Ko Koe Nakai ko e “Fekafekau Pule he Fakaalofa Noa he Atua”?
“Kia fakafeheleaki ke he feofanaki he tau matakainaga; kia takitokotaha mo e mua ke tuku atu e lilifu ke he falu.”—ROMA 12:10.
1. Ko e heigoa e tau fakamafanaaga ne moua e tautolu i loto he Kupu he Atua?
KUA fakamafana tumau he Kupu he Atua a tautolu to lagomatai e Iehova a tautolu he magaaho ka lolelole po ke loto malipilipi a tautolu. Ke tuga anei, kia mailoga e tau kupu mafanatia nei: “Kua toto hake e Iehova a lautolu oti kua veveli; ko ia foki kua fakatu hako a lautolu oti kua fakatolotolo.” “Kua fakamalolo e ia a lautolu ne malipilipi e tau loto; kua pipi e ia ha lautolu a tau motu.” (Sala. 145:14; 147:3) Mua atu, ne talahau mai ni he ha tautolu a Matua he lagi: “Ko au ko Iehova ko e Atua hau, ko ia kua taofi hau a lima matau; ko ia kua pehe atu kia koe, Ua matakutaku a koe ko au ni kua lagomatai kia koe.”—Isaia 41:13.
2. Foaki fēfē e Iehova e lalagoaga ma e tau fekafekau haana?
2 Ka e maeke fēfē ia Iehova, ne ha ha he lagi nakai kitia, ke ‘taofi ha tautolu a lima’? Fēfē e puhala ne ‘fakatu hako e ia a tautolu kua fakatolotolo’ ha ko e loto mamahi? Kua foaki e Iehova ko e Atua e lalago pihia ke he tau puhala kehekehe. Ma e fakatai, ne age e ia ke he tau tagata haana e “lahi ue atu he malolo” puhala he agaaga tapu haana. (2 Kori. 4:7; Ioane 14:16, 17) Kua logona hifo foki he tau fekafekau he Atua e malolō atihake ne peehi mai he fekau i loto he Kupu omoomoi he Atua, ko e Tohi Tapu. (Hepe. 4:12) Kua fai puhala foki nakai ka fakamalolō e Iehova a tautolu? Moua e tautolu e tali i loto he tohi Fakamua a Peteru.
Ko e “Fakaalofa Noa he Atua ne Fakakite ke he Tau Puhala Kehekehe”
3. (a) Ko e heigoa e talahauaga he aposetolo ko Peteru hagaao ke he tau kamatamata? (e) Ko e heigoa ne fakatutala he vala fakahiku he tohi fakamua ha Peteru?
3 He tohi ke he tau tagata talitonu ne fakauku he agaaga, ne tohia he aposetolo ko Peteru kua ha ha ia lautolu e kakano mitaki ke fiafia ha ko e palepale mitaki lahi ne fakatali ki a lautolu. Ti lafi e ia: “Pete ni he fakatutuku a mutolu ke he na aho nai, (kaeke kua lata ai,) ke he tau mena kamatamata kehekehe.” (1 Pete. 1:1-6) Mailoga e kupu “kehekehe.” Ne fakakite to kehekehe e tau kamatamata. Pete ia, ne nakai oti e vagahau ha Peteru he mena ia, he toka e tau matakainaga haana ke fakauaua po ke maeke nakai a lautolu ke fahia ke he tau kamatamata loga pihia. Ka e talahau e Peteru kua maeke he tau Kerisiano ke iloa mooli to lagomatai e Iehova a lautolu ke fahia ke he tau kamatamata takitaha kua fehagai mo lautolu, pete ne tau kamatamata kua feleveia mo lautolu. Ko e fakamafanaaga ia kua foaki mai he vala fakahiku he tohi ha Peteru, ne fakatutala e aposetolo ke he tau mena ne hagaao ke he “fakatulakiaga he tau mena oti.”—1 Pete. 4:7.
4. Ko e ha kua mafanatia ki a tautolu e tau kupu he 1 Peteru 4:10?
4 Ne talahau e Peteru: “He takitokotaha mo e moua e vala he mena fakaalofa, kia fakaaoga ai ke fekafekau ke he taha mo e taha tuga e tau fekafekau pule mitaki he fakaalofa noa he Atua ne fakakite ke he tau puhala kehekehe.” (1 Pete. 4:10, NW) Ne liu a Peteru fakaaoga e kupu “kehekehe.” Ti tuga kua pehē a ia, ‘Ne tutupu e tau kamatamata ke he tau puhala loga, ka kua fakakite e fakaalofa noa he Atua ke he tau puhala kehekehe foki.’ Ko e ha ne mafanatia e talahauaga ia? Liga hagaao ai ke he ha kamatamata ne moua e tautolu, to ha ha ai tumau e fakakiteaga he fakaalofa noa he Atua ka lagomatai a tautolu ke fakauka. Ka e mailoga nakai e koe e talahauaga ha Peteru ke he puhala ne fakakite e fakaalofa noa ha Iehova ki a tautolu? Puhala mai he tau matakainaga Kerisiano.
“Fekafekau ke he Taha mo e Taha”
5. (a) Ko e heigoa kua lata e tau Kerisiano takitaha ke taute? (e) Ko e heigoa e tau hūhū ne lagā mai ai?
5 He vagahau ke he tau tagata oti he fakapotopotoaga Kerisiano, ne pehē a Peteru: “Mua atu he tau mena oti, kia malolō lahi e fakaalofa he taha ke he taha, ha kua ufiufi he fakaalofa e tau agahala loga.” Ne lafi e ia: “He takitokotaha mo e moua e vala he mena fakaalofa, kia fakaaoga ai ke fekafekau ke he taha mo e taha ia.” (1 Pete. 4:8, 10; NW) Igatia a lautolu he fakapotopotoaga mo e fakalataha ke atihake e tau matakainaga Kerisiano. Kua kotofa a tautolu ke leveki e taha mena aoga lahi ha Iehova, ti kua lago ki a tautolu ke folafola ai ke he falu. Ti, ko e heigoa mogoia kua kotofa ki a tautolu? Pehē a Peteru ko e “mena fakaalofa.” Ko e heigoa e mena fakaalofa? Fēfē e puhala ha tautolu ka “fakaaoga ai ke fekafekau ke he taha mo e taha”?
6. Ko e heigoa falu mena fakaalofa kua kotofa ke he tau Kerisiano?
6 Ne talahau he Kupu he Atua: “Ko e tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki, mai luga e tau mena ia.” (Iako. 1:17) Mooli, ko e tau mena fakaalofa oti ne kotofa e Iehova ke he tau tagata haana ko e tau fakakiteaga he fakaalofa noa haana. Taha mena fakaalofa mua ue atu ne foaki e Iehova ki a tautolu ko e agaaga tapu. Ne taute he mena fakaalofa ia a tautolu ke feaki e tau mahani faka-Atua tuga e fakaalofa, mahani mitaki, mo e mahani molu. Kua fakalagalaga he tau mahani pihia a tautolu ke maeke ke fakakite ke he tau matakainaga talitonu e fakaalofa mooli mo e makai ke lalago ki a lautolu. Ko e pulotu mo e iloilo mooli e falu mena fakaalofa mitaki ne moua e tautolu ha ko e lagomatai he agaaga tapu. (1 Kori. 2:10-16; Kala. 5:22, 23) Ko e mooli, ko e tau malolō, tau lotomatala, mo e tau taleni oti ha tautolu kua liga onoono ki ai ko e tau mena fakaalofa ka fakaaoga ke fakaheke mo e fakalilifu ha tautolu a Matua he lagi. Ha ha ia tautolu e matagahua ne tuku mai he Atua ke fakaaoga e tau lotomatala mo e tau mahani ha tautolu nukua puhala mai e tau fakakiteaga he fakaalofa noa he Atua ke he tau matakainaga talitonu ha tautolu.
“Kia Fakaaoga Ai ke Fekafekau”—Puhala Fe?
7. (a) Ko e heigoa ne fakakite he kupu “vala”? (e) Ko e heigoa e tau hūhū kua lata ke hūhū hifo ki a tautolu ni, ti ko e ha?
7 Hagaao ke he tau mena fakaalofa ne moua e tautolu, ne talahau foki e Peteru: “He takitokotaha mo e moua e vala he mena fakaalofa, kia fakaaoga ai.” Ko e kupu kua lata ma e “vala” ne fakakite kua kehekehe e tau mahani mo e tau lotomatala ne liga nakai ni ke he puhala pauaki ka ke he puhala fakalaulahi. Pete he pihia, kua tomatoma ke he tau tagata takitaha ke “fakaaoga ai [kakano, ko e ha mena fakaalofa ne moua e ia] ke fekafekau ke he taha mo e taha.” Mua atu, ko e talahauaga “fakaaoga ai . . . tuga e tau fekafekau pule mitaki” ko e poakiaga. Ti kua lata ke hūhū hifo ki a tautolu ni: ‘Kua fakaaoga moli kia e au e tau mena fakaalofa ne kotofa ki a au ke fakamalolō e tau matakainaga talitonu haaku?’ (Fakatatai 1 Timoteo 5:9, 10.) ‘Po kua fakaaoga e au e tau lotomatala ne moua mai e au ia Iehova ke aoga ni ki a au—liga ke moua aki e tau monuina po ke moua e tuaga?’ (1 Kori. 4:7) Kaeke ke fakaaoga e tautolu e tau mena fakaalofa ha tautolu he “fekafekau ko e taha ke he taha,” to fakafiafia e tautolu a Iehova.—Fakatai 19:17; totou Heperu 13:16.
8, 9. (a) Ko e heigoa falu puhala ne fekafekau e tau Kerisiano he lalolagi katoa ke lata mo e tau matakainaga talitonu? (e) Felagomataiaki fēfē e tau matakainaga he fakapotopotoaga haau?
8 Ne totoku he Kupu he Atua e tau puhala kehekehe ne fekafekau e tau Kerisiano he senetenari fakamua ke he taha ko e taha. (Totou Roma 15:25, 26; 2 Timoteo 1:16-18.) Pihia foki he vahā nei, ko e poakiaga ke fakaaoga e mena fakaalofa he tagata ma e tau matakainaga talitonu kua taute loto katoa he tau Kerisiano mooli. Manamanatu la ke he falu puhala ne kua taute ai e mena nei.
9 Tokologa e tau matakainaga taane ne loga e tulā ne fakaaoga he tau mahina takitaha ke tauteute e tau vala he feleveiaaga. He tau feleveiaaga, ka talahau e lautolu falu vala tala uho fakaagaaga ne moua e lautolu he magaaho ka fakaako ke he Tohi Tapu, ne omoomoi he tau kupu pulotu ha lautolu e fakapotopotoaga katoa ke fakauka. (1 Timo. 5:17) Kua tokologa e matakainaga ne talahaua ai ha ko e ha lautolu a mafanatia mo e fakaalofa hofihofi noa ke he tau matakainaga talitonu. (Roma 12:15) Ne aahi tumau atu e falu ki a lautolu ne fakaagitau mo e liogi mo lautolu. (1 Tesa. 5:14) Ka kua manamanatu e falu he tohi e tau kupu fakamafana ne atihake ke he tau matakainaga Kerisiano hane fehagai mo e kamatamata. Ti ha ha i ai e falu ne lagomatai totonu a lautolu ne fai matulituli e tau tino ke hohoko atu ke he tau feleveiaaga he fakapotopotoaga. Totou afe e Tau Fakamoli ne fakalataha ke he gahua lagomatai, he lalago e tau matakainaga talitonu ke liu tālaga e tau kaina ne malona he tau matematekelea pauaki. Ko e fakaalofa hofihofi mo e lalagoaga fakatino ne foaki he tau matakainaga fakaalofa pihia ko e tau fakakiteaga oti he “fakaalofa noa he Atua ne fakakite ke he tau puhala kehekehe.”—Totou 1 Peteru 4:11.
Ha e Fe e Mena ne Mua Atu e Aoga?
10. (a) Ko e heigoa e tau faahi ua ne manamanatu a Paulo ki ai he fekafekau haana ke he Atua? (e) Fifitaki fēfē e tautolu a Paulo he vahā nei?
10 Kua nakai ni foaki ke he tau fekafekau he Atua e mena fakaalofa ke fakaaoga ke lata mo e tau matakainaga talitonu ka e pihia foki mo e fekau ke tala age ke he tau tagata ha lautolu. Ne mailoga he aposetolo ko Paulo e tau faahi ua nei he fekafekauaga haana ki a Iehova. Ne tohi e ia ke he fakapotopotoaga i Efeso hagaao “ke he tauteaga he fakaalofa noa he Atua” ne foaki ki a ia ke fakaaoga ke lata mo lautolu. (Efeso 3:2) Ka e talahau foki e ia: “Ne lata a mautolu ke he finagalo he Atua ke tuku mai kia mautolu e [tala] mitaki.” (1 Tesa. 2:4) Tuga a Paulo, kua mailoga foki e tautolu kua kotofa ki a tautolu e matagahua ke eke mo tau tagata fakamatala he Kautu he Atua. He fakalataha fakamakutu ke he gahua fakamatala, kua eketaha a tautolu ke muitua e fakafifitakiaga ne fakatoka e Paulo he eke mo tagata fakapuloa tumau he tala mitaki. (Gahua 20:20, 21; 1 Kori. 11:1) Iloa e tautolu ko e fakamatala e fekau he Kautu ka fakahao e tau momoui. Ka e he magaaho taha, lata foki ia tautolu ke fifitaki a Paulo he kumi e tau magaaho ke ‘ta atu taha mena fakaalofa ke lata mo e agaga’ ke he tau matakainaga talitonu.—Totou Roma 1:11, 12; 10:13-15.
11. Kua lata ke onoono fēfē a tautolu ke he tau kotofaaga ha tautolu ke fakamatala mo e ke atihake e tau matakainaga ha tautolu?
11 Ha e fe he tau matagahua Kerisiano ua nei kua mua atu e aoga? He hūhū pihia kua tuga mo e hūhū hagaao ke he manu lele, Ha e fe e tapakau haana ne mua atu e aoga? Maaliali e tali. Kua lata he manu lele ke fakaaoga ua e tau tapakau haana ke maeke ke lele fakamitaki. Pihia foki, kua lata ia tautolu ke fakalataha ke he tau faahi ne ua he fekafekauaga ha tautolu ke he Atua ke katoatoa ai ko e tau Kerisiano. Ti, he nakai manatu ko e tau kotofaaga ha tautolu ke fakamatala e tala mitaki mo e ke atihake e tau matakainaga talitonu ko e tau kotofaaga kehekehe, kua onoono a tautolu ki ai tuga ne taute he tau aposetolo ko Peteru mo Paulo—ko e tau matagahua tatai ua. He puhala fe?
12. Fekafekau fēfē a tautolu ko e tau ekegahua he lima a Iehova?
12 Ha ko e tau tagata fakamatala, ne fakaaoga e tautolu e tau puhala fakaako ne liga ha ha ia tautolu he lali ke hokotia e fekau he Kautu he Atua ke he tau loto he tau tagata ha tautolu. He puhala ia, kua amaamanaki a tautolu ke lagomatai a lautolu ke eke mo tau tutaki he Keriso. Ka e fakaaoga foki e tautolu ha iloilo mo e falu mena fakaalofa ne liga ha ha ia tautolu he lali ke fakamafana e tau loto he tau matakainaga talitonu ha tautolu aki e tau kupu atihake mo e tau gahua lagomatai—ko e tau fakakiteaga he fakaalofa noa he Atua. (Fakatai 3:27; 12:25) Ke he puhala ia, kua amaamanaki a tautolu ke lagomatai a lautolu ke fakatumau ko e tau tutaki he Keriso. Ke he tau matagahua ua ia—ko e fakamatala ke he tau tagata mo e “fekafekau ke he taha mo e taha ”—kua moua e tautolu e lilifu homo ue atu he fekafekau ko e tau ekegahua he lima a Iehova.—Kala. 6:10.
‘Kia Feofanaki ke he Tau Matakainaga’
13. Ko e heigoa ka tupu kaeke ke mataofi a tautolu he “fekafekau ko e taha ke he taha”?
13 Ne tomatoma e Paulo e tau matakainaga talitonu haana: “Kia fakafeheleaki ke he feofanaki he tau matakainaga; kia takitokotaha mo e mua ke tuku atu e lilifu ke he falu.” (Roma 12:10) Mooli, he fakaalofa ke he tau matakainaga ha tautolu ka fakaohooho a tautolu ke gahua loto katoa ko e tau fekafekau he fakaalofa noa he Atua. Ne mailoga e tautolu kaeke ke kautū a Satani he taofi a tautolu mai he “fekafekau ko e taha ke he taha,” to fakalolelole e ia e maopoopo ha tautolu. (Kolo. 3:14) Fakahiku ai, he temotemoai e maopoopo, po ke kaufakalataha to takitaki atu ke he temotemoai e makutu ke he gahua fakamatala. Iloa mitaki e Satani kua lata a ia ke fakapakia e taha he tau tapakau ha tautolu, ke he vagahau fakatai, ke nakai maeke ia tautolu ke lele.
14. Ko hai ka aoga mai he “fekafekau ke he taha mo e taha”? Talahau e fakataiaga.
14 He “fekafekau ke he taha mo e taha” kua nakai ni aoga ma lautolu ne moua e fakaalofa noa he Atua ka e aoga foki ma lautolu ne tala age ai. (Fakatai 11:25) Tuga ma e fakatai, ko Ryan mo Roni, ko e hoa i Illinois, U.S.A. He iloa e laua kua totou teau e tau kaina he tau matakainaga Fakamoli ne malona he Afā ko Katrina, ne fakalagalaga he fakaalofa matakainaga a laua ke fakaoti e tau gahua tupe ha laua, toka e fale ha laua, ti fakatau e tulela kua fitā e fakaaoga, fakafoou ai ti o atu he fenoga ne 1,400 kilomita ki Louisiana. Ne molea e taha e tau he nonofo a laua i ai mo e foaki e magaaho, malolō, mo e tau koloa ha laua ke lagomatai aki e tau matakainaga ha laua. “He fakalataha ke he gahua lagomatai ne kua fakatata lahi atu au ke he Atua,” he talahau e Ryan, ne 29 e tau he moui. “Ne kitia e au e puhala ne leveki e Iehova e tau tagata haana.” Ne lafi e Ryan: “Ne lahi e mena ne ako e au he gahua auloa mo e tau matakainaga motua hagaao ke he puhala ke leveki aki e tau matakainaga. Ako foki e au kua lahi e mena ka taute e mautolu ko e tau fuata he fakatokatokaaga a Iehova.” Ne talahau foki e Roni ne 25 e tau he moui: “Kua loto fakaaue au he maeke ke lagomatai e falu. Ko e logona laia e au e fiafia lahi he moui haaku. Iloa e au, ke he tau tau i mua, to matutaki au ke helehele e tau fua mitaki mai he mena homo ue atu nei ne tupu.”
15. Ko e heigoa e tau kakano mitaki ne ha ha ia tautolu ke fakatumau ke eke mo tau fekafekau he fakaalofa noa he Atua?
15 Mooli, he omaoma ke he tau poakiaga he Atua ke fakamatala e tala mitaki mo e ke atihake e tau matakainaga talitonu ka tamai e tau monuina ki a tautolu oti. Ko lautolu ne lagomatai e tautolu kua malolō fakaagaaga, magaaho taha kua logona e tautolu e olioli lahi mahaki ne tamai ni he foaki atu. (Gahua 20:35) Ko e fakapotopotoaga katoa mogoia kua tupu ai e mafanatia he femataaki e tau tagata takitaha. Lafi ki ai, ko e fakaalofa mo e hofihofi noa ne fefakakiteaki e tautolu kua kitia maaliali ai ko tautolu ko e tau Kerisiano mooli. Ne pehē a Iesu: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:35) Mua ue atu, kua tuku atu e lilifu ke he ha tautolu a Matua fakaalofa, ko Iehova, ha ko e manako haana ke fakamalolō a lautolu ne lata ke lagomatai kua fakaata he tau fekafekau haana he lalolagi. Kua moua mooli mogoia e tautolu e tau kakano mitaki, ke fakaaoga e mena fakaalofa ha tautolu ke “fekafekau ke he taha mo e taha tuga e tau fekafekau pule mitaki he fakaalofa noa he Atua”! To fakatumau nakai a koe ke taute pihia?—Totou Heperu 6:10.
Manatu Nakai e Koe?
• Tau puhala fe ne fakamalolō e Iehova e tau fekafekau haana?
• Ko e heigoa ne kotofa ki a tautolu?
• Ko e heigoa falu puhala ka fekafekau a tautolu ke he tau matakainaga talitonu ha tautolu?
• Ko e heigoa ka fakaohooho a tautolu ke fakatumau ke fakaaoga e mena fakaalofa ha tautolu ke “fekafekau ke he taha mo e taha”?
[Tau Fakatino he lau 13]
Fakaaoga nakai e koe e “mena fakaalofa” haau ke fekafekau ke he falu po ke fakafiafia aki ni a koe?
[Tau Fakatino he lau 15]
Fakamatala e tautolu e tala mitaki ke he falu mo e lalago e tau matakainaga Kerisiano
[Fakatino he lau 16]
Latatonu e tau tagata gahua lagomatai ke nava ma e agaaga foaki noa ha lautolu