakamatala, tali mai i tuai, mo e vaha nai foki.” (Esoto 4:10) Ko e tau logonaaga he nakai lotomatala ne matutaki lahi ke he matakutaku neke kaumahala. Liga tupetupe a tautolu to nakai eke e tagata mo tutaki ha kua nakai ko e faiaoga mitaki katoatoa a tautolu. He kalo mai he manatu pihia, kua liga fakatō noa e tautolu e magaaho ke taute e fakaakoaga. Maeke fēfē a tautolu ke fehagai mo e tau paleko tuga nā ne totoku?
Tauteute e Loto Haau
7. Ko e heigoa ne fakalagalaga a Iesu he fekafekauaga haana?
7 Ko e lakaaga fakamua ko e tauteute e tau loto ni ha tautolu. Ne pehē a Iesu: “Ha ko e puke he loto ke vagahau mai ai [e] gutu.” (Luka 6:45) Ne fakalagalaga a Iesu ke he fekafekauaga haana he manamanatu mai he loto ma e tau manako he falu. Ma e fakatai, he magaaho ne mailoga e ia e tuaga fakaagaaga kelea he tau tagata Iutaia, ati “fakaalofa hofihofi ai a ia kia lautolu.” Ne pehē a ia ke he tau tutaki haana: “Kua loga e tau saito ke helehele . . . kia olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.”—Mata. 9:36-38.
8. (a) Ko e heigoa kua mitaki ke manamanatu a tautolu ki ai? (e) Ko e heigoa ka ako e tautolu mai he tau talahauaga he taha tagata fakaako Tohi Tapu?
8 He fai vala a tautolu ke he gahua taute tutaki, kua mitaki ki a tautolu ke manamanatu fakahokulo hagaao ke he lahi mahaki he mena ne aoga ki a tautolu ha kua fakatoka he taha tagata e magaaho ke fakaako e Tohi Tapu mo tautolu. Manamanatu foki ke he tau tagata ka feleveia mo tautolu he fekafekauaga mo e puhala ka aoga ki a lautolu he fanogonogo ke he fekau ne uta e tautolu. Taha e fifine ne tohi ke he la ofisa he motu ne nofo ai a ia: “Manako au ke tala atu ki a mutolu e loto fakaaue lahi haaku ke he Tau Fakamoli ne fakaako au he kaina haaku. Iloa e au kua liga hogohogo manava a lautolu he falu magaaho ki a au ha kua loga lahi e tau hūhū haaku ti fa fakamule tumau e au a lautolu. Ka kua fakauka a lautolu ki a au ti fakamakutu ke folafola mai e tau mena ne ako e lautolu. Fakaaue au ki a Iehova mo Iesu ha kua fai vala e tau tagata nei he moui haaku.”
9. Ko e heigoa ne hagaaki a Iesu ki ai, ti fifitaki fēfē e tautolu a ia?
9 Mooli, nakai talia oti he tau tagata e tau laliaga a Iesu ke lagomatai a lautolu. (Mata. 23:37) Ne fai magaaho ne mumui e falu ki a ia ka e hiku ni totoko ke he tau fakaakoaga haana ti “nakai tuai o fano a lautolu mo ia.” (Ioane 6:66) Pete ia, ne nakai fakaatā e Iesu e tali nakai mitaki he falu ke taute a ia ke logona hifo kua nakai aoga e fekau haana. Ha kua loga e tega ne gana e ia kua nakai fai fua, ne hagaaki a Iesu ke he mitaki haana ne taute. Ne kitia e ia kua hina tuai e fonua ke helehele ti moua e olioli he lagomatai e heleheleaga ia. (Totou Ioane 4:35, 36.) He nakai ni kitia hokoia e kelekele taluē mo e tau kā saito, nakai kia hagaaki pihia foki a tautolu ke he heleheleaga mitaki he matakavi ne kotofa mai ki a tautolu? Kia kumikumi la tautolu ke he puhala ke fakatumau e aga mitaki pihia.
Gana mo e Kitekiteaga ke Helehele
10, 11. Ko e heigoa haau ka taute ke fakatumau e olioli haau?
10 Ne gana he tagata gahua fonua e tau tega akau mo e kitekiteaga ke helehele ai. Pihia foki, kua lata ia tautolu ke fakamatala mo e kitekiteaga ke kamata e tau fakaako Tohi Tapu. Ka e kua kaeke kua foaki tumau e koe e magaaho ke he gahua he fonua ka e gahoa e tagata ne moua he kaina po ke liga nakai maeke ke liu feleveia mo e tau liu aahi atu haau? Ko e mena fakahogohogo manava anei. Kua lata kia a koe ke tiaki e gahua ke he taha gutuhala ke he taha gutuhala? Nakai pihia! Tokologa agaia e tagata ne feleveia fakamua ke he puhala fakamatala nei kua leva tigahau.
11 Ke fakatumau e olioli haau, maeke nakai a koe ke fakalaulahi e tau puhala fakamatala haau, liga ke putoia e falu puhala ke hokotia ke he tau tagata? Ma e fakatai, kua lali nakai a koe ke fakamatala ke he tau tagata he puhalatū po ke he tau gahuaaga ha lautolu? Maeke nakai a koe ke matutaki atu ke he tau tagata he telefoni po ke moua e tau numera telefoni ha lautolu ne fitā e tala age e koe e fekau he Kautu ki ai ke maeke ia koe ke matutaki mo lautolu? He fakakite e fakamanava lahi mo e hikihiki e fekafekauaga haau, to moua e koe e olioli he moua e tau tagata ka talia fiafia e fekau he Kautu.
Fehagai mo e Fakateaga
12. Ko e heigoa ha tautolu ka liga taute kaeke ke tokologa he fonua ha tautolu kua tuga ke fakateaga?
12 Ka e kua ka tokologa he fonua haau kua fakateaga ke he lotu? Maeke nakai ia koe ke hikihiki e fakatutalaaga haau ke futiaki e fiafia ha lautolu? Ne tohi he aposetolo ko Paulo ke he tau matakainaga i Korinito: “Kua eke au mo tagata Iutaia ke he tau tagata Iutaia, . . . Kua eke au mo tagata kua noa mo e fakatufono kia lautolu kua noa mo e fakatufono, ka e nakai noa au mo e fakatufono ke he Atua.” Ko e heigoa e fatuakiloto ha Paulo? “Kua eke au mo tau mena oti ke he tau tagata oti,” he talahau e ia, “kia momoui ai ni falu kia au.” (1 Kori. 9:20-22) Maeke foki nakai ia tautolu ke kumi e fakavēaga pihia mo lautolu he fonua ha tautolu? Tokologa e tagata ne nakai ō tapu ne manako ke fakaholo ki mua e uho he tau fakafetuiaga fakamagafaoa ha lautolu. Kua liga kumikumi foki a lautolu ke he kakano he moui. Fakakite nakai e tautolu e fekau he Kautu ke he tau tagata pihia ke he puhala ke futiaki mai a lautolu?
13, 14. Liga maeke fēfē ia tautolu ke fakamalikiti e olioli ha tautolu ne moua mai he gahua taute tutaki?
13 Ko e tupu lahi he tau tagata fakailoa ne fakamalikiti e olioli ne moua e lautolu mai he gahua taute tutaki, pihia foki ke he tau matakavi ne laulahi e tau tagata kua tuga ke fakateaga. Fēfē? He ako e vagahau kehe. Taha e hoa he atu tau 60 ne mailoga kua totou afe e tau tama aoga Saina mo e tau magafaoa ha lautolu ne nonofo he matakavi ne kotofa ke he fakapotopotoaga. “Ha ko e mena nei, ne fakamalolō ki a maua ke ako e vagahau Saina,” he talahau he taane. “Pete ni ko e kakano he mena nei ke fakaaoga e magaaho he tau aho takitaha ke fakaako e vagahau,” ne matutaki e ia, “ne fakahiku ai ke tokologa e tagata fakaako Tohi Tapu mo e tau tagata Saina he kavi ha maua.”
14 Pete he nakai ako e koe e vagahau kehe, kua maeke ia koe ke fakaaoga fakamitaki e tohi tote Good News for People of All Nations ka feleveia mo lautolu ne vagahau kehe. Fa mahani ke moua foki e koe e tau tohi he vagahau he tau tagata nukua feleveia mo koe. Mooli, kua lata ke lahi e magaaho mo e laliaga ke tutala mo lautolu he taha vagahau mo e aga fakamotu. Ka e manatu e matapatu fakaakoaga he Kupu he Atua: “Ko ia kua fakalahi hana saito kua gana, to fakalahi foki hana helehele mai.”—2 Kori. 9:6.
Putoia Ai e Fakapotopotoaga Katoa
15, 16. (a) Ko e ha e gahua taute tutaki ne putoia e fakapotopotoaga? (e) Ko e heigoa e matagahua ne taute e lautolu ne kua momotua?
15 Pete ia, ne nakai falanaki e taute tutaki ke he tau laliaga he taha ne tagata. Ka ko e laliaga he fakapotopotoaga. Ko e ha? Ne pehē a Iesu: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:35) Ti ka ō e tau tagata fakaako Tohi Tapu he tau feleveiaaga, ne fa nava mooli a lautolu ke he takatakaiaga fakaalofa he tau fakalatahaaga ha tautolu. Taha e tagata fakaako Tohi Tapu ne tohi: “Fiafia lahi au ke fina atu ke he tau feleveiaaga. Kua fakafeleveia fakamitaki mai e tau tagata!” Ne pehē a Iesu ko lautolu ne eke mo tau tutaki haana kua liga totoko he tau magafaoa tino ha lautolu. (Totou Mataio 10:35-37.) Pete ia, ne mavehe mai a ia to moua e lautolu i loto he fakapotopotoaga e tokologa he “tau matakainaga, mo e tau mahakitaga, mo e tau matua fifine, mo e tau fanau” fakaagaaga.—Mare. 10:30.
16 Ko e tau matakainaga momotua ha tautolu ne aoga lahi e matagahua he lagomatai e tau tagata fakaako Tohi Tapu ke tupu ki mua. Ke he puhala fe? Pete foki ka nakai maeke e falu ia lautolu ne momotua ke taute e fakaakoaga Tohi Tapu, ko e tau talahauaga atihake ha lautolu he tau feleveiaaga he fakapotopotoaga kua fakamalolō e tua ha lautolu ne fanogonogo ki a lautolu. Ko e fakamauaga ha lautolu he o fano “ke he puhala he tututonu” kua lafi ke he fulufuluola he fakapotopotoaga mo e futiaki e tau tagata loto fakamooli ke he fakatokatokaaga he Atua.—Fakatai 16:31.
Kautū Mai he Tau Matakutaku ha Tautolu
17. Ko e heigoa ka taute e tautolu ke kautū mai he tau logonaaga maimainā?
17 Ka e kua ka taufetului a koe mo e tau logonaaga maimainā? Manatu na lagomatai e Iehova a Mose he foaki e agaaga tapu ki a ia mo e haana hoa, ko e haana taokete ko Arona. (Esoto 4:10-17) Ne mavehe mai a Iesu to lalago he agaaga he Atua e gahua fakamatala. (Gahua 1:8) Lafi ki ai, ne fakafano e Iesu e tau ekegahua ke fakamatala takitokoua. (Luka 10:1) Ko e mena ia, kaeke kua paleko ki a koe ke taute e fakaako Tohi Tapu, liogi ma e agaaga he Atua ke foaki ki a koe e iloilo ti ō mo e hoa fakamatala ka foaki ki a koe e mauokafua mo e lotomatala ka liga lagomatai ki a koe. Kua atihake e tua ke manatu kua fifili e Iehova ke fakaaoga e tau tagata noa—ko e “tau mena lolelole he lalolagi”—ke taute e gahua kehe ue atu nei.—1 Kori. 1:26-29.
18. Maeke fēfē ia tautolu ke kautū mai he matakutaku neke kaumahala?
18 Maeke fēfē ia tautolu ke kautū mai he matakutaku neke kaumahala? Kua mitaki ki a tautolu ke manatu ko e taute tutaki kua nakai tatai mo e tauteute mena kai nukua falanaki katoatoa e kautū po ke kaumahala ke he tagata tokotaha—ko e tagata ne tunu. Ka ko e taute tutaki ne putoia kavi ke he tolu e puhala matutakiaga. Ne aoga lahi e vala ne taute e Iehova, he futiaki e tagata ki a ia. (Ioane 6:44) Ko tautolu mo e falu he fakapotopotoaga kua foaki katoatoa ke fakaaoga e puhala fakaako ke lagomatai e tagata fakaako ke tupu ki mua. (Totou 2 Timoteo 2:15.) Ti kua lata e tagata fakaako ke taute e tau mena ne ako e ia. (Mata. 7:24-27) Ka fakaoti he tagata e fakaako Tohi Tapu haana, kua liga fakaita ki a tautolu. Amanaki a tautolu kua taute he tagata fakaako Tohi Tapu e fifiliaga hako, ka e igatia e tagata mo e “talatala atu hana mahani ke he Atua.”—Roma 14:12.
Ko e Heigoa e Tau Palepale?
19-21. (a) Ko e heigoa e tau aoga ne moua e tautolu he taute e tau fakaako Tohi Tapu? (e) Onoono fēfē a Iehova ki a lautolu oti ne taute e gahua fakamatala?
19 He taute e tau fakaako Tohi Tapu ne fakatumau a tautolu ke hagaaki he tuku fakamua e Kautu. Kua peehi hifo muatua foki e tau kupu mooli he Kupu he Atua ke he tau manamanatuaga mo e tau loto ha tautolu. Ko e ha ne pihia ai? Ne fakamaama he paionia ne higoa ko Barak: “Ko e taute e tau fakaako Tohi Tapu kua omoi a koe ke eke mo tagata fakaako mitaki he Kupu he Atua. Ne mailoga e au kua lata ia au ke mauokafua e fifiliaga fakatagata haaku ato maeke mooli au ke fakaako e taha tagata.”
20 Ka nakai fai fakaako Tohi Tapu a koe, kakano kia e mena ia kua nakai aoga e gahua haau ke he Atua? Nakai pihia! Ne hokulo e loto fakaaue ha Iehova ke he tau laliaga ha tautolu ke fakaheke a ia. Ko e tau tagata oti ne fakalataha ke he gahua fakamatala ko e ‘tau ekegahua he Atua.’ Pete ia, kua tamai he taute e fakaako Tohi Tapu e olioli lafi ki luga he kitia e tautolu e puhala ne fakatupu he Atua e tega ne tō e tautolu. (1 Kori. 3:6, 9) “He kitia e koe e tagata fakaako Tohi Tapu hane holo ki mua,” he talahau he paionia ne higoa ko Amy, “kua pukeina e logonaaga katoa haau he loto fakaaue ki a Iehova ha kua fakaatā a koe ke fakaaoga ke foaki ke he tagata ia e mena fakaalofa homo ue atu—ko e magaaho ke iloa a Iehova mo e moua e moui tukulagi.”
21 He taute e tau mena oti kana ke kamata mo e taute e tau fakaakoaga Tohi Tapu ka lagomatai a tautolu ke hagaaki ke he fekafekau ke he Atua he mogonei mo e ka fakamalolō e amaamanakiaga ha tautolu ke hao atu ke he lalolagi foou. Mo e lalagoaga a Iehova, kua liga lagomatai foki a tautolu ke fakamoui a lautolu ne fanogonogo ki a tautolu. (Totou 1 Timoteo 4:16.) Kua fakatupu mooli he mena ia e olioli!
Manatu Nakai e Koe?
• Ko e heigoa e tau paleko ne liga taofi e falu mai he taute e tau fakaako Tohi Tapu?
• Ko e heigoa ka liga taute e tautolu kaeke ke tokologa he fonua ha tautolu ne tuga e fakateaga?
• Ko e heigoa e tau palepale ne moua e tautolu mai he taute e fakaako Tohi Tapu?
[Tau Fakatino he lau 9]
Fakalaulahi nakai e koe e tau puhala fakamatala haau ke maeke ke moua a lautolu ne loto fakamooli?