Leveki Nakai he Atua Au?

Tau tali fa mahani:

▪ “Kua lilifu lahi e Atua ke tupetupe ke he tau lekua haaku.”

▪ “Nakai amanaki au ke manamanatu mai a ia ki a au.”

Ko e heigoa ne talahau e Iesu?

▪ “Nakai kia fakafua lima e manu ikiiki ke he ua e asari? ka e nakai nimo foki taha a lautolu ki mua he Atua. Ka kua oti kana he totou ha mutolu a tau lauulu. Ko e mena ia ua matakutaku ai a mutolu; kua mua a mutolu ke he tau manu ikiiki loga.” (Luka 12:6, 7) Nakai fakauaua, ne fakaako e Iesu kua leveki he Atua a tautolu.

▪ “Aua neke fakaatukehe a mutolu, mo e pehe age, To kai e tautolu ha ha, po ke inu e tautolu ha ha, po ke tapulu a tautolu ha ha? Ha ko e tau mena oti ia kua kumi he tau motu kehe. Ha ko e mena fioia he Matua ha mutolu ha ha he lagi kua aoga e tau mena oti ia kia mutolu.” (Mataio 6:31, 32) Ne talitonu a Iesu kua iloa he Atua e tau manako ni ha tautolu.

NE TALAHAU fakatonu he Tohi Tapu kua leveki po ke, manatu he Atua a tautolu. (Salamo 55:22; 1 Peteru 5:7) Ane mai taute pihia e ia, ti ko e ha ne lauia lahi a tautolu he matematekelea he vahā nei? Kaeke ko e Atua fakaalofa mo e malolō ue atu, ko e ha ne nakaila taute e ia ha mena ke fakaoti e matematekelea?

Kua putoia ke he tali e mena ne nakai iloa he tokologa—ko Satani ko e Tiapolo e pule he lalolagi kelea nei. He kamatamata a Iesu, ne foaki e Satani ki ai e tau kautu oti he lalolagi, he pehē: “To ta atu oti e au kia koe e pule nai, mo e lilifu ha lautolu; ha kua tuku mai ia kia au, to ta atu foki e au kia ia na loto au ki ai.”—Luka 4:5-7.

Ko hai ne taute a Satani ke pule ke he lalolagi? Magaaho ne omaoma e tau matua fakamua ha tautolu, ko Atamu mo Eva, ki a Satani ti fuluhi kehe a laua he Atua, kakano kua fifili e laua a Satani ke pule ki a laua. Tali mai he totokoaga ia, ne fakauka a Iehova ko e Atua he fakaatā e magaaho ke fakakite e kaumahala ue atu he pule ha Satani. Nakai peehi e Iehova e tau tagata ke fekafekau ki a ia, ka e hafagi e ia e hala ma tautolu ke liliu ki a ia.—Roma 5:10.

Ha kua leveki he Atua a tautolu, ne taute e ia e tau fakatokaaga ma Iesu ke laveaki a tautolu mai he pule a Satani. He vahā tata i mua, ko Iesu ka “fakaoti ai e ia . . . a ia ne toka ai e kautu ke mate ai, ko e [T]iapolo haia.” (Heperu 2:14) He taute pihia, to “moumou e ia e tau gahua he [T]iapolo.”—1 Ioane 3:8.

To liuaki mai e parataiso ke he lalolagi nei. He magaaho ia, “to holoholo kehe he Atua e tau hihina mata oti mai he tau mata [he tau tagata]; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”—Fakakiteaga 21:4, 5.a

[Matahui Tala]

[Blurb he lau 8]

To liuaki mai e parataiso ke he lalolagi nei